الأحد، سبتمبر 28، 2008

عن الحرايق ........سألونى


اخواتى المدونات واخوانى المدونين

100 مساء على احلى عيون كويسه

اول كلامى

كل سنه وانتم جميعا بخير
واشكر بشده كل من سأل عنى فى فتره بياتى الرمضانى

تانى كلامى

بمناسبه دخول مصر الحزام الحرايقى بدلا من حزام الزلازل البراكين والعياذ بالله
اود ان اتوجه الى الاخوه المواطنين بضروره شراء مسدس ميه
ايوه مسدس ميه
مفروض كل مواطن ومواطنه يكون معاه مسدس ميه لان تراثنا فى الباى باى.... كله عليه عين الكهرباء
واخوانا بتوع المطافى غلابه ومساكين مش بيعرفوا يطفوا الحرايق ...يبقى مفيش الا اننا نطفى الحريق بانفسنا
انا من بكره هاشترى مسدس ميه ..ولا ادور على مسدس ميدو ابن اختى واشيله معايا وده كله فى حب مصر
ولا ندور على القربه بتاعه السقا بتاع زمان وكل مواطن يشيل قربه مليانه ميه
واوعوا حد يشيل قربه مخرومه
انا يا اخوانى مش عارفه ايه حكايه الحرايق دى وسمعت كلام كتير عن ماس كهربى وانفجار لوحه كهرباء وغيره وغيره
وكمان ناس بتقول الحرايق ده عامدا متعمدا فى العمدان
انا بقى بقول لا
احنا مش بنفكر بعقلانيه .... الاكل المسرطن بوظ صواميل نفافيخ نافوخنا ( من فعل نفيخه )
منك لله يا والى جزيره اليوسفى سرطنتنا وسرطنت نافوخ انفوخنا
عارفين مين السبب
اقولكم
يقال والعهده على الراوى
ان ولد واخته فى احدى محافظات المحروسه ...كانوا بيتفرجوا على كرتون الاطفال ...وكانوا بيشربوا شاى بلبن ... الولد والبنت اتخانقوا على الكوبايه الكبيره
كلمه منه ...كلمه منها ...شخطه منه ...رفصه منها ....هوووووووووووووب
خبطوا التليفزيون بالكرسى ...كسروا الشاشه
وكانت اللقطه على التنين وهو بينفخ نار
طبعا صاحبنا التنين ماصدق الشاشه اتكسرت وبلغ فرار
هرب التنين من التليفزيون
وداير دلوقتى على حل شعره ينفخ النار فى المبانى الحكوميه
الظاهر كده ان التنين ..مش بيحب الحكومه الرشيده ام رشيد
بس
هى دى مصر يا عبله
وهى دى الحكايه
التنين ده يا اخوانى داير على حل شعرياته
ومحدش هيقدر يلمه
هنطلع نحاربه بالشتيمه مش هنعرف ولا هنقدر
هنطلع نحاربه بالطوب مش هنعرف ولا هنقدر
هنطلع نحاربه بالمطاوى مش هنعرف ولا هنقدر
عارفين ازاى نحارب التنين
بدماغنا
لازم نفكر نوقف التنين ده ازاى
مصر كلها هتولع
احنا دخلنا فى حزام الحرايق يا بشر
وربنا يستر

ملحوظه
********
وحشتونى جدا جدا
وارجوكم الحاضر يبلغ الغايب سلامى وتهنئتى بعيد الفطر
وكل عام وانتم جميعا بخير