الثغره .......وذكريات مجيده

السلام عليكم ورحمه الله وبركاته
اخواتى المدونات اخوانى المدونين
انا كنت ناويه اتكلم معاكم عن معركه السويس المجيده والمقاومه الشعبيه بقياده البطل الشيخ حافظ سلامه وشهداء السويس ومنظمه سيناء العربيه
بس
لكن بعض اصدقائى الاحباب سألونى انا مين ؟ قصدى سالونى بعض الاسئله وطبعا لايليق بى ان اتجاهل اسألتهم وخصوصا اذا كانت عندى اجابتها .. اما لو معنديش الاجابه ..هاقول انى معرفش وده مش عيب ابدا
محمود صاحب مدونه امال والام سألنى ليه السويس سميت بلد الغريب ؟
اخى الكريم الطائر الحزين سألنى هى الثغره مكانش ليها حل فى وقتها ؟
عاشقه الفردوس سألتنى يعنى ايه ثغره الديفراسوار ؟
وعبده الرايق سأل نفس السؤال بتاع محمود
وبطه سألت عن الثغره
الاخ وضاح سألنى كنتى فين قبل العوده الى السويس ؟
افاق الحريه سألنى بما انك عاصرتي هذه المرحلة هل ايمانيات وتدينه الشعب المصري في هذاا الوقت كان افضل من الان؟

دى ورقه الاسئله
اما ورقه الاجابه
اولا
قبل ما نرجع السويس كنا مهجرين فى امبابه محافظه الجيزه يعنى عند الجيزاوى
ثانيا
السويس سميت بلد الغريب لوجود مسجد العارف بالله عبد الله الغريب بها
وهو مسجد كبير جدا ومن معالم السويس
ثالثا
ايمانيات الشعب المصرى فى حرب اكتوبر كانت فى اى مستوى لللايمانيات
يكفى ان سجلات الشرطه لم تسجل فى تلك الفتره اى حوادث سرقه او مشاجرات وخلافه
وده دليل على وقوف الشعب صفا واحدا مع القوات المسلحه والشرطه
وذياده الوازع الدينى وقت الحرب
الثغره
طبعا انا مش محلله حربيه ولا خبيره استراتيجيه
وهيكون كلامى على قدى
وارجوكم محدش يحدف طوب ولا بيض ولا طماطم عليا علشان انا لسه ماسحه المدونه ومروقاها
ثغره الديفرسوار حصلت ازاى ؟
الجيش الاسرائيلى كانت صدمته جامده قوى بالعبور المجيد وماكنش متصور ان ده ممكن يحصل
قعدوا يعيطوا حبتين ويبكوا بدل الدموع دم ويعاتبوا بعض
وبعدين فاكروا يخدوا تارهم من المصريين ازاى
فكروا يعبروا القنال زى ماحنا عبرنا ويستولوا على مدينه السويس والاسماعيليه
قواتنا لكا عبرت القنال يوم 6 اكتوبر
عبرت بشكل مكثف جدا
لدرجه ان بعد الحرب باسبوع كانت معظم قواتنا المسلحه فى شرق القنال وعلى طول الجبهه من السويس فى الجنوب الى بورسعيد فى الشمال
فكان صعب جدا على الشرشوحه اسرائيل انها تعبر القناه الى الغرب
ولكن
ستها اللئيمه وست ابوها امريكا العجوز الشمطاء اشتركت معاها فى الحرب وعملت جسر جوى من امريكا حتى داخل سيناء
المهم
ايه ؟؟؟؟
المخرج بيبص فى ساعته
لا سيبك منه ده باين عليه لاسع
المهم
طياره من طيارات الاستطلاع الامريكيه مسحت المنطقه وعرفت مكان ثغره موجوده فى الديفرسوار
ازاى
الجيش التالت ماسك من اول خليج السويس حتى منطقه البحيرات المره فى الديفرسوار وبعديه الجيش التانى من منطقه الديفرسوار حتى الاسماعيليه
بين الجيشين التالت والتانى كانت منطقه البحيرات المره
وكانت منطقه كبيره نسبيا
اسرائيل خدت المعلومات وهبااااااا
كلفت المقحوم شارون ومعاه اكتر من 300 دبابه ومدرعات واليات ودفاع جوى وووووووووو
بعبور القنال من منطقه الديفرسوار
بدء شارون والاندال اللى بعمل خطه ذكيه
ضربوا اخر نقاط الجيش التالت واول نقاط الجيش التانى بغزاره شديده لعده ساعات
عملوا زى دربكه للجيشين فى المنطقتين دول
وبكده قدروا يصرفوا نظرهم عن عمليه الاقتحام
وفعلا
تقدموا الى مشارف القناه من اتجاه الشرق يريدون العبور الى الغرب
قاده الجيش انتبهوا للموضوع
وبدء الجيش التالت والتانى يقربوا من بعض علشان يسدوا الثغره
لكن قوات العدو كانت كترت جدا فى المنطقه
وبالبلدى كده احتلتها
دارت معارك شديده بين الجانبين لكن تفوق الجانب الاسرائيلى فى الاحتفاظ بموقعه حتى انا طائراتنا وصواريخنا كانت تضرب فى قواتنا
يعنى حصلت هرجله
المهم
احتفظت اسرائيل بموقعها وبدءوا فى العبور الى الغرب بالزوارق المطاطيه والقوارب لتأمين عمل كوبرى زى الكبارى اللى احنا عبرنا عليها
وفعلا نجحوا فى عمل كوبرى
لكم قواتنا استطاعت نسف الكوبرى
ورجعوا تانى عملوه
وعبروا منه الى الغرب
وبدءت قواتهم تزيد فى الغرب
اولا كانوا 7 دبابات
تانى يوم كانو 37 دبابه وفضلوا يزيدوا
واتجهوا شمالا الى الاسماعيليه
لكن كانت قوات الجيش التانى فى المنطقه لهم بالمرصاد
فرجعوا قفاهم يقمر عيش
واتجهوا جنوبا
الى السويس
الغريب فى الموضوع بتاع الثغره
ان قاده الشرشوحه اسرائيل بعد نجاح عمل الثغره
ونجاحهم فى عمل كوبرى والعبور عليه الى الغرب
قاموا باعلان اسماء اتنين محافظين من عندهم للسويس والاسماعيليه
يعنى كانوا مصدقين نفسهم انهم هيستولوا على المدينتين بسهوله
وصدقونى
لو ده حصل
كان مجرى الحرب هيتغير تماما
ونيجى بقى
لبطوله السويس
ايه ده ؟؟؟؟؟؟؟؟؟
المحرج قفل عليا ومشى
هرب زى الحضرى
يامخرج
ياسطى
اروح الحقه والف مليون تحيه
لكل شهداءنا
تحيه لانهم احياء عند ربهم يرزقون

السويس ..بلد الغريب

تحديث
**********
***********
لماذا يا زهره الكاميليا ؟؟؟؟؟؟
احنا بنحبك
والله بنحبك
لماذا ؟؟؟؟
**********
**********
السلام عليكم اخوانى المدونين واخواتى المدونات
ساعات كده ولا مؤاخذه تمسك كتاب وتقراه وتلاقى نفسك سرحت وفكرت فى العشاء او فى الشغل وخلافه
وممكن يكون الكتاب ده بيتكلم عن غزوه او موقعه او حرب حديثه او حتى كتاب سمير وميكى
وساعات بتمسك كتاب ويشدك ولا اجدعها مقطوره وتلاقى نفسك سرحت وطرت مع الكتاب
ولو كانت بقى معركه وشدتك الله الله
تلاقى نفسك ايدك ورجلك منفعلين مع القصه وحاسس انك شايف ابطالها وانك واحد منهم
صحيح كل واحد هيختار البطل اللى على مزاجه
لكن فى الاخر فعلا هيحس قوى بالقصه
ولو كانت معركه قديمه هيسمع صوت الخيل وصليل السيوف
ولو كانت معركه حديثه
مش هتسمع حاجه لكن ممكن تكمل الكتاب تحت السرير علشان الغارات
الاحسن بقى من الرومه دى كلها
شهود العيان ( لا مش العيان المريض . العيان ابن ام عيان )
انا بقى واعوذ بالله من قوله انا
بحب قاعده شهود العيان دول
وبحب اسرسبهم فى الكلام واتمتع بحديثهم المثير اللى اكيد كله حقيقه ( نحسبه كذلك )
بعد مارجعنا السويس وبالتحديد يوم 7 يونيو 1975 وكان يوم سبت
والله انا بكتب من الذاكره ومارجعتش للكتب اوالنتيجه لانى فاكره التاريخ كويس
كان بعد افتتاح القناه بيومين اتنين
اول ما وصلنا السويس كانت خرابه
بجد
كان بين كل بيت وبيت اربع بيوت مضروبين وبيوت كتيره متهدمه
وكانت مهجوره
زى الصحراء الجرداء
كنا بنلاقى الظروف الحيه فى البيوت المهجوره وفتيل القنابل وكنا بنلعب بيهم
عيال بقى مش عارفين حاجه
كنا بنجرى ونطنطط على الدبابات الاسرائيليه المحطمه فى شارع صدقى وفى الهاويس وامام قسم الاربعين وامام مسجد الشيخ سعيد بشارع الجيش وامام سينما مصر وفى السويس
منظر الحرب والموت فى كل مكان
لكن احنا ولا كان هممنا
كيك على العالى وكيك على الواطى واستغمايه
وكانت المجارى فى شوارع السويس بتضرب وتغرق الشوارع
بس مش كتير
ممكن نقول مره واحده فى اليوم بسبع مرات فى الاسبوع ب 365 وربع فى السنه
يعنى العرض مستمر
انا فاكره شوارع لغايه لما كبرت وكانت غرقانه ميه من 75
المهم
قعدت مع الابطال الحقيقيين للمقاومه
ابطال الحصار
ابطال 24 اكتوبر
منهم ابويا الله يرحمه
ومنهم حما اخى الله يرحمه
ومنهم ابو زميلتى برضه الله يرحمه
ومنهم جار لنا فى ايام سكننا فى الاربعين
وجيران فى مسكننا الحالى
قابلت الكثيرون
وكل منهم عليه حكايه كنت بسمعها وانا فاتحه بقى على الاخر
الحصار ده تم بعد ثغره الديفرسوار
وللامانه الحربيه الثغره دى لو تمت كانت هتبقى انتصار لاسرائيل
لان الاستيلاء على السويس كان هيطوق جنودنا فى سيناء
وده مش تطويق كلى لان الاسماعيليه وبورسعيد كانوا غير محاصرين
وكان الاستيلاء على السويس سيقرب الاسرائيليين من القاهره
والله احنا فداكى يا قاهره المعز
والله احنا فداكى يا عاصمه المحروسه
وللامانه الحربيه والتاريخيه برضه
الثغره كانت عمل عسكرى ذكى جدا من الشرشوحه اسرائيل وقادتها
لانهم قاموا بضرب اسفل واعلى الثغره بكثافه شديده
فاضطر الجنود الموجودين فى تلك النقطه الصعود تجاه الاسماعيليه والهبوط تجاه السويس للمشاركه فى الدفاع عن النقطتين المستهدفتين
فكانت الثغره
واستطاع العدو عمل جسر جوى طوال المنطقه متوغلا داخل الضفه الغربيه للقناه مطوقا مدينه السويس
ماذا فعل شعب السويس ؟؟؟؟؟؟
وماذا فعل القائد الباسل الشيخ حافظ سلامه ؟؟؟؟؟؟
وماذا فعل الفدائيون ؟؟؟؟؟؟؟؟
هذا ما سوف نعرفه فى الحلقات القادمه باذن الله من برنامجنا
السويبس بلد الغريب
ايه بقى سر التدوينه دى ؟؟؟؟؟؟؟؟؟؟؟؟؟؟
ابن حجر العسقلانى
ايوه ابن حجر
صبى استراحه الكاشفه
جه زياره للسويس كما قال لى فى تعليقه
وشعرت بحلو كلامه عن السويس
ان احكى لكم
ذكريات غير موجوده فى الكتب
لاناس كانوا فى وسط المعركه
معلشى
شايفه المخرج بيبص فى ساعته
الى لقاء فى حلقات قادمه
والسلام عليكم ورحمه الله وبركاته

فين التتر ؟؟؟

مظاهرات ...حركه جوعى

خلاص الاجازه بح كام يوم وارجع الشغل تانى ( بفكر اخد اجازه لحسن انا تعبت من القعده ) اتبطرت على النعمه اللى كنت عايشه فيها طوال 3 شهور وانا نايمه فى بلاص العسل

النعمه دى ايه ؟؟؟

ابن اختى ميدو ربنا يكرمه كل يوم كان بيجيب لى العيش لغايه عندى ويقولى اتفضلى يا خالتو وانا مره اشكره وعشره اطنشه واصدر له الطرشه واخد منه العيش واركنه من غير ما اكلم الولد

لما قربت انزل الشغل قلت لاختى مفيش لازمه تبعتى عيش تانى انا خلاص بقيت زى الحصانه وهانزل اجيب طلباتى بنفسى . اختى قالتلى هاتى اللى عايزاه بس العيش زحمه قوى ومش هتقدرى ... قلت لها ماحنا واخدين على كده

لبست الملايه اللف قصدى لبست الهدوم واخذت الميداليه اللى فيها ليزر بتاعه ابن اختى وخرجت اجيب عيش وسمك مشوى

اشتريت السمك وتمام التمام ووديته للشوايه ورحت للفرنه وياريتنى مارحت الفرنه

ويلهوى على الفرنه

لقيت بشر كتييييييييييير واقفين على الفرنه .. افتكرتها خناقه او مظاهره

سألت كتكوته شابه حلوه ماشيه فى الشارع قلت لها هما الناس دى كلها ليه ؟؟؟؟؟؟

البنت بصيت لى من اول رجلى لغايه السطوح فوق وقالت لى من تحت ضرسها بيشتروا عيش يامدام اصل دى فرنه يا هانم.......... هانم؟؟؟ هى البت عرفت اسمى منين ...خياااااانه

قلت لها مانا عارفه ان دى فرنه طيب هما سابوا كل الفران وجم هنا ليه ؟

قالت لى كل الفران بالشكل ده هو حضرتك مش من هنا ولا ايه ؟

وراحت مفلسعه على طول بالخطوه المعتاده وكل ما تمشى كام خطوه تبص عليا .... باين كانت فاكرانى مسعوره هعضها ولا ايه ؟

قربت من الحشد الهائل من المواطنين ووقفت جنبهم تلات دقايق بس ومقدرتش اكمل وده طبعا لانى مكسوره فى عامود السرير قصدى فى العامود الفقرى ومينفعشى اقف كتير .. عملت للخلف در وعلى العيش الطباقى معتاده هرش

اول حاجه عملتها لما روحت اتصلت باختى وسألتها عن ميدو ابنها . ولجل الحظ كان موجود قالى ازيك يا خالتو .... قلت له ازيك ياروح خالتك وحشنى موت يا ميدو تعالى بسرعه عايزاك

واول ما دخل عندى رحبت بيه كانه محرر القدس وحضنته وبوسته واصريت يتغدى معايا ... وكل ده علشان المعاناه اللى كان بيعانيها لمده 3 شهور فى الفرنه واشتراكه فى مظاهرات حركه جوعى التى تطالب بالمم اى بالطعام

ايه الحكايه ؟؟؟؟؟؟؟؟؟

ايه اللى حصل ؟؟؟؟؟؟؟؟؟؟؟؟؟؟؟

ليه الزحمه دى على الفران بالطريقه دى بجد زحمه غير عاديه

اثرت الموضوع ده فى الصالون بتاعى مع اصدقائى لقيت ان انا بس وحيده القرن قصدى انا الوحيده اللى مكنتش واخده بالى من النقطه دى

وده طبعا لانى كنت محبوسه احتياطيا على ذمه الاجازه

ايه سبب مظاهرات حركه جوعى

كل واحده من صحباتى قالت حاجه وكله بيفتى

اللى قالت ان المكرونه والرز غلوا فالناس بطلت تجيبهم وغنولهم بودعك اخر وداع وركزوا على العيش

واللى قالت ان العلف غلى فالناس اللى عندهم حيوانات كييفه علف قلبوا على العيش

واللى قالت ان الوزاره قللت حصه الفران للنص يعنى الفرنه اللى كانت بتاخد 30 شوال دقيق بقت بتاخد 15 شوال

وبعدين انا بصراحه مش عارفه اجيبها لميدو ازاى يرجع يجيب لى العيش من الفرنه تانى

انا بفكر اشترى درع وسيف وحربه وحصان واروح اقف فى طابور الفرنه

فرنسا بابا ...والاربعين وزير

السلام عليكم

تحياتى لكل من نور المدونه وشرفنى بالتعليق

واردت ان انوه لكل من قراء التدونتين الماضيتين انه لا علاقه بينى وبين فرنسا الرئيسه الا الاسم

فدعوها تفعل ما تشاء فقد اخذها تيار السلطه

وانشاء الله ما من طير طار وارتفع الا كما طار وقع

وهتقع على جزور رقبتها من غير لا سلم ولا ام دبوه



نكمل المشوار ؟؟؟؟؟؟

فرنسا هانم :- ايه ده يا عبده انتى جايبنا الصحراء وبقالنا ربع ساعه ماشيين كل ده علشان الاجتماع ؟

عبد الجليل :- خلاص يا فندم وصلنا المغاره

فرنسا هانم :- الاجتماع هنا فى المغاره دى ؟

عبد الجليل :- ايوه يا فندم علشان الحيطه اللى عاملها الانسان ليها ودان اما الحيطه بتاعه المغاره طبيعيه ملهاش ودان وبعدين الاجتماع انهارده مسئله حياه او موت ..وتحيا الشفافيه المتحده ... خشى يا فندم برجلك اليمين كل الوزراء والناس بتوعنا المهمين كاجول هنا
فرنسا هانم :- السلام عليكم انتوا متجمعين بربطه المعلم ؟
الوزراء :- وعليكم السلام ياريس منوره المغاره
عبد الجليل :- احنا انهارده اتجمعنا علشان امر فى غايه الخطوره .. احنا عايزين نخرج من عنق الزجاجه وانتوا عارفين الازازه اللى احنا دخلنا فيها فتحتها ضيقه قوى وعايزين زقه حلوه علشان نطلع منها
الموضوع ببساطه ان الدول اللى مسلفانا فلوس عايزه فلوسها والديون بتاعتنا تلتلت وبقت فوق السطوح . وطبعا محدش منا عايز يجرح الوديعه اللى مكمنها فى البنوك اللى بالى وبالكم .. يبقى لازم نلاقى حل ونلم فلوس من الشعب باى طريقه .. كل واحد منكم عنده اقتراح يقوله
فرنسا هانم :- نزود فاتوره الكهرباء
وزير :- بعناها ياريس
فرنسا هانم :- نزود فاتوره الميه
وزير :- بعناها يا ريس
فرنسا هانم :- نزود التليفونات
وزير :- بعناها يا ريس
فرنسا هانم :- نلغى المجانيه بتاعه التعليم
وزير :- لغيناها ياريس
فرنسا هانم :- نبيع كام شركه من شركات الدوله ؟
وزير :- بعناها ياريس
فرنسا هانم :- نبيع كام حتته ارض من اراضى الدوله
وزير :- مفضلشى غير الجبال ياريس
فرنسا هانم :- والشواطىء
وزير :- بعناها بسمكها ياريس
فرنسا هانم :- نزود الضرايب
وزير :- كل شهر بنزودها ياريس لغايه الناس مابقت مش قادره تدفع وبقينا مبنلمش حاجه
فرنسا هانم :- حيرتونى امال هنعمل ايه ؟؟؟؟؟؟
عبد الجليل :- ماهو احنا مجتمعين علشان كده ياريس وجينا هنا فى المغاره علشان الشفافيه
فرنسا هانم :- شفافيه ايه ونيله ايه ؟ وجعتوا دماغى ... شوفولكم حل فى المصيبه دى .. ولا تشوفولكم رئيس غيرى .. انا خلاص طهقت
وزير :- على مهلك ياريس انا عندى فكره ... احنا دلوقتى مفيش عندنا الا الشعب .. نعمل عليه مزاد علنى ونبيعه بالطن
عبد الجليل :- مين هيشترى شعب محدش ناقص بنى ادمين ........مين عنده فكره تانيه ؟
وزير :- البلد بتاعتنا كبيره علينا ياريس واحنا مش عايشين فيها كلها نبيع حته منها ونسدد الديون
عبد الجليل :- بيقولك يا فالح مش ناقص غير الجبال مين هيشترى جبال مفهاش اى معدن
فرنسا هانم :- طيب لو كل واحد مننا سحب ربع فلوسه اللى فى البنوك بتاعه بلاد بره هتعمل حاجه ؟
الوزراء وعبد الجليل :- مناهاللعؤالانائ÷اليهضعباخعباخهتسهلباسحهغشلخسهلاحهسغبلسختا
فرنسا هانم :- ايه يا جماعه مالكم انا كنت بسأل بس
عبد الجليل :- سؤالك هيضيعنا ياريس
فرنسا هانم :- خلاص معلش حقكم عليا انا كنت بهزر
الوزراء وعبد الجليل :- هههههههههههههههههههههه
عبد الجليل :- الظاهر مفيش حل الا الجدوله .... واللى يجى بعدينا ربنا ينفخ فى صورته
فرنسا هانم :- يلا بينا يا عبد الجليل علشان نلحق نروح . لحسن طول ماحنا هنا وانا قلقانه على بكار اصل زعتر رجعله تانى

كلاكيت تانى مره ...فرنسا بتخرف

السلام عليكم
رجعت فرنسا تخرف تانى يارجاله
اللهم انت الشافى المعافى يارب

ندخل فى التخاريف
عبد الجليل :- اهلا وسهلا ياريس نورتى قصر الرئاسه
فرنسا هانم :- اهلا بيك ....مين حضرتك ؟
عبد الجليل :- محسوبك عبد الجليل ياريس ...مستشار حضرتك الخاص ....شعارى يا فندم . مع عبد الجليل مفيش مستحيل
فرنسا هانم :- منور يا استاذ برسيل قصدى عبد الجليل ...الا قولى يا عبد الجليل القصر ده كله بتاعى انا ؟
عبد الجليل :- طول ما حضرتك فى الحكم يا فندم
فرنسا هانم :- بس كده ؟ .. ماشى . قرار جمهورى رقم واحد .... الغاء جميع العملات المعدنيه واستبدالها بالعملات الورقيه وسد جميع الاماكن الضيقه اسفل الكبارى ...... يبقوا يورونى بقى هيختاروا رئيس تانى ازاى وفين
عبد الجليل :- تم التنفيذ ياريس
فرنسا هانم :- عايزين نشتغل بقى يا جلجل فين الاجنده بتاعه الخارجيه ؟
عبد الجليل :- ليس اجنده واحده ولا اتنين بل 15000 اجنده ياريس نعمل ايه علاقات واتفقيات والذى منه
فرنسا هانم :- والاجنده الداخليه ؟؟؟
عبد الجليل :- لا دى معايا فى جيب المحفظه اهه
فرنسا هانم :- ايه دى نوته ؟؟؟؟؟؟؟؟
عبد الجليل :- شعبنا شعب طيب ياريس مش محتاج لا اجندات ولا اتفاقيات خلى الطابق مستور
فرنسا هانم :- شوف يا جلجل انا عايزه اراجع علاقاتنا مع الدول كلها وخصوصا دول الجوار
عبد الجليل :- نراجع يا ريس تحت امرك وادى كل الدول اهه قدام سيادتك
فرنسا هانم :- ايوه الدوله دى غيظانى وفاقعه مراره امى وعايزه اقطع العلاقات معاها خالص
عبد الجليل :- للاسف ياريس مفيش عندنا مقص نقطع بيه العلاقات .. وبعدين من اخر خناقه بينا واحنا قعدنا قعده عرب وحطينا اتفاقيات بينا وبينهم ومستحيل نخالف الاتفاقيه والشرعيه الدوليه
فرنسا هانم :- مستحيل ؟؟؟؟؟؟؟ امال ايه بقى مع عبد الجليل مفيش مستحيل ؟
عبد الجليل :- ياريس بره غير جوه .... جوه النور مولع والاوده محكومه ونقدر نبرطع براحتنا . اما بره الدنيا ضلمه ومينفعشى نبرطع براحتنا ... جوه الشعب بتاعنا وممكن نغنى له شعبى وانا حره فيه . شعبى اغسله واكويه . شعبى اعمله بفتيك . شعبى اتعشى بيه
اما بره مستحيل ..الناس دى معاها نبله ياريس وبيصطادوا عصافير
فرنسا هانم :- لا تقولى شرعيه ولا مكرونه شعريه .. هو فيه حد بيراعى حد
عبد الجليل :- ولا يهمك ياريس سيبك انتى من وجع الدماغ والهوس ده وخلينا فى المهم .. انا حضرت لحضرتك تليفزيون 115 بوصه ومعاه فيديو اخر بهججه وجبت لك كل شرايط السندباد وعلى بابا وياسمينا وعلاء الدين وتوم وجيرى

بعد اسبوع
عبد الجليل :- ايه يا فندم الشياكه والاناقه دى اللهم صلى على النبى يا ارض احرصى ما عليكى
فرنسا هانم :- ارض مين وتحرص مين ؟ . الحارث ربنا .... مين الناس دول كلهم ؟؟؟
عبد الجليل :- الوزراء بتوع حضرتك ياريس . اكيد فاكراهم . بتوع الكوبرى والرفه
فرنسا هانم :- هما بتوع الكوبرى هما هما الوزراء ؟
عبد الجليل :- امال هنجيب من بره يا فندم .... الشعب بتاعنا مشغول ومعندهوش وقت ... واحنا بنختارها مننا فينا
فرنسا هانم :- فين وزير الداخليه وفين وزير الخارجيه ؟
عبد الجليل :- كله برزقه ياريس ... اى وزاره واى حد الناس دول مبيدقوش ياريس .. ادى لاى واحد اى وزاره ولو رجعها بحق .. الناس دى عايزه تسترزق وتربى عيالها وعيال سويسرا .. وهنيه لك يا فاعل الخير
فرنسا هانم :- امال هنختارهم ازاى ؟؟؟؟
عبد الجليل :- سيبى دى عليا انا .... وزراء صفا وزراء انتباه .. وزراء استرح
شايفه حضرتك الاشقرانى ابو عنين معمصه ده ايه رايك نديله وزاره الصحه ؟ يمكن ربنا يكرمه ويتعالج ببلاش
فرنسا هانم :- يلا مش خساره فيه اديهاله غلبان .... هو اسمه ايه ؟
عبد الجليل :- لغايه امبارح كان اسمه فكرى مش عارف غير ولا لاء
فرنسا هانم :- وايه رايك فى الفسفوس ده نديله الخارجيه ؟ ... تعالى يا كتكوت اسمك ايه ؟؟
وزير :- تونى ياريس ..محسوبك تونى كاد عادل
فرنسا هانم :- ايه الفرق بين اليابان واللبان ؟
وزير :- يا فندم دى معروفه طبعا اليابان دوله ... اما اللبان دوله تانيه خالص
فرنسا هانم :- طب ايه معلوماتك عن العولمه ؟
وزير :- اييييييييه دنيا ... فين صاجاتك يا خالتى شخلع ...كانت استاذه فى العولمه
فرنسا هانم :- تسمع عن القانون الدولى ؟
وزير :- انا كان عندى القولون وكان عصبى بس راضيته ودلوقتى عال العال
فرنسا هانم :- طب روح اقف هناك فى الصف ..... ايه ده يا عبد الجليل ؟ .. دول الوزراء بتوعك ؟؟
عبد الجليل : يا فندم ماشيها خلى المركب تمشى .. هو حد بيحاسبنا-؟
فرنسا هانم :- على رأيك كده احسن .. خليهم فى بطن الزير .. بس بقولك ايه اوعى تنسى شرايط بكار. ابو كف رقيق وصغير

واخدنا الكاس

السلام عليكم
من عميق قلبى ومن التاجى والاورطى وبلاد الواق واق
اقول لمصر
مبروووووووووووووووك
كاس افريقيا فى احضانا للمره السادسه وللمره الثانيه على التوالى
( مش على التوازى )
والله دمعت عينى والابطال ساجدون لله شكرا
حسيت كانى عايزه ادخل جوه التليفزيون واجرى واتنطط واتشقلب معاهم
حسيت انى عايزه اشيل علم مصر
الناس زهقت
بجد
الناس محتاجه تفرح
كل حاجه قصادنا لونها مش ابيض
كل طريق قدامنا ابوابه مش مفتوحه
واحد يسألنى
يقولى كابتن فرنسا هانم هو احنا لما اخدنا الكاس حررنا القدس ؟
ولا هزمنا الشرشوحه اسرائيل ؟
ولا طردنا العدو الامريكانى من ارضنا العربيه ؟
اقوله
لا
لا حررنا القدس ولا هزمنا اسرائيل ولا طردنا الامريكان
احنا انتصرنا فى محفل رياضى
بجد الاسئله دى والاستنكارات دى سمعتها من الناس فى الشارع وفى العماره
لكن
احنا محتاجين نفرح
والله محتاجين نفرح
سبونا نضحك من قلبنا سبونا نلتف حوالين فرحه واحده
الله عليكى يامصر
الله عليك يا منتخبنا يا قومى
الله عليك يابوتريكه - يازيدان - يا متعب - يا عمرو زكى - يا معوض - يا حسنى - يا شوقى - يا جمعه - يا حضرى - يا احمد ياحسن -يا فتحى -يا شحاته - يا مذيعه يافرنسيه يام وش حلو
كان نفسى اركب على المحفه زى البنت الصغيره اللى جابت الكاس
واللف الملعب 732 واقول
تحيا مصر تحيا مصر
مبرووووووك ليكم كلكم

تخاريف ......فرنسا هانم

اعذرونى على التدوينه اللى كلها تخاريف فى تخاريف
تانى حاجه انا سمعت ان فى سفنتين جايين من بريطانيا يوم الثلاثاء وكل واحده جايبه كابل نت لعل وعسى
التدوينه دى تعويضا عما سببته لكم فى التدوينه السابقه
ندخل فى التخاريف
المعلم :- ايه ياد الناس اللى بيجروا فى الشارع دول هو فى ايه ؟
الصبى :- مش عارف يا معلم دا حتى القهوه فضيت خالص
المعلم :- طيب اسأل اى بنى ادم ماشى وشوف لنا الحكايه بدال مانت واقف كده زى خبيتها
الصبى - لو سمحت يا سيد .... يا استاذ .... يا مدام .... يا كابتن .... لو سمحت هو فى ايه بتجروا ليه كده ؟
عابر سبيل :- واحده ست مسكت رئاسه الجمهوريه وهتحلف اليمين دلوقتى حالا وتقول خطاب للشعب
المعلم :- ست ؟؟؟؟ ليه هى هوزلت اخره المتامه ست تحكومنا ده لايمكن يحصل ابدا انا لايمكن ست تحكمنى وتمشى كلامها عليا ابدا
الصبى :- احمممممممم
المعلم :- ايه ياد انا قلت ست مجبتش سيره ام العيال متودناش فى ابو نكله لحسن الحيطان ليها ودان ... اجرى انجر افتح المخروب ده نشوف الحكايه ايه
الصبى :- اهو يا معلم انا فتحت التليفزيون والمذيعه بتقدم الرئيسه الجديده ....اهى رايحه للمنصه اهى المذيعه بتقول اسمها فرنسا هانم
المعلم :- دى ست تحكمنا دى يابنى دى شبه الفلاح اللى عنده بلهارسيا ...اتصوا فى نظرهم وجابوها منين دى ؟؟؟؟ ... هى بتعمل ايه ؟؟
الصبى :- دى هتحلف اليمين يا معلم ... هاعليلك الصوت شويه علشان تسمع
فرنسا هانم :- اخواتى واخوانى شعبى الحبيب السلام عليكم
وحياه الاخوه والعيش المدعم والملح اللى هناكله سوا لاخليكم فل الفل وانعنشها معاكم واروقكم ميه ميه واتعهد لكم بالابقاء على قناه سبيستون بتاعه الاطفال وزياده انتاج الفلفل الرومى
وزير :- كح كح كح كح
فرنسا هانم :- مالك يابنى بتكح ليه ؟؟؟؟
وزير :- احنا اتفقنا يا فندم لو حضرتك غلطى اكح .... وحضرتك غلطى لان مش ده القسم بتاع الرئاسه
فرنسا هانم :- انت مين وبشتغل ايه وايه اللى موقفك جنبى ؟؟
وزير :- يا فندم انا وزير الاعلام بتاع جمهوريه سعادتك
فرنسا هانم :- بلغ نفسك خصم اسبوع .... ومكافأه الف جنيه ومتقاطعنيش تانى سيبنى اضرب الخطاب وانزل لحسن العجله لوحدها
شعبى الحبيب
انا جيت احكمكم من غير انتخابات ولا يحزنون ....هى كده جات مع العمى طباش
انتوا عارفين انى من سكان الاقاليم وجيت العاصمه اتروشن شويه واديها فسحه وخدت العجله بتاعتى وهاتك يالف على الكبارى
وانا نازله اتدلع من على كوبرى لقيت عربيات كتير مركونه تحت الكوبرى . مديت راسى واديتها بصه لقيت يجى اربعين بنى ادم فرشين تراب على الارض وبيلعبوا رفه
دخلت بحكم الفضول اشوف ايه الحكايه طلعوا عليا بالقصافات وقالولى سلمى نفسك ... عدو ولا حبيب ؟؟
قلت لهم حبيب ... انا ماليش اعداء
انا فرنسا هانم قالولى فرنسا ؟ انتى بتاعه باريس ومارسيليا
قلت لهم لا والله انا ماليش دعوه بباريس ولا مارسيليا ولا حتى بساركوزى ..ده انا من الشعب
قالوا انتى من الشعب .....قلت ايوه والله من الشعب وانا الشعب
قالوا خلاص طالما انتى الشعب اقعدى معانا وحكمى بينا
قلت على ايه يا باشا
قالوا احنا مش فاضيين لانتخابات ووجع قلب وصرف فلوس على الفاضى احنا قررنا نختار رئيس الجمهوريه بالقرعه ..هنلعب رفه واللى هيكسب هيبقى الرئيس وانتى الحكم
وفضلوا يلعبوا وكان فى واحد نصاب بيقرص على البريزه ويوقفها وعماله يكسب وطلع نص اللى قاعدين ... انا برضه مش سهله كشفته وقلت له بلاش القرص هنعملها رفه على الطاير ... واحد انسحب وطلب منى ادخل مكانه وهتتك بتتك كسبت ووصلت للدور قبل النهائى وبعدين النهائى وهوب كسبت الكل
قالولى انتى الرئيس بتاعنا الجديد .. يلا بقى علشان تحلفى اليمين وتضربيلك خطاب بسرعه
جيت اركب العجله قالولى لا
لازم تركبى العربيه المصفحه
قلت لهم يا خلق الله انا جايه بالعجله ...قام واحد باين عليه كباره ضرب يمين طلاق لانا را
وزير :- كح كح كح كح
فرنسا هانم :- ايه يابنى مالك تانى ؟؟ومين انتى ؟؟؟
وزير :- يافندم انا وزير الاعلام وحضرتك قلتى يمين طلاق وده مرفوض فى الخطابات
فرنسا هانم :- جدع انك نبهتنى مكافأه خمسميت جنيه وخصم شهرين من مرتبك .. واوعى تتدخل تانى بينى وبين شعبى
كنت باقول ايه يا شعبى انا نسيت ؟؟؟
المعلم :-كنتى بتقولى حلف بالطلاق
فرنسا هانم :- شكرا يا معلم الراجل فى اخر الدنيا فى قهوته متابعنا فى التليفزيون . وفاكر وانتوا لا .... نهديك السلام يا معلم
نرجع لكلامنا تانى
الراجل دب طلاق تلاته من مراته كل ما تحل تحرم انى اركب المصفحه ... اخدت العجله معايا وركبت المصفحه وجيت على هنا على طول و هاعملكم خلطه وزاره وقرارت بالهبل وهاخلى حياتكم بمبى وهطالب بزياده اراضى المزروعه كرات وفجل وبقدونس لزوم السلطه .. وان امكن هازود البنجر كمان والى اللقاء فى خطابات اخرى
والسلام عليكم
المعلم :- يانهار ابيض هى طلعت فوق المنصه ووقفت عليها ليه ؟؟؟
الصبى :- مش عارف يا معلم . ده باين عليها لابسه شبشب حمام

الوجه الاخر...لفرنسا هانم

السلام عليكم ورحمه الله وبركاته
طبعا علشان الصقعه والبرد الجامد ده هادخل فى الموضوع عدل
حكيت للعائله الكريمه اللى حصل بالظبط . وبداءوا يشتغلوا زى العسس (العسس معناها الشرطى وسمى بالعسس لانه بيعس جسم الشعب عند دخول القسم حتى يعرف اكتر الاماكن ايلاما علشان الضرب يبقى مفيد )
وجابوا قرار العريس والعائله بتاعته وكان تقديره جيد جدا فى كله
واخوايا الكبير كان يعرفه عن قرب وفرح جدا لان اخلاق العريس ممتازه
جات والدته واتقدمت وطلبنا مهله للتفكير . رغم اننا كنا مفكرين وموافقين لكن العادات بتحكم
المهم حددنا ميعاد لقراءه الفاتحه ودخلت بالعصير وقعدت معاهم شويه صغيرين وقمت
فى الفتره الصغيره عاينت العريس واديته جيد جدا برضه
العريس كان مهندس فى شركه مقاولات قطاع خاص وكان ملتزم وفى حاجات كويسه كتير جدا
حددنا ميعاد الشبكه بعد اربع شهور
وفى خلال المده دى حبيته جدا جدا
وهو حبنى جدا جدا
وكنا بنقعد فى الصالون اياه
فى حضور الاسره ولكن كانوا اوقات بيسبونا لوحدنا فى حضور حرس شرف وكان اخى الاصغر منى
لكن العريس كان ذكى جدا
جاب القرشانه وخلاها تشغل اخى بالكلام علشان يتكلم براحته
وفعلا نجحت القرشانه فى تحويل اهتمام اخى عنا
وفى يوم قبل الخطوبه حصل بينى وبينه سؤ تفاهم وبداء صوتنا يعلا فى الكلام
لقيت القرشانه من نفسها راحت قايله لاخويا فى واحد صاحبك فى العماره رقم كذا شتمنى وقلتله انى عارفاك قالى ميهمنيش منه
اخويا رغم انه اكبر من القرشانه الا انها كلفتته وكروتته وخادته للبلاكونه علشان توريه الولد او عمارته
المهم اخويا اكل الطعم وراح معاها
اول ما افرجت عنه القرشانه كنا متكلمين براحتنا وكل واحد وصل وجهه نظره للتانى واتفقنا على ما كنا نختلف عليه
وتمت الخطوبه
ولبست الدهب ابو 24 جنيه للجرام اللى دلوقتى وصل ميه وحاجه وتلاتين
حددنا ميعاد الفرح بعد سنتين
مرت سنه
وعرفت معنى الحب الحقيقى
الحب الصافى
الحب المحترم
اوض قلبى الاربعه بالصاله بتاعتهم احبته
وهو كذلك
كان يهيم بى حبا

....(ربنا يقوينى على كتابه الباقى )
....( ارجو ان تسامحونى لما سوف اسببه لكم )
....( للعلم والله العظيم ترددت اكتر من مره قبل كتابه باقى الحكايه وتمنيت الا اكملها )
رن جرس التليفون فى يوم حزين واخبرونى ان خطيبى وقع من على شده معدنيه وهو يتابع عمله
جريت على المستشفى انا وكل اهلى
وهالنى ما رأيت
خطيبى
و
حبيبى يتجهز لغرفه العمليات وهو يصرخ من الالم
والدم فى كل موضع من جسمه
كان للاسف الشديد
او لقضاء الله عز وجل
وقع من ارتفاع عالى على مكعبات خرسانيه يسمونها عينات
بعد العميله نصحونا بنقله الى القاهره
ومكث فى القاهره فتره 35 يوم
كنت خلالها مقيمه معه
لا اغادر الى مساء عند اقاربى فى القاهره
واعود فى اليوم التالى صباحا
طوال 35 يوم لم ينظر لى نظره واحده بملء عينه
لم اعرف السبب
ولكن عند عودتنا الى السويس
عرفت
انا كنت اعرف انه اشتباه فى شلل نصفى
ولكن الاطباء اكدوا انه مصاب بشلل نصفى وليس هناك اى امل
اصررت على اكمال مراسم الزواج
وحتى ان تزوجنا فى شقتهم
بدون اى عفش
ولكنه كان يعلم انه لن يستطيع الزواج
صارحته بانى مؤمنه بالله وسابقى معه طوال عمرى
اريد انسانيته
لا اريد رجولته
اريد قلبه
لا اريد جسده
اريد حبيبى
ولكنه بدء يعاملنى معامله جافه
كنت اعلم انه يريدنى ان اكرهه
فاحببته اكثر
لكنه زاد فى سوء معاملته لى
حتى انه بدء يخرج الفاظا لا تستحب
وبعد 5 شهور وانا على يقينى انى لن اتزوج غيره
وساظل معه
سبقنى اليه القدر
توفى

ملحوظه مهمه جدا جدا

لا اريد عزاء

لقد تقبلت الامر منذ حوالى 16 سنه ولا اريد فتحه مره اخرى

من يحبنى لا يعزينى
فهو حى فى نفسى
انه يعيش دوما معى
انا اراه دائما
اضحك معه اجرى معه احلم معه انا حى فى حياتى
وعلى عطر ذكراه اعيش

فرنسا والحب

السلام عليكم
اخواتى المدونات اخوانى المدونين
وصلتنى رساله عبر بريدى الالكترونى من صديقه عزيزه طلبت منى عدم ذكر اسمها
تقول الرساله
خالتى العزيزه فرنسا
انا وكتير من المدونين عايزين نتعرف عليكى اكتر واكتر
لو تقدرى تبعتيلى صورتك ابقى متشكره
ولو مش تقدرى
عايزه منك توصيفى لى شكلك
وعندى سؤال تانى
لو مفيش عندك مانع يعنى
انتى حبيتى ؟
قصدى قابلتى الشخص الذى حسيتى فيه بالحب والاعجاب
وسلامى
اختك الصغيره
..............

اول الرساله دى ما جت على الكمبيوتر بتاعى
الجهاز اترعش وسخن وخاف منى لااضربه واطين عيشته
لكن
انا خدت الرساله بصدر رحب (حلوه صدر رحب دى )
وقررت انى ارد فى تدوينه او اكتر على حسب العجله ما هتقدر تمشى بيا

اولا
وصف نفسى ده حاجه انا مش هاقدر اعملها
لانها تخالف الدين والتقاليد والاعراف
وبعدين انا مش علشان متجوزتش ابقى وحشه
لا
ده نصيب
وانا راضيه بيه
وبحب اقولها كمان
لو وصفت نفسى ممكن اطلع نفسى زبيده ثروت
او
ام الخلول

اما السؤال التانى
جلى عالم بالاشواج الحب حلو ولا حراج ؟؟؟؟؟؟؟
فعلا
انا مريت بتجربه حب
زمان قوى
لا مش زمان قوى قوى ايام عصر بناه الاهرام
انا مش كبيره للدرجه دى
وانا فى الثانوى العام
كنت بهتم قوى بالدراسه وقراءه الكتب وكان عندى شنطه خشب كبيره كنت حاطه فيها كتب من جميع الاصناف وكان وقت فراغى كله اطلاع ومذاكره
وايام الكليه وماكنتش فى السويس كنت برجع محمله بالكتب من سور الازبكيه وبرضه ماكنشى عندى وقت للحب
فى اخر سنه فى الكليه كنت بلاحظ ان فى شاب ساكن فى العماره اللى قصادنا فى السويس كان بيحاول يلفت نظرى باى شكل ولون لدرجه انه كان بيعمل زى بتوع تجاره المخدرات يولع النور ويطفيه اكتر من مره اول ما اطلع على البلاكونه وده فعلا جذب انتباهى ليه وبقيت احس بوجوده
وعلشان اكون صريحه كنت باخرج للبلاكونه واول حاجه بدون ارادتى ابص على بلاكونته
بعد التخرج
بقيت فى السويس على طول
وذادت فتره تواجدى فى البلاكونه
وذادت فتره تواجده وتوليع النور وقفله
فى يوم
بعد ما وقف فى البلاكونه فتره طويله لقيت الباب بيخبط فتحت اختى الباب ووجدت عيله صغيره بتسألها عنى
نادتنى اختى ووقفت جانبى على الباب
الا والاقى البنوته الصغيره بتقولى انا عايزاكى يا ابله فى كلمه
استغربت واخدتها للداخل وقعدت جانبها
البنت كانت فى تالته ابتدائى
لكن
كانت قرشانه وكانت اكبر من عمرها بمراحل وكان كلامها كلام عواجيز
قالتلى بصى يا ابله من الاخر كده ومن غير لف ودوران اخويا معجب بيكى وعايز يتعرف عليكى
البنت قالتهالى كده خبط لزق من غير احم ولا دستور
تصدقوا انا اتكسفت من البنت
واتلجلجت فى الكلام وسألتها اخوكى مين ؟؟؟
قالتلى مانخلينا صرحا يا ابله مع بعض علشان الامور تمشى
يانهار ابيض بنت صغيره دى ولا ست قزمه سالتها انتى فى سنه كام ؟؟؟؟
قالتلى فى تالته ابتدائى وسنى مش هيفرق معاكى يا ابله ماهو مش انا اللى معجبه بيكى ده هو
قلت فى نفسى حد يخبينى يا عالم من القرشانه دى البنت دى قادره وانا مش قدها
لملمت اعصابى وشحنت البطاريه بتاعه الشجاعه بتاعتى وسألتها اخوكى مين كده الكلام معاكى مش جايب تمنه كلمينى على طول احسن
بصت لى بصه
طول عمرى ما هنساها
وقالتلى اخويا اللى ساكن فى العماره اللى قدامكوا وانا عارفاكى ازاى انتى متعرفنيش ؟؟؟
قلت لها معلشى مش واخده بالى
قالت اخويا اللى بيولع النور بتاع البلاكونه ويطفيه ومن الاخر كده هو بعت لك معايا جواب وغرضه شريف بس عايز يتعرف عليكى الاول وتتعرفى عليه وادى الجواب اهه وعلشان خاطرى خديه
مسكت الجواب منها ومن غير ما افتحه سالتها فيه ايه الجواب ده ؟؟
قالتلى عيب طبعا يا ابله هو انا برضه وش كده اقراء حاجه غيرى . الجواب مكتوب فيه انا معجب جدا بيكى وعايز اتقدم لخطبتكى وعايز اعرف رأيك وياريت نتعرف على بعض اكتر
ضحكت وفتحت الجواب لقيت الكلام اللى قالته مكتوب بالحرف الواحد
سألتها امال ازاى عيب كده وانا اقراء مش عارفه ايه ؟؟
قالت لى انا بوسطاجيه اه لكن حد يدينى حاجه اوصلها من غير ما اعرف اللى فيها لا
انا استأذنت اخويا قبل ما اقرأه وقلت له لا يمكن اوصل حاجه انا مش عارفه ايه اللى فيها
بصيت للقرشانه الجدعه دى ومتكلمتش
نطقت هيا وقالت يلا يا ابله اكتبى لى الرد علشان امشى
قلت لها قوليله يدخل البيت من بابه انا مش بتاعه جوابات يتفضل يجى هنا ونتعرف على بعض فى النور
البنت بصت لللمبه اللى فى الاوده وقالت لى عندك حق يا ابله حتى اللمبه بتاعتكوا نايلون
وقامت وقالت استاذن انا بقى يا ابله
قلت لها لا لازم تشربى حاجه
قالت لى يااااااه انتى لسه فاكره ...... متزعليش انا بهزر ....نخليها شربات احسن لما نيجى عندكم
وعلشان الحكايه كبيره والقرشانه الجدعه ليها مواقف جامده
هاكمل بعدين
للحديث بقيه

مفيد فوزى ...ووزير الداخليه

قلبت زرار التليفزيون امبارح الجمعه وانا بدور على الماتش بتاع الدوره الافريقيه بتاع نيجيريا


ومن غير احم ولا دستور ولاحتى عواف


لقيت عمنا مفيد فوزى مستضيف عمنا حبيب العدلى وعمالين يدردشوا فى برنامج حديث المدينه


قلت يابنت يافرنسا اسمعى وشوفى الدنيا فيها ايه ماهو برضه الناس الكباره دول ليهم ودان غير ودانا وليهم عنين غير عينينا ومناخير غير مناخيرنا يبقى مفيش مينى مانع انى اتفرج واتعلم


بصراحه عمنا حبيب العادلى كان بيضحك على طول ومبتسم من الابتسامه الطباقى ام نص جنيه مش ابتسامه من المدعمه ام شلن


وقال قوااااااااااله اخترت منها حاجه ببلاش كده


عمنا العادلى زعلان من appy ومن بطوطها هو مقالشى ابى بالتحديد لكن قال ان اصحاب العربيات بيعتدوا على رجل المرور الغلبان بالسب والضرب وان المسكين عمنا العسكرى مظلوم وان فى المانيا القانون صارم عن هنا والعسكرى بتاع المرور بيرعب الناس باشاره من ايده من غير ما ينزل من عربيته


ونسى سيادته ان العسكرى الغلبان مكسور الجناح يتيم الخاله والعمه . ناهب السواقين فى الرايحه والجايه وخير مثال على كده عسكرى ظريف لطيف بيقف فى دوران السلام التوفيقيه عندنا فى السويس بيقسم مع سواقين النص نقل فى البنديره ومفيش نملايه تعدى الا لما يقلبها


وقال كمان


ان الناس اللى بيسافروا ويغرقوا امام السواحل الاوربيه مجرمين لانهم يقومون بعمل اجرامى بالاشتراك مع مافيا متخصصه فى السبوبه دى وان الهجره غير الشرعيه دى بتسبب لهم حرج امام دول اوروبا وان المجرم ده قدر يدفع 60 الف جنيه كانت كفيله بعمل مشروع يعيش منه


وطبعا عمنا مفيد بتاع حبشتاكانات وشويه الفطه يقوله ايوه مع حضرتك الناس دول عملوا عمل اجرامى


عمل اجرامى اكيد يقصدوا الواد اجرامى بتاع الاهلى كان حارس مرمى زى الدبور


وقال كمان


ربما تحدث تجاوزات فى قسم الشرطه ضد المواطن ولكن فى الغالب سببها المواطن الوجيه


والمواطن الوجيه بيجى مش عايز يستنى دوره وعايز ياخد دور غيره وممكن ينرفز الضابط او الامين وهنا تحدث بعض التجاوزات نتيجه ان الضابط او الامين بشر والراجل نرفزهم


ايه يعنى كلامك دلعنى بجد دلعنى ....فرشه كده وفرشه كده


المواطن يا جدعان اللى بيمشى على بعد 100 متر من القسم ورجليه تخبط فى بعض ويجرى على الحمام عدل ولو دخل القسم يتكلم بالعافيه والكلام يخرجوه من زوره بالمغرفه ويتلجلج ويتعلثم


ال ايه بيستفز الظابط


ونسى سيادته جميع انواع التعذيب فى الاقسام واللى وصلت لمرحله قله الادب وقله الضمير


لا وقال ايه كمان


ان المخدرات جريمه مواطن والسرقه جريمه مواطن وتوظيف الاموال جريمه مواطن والكثافه السكانيه جريمه مواطن


اقفش


امسك


حلق حوش


قرب ياجدعان كله يقرب اللى مايشترى يتفرج قرب


الكثافه السكانيه جريمه مواطن


ازاى الكثافه السكانيه جريمه


يعنى لو فى عماره عدد سكانها زاد عن خمسين يلفوهم بملايه ويعملولهم قضيه ؟


ولا لو واحد اتلطش فى نافوخ امه وراح سكن فى شارع كبير وفيه كثافه سكانيه يتخبط له 15 سنه اشغال شاقه مؤبده





اما بقى عمنا مفيد فوزى


كان مفيد جدا فى الحلقه دى


مفيد للوزير بالطبع


وراح عمل مقابلات مع المسجونين


وقالوله احنا مبسوطين ومرتاحين وعندنا مراتب وبطاطين والحاله ميه ميه
والاشيه معدن وكان ناقص كمان يقولوا احنا مش عايزين نطلع من الجنه دى
وانا بهمس فى ودن مفيد باشا فوزى والسيد حبيب العادلى واقولهم
الناس خلاص الغلاء بتاع الاسعار خلاهم يسرقوا بعض وعلى عينك يا تاجر
وصلت الحاله لسرقه غطاء البلاعات فى الشوارع علشان يبيعوها لان الحديد ولع ولعلع فى العلالى ومش مهم عيل ولا عربيه ولاحتى ابو قردان يقع فى البلاعه
الناس دلوقتى بيسرقوا المواعين من بعض
الحلل والطشوت والشبابيك والهدوم المنشوره على الحبال كله بيضيع وبيتلهف
احنا خايفين من عوده السرقه بالاكراه على نطاق واسع
خايفين الناس تاكل بعض
والمسئوليه مش على السيد حبيب العادلى وحده
لا
المشكله على حبيبتنا وعمتنا الحكومه
الغلاء هيولع الدنيا
الحقونا قبل ما نضيع
الحقونا
الحقونا
الحقونا
الشعب بيغرق يابشر

تاج من فرنسا لفرنسا ....مجلس الشعب

اولا
خبر وصول شاحنه محمله بالوقود الى قطاع غزه وبدء تشغيل محطه الكهرباء هو بدايه لفك الحصار عن غزه
ندعو الله ان ينصريحفظ غزه

ثانيا
انا مقموصه وزعلانه من المدونين اللى ساكنين فى القاهره
انا بقالى 3 ايام فى القاهره ومحدش سئل فيا ولا حد عزمنى حتى على شفطه ميه
ليه البخل ده
وانا اللى نازله ومنفوخه وعامله نفسى ياما هنا ياما هناك وفاكره الاخوه هيقابلونى بالورد والفل والياسمين
انزل رمسيس الاقى الزحمه افتكر الناس دى كلها المدونين اصدقائى استنى حد يمد ايده ويسلم عليا محدش معبرنى
ولا حتى يافطه مكتوب عليها مرحبا فرنسا هانم
ابتسمى فرنسا هانم انتى فى بلد المعز لدين الله الفاطمى
المهم
انا رجعت السويس دلوقتى حالا وهاحكى لكم عن زيارتى للقاهره رغم كيد الاطباء
اما الان مع فاصل اعلانى
عدنا من جديد

اخوانى الان مع التاج ....مجلس الشعب

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟

المركب

كنت تفضل الدخول مستقل او تتبع حزب معين ؟؟؟؟

مستقله


اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟

النقطه دى بالذات انا قرفانه منها وعايزه اصرخ منها
العضو اللى ينجح مستقل ويمضى للحزب الوطنى فى نصاص الليالى زى الحراميه لايستحق دخول المجلس من اصله
لانه ضحك على الناخبين
الناس انخبته علشان هو مستقل
وبقى ناجح بحكم الناس
مش من حقه انه يضرب بالناس دول عرض الحائط ويمضى للحزب الوطنى او حتى حزب ام حنفى


ايه اول حاجه هتعملها لنفسك ولاسرتك ؟؟؟؟؟

الانتقام من ام دبوه

ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت

خط ميه حلوه بنت ناس تتشرب للسويس
خط ميه حلوه ياخلق
خط ميه حلوه ياهووووو


قعدت فى المجلس جنب نائب مميز . من هو النائب ؟؟؟

كنت اتمنى اقعد جنب النائب المميز ممتاز نصار عليه رحمه الله
اما الان فاجلس بجوار النائب سعد خليفه


قدمت سؤال للحكومه ايه هو السؤال ؟؟؟؟؟

فين فلوسنا ياعسل؟
فين المنى يا اموره ؟
بعتى الدوله ياكتكوته .....وديتى القرش فين ؟؟


طلب احاطه موضوعه ايه ؟؟؟ وبتقدمه لمين ؟؟؟؟

اولا تعريف طلب الاحاطه هو طلب يتقدم به أعضاء البرلمان لنظر قضية ما على نحو عاجل. ويجري قيام بقية النواب بالتوقيع عليه خلال انعقاد الجلسة.
علشان كده الطلب حول منع مصر دخول المساعدات الى قطاع غزه بناء على توجيهات الست اسرائيل باشا كعب الغزال

استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟

الست اللى كتبت التاج ده غلطانه فى السؤال
كانت مفروض تكتب استجوابين لاتنين من الوزراء
مش استجواب
هى بتهزر ولا ايه ؟؟؟؟؟
عموما
الاستجواب الاول
لوزير التربيه والتعليم
حول تطوير التعليم وعدم تناسبه مع عقول اطفال الابتدائى
وخاصه الصف الثالث الابتدائى
كان فى تانيه قديم
ودوه فى ثوانى على تالته حديث من غير لا احم ولا دستور
العيال مخها ضرب
مش فاهمه حاجه
واسألوا
الاستجواب الثانى
لوزيره القوى العامله حول استحداث شركات القطاع الخاص لموضه جديده
هى طلب الشركه من الراغب فى العمل امضاء جواب الاستقاله قبل الامضاء على العقد
بمعنى ان اللى عايز يشتغل يمضى على جواب استقاله مع العقد ويفضل جواب الاستقاله مع الدوسيه بدون تاريخ لو العامل همس همسه واحده بدون امر المشرف او المهندس يطلع جواب الاستقاله
مش دى اسمه العمل بالسخره برضه ولا ايه ؟؟

هل انت مع الخصخصه ؟؟؟؟؟؟

خصخصه
مش سرقصه


هل انت مع قطع العلاقه مع اسرائيل ؟؟؟؟؟

نعم وبشكل نهائى


هل تؤيد الحرب الحرب على العراق ؟؟؟؟؟؟؟؟

بالطبع لا


هل تؤيد مرور الامريكان فى القناه ؟؟؟؟؟؟

بتحسر وانا على شط القنال والاقيهم متنيلين على عين ابوهم وماشيين فى القنال



هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟

مين فرنسا هانم ومين ام دبوه ؟
انا معرفشى الاشكال دى
بلدى قوى


بتمرر التاج ده لمين ؟؟؟؟؟؟؟؟

مررته وخلاص

شكر خاص للاستاذ وطنى على استجابته الفوريه للتاج

صالون فرنسا هانم....والقوميه العربيه

السلام عليكم ورحمه الله وبركاته


اخواتى اخوتى


اسمحوا لى ان اكتب تلك التدوينه بالغه العربيه الفصحى لانها تتعلق بالقوميه العربيه


فى صالون فرنسا هانم تدور مناقشات عده عن مختلف الامور وتخرج من تحت عباءه المناقشات اتجاهات عده


وبعض تلك المناقشات تتخذ طابعا حارا للحوار وربما تتطور الى صراعات . الا انها فى كل الاحوال لا تصل الى مرحله شد الشعر او الخربشه او القرص او العض


ومن الحوارات التى دارت بيننا وكان لها باع طويلا معنا





القوميه العربيه





كان حوارا بسيطا بداء مثله مثل اى حوار بين الاصدقاء ثم اشتعل الموقف وتحول الى حوارا مدويا اهتزت له ارجاء الصالون


انا ساوجز لحضراتكم ما دار فى هذه الحوارات


لضعف الذاكره او لعدم وجود مضبطه او للاختصار





تحدثت طبيبه اسنان قائله





القوميه العربيه ماتت اكلانيكيا ولا امل فى شفائها


صحيح ان الله قادر على كل شىء وانه سبحانه اذا قال لشىء كن فيكون


وهو وحده القادر على اعاده الحياه الى الميت اكلانيكيا


والقوميه العربيه وصلت الى تلك الحاله وانا لا ارى لها عوده مره اخرى





تحدثت زميله (محاسبه ) قائله





القوميه العربيه لم تمت انها باقيه وستظل باقيه انها ماتزال تجرى مجرى الدم فى عروقنا اننا عرب ونفتخر بعروبتنا وما ضحى من اجله ابائنا واجدادا لاحرى لنا ان نحافظ عليه ونجاهد فى سبيل تحقيقه وانى ارى وحدتنا العربيه قريبه جدا جدا . ان اليهود تجمعوا من اشتات الارض افرادا وجماعات ليكونوا دوله


فهل يصعب علينا تجمعنا ونحن دولا حره


اننى لا اوافق على هذا الكلام وان قوميتنا باقيه باقيه باقيه





تحدثت زميله اخرى قائله





لقد تجمع اليهود بدافع دينى وهو ما قد تجمعنا عليه ايام الخلافه الاسلاميه فقد كنا دوله كبرى واستطعنا تكوين دوله خلافه عظمى امتدت حتى اوروبا


اما الان فحتى الوازع الدينى اختلف


لقد تفتتنا دينيا


لا تؤاخذونى على تلك الكلمه ولكننا بالفعل متفتتون دينيا


فقد تحولنا الى ديانات داخل ديانه واحده


وذلك لان منا من يكفر الاخر


وهو يعلم انه مسلم مثله تماما الا انه يكفره لاختلافهم فى امور غير توحيديه


فهم جميعا مؤمنون بالله ورسوله


الا انهم مختلفون فيما بينهم من امور دينيه . كلا منهم متمسك بما يراه

وقالت اخرى وهى مدرسه

ان الوحش المسمى بالقوميه العربيه هو سبب ما نقاسيه فى تلك الايام

لقد قدمنا الكثير من المال والرجال فى سبيل القوميه العربيه وكنا من اكثر الشعوب تضررا من تلك القوميه اتذكرون اليمن وما حدث لنا فيها اتذكرون حروبنا مع العدو الاسرائيلى ومع تجرعنا فيه من ويلات وويلات يشيب لها الوليد

لا تعتقدوا انى لا اوؤمن بالقوميه العربيه بالعكس انا ابكى عليها بدلا من الدموع دما

ولكن لا اريد ان نكون نحن دائما كبش الفداء

وان نكون دائما فى اول الصفوف

اننى احبذ قوميه عربيه كامله متكامله يتساوى فيها الجميع من خلال مساوئها قبل حساناتها

وقالت اخرى وهى زميله ايضا

اننا نفتقر الى التحضر

نعم نفتقر الى التحضر

اننا شعب عربى واحدا لغتنا واحده وديننا واحد وعاداتنا وتقاليدنا تقريبا واحده ورغم ذلك لم نتوحد فى قالب واحد

انى ارى شعوبا قد توحدت رغم اختلاف اعراقهم وثقفاتهم

وما كون الاتحاد الاوربى ببعيدا عنا وغيره من القوميات التى نفتقر اليها

الاتحاد السوفيتى كان كيانا واحد قويا رغم اختلاف دوله

الولايات المتحده الامريكيه ايضا مختلفه الولايات والقوانين والعادات الا انها اقوى دوله فى العالم

اننا ككيان عربى نفتقر الى التحضر

وانا فرنسا هانم قلت

اننا لم نموت ولكننا مرضى

نعم القوميه العربيه مريضه الا انها تقوى وتصبح ماردا داخل الشعوب العربيه اذا مر احدنا بمأزق

اننا تكاتفنا اثناء حرب اكتوبر حين منع العرب البترول عن العالم الخارجى وكا ن سلاح فتاك فى حربنا المجيده

ولا ننسى موقف الشعوب العربيه حين اجتاح العدو الصهيونى لبنان عام 82 وحين قامت امريكا بحربها القذره على العراق

صدقونى والله لقد دمعت عينى اثناء الحرب على العراق وكنت كمن فقد عزيزا عليه

فقد تابعت برنامج تليفزيونى بعد الغزو بايام وكان برنامج عادى وثائقى يتحدث عن الحضارات وجاء اسم العراق بمثابه قنبله مدويه انفجرت بداخلى فأجهشت فى البكاء

ولا ننسى ايضا موقف الشعوب العربيه اثناء الحرب الاخيره على لبنان والتفاف الجميع حول حزب الله وتناسى الجميع من شيعى ومن سنى ومن كردى ومن ومن

وقف الجميع خلف حزب الله وتمنوا عدم هزيمته من الاسرائيليين

ان القوميه باقيه

ولكنها مريضه

وفى اشد حالات مرضها

اخوتى واخواتى

ماذا تعتقدون وما هى ارائكم تجاه القوميه العربيه ؟؟؟؟؟