الأحد، ديسمبر 30، 2007

السويس مدينه فاشله .........كلويا

اخواتى واخوانى المدونات والمدونين
السلام عليكم
النهارده هفتح معاكم ملف محزن من ملفات السويس الباسله
ومن غير فتاحه ولا مفتاح كله على عينك يا تاجر
من فتره رن تليفونى المحمول وانا من الناس اللى خدوا على قفاهم فى موضوع التليفونات المحموله
اشتريت خط من عمنا كليك الله يرحمه اللى اسمه دلوقتى فودافون ب 1200 جنيه جنيه ينطح جنيه
علشان كده اول ما يرن اجرى عليه بسرعه علشان ميزعلش
المتحدثه : سلام عليكم
انا : وعليكم السلام
المتحدثه : احنا شركه كذا كذا حضرتك مدام فلانه؟
انا : انسه فلانه
المتحدثه : احنا عندنا عروض لفلتر علشان الميه ممكن حضرتك تاخدى فكره عنه
انا : اتفضلى
المتحدثه : حضرتك لازم يجى المهندس عندك يورى لحضرتك تجربه عمليه على كوبايه ميه من الحنفيه
انا : بس مينفعش انا قاعده لوحدى
المتحدثه : حضرتك اى عنوان عايزانه نروح فيه اديهولنا واحنا نجيلك
انا : انتوا عرفتوا نمرتى ازاى ؟؟؟؟
المتحدثه : احنا معانا نمر كتير من السويس وناس بترشح ناس علشان نتصل بيهم
انا :ومين رشحنى
المتحدثه : مش فاكره والله يا فندم
انا : طيب سبينى افكر
المتحدثه : اتصل بيكى امتى يا فندم ؟
اانا : سيبينى يومين تلاته
وخلصت المكالمه
وقعدت افكر صوت مين دى
ده مش صوت حد اعرفه
تكونشى ليلى علوى وعايزه تضرب معايا صحبيه
ولا البنوته رانيا علونى بتاعه السباحه
المهم
قعدت مع صديقاتى وكلمتهم فى الموضوع
وقالوا ان فى تليفونات كتير جات لاخواتهم ولازواجهم ولزملائهم عن حكايه الفلتر ده
وفعلا بيجيبوا كوبايه ميه ويعملوا عليها تجربه تطلع الميه وسخه جدا
وبداءت الحوارت والمناقشات عن السويس والفشل الكلوى
وكل واحده قالت رأيها
لكن
علشان مطولشى عليكم انا هختصر
السويس عايشه بتشرب من ترعه الاسماعيليه
وطبعا لما الميه بتيجى عندنا بتبقى لفت ودارت وداخت السبع دوخات والناس عملت معاها الواجب ورمت فيها جميع انواع القاذورات من كذا وكذا
احنا بقى بناخد الفضله بتاعه الترعه
وبيكرروها
لكن بتطلع ميه مالحه وطعمها اعوذ بالله لا يسر عدو ولا حبيب
الناس بدءت تتعب والفشل الكلوى بداء ينتشر بسرعه فى السويس
والساده الكبار ملهومش دعوه
بيشربوا ميه معدنيه
او بيجيبوا فلاتر
طيب وبقيه خلق الله
يغوروا فى ستين داهيه ؟؟؟؟؟؟
ولا يعملوا ايه ؟؟؟
الناس اشتكت سنين طويله
وفى الاخر
اتكرموا علينا وجابوا خط ميه حلوه من القاهره
لكن السيد المحافظ اعزه الله اخد الخط ووداه على السخنه
وقال السياحه مهمه جدا للبلد
وطبعا كلامه سليم
الناس الضيوف يجوا هنا يشربوا ميه وحشه والملاعين بتوع السويس يشربوا الميه الحلوه
لا طبعا
الضيوف بطنهم نضيفه ومتستحملشى الميه بتاعتنا وجسمهم لطيف ميستحملشى القرف بتاعنا والزرع كمان بتاعهم فافى لازم له ميه حلوه وعربيتهم لازم تتغسل بميه نضيفه انما احنا معانا عجل يبقى علينا وعلى الميه التعبانه
وكمان نسيت اقولكم
انا الدوله تشكر
وبعض الشركات ربنا يكرمهم
مع بعض الافراد
عملوا مبنى لغسيل الكلى فى السويس
وكده حلوا المشكله
احسن ما يتعبوا نفسهم بالميه والخط الجديد وخلافه
لا
اديها غسيل
وكله بيطلع فى الغسيل
ملحوظه مهمه
الفشل الكلوى منتشر جدا فى مصر كلها وانا عارفه ان ممكن حد يقولى الكلام ده
لكن
نسبه الفشل الكلوى فى السويس مرتفعه جدا جدا جدا
ونسبه الاصابه بامراض الكلى مرتفعه للغايه
ويكفى الحكم على الميه
من تناول كوب واحد منها
اسألوا عن ميه السويس
واسألوا عن ارتفاع نسبه الاصابه بامراض الكلى فى السويس
واشربوا كوبايه واحده من ميه السويس
واحكموا
نداء
الى كل محبين فرنسا هانم
لو زرت السويس
اشرب ميه معدنيه

الخميس، ديسمبر 27، 2007

طن تفاؤل

السلام عليكم
وصلنى عبر الحمام الزاجل تاج من العزيزه همسه قلم
وطبعا انا مش هينفع افتح الصالون وعندى واجب تدوينى
علشان كده قفلت الصالون وحطيت لافته بتقول
مغلق للتجديدات
والتاج ده جاوبه قبلى كتير من المدونين الكرام
وانا مش هينفع ازايد عليهم
ولكن
ما باليد حيله
هنجاوب واللى يحصل يحصل
بس ياريت ميكونش فيها اعدام
اجابه السؤال الاول
والتانى والتالت علشان الوقت


طن تفاؤل

لما اروح اجيب عيش من الفرنه والاقيها فاضيه مش طوابير للقاهره


طن تفاؤل
لما اللهف القبض بتاعى من الصراف والاقى ورق الفلوس زى بقيه دول الله مفيهاش ورق متقطع ومتبهدل وديبان

طن تفاؤل
لما اشترى كبريت مصرى ويولع من اول شطه
من اول شطه يا كبريت ولعت القلب يا عفريت

طن تفاؤل
لما امشى فى الطريق وملقيش ميه المجارى مغرقه الشوارع

طن تفاؤل
لما اسمع صوت طفل حديث الولاده

طن تفاؤل
لما افتح الشباك الصبح بدرى واسمع صوت العصافير

طن تفاؤل
لما اشوف الاولاد الصغيرين يوم العيد لابسين هدوم جديده وفرحانين

طن تفاؤل
لما الاقى ميكروباص فاضى وقت الخروج من العمل او المدارس

طن تفاؤل
لما اعدى قدام مدرسه فى الطابور واسمع نشيد بلادى بلادى بصوت الاطفال

طن تفاؤل
لما يعكش المفتى بتاعنا فتوى وميرجعشى فيها

طن تفاؤل
لما اسمع ان جلجل محافظ السويس اتشال

طن تفاؤل
لما اروح السوق والاقى حلبه خضراء

طن تفاؤل
لما امشى فى الشارع بالليل وملقيش شباب بيضرب بانجو على الناصيه

طن تفاؤل
لما الاهلى يكسب

طن تفاؤل
لما اسمع اسم المأذون

طن تفاؤل
لما اروح انفخ العجله والاقيها مش مخرومه

طن تفاؤل
لما اسمع صوت عبد الباسط عبد الصمد

طن تفاؤل
لما اسمع جمله لا مساس بالدعم

طن تفاؤل
لما اقعد على شط القنال وملقيش سفن امريكيه معديه

الثلاثاء، ديسمبر 25، 2007

عفاريت ولاد حراميه

اخواتى واخوانى المدونين
السلام عليكم
انهارده هابتدى اتكلم معاكم عن صالون فرنسا هانم
وطبعا لازم ابتدى باهداء
اهداء
الى من حملتنى بلا ملل
الى من استحملتنى بلا كلل
الى من اخذتنى من رياض الى رياض
الى عجلتى النفاثه

انا هبتدى احكى شويه معاكم
لكن يكون فى علمكم وفى علم لماضه صاحبه مدونه لماضه
اننى اقسم بالله انى سوف احكى احداث حقيقيه بس علشان محدش يقول اوعى تكونى بتسرحى بينا
من فتره مش طويله غابت واحده من رواد الصالون لفتره اسبوع كامل واحنا من عادتنا ان اى واحده ممكن تتخلف يوم يومين تلاته لكن لو غابت اكتر نبتدى نتصل بيها على التليفون
ولاحظ الجميع غياب صديقتنا ف واحده من الجمع اتبرعت واتكرمت وقالت هاتصل بيها
وطبعا انا فاتحاه صالون وسنترال كمان
اتصلت صديقتنا بمنزل الاخت ف
رد عليها جوزها
وجوزها ده رجل مهذب جدا وظريف جدا وجنتل مان وقالها
ف غارت فى داهيه
وهوباااااااااا
قفل السماعه فى وش البنيه
كلنا واحنا قاعدين اتبلينا ولزقنا فى مكانا محدش نطق بهمسه ولا حتى لمسه
كله فى الطراوه
فاتح بقه ومش مصدق
واكتر اتنين اتبلوا صديقتنا اللى اتكلمت والعبده لله فرنسا هانم
صديقتنا لانها هى اللى اتكلمت واخدت من المنقى خيار
وانا لانى صاحبه التليفون وهو عارف ان الرقم ده رقمى بحكم اظهار الرقم
لكن الشهاده لله
كل النسوه الحريم الموجودين كان قفاهم يقمر عيش
لو حطيت سمكه على قفا اى واحده تتشوى فى ثانيه
وقطعت وصله ظلموه دى واحده من الموجودات وقالت انا هاقوم اعمل ليموناده
وقامت تعمل الليمون واحنا قعدنا نضرب اسداس فى اخماس
المهم
تبرعت واحده انها هتكلم ف على تليفونها المحمول
وفعلا كلمتها
وكانت عند مامتها وكانها كانت فى بير وطلعت قالت لها
انتوا عند فرنسا ؟ طيب انا جايه حالا
وطبعا كانت عرفت ان احنا اتصلنا بجوزها لكن معرفتش الكلام المهذب بتاعه
جات صاحبتنا وقعدت
وبدءنا نتكلم معاها وعرفنا انها غضبانه من جوزها وانها عايزه تاخد رأينا فى الموضوع وتتصرف ازاى
وابتدت تتكلم
قالت ف
من حوالى سنه لا من حوالى كام سنه
انا قطعت كلامها وقلت لها استنى نشرب القهوه وبعدين نتكلم
وتبرعت واحده من صاحبتنا بعمل القهوه
وشربنا
وبعد كده
قلت لها شوفى يا ف لو عايزه تحكى ونفيدك احكى بصدق
احكى اللى ليكى واللى عليكى ولو هتكدبى يبقى بلاش تحكى من اصله
ونفعت الطريقه
وابتدت تحكى بصدق
انا هقولكم
من ساعه ما اتجوزت يعنى من حوالى 12 سنه وانا باخد فلوس من وراء جوزى
انا جوزى بيدينى مصروف شهرى للبيت ولكن فى واجبات بعملها مع زميلى وجيرانى واخواتى جوزى مش معترف بيها
زى نقطه وهدايا وكده وجوزى راسه والف سيف ان دى تقاليد هيفه ومش بيرضى يدينى اى فلوس للحكايه دى
وكمان بخيل فى حتته الملابس وحاجات للشقه بيعتبرها كماليات
وممكن طول السنه مش يشترى لى اى هدوم
ولو اشترى حاجه وقلت له على حاجه تانيه تقوم القيامه
وانتوا عارفين انه معاه فلوس ومش محتاج وانا مش بشتغل
المهم
كنت سمعت عن حكايه العفاريت اللى بتحط للناس فلوس
قمت انا قلبت الايه
قعدت اوهمه ان البيت فيه عفاريت وكل اسبوع او اسبوعين اعمل كركبه وقلق فى المطبخ واجرى على اوضه النوم واعمل نفسى نايمه
او اقوم اتسحب واحط اى حاجه على طرف المطبخ تقع لوحدها ونقوم نتفزع من النوم
المهم
جوزى اقتنع ميه فى الميه ان فيه عفاريت
وفى يوم حطيت له خمسه جنيه تحت الموبيل بتاعه بعد مانمنا
ولما صحينا قالى خدى فلوسك انتى حطاها هنا ليه
قلت له فلوس ايه ؟
قالى الخمسه جنيه دى
قلت له معرفشى عنها حاجه
بص لى فى استغراب وقالى ازاى
قلت له يمكن العفاريت انا سمعت من ناس ان فيه عفاريت بتحط للناس فلوس تحت المخده او فى اى حته
ولو حد قال على سره بيبعدوا عنه
وطبعا بالطريقه صدق
وبدءت اخد منه فلوس واقوله العفاريت اخدتها
وصدق الحكايه دى
وسنين طويله وانا باخد منه كل شهر او شهرين مبلغ بكون محتاجاه
لكن مزادشى عن 100 جنيه ابدا مع العلم ان كل فلوسه قدامى
لكن انا باخد اللى محتاجاه بس
ومن اسبوع جه ابنى من عند جدته ام ابوه وقالى تيته بتقولك الست اللى انتى عامله معاها الجمعيه بعتت لها وعايزه الجمعيه
وكانت الجمعيه ب100 جنيه كنت عاملها من المصروف وهو كان عارف بيها
قلت لابنى روح قول لتيته تتصرف وانا هبقى اديها ال 100 جنيه
ومشى الواد وخلاص قفلنا الموضوع ودخل جوزى نام ساعه العصر
واخذت من محفظته 100 جنيه وبعتها لجدته علشان تدفعها
جوزى قام من النوم وخرج واكتشف ضياع ال 100 جنيه وهو بره رجع وسألنى عليها
وانا كالعاده قلت له معرفشى عنها حاجه
شقلب البت عاليه على واطيه ملقاش حاجه
المهم خرج
وهو راجع
حود على امه علشان يديها ال 100 بتاعه الجمعيه
ودى كانت اول مره تحصل
ويمكن علشان يتفضح سرى
امه قالت له مراتك بعتتها
وطبعا هو كان عارف انى ممعيش فلوس تكفى لاننا كنا فى اخر الشهر ولسه مخدتش المصروف
قال لمامته
وبعتى الفلوس ؟؟؟
قالت له لا
قال لها هى فين ؟
قامت حماتى بكل براءه وهى فعلا ست طيبه جابت ال 100 جنيه
قام مطلع الفلوس اللى كانت معاه
وكانوا 200جنيه ورقتين انا اخدت واحده وبقت واحد
المهم شك فى الموضوع وحط الفلوس على بعض
نفس الطبقه بتاعه الاتنين
هو بيطبقهم كتير علشان يحطهم فى المحفظه
ورجع البيت
واتحول لشرلوك هولمز
وسألنى
هى امى دفعت الجمعيه للوليه ولا لاء ؟؟
وانا مخدتش بالى انه اول مره يتدخل فى المواضيع دى لا
بس لما ربنا عايز يفضح حد يفضحه
قلت له مش عارفه جايز لسه متصرفتش فيها
قالى
كنتى اديهالها من مصروفك او استلفيها من اى حد من اخواتك
قلت له
طيب سلفهانى انت
وانا بتدلع عليه
الا ولقيت قلم على خدى عمرى ما اخدت زيه ابدا
ومسكنى من شعرى
وكان عمره ما ضربنى
وفضل يضربنى لغايه ما اعترفت له بكل حاجه
ومشانى لبيت امى ومش عارفه اعمل ايه ؟؟؟؟

خلص كلام الست ف
قمنا احنا عملنا الواجب وشويه اديناها كلام فى جنابها
وذكرناها بتعاليم الدين الاسلامى
لكن الشهاده لله
هى كانت فى حاله وحشه خالص
مينفعش معاها الكلام خالص
قمنا عملنا فريق مكون منى ومن 2 من صديقاتنا واخذناها ورحنا بيها لبيتها
وقابلنا جوزها
وفضلنا نتحايل عليه اكتر من ساعه
وعلشان خاطرنا وعلشان خاطر العيال وعلشان خاطر ربنا
المهم الراجل سكت وبدء يلين
وقال
انتوا عارفين انا بقالى اسبوع مش عارف راسى من رجلى مراتى بتسرقنى
مش صعبت عليها فى مره وانا بدور على الفلوس واقلب المكان
والمصيبه انها كانت بتدور معايا
وكل ما اسكت تقولى ندور هنا يمكن وقعت هنا
دول وصلوا لاكتر من 2000 جنيه من ساعه ما بدأت الفلوس تتسرق
قالت له اكتب لك وصل امانه بيهم
قال تكتبى وصل امانه ب 5000 جنيه
قالت موافقه
وكتبت واحنا قاعدين
لكن هو طلع رجل جنتلما ن قوى ورجل جدع قوى قوى
قطع الوصل وقال لها انا سامحتك لله
ومن يومها وصاحبتنا صامت وصلت على الموضوع ده
لكن انتوا عارفين مكر الستات
عارفين عملت ايه
بعد اسبوع واحد من الحكايه دى
شغلت الاسلحه الانثويه بتاعتها وذودت المصروف 50 جنيه فى الشهر
يعنى اكتر من اللى كانت بتاخده
معلشى طولت عليكوا
تلاقيكم نمتوا
تصبحوا على خير

الأحد، ديسمبر 23، 2007

فى صالون فرنسا هانم .... كانت لنا ايام

مع الاعتذار لعمنا الكبير عباس العقاد
اخدت منه الاسم سلف بس كام يوم وهرجعه تانى
وبعدين صالون العقاد وصالون فرنسا هانم شبه بعض جدا جدا
مفيش اى فرق
هو بس كام فرق كده صغننين وخلاص
يعنى صالون العقاد
كان بيضم نخبه من نجوم المجتمع فى جميع مجالاته الادبيه والعلميه والسياسيه
وصالون فرنسا هانم
بيضم نخبه من سيدات الحته والمنطقه اللى جنب الحته وزميلات العمل والدراسه
صالون العقاد
كان يتم فيه مناقشات عن العلم واللغه والسياسه والطب والهندسه
وصالون فرنسا هانم
بيتكلم عن السياسه والتعليم واصول عمل الملوخيه والباميه وفن الكيكه
صالون العقاد
على حسب ما قريت كبير وفخم جدا
وصالون فرنسا هانم
كنبه واربع كراسى وكام كرسى بلاستيك من اللى بيتفتحوا ويتقفلوا
يبقى مفيش فرق زى مانتوا شايفين
اما حكايه الصالون دى
بداءت من حوالى اربع سنين يعنى بعد ما اخويا اتجوز
طبعا انا عايشه لوحدى ولى زميلات فى العمل وزميلات من ايام الثانوى وجارات فاضلات
كان زميلاتى بيجوا عندى كتير بعد جواز اخويا
وزاد المجى عندى وكتر العدد وبقت شقه فرنسا مكان لتقابل كتير من زميلاتنا حتى انهم بقوا يدوا بعض معاد عندى
الو ازيك يا فلانه بقالى مده مشفتكيش
مانتى مبتجيش عند فرنسا ابقى اقابلك هناك
وفى خلال كام شهر كان الاخوات الفاضلات معسكرين على حدود فرنسا
ومحاصرينها من كل اتجاه
بس حصار جميل مخلانيش احس انى وحيده ابدا
لكن
انا فى اول الامر كنت عامله زى الخدامه
دور شاى
على دور قهوه
على دور نسكافيه
على دور كركديه
على على على على كان ناقص الشيشه والطاوله واقلبها ماركات
طبعا الكلام ده مينفعش
هما يقعدوا يتكلموا ويضحكوا وانا قاعده فى المطبخ كل ما اقعد واحده تيجى اقوم اوجب معاها
او دور وراء دور
وانتوا عارفين الستات كل واحده وليها طلب
دى عايزه شاى ودى عايزه نسكافيه
ودى عايزه حلبه ودى عايزه تدوخنى معاها
المهم
انا
واعوز بالله من كلمه انا
مش سهله
عملت عليهم خطه خمسيه
بس مش زى خطط الحكومه
لا
خطه خمسيه لمده خمس دقايق بس
فى يوم عملت معاهم الواجب اول مره وبعدين زى العاده بعد نص ساعه سألتهم
ها
تشربوا ايه ؟؟؟؟؟؟
كل واحده طلعت بطلبها قلت لهم
ياااااااااااااااااه
رجلى منمله
واحده تقوم تعمل الدور ده
وقامت واحده متطوعه من الفرقه الانتحاريه ودخلت المطبخ
ومن يوميها
وكل واحده تدخل المطبخ دور
ومنهم من جاب معاه شاى وسكر وبن والذى منه
لكن انا الحمد لله مستوره مرتبى كبير وايجار الشقه ملاليم ومعنديش مصاريف
يعنى عندى فائض فى الميزانيه
سمعانى يا حكومه
فائض مش عجز
رفضت اى حاجه تدخل الشقه نهائيا
الا لو واحده عايزه تشرب حاجه معينه مش عندى فى الحاله دى خلاص معنديش مانع
المهم
اجتماعتنا كانت تتم بشكل دورى تحت مظله الامم المتحده ومنظمه حقوق الجيران واليونيسيف ودار عبوده للنشر والاعلان
وكنا بنتكلم فى حاجات كتير
فى السياسه والطب والاقتصاد والمانيكيروالتاريخ والفيزياء والشربات الفيليه والحجاب والنقاب وشعبان عبد الرحيم واحسن طريقه لعمل المخلل ووسائل تنظيم الاسره (جميع الزميلات متزوجات الا اتنين) فرنسا هانم الفائزه بجائزه نوبل لافضل عانس واخت ارمله
يعنى بنجبهامن ساسها لراسها
وانا حبيت اكلمكم عن الاخوات دول وعن مناقشاتهم وحوارتهم
اه
نسيت اقولكم زميلاتى او صديقاتى
واحده دكتوره اسنان و4 مدرسات منهم واحده ابتدائى والباقى اعدادى و2 زى حالاتى محاسبات ومحاميه و2 موظفات فى الحى وفى التامين ومهندسه ( بدون عمل بناء على رغبه زوجها ) والباقى من ربات البيوت لكن الشهاده لله فيهم المتحدثات اللبقات
وطبعا حصلت طوال السنين الاربعه اللى فاتوا
حوارات
ومشادات
ممكن احكى عنها
واحسن حاجه ان ولا واحده فيهم تعرف انى عندى مدونه
علشان كده هتكلم واقطع فروتهم براحتى
على فكره
محدش عنده وسطه فى المرور
بس تكون وسطه كبيره
عايزه رخصه قياده
للعجله

الخميس، ديسمبر 20، 2007

فرنسا هانم مش جاحوده

اخواتى المدونات الاحباب الى صمامات قلبى من جوه
اخوانى المدونين احبابى واخوانى فى الله
السلام عليكم ورحمه الله وبركاته
كل عام وانتم بخير
اعاد الله الايام عليكم باليمن والبركات
باركولى
فكيت الجبس
وايدى ورجلى كويسين والحمد لله
اما ضهرى
لسه ممنوعه من الحركه الكتيره
وده اللى مزعلنى
لسه اكتر من شهرين
ممنوعه من ممارسه المصارعه الحره ومن رفع الاثقال والخناقات فى الافراح ومن لعب السبعاويه ومن النط على الشقق من على المواسير بتاعه الصرف ومن الشعبطه فى العربيات ومن ممارسه لعبه الحاوى والنط جوه الطوق المولع
كل ده ممنوعه منه
انا فعلا مكنتش بعمله لكن برضه حاسه انى ممنوعه منه
يلا
الحمد لله على كل حال
علشان تعرفوا ان اختكم وخالتكم فرنسا مش جاحوده
ونكاره جميل
انا انهارده هتكلم عن ايجابيه من ايجابيات الحكومه
وطبعا الست حكومه وليه زى حالاتى ومكسوره الجناح زى حالاتى
يبقى تاخد حقها
من كام يوم كنت بسأل على الدكتور بتاعى قالولى انه فى قافله طبيه
كلمته على المحمول وسألته عن اللى عايزاه وخلاص
وبس
قبل ما اسيبكم اقولكم تصبحوا ........ ايه ده ؟
هو انا لسه قلت حاجه
انا بصراحه مكنتش اعرف ايه القافله الطبيه دى
وكنت فاكراها قافله من نوع نحن وراها عد عد
او القافله الحديثه كام عربيه يمشوا فى صف واحد وتبقى دى قافله طبيه
لكن
عرفت الفوله
القافله دى عباره عن صوان كبير جدا او شادر
ومقسيمينه اوض اوض
وبيكشفوا على الناش ببلاش
وبيدوهم علاج ببلاش
خير
والله خير
الحكومه تشكر
لكن التاس متشكرش
هنا الحكومه مظلومه والناس هى اللى ظالمه
واحده معرفه
والله العظيم الاحداث دى حصلت قدامى
واحده راحت كشفت فى القافله الطبيه
وعلشان هى مجانا
قامت صاحبتنا كشفت سبع تذاكر ببلاش
من كل نوع يا باطسطا
جلديه على اعصاب على باطنه على مسالك على رمد على الخ
سبع تذاكر
وهى معندهاش غير الضغط بس
صاحبتنا جابت العلاج ولاجل حظها الاغبر فاتت على علشان تسلم على
وطبعا اخنكم فرنسا كان منظرى بالجبس مثال لكل انواع القوافل الطبيه
قالتلى ماتروحى عرب المعمل فى قافله طبيه هناك
وكانت فى الحرفيين وفى الانصارى
يعنى الشابه متابعه مكان القافله
واكيد زبونه معتبره من النوع اللازق
استفسرت منها عن القافله والعلاج
وهى ما صدقت
اعتبرتنى جاهله ومن زمن فات
واعتبرت نفسها عمنا الكبير احمد زويل
قامت فاتحه الشنطه بتاعه السوق
والله كلامى صحيح
وقامت مطلعه انواع العلاج
ازايز كتير
وبراشيم كتيره ومراهم ومضادات حيويه وبخاخه تنفس وحقن
ايه ده ؟؟؟؟؟؟؟؟؟
كل ده علاج
قالت ده لكذا وده لكذا وده لكذا
وعماله تشرح لى واكنها فى ندوه طبيه
وهبا
وقع المحظور
الست اتلخبطت فى العلاج
بصت لى وقالت
هو ده بتاع ايه ؟؟؟
وده كمان ؟؟؟؟
وبصت لى واكنى انا ابوحميد ابن زويل وهى مكانى
قلت لها معرفشى
قالت لى وهى بتبص للجبس وللشاش متعرفيش ازاى يا فرنسا ؟؟؟؟
قلت لها
هو انا علشان مكسوره ومتجبسه قوم اشتغل صيدلانيه
ولا ابقى عالمه طب
انتى ايه خلاكى تروحى تجيبى كل ده ؟؟؟؟
حرام عليكى فى ناس غيرك محتاجاه
فى ناس غيرك مش لاقياه
قامت بصت لى وقالت
يوووووووووه طول عمرك كده يا فرنسا الواحده متعرفشى تاخد معاكى حق ولا باطل انا هاروح لبتاع الارزخانه واسأله عن دى ودى والحقن دى
والبرشام ده
ولمت صاحبتنا العلاج اللى كانت فرشاه فى سوق الحد قصدى على السرير جنبى فى شنطتها
وشربت الشاى وهاتك يابو فكيك
للخلف در على طول
انا
واعوذ بالله من كلمه انا
مش موافقه على كده
وقبل ما اوافق ولا ما اوافقش
احب اشكر الحكومه على النوع ده من الخدمات
ودى نقطه ايجابيه تتحسب للحكومه
يبقى هى تاخد نقطه
لكن سيداتى انساتى سادتى
الحكومه خدت نقطه لتحسن موقفها وتصبح النتيجه نقطه لصالح الحكومه مقابل الف نقطه لصالح الشعب
والمباره مستمره
احب من خلالكم ان كل واحد يعرف حد بعمل زى صاحبتنا صاحبه الشنطه المليانه علاج
يقول له اتقى الله

الأحد، ديسمبر 16، 2007

مطلوب عريس لفرنسا فورا

اصدقائى واحبائى
كل سنه وانتم بخير
واللى عنده بلوفر او جاكت صوف ميلبسوش الايام دى خالص
انا عن نفسى ساعات اكون صقعانه والبس صوف جوه الشقه
لكن الايام دى وحياه امى ابدا
محدش ضامن
جزار يعدى كده ولا كده نروح بلاش
انا انهارده هكلمكم عن نفسى شويه
من حوالى كام سنه كده مش فاكره كام لكن متأكده انهم اقل من مليون سنه
كان عندى 34 سنه يعنى من حوالى خمس سنين
مجموعه من زميلاتى فى العمل عملوا منظمه سريه
وكان عددهم اربعه وترأسهم زميلتى فى المكتب (س) وهى الرأس المدبره لتلك المنظمه
وفى يوم دعت س باقى افراد المنظمه الى اجتماع طارىء لمجلس الامس واستمرت فاعليات الاجتماع لايام متتاليه
وخرج الاجتماع بقرارات ملزمه لجميع الافراد
القرار رقم 6678 لسنه 2002 ونص القرار
مطلوب عريس لفرنسا فورا
وتعهدت كلا منهن بالف والدوران والبحث عن العريس
كل ده واختكم نايمه على ودانها
اصل انا معنديش مرتبه ولما بنام بنام على ودانى
كل الاجتماعات دى وتوزيع الادوار والذى منه وانا فى الباى باى خالص
المهم
فى يوم جات زميلتى س وقالتلى
فرنسا فى عريس عايز يتقدملك
رديت عليها ومين هو العريس ده ؟
قالت صاحب خطيب اختى
سألتها وشافنى فين ؟
قالت شافك عندى وهو موصل اختى عندى فى البيت
طبعا انا هبله وعبيطه وصدقت كلامها ومخدتش خوانه
وفكرت شويه ولكن انا لسه مكنتش قفلت باب الجواز فوافقت
وطلبت منها قبل مقابلته لاخواتى انى اشوفه هنا فى المكتب
وفعلا
جه المكتب
ودخل ومسلمش على حد فينا
دخل زى النسمه المعديه وفضل واقف بكل ادب
وقلت له اتفضل
قعد صاحبنا وهو مؤدب قوووووووووووى
وفضل يبص للارض ومركز عينه على الارض وحاطط ايديه الاتنين على ركبه وعماله يفرك فى ايده
واستمر صاحبنا يفرك فى ايده
انا قلت يمكن نحله لسعته ولا حاجه وهو داخل الشركه
واستمر
يفرك ويفرك لغايه لما ايده صعبت عليا
المهم
زميلتى عملت نفسها ناصحه وقالت اروح اطلب حاجه ساقعه مع العلم انهاممكن تطلب بالجرس
قلت لها خليكى قاعده انت اختى
وبصيت على صاحبنا لقيته لسه بيبص للارض نفس الحته اللى كان بيبص عليها
هو فى ايه ؟
هو بيبص على ايه ؟
يكون جنيه ولا عشره جنيه واقعين منى وصاحبنا بيأمن عليهم
قمت من مكانى واتمشيت فى المكتب بحجه انى بشيل اوراق وبصيت على الارض ملقتش حاجه
رجعت مكانى
وقعدت
وبصيت لصاحبنا
لقيته
لسه بيفرك فى ايده
يمكن عنده جرب
لكن انا مالى هى ايدى ولا ايده خليه يفرك فيها براحته
المهم
قلت لزميلتى روحى هاتى حاجه صاقعه
راحت البنيه تجيب الصاقع وغابت
ولسه صاحبنا بيفرك فى ايده
سألته ازى حضرتك ؟
جاوب برعشه من راسه وبهمهمه فهمت منها انه عايز يقول انا كويس والحمد لله
وسكت
ورجع لايده
يخرب بيت ايدك سيب اللعبه دى وانطق قول اى حاجه
انا قلت كده فى نفسى
وعلشان انا معنديش وقت
قعدت اسرسبه فى الكلام
وهو زى العذراء الخجول
بعد ما زهقت انهيت الحوار واعطيته ميعاد يقابل اخواتى
وقابل اخواتى وكان فى غايه الادب والاخلاق
لغايه لما انا عن نفسى عجبنى ادبه
وقلت انا احب النوع المؤدب ده
وكده احسن من الشباب السنكوح بتوع اليومين دول
ووافقت
عارفين وافقت ليه
علشان الادب بتاعه والاخلاق العاليه
قبل الخطوبه
كنت فى المحكمه بعمل توكيل لمحامى العائله رغم ان صاحبنا محامى لكن محامى العائله عنده اوراقنا كلها
المهم عبقال عندكم كنت اشتريت حته ارض فى السلام منطقه عندنا فى السويس
وانا نازله من سلم الشهر العقارى لمحت صاحبنا واقف مع زميله
وعماله يضحك ويكركر ويتكلم بصوت عالى ويشوح بايده يمين وشمال
بصراحه
واحد تانى خالص
نزلت من على السلم وخدت ساتر قريب منهم واتصنت عليهم
وطبعا التصنت حرام
لكن
فضول منى
المهم سمعت كلام
من المنقى خيار
سمعت شرشحه وصرقعه مش قادره اوصفها
المهم
عملت للخلف در
وعلى البيت معتاده مرش
وعملت تحريات مكثفه على العريس
اتضح الاتى
العريس محامى تعبان قوى موله
عنده 34 سنه
شريب بانجو معتبر
وحشاش
وبتاع افراح ومطاوى وميه مساء على العيون المدعمسه
ومفلس
وقحطان
وكل الفرك والادب ده كان تمثيل على فرنسا
وهو عكس كده خالص
كل ده ليه ؟؟؟؟؟؟؟؟؟
عرف ان فرنسا عندها شقه وارض وفلوس فى البنك
ميعرفش ان الشقه تبع ورثه
والارض شركه مع جوز اختى والفلوس اللى فى البنك بح
راحوا فى الارض
على فكره
زميلتى س هى اللى جابت لى كل المعلومات دى
وخطيب اختها هو اللى جاب اراره اول ما عرف بالموضوع
وفى النهايه
تم فصل باقى افراد التنظيم
ومحو الطلب
وغير مطلوب اى عريس لفرنسا

الأربعاء، ديسمبر 12، 2007

افتراس عقل اطفالنا

تحديث
------
اخوانى واخواتى
السلام عليكم
انا لما كتبت التدوينه دى
والله ماكان قصدى امتحنكم
ولااختبر ذكاء احد
انا كان قصدى نعرف مدى المعاناه اللى بيعانيها اطفالنا
ومدى الاستهتار بمستوى عقولهم
واشكر كل الاصدقاء الذين شاركونى بالتعليق
واشكر جدا الاخت
jana
على حلها للمسائله الاولى
فهى صعبه جدا سهله جدا
بمعنى ان الحل من وسط المسئله دائره + مربع يساوى دائره اذن المربع محايد جمعى يساوى صفر
نعوض عنه فى اول المسئله صفر + 3 يساوى مثلث اذن المثلث يساوى 3 ثم نعوض عن المثلث فى اخر المسئله مثلث زائد دائره يساوى 9 اذن الدائره تساوى 6 بس خلاص
فين بقى العيل بتاع تالته اللى هيعرف كده ؟؟؟؟؟؟؟
يا اخوانا انا قسمت بالله ان فى مدرسين وقفوا قدام المسئله
كانت معكم مراسلتكم
فرنسا هانم
من امام تجمع اطفال تالته ابتدائى

السلام عليكم
وحشتونى جدا
معلش انا بعتذر لكم ان كنت قد قصرت فى حق احد
وذلك لصعوبه كتابتى على الكيبورد
اما بعد
فى بعض الدول المتقدمه الديمقراطيه زى مصرنا الحبيبه تلاقى بعض السلبيات
وحتى فى الدول المتخلفه الناميه زى اوروبا وامريكا برضه فى سلبيات
لكن الفرق ايه ؟
احنا علشان متقدمين وديمقراطيين مبنحبش سلبياتنا تتطلع بره
يعنى مبنحبش ننشر غسيلنا الوسخ بره
اى سلبيه او اى حد ينطق بسلبيه يروح النار ويتشوى فيها بس نار الدنيا مش نار الاخرى ونار الدنيا دى تربيه عبيد يعنى معموله علشان انتهاك وانهاك المواطنين
لكن
من حقى
ومن حق اى مواطن شايف حاجه مش عجباه يتكلم عليها
واحنا هنا بتكلم مع بعض ان بعرض وجهه نظرى
وحضراتكم بتقولولى انا صح ولا غلط
انهارده
هنخليها تربيه وتعليم
بصراحه
وبكل صراحه
انا مفروسه
من الجماعه بتوع تطوير التعليم دول
ونفسى اقابل واحد منهم وجه لوجه سا عتها هيقول حقى برقبتى
هخليه يغسل العجله ويشحمها ويلمعها والاعبه مصارعه حره من نوع
حتى النهايه
شوفوا حضارتكم
عندى ابن اختى فى تالته ابتدائى
وعلشان انا خريجه تجاره
وشغاله محاسبه
دماغى فيها حسابات كتير وبحب الرياضه
وكل العيله والجيران متكلين على الله وعلى فرنسا هانم فى النقطه دى
جابلى ابن اختى مسئله حساب عقلى
والله زمان حساب عقلى
وقعدت احل المسئله الموجوده اول التدوينه امام حضاراتكم
وبالامانه والله حلتها بسرعه
لكن عرضتها بعد كده على مدرسين وعلى ناس كتير و قليل اللى حلها
وفى مسئله تانى بتقول
فى صفحه 51 من كتاب الوزاره
اكتب مجموعه من الاعداد المختلفه التى يتكون كل منها من خمس ارقام
هى 3 -4 -5 -6 -7 - ثم اختر اربعه من هذه الاعداد فى كل مره بحيث تحقق الشرط الاتى
ا-يكون الفرق بين عددين منها مساوى للفرق بين العددين الاخرين :
اكمل :........ -......... = ......... -.......... ؟
ب -يكون الفرق بين عددين منها اصغر من الفرق بين العددين الاخرين
اكمل : ........_........... < ........._..........؟
ج: يكون الفرق بين عددين منها اصغر من مجموع العددين الاخرين
اكمل :........ _.........<.......... + ......... ؟
د :يكون مجموع عددين منها اكبر من مجموع العددين الاخرين
اكمل :........... +...........>........+............ ؟
ه :يكون مجموع عددين منها مساوى لمجموع العددين الاخرين
اكمل ..........+............=...............+......... ؟
وخلو بالكم من اخر سؤال لانى وقفت قدامه لعده دقايق
بس انا طلبه منكم رجاء اللى يحل المسئله والمسئله الموجوده باعلى يقارن بينه وبين عيل فى تالته ابتدائى
على فكره المسئله الموجوده بالاعلى مطلوب منها
التعويض عن المثلثات والمربعات والدوائر
بمعنى اننى لو عوضت عن المثلث مثلا ب 5 يكون كل المثلثات تساوى 5 وهكذا
انا بس راضيه ضميركم ده مستوى تعليمى
احب اقولكم
ان ده مش رايى انا بس
لا
معظم الامهات اللى اطفالها فى تالته ابتدائى بيدعوا على البروفوسير اللى حط المنهج
وعلى فكره
والله العظيم فى مدرسين وقفوا محتارين قدام بعض المسائل
وخدوا بقى اخر حاجه وارجو الا يعلق عليها احد
فى صفحه 23 من كتاب الرياضيات برضه تالته ابتدائى
تبرع حسن لصالح احد الجمعيات الخيريه بمبلغ 370 جنيه
وتبرع مرقص بمبلغ 390 جنيه
وعلى طول ايدى راحت محوله على اول الكتاب وزى ما توقعت الكتاب تاليف د. فايز مراد مينا و د . جان ميشيل حنا
ارجو عدم التعليق على النقطه دى
حتى لا نحول الموضوع دينيا
مع العلم
اننى احترم جميع المسيحيين ولى معهم صداقات وتعاملات
مش عارفه رأيكم ايه ؟؟؟؟؟؟
اختكم فى الجبس وجسمها كله قايد نار من الغل
انا فعلا مغلوله
لا مش غوله
مغلوله
وعايزه اخد حق العيال بتوع تالته ابتدائى من المسئولين
لما اتكلمت قبل كده مع بعض اصدقائى فى الموضوع ده
منهم من قال ده تطوير للتعليم
ورديت عليهم
بان التطوير مفروض يكون من اولى ابتدائى
ازاى تاخد عيل من تانيه جاهليه
الى تالته تطوير على طول
طب ما هيطلع لا حول له ولا قوه
انا حاسه انى طولت عليكم
اهديكم احلى سلام
واللى يعرف يحل المسائل يرسل الاجابات على العنوان التالى
faransahanm@yahoo.com
وشكرا

الأحد، ديسمبر 09، 2007

وعندك واحد نووى سكر بره لمصر وصلحه

قهوه الطرش
حد سمع عنها ؟
الجماعه الاحباب بتوعنا الروس الكبيره اللى كبرت وورمت لغايه لما بقت زى المنطاد
فاكرين نفسهم فى قهوه الطرش
ولا يمكن هما اصلا اللى طرش ؟
انا مش عارفه لهم حاجه
طبعا انا اليومين دول عطلانه وفى حاله عمره
وعمره من غير سمكرى ولا دوكو
عمره جبس بس واطنان من الحقن والمسكنات
المهم اختكم دلوقتى لا شغله ولا مشغله
قاعده اتفرج على الصندوق السحرى المسمى بالتليفزيون
وكل القنوات المصريه الارضى والفضائى
حكم اختكم عندها 2 دش
دش فى الحمام بيجيب ميه ودش فوق سطح العماره بيجيب قنوات
المهم يا اخوانى
معظم القنوات معندهمش سيره الايام دى الا موضوع استئناف مصر لمشروعها النووى السلمى
وواحد دكتور كبير عامل رساله بيقول ان الجدار بتاع المفاعل عرضه عشرين متر ولازم نوع معين من الميه يتخلط بخرسانه الجدار
وواحد بيقول انه عنده استعداد يشترك فى المشروع
ووووووووووووووووو الخ
ما هو يا فرنسا هانم اللى عندها لوسه فى نافوخها
وان الامبير بتاع التترخات اللى فى الدماغ شاطت وولعت
انا معرفش ايه التترخات دى
يمكن حاجه فى النافوخ بتبوظ ونرميها ولا حاجه انا مش عارفه
ولا يمكن حاجه فى نافوخ العيان اللى جنبى ولا ايه ؟
ولو كان كده
مرحب بالعباسيه يا مراحب
حتى البراشيم اللى هناك كلها كيف نروح نحجز مكان هناك ونتخدر ببلاش
بجد
يا انا مش فاهمه حاجه
يا اما الناس دول عبط
باكستان لما بدأت مشروعها النووى كانت محوطاه بسريه كامله
والهند شرحه
حتى اسرائيل فى بدايه مشروعها كان سرى
وكل الدول اللى بتشتغل فى النووى بتشتغل فى سريه
الا احنا
فاضحين الدنيا
واللى ما يشترى يتفرج
ب اتنين ونص وتعالى بص
ممكن واحد يقول ان ده مشروع نووى سلمى
وان احنا بنبين او بنثبت للعالم اننا بعمل للسلم
يبقى
عذر اقبح من ذنب
ما الشرشوحه ست ابوها اسرائيل عندها نووى وبتعرف العالم كله بكل الاطه
وبكل عينين فارغه ان عندها نووى
نقوم احنا علشان نستئانف مشروعنا السلمى نعمل زفه ونقعد نقول
اهه اتفرج سلمى اهه
سلمى اهه
لو حد عنده راى تانى انا مش فهماه يتفضل ويشرحلى الوضع واكون شاكره له
انا بجد متلخبطه
يمكن من الوقعه
لا
يمكن علشان بقالى كام يوم مركبتش العجله ؟
ممكن
لا وحياه امى انا فايقه وواعيه وعايزه اعرف ايه اللى بيحصل
وايه دماغ الناس الكبار بتوعنا
اللى فاكرين نفسهم فى قهوه الطرش دول

الخميس، ديسمبر 06، 2007

فرنسا هانم اكثر بياضا ،،،،، مع ام دبوه

وحشتوووووووووونى
قوى قوى قوى
اشكر بشده وبمزيد من الشده كل من تكرم وسأل عنى
دخلت المدونه انهارده وجدت اخوانى واصدقائى بيسألوا عنى
انا الحمد لله كويسه جدا
واحب ان اعرفكم ان فرنسا هانم اصبحت اكثر بياضا
بقيت بيضا ناصعه البياض
احكى لكم الحكايه من طقطق لسلام عليكم

من وسط جميع المجرات
ومن وسط كل الكواكب
ومن وسط الست مرجانه قصدى الست قارات
ومن وسط دول افريقيا ومحافظات مصر واحياء السويس
يقع حظى فى عماره واحده مع ام دبوه
ام دبوه دى يا اخوانى جاره ساكنه فى الدور اللى تحتى مباشره
واخلاقها وتصرفاتها غير الناس كلها
ام دبوه الوحيده فى العماره اللى رفضت تشترك مع السكان فى تركيب رخام للسلالم
ووقفت الموضوع سنتين وفى النهايه ركبنا السلم واتحملنا نصيب ام دبوه كل ساكن دفع جزء
ام دبوه يا ساده الوحيده فى العماره اللى عمرها منورت نور السلم لاى حد الا ليها ولعيالها
وحتى لما لمبه السكان اللى قصادها تتحرق راسها والف سيف متولعش النور
تيجى من اول الدور بتاعها وتنادى
واد يا دبوه ولع النور ياله
واول ما تدخل الشقه تتطفىء النور على طول
ام دبوه يا ساده
الوحيده فى العماره اللى حاطه صفيحه زباله جنب باب الشقه
كل السكان حاطه الصفيحه او شنطه الزباله فى المطبخ
الا ام دبوه
اتحايلنا عليها تدخل الزباله فى المطبخ وهى راسها والف سيف لا
لغايه لما صندوق زباله ام دبوه بقى وصمه عار فى جبين العماره كلها
طبعا كل اللى طالع او نازل وفى ايده منديل او اى ورقه او اى نوع من انواع الزباله يرميه فى صندوق ام دبوه فى الخباسه كده
الصندوق بقى مقر دائم للامم الزباليه
قلنا لها
يا ام دبوه يمكن حد من الناس الكبار زى بوش ولا ساركوزى ولا كريس ايفرت بتاعه التنس او كاكا بتاع الكوره او ام باتعه بتاعه الفجل يجوا يزورونا فى العماره يلاقوا منظر الصندوق الاسود ده
قالت
اللى مش عاجبه يشيله جوه شقته انا شقتى مفهاش مكان
اما بعد
حصل اللى حصل
من حوالى عشر ايام
وانا نازله اتدلع املىء القلل على السلم
وعند صندوق ام دبوه الاسود
وفى غير موسم الموز
جابت ام دبوه موز
واتكرمت علينا بالقشر على السلم
وطبعا
من غير فكاكه
الكل عرف اللى حصل
طرت لفوق
زى اى عصفوره او يمامه
ونزلت اتكوم على السلالم الرخام
لاول مره فى حياتى اتمنى اكون اى حاجه بجناحين
عصفوره حمامه غرابه اى حاجه حتى لو بومه
المهم
طرت
ونزلت على ضهرى
كسرين فى العمود الفقرى فى الفقره القطنيه الاولى والتالته
والله العظيم كسرين فى ضهرى
عاجبكم كده
استنوا خدوا اخر كلامى
انا لما طرت ونزلت امسح السلالم بكل جسمى وهدومى
صرخت باعلى صوتى
اتلم كل ناس العماره والعمارات المجاوره
واتقدمت النسوان وشالونى على الاعناق زى عصام الحضرى
وارقصى يا فرنسا
وبعد عمل الاشعه
اتضح وجود كسور فى الساق والذراعين وجرج فى الرأس
ونصح الاطباء بعمل حزام عالى بحمالات
او قميص جبس
او
تلات شهور نوم على السرير بدون حركه كبيره
وعدم ركوب سيارات نهائى طوال ال 3 شهور
ولفونى كلى فى الشاش
رجلى وايدى وصوابعى وراسى
كلى
ابيض فى ابيض
والسبب
ام دبوه
وطار فى الهوا شاشى وانتى متدراشى يا جدع
تعرفوا يا اخوانى
انا قعدت قد ايه اكتب الكلام ده
خمس ساعات
واربع برشامات مسكن قوى
يعنى انا دلوقتى مبرشمه
مره تانيه
اشكر كل من سأل عنى
وتصبحوا على خير
فين ايام العجله ؟؟؟؟؟؟؟؟؟؟؟

الجمعة، نوفمبر 23، 2007

تاج الجزيره

ضحك على الدكتور محمد
وبعتلى تاج
وانا بخاف من التاجات
ولكن
مقدرشى ازعل الدكتور حر
علشان انا بخاف من الحقن
وبرضه هو صديق عزيز جدا
يبقى
تعملى ايه يا فرنسا ؟
توكلنا على الله
اركن العجله الاول واقفلها كويس علشان المافيا الايطاليه بتدور عليها
وحركه تموين كده من فرنسا
هاكتب على العجله
دى عربيه مرسيدس

نبداء التاج
لو مكنتيش مصريه بس عربيه كانت هتبقى إيه نظرتك للمصريين واللي بيحصل في مصر دلوقتي؟
لا تعايرنى ولا اعايرك الهم طايلنى وطاليك
ده بالنسبه للسياسه
اما الابيج ( الفلوس ) ربنا يجعل كلامنا خفيف عليها
لو كنت من دوله غنيه
كان هيصعب على الناس اللى بتيجى من مصر تتمرمط وتتبهدل عندنا
وحتى سفارتهم سيقه الهبل على الشيطنه وضرباها احلى طناش بالمكسرات
اما لو كنت من بلد فقيره
كنت هاحسد مصر واقول الناس دول مش حمدين ربنا ليه
عندهم اثار بالهبل
وعندهم قنال بيعدى سفن حربيه بالشىء الفلانى
وعندهم شواطىء بالكوم
وشعبله اللى بطل سجاير وبيكره اسرئيل
عايزين ايه تانى ؟


لو
كنت أوروبيه أو غير مسلمه بردو إيه نظرتك للعرب والمسلمين؟


كنت هاقول فى نفسى الدين بتاع العالم دول دين لازم ادرسه لان فى ناس فيهم بتضحى بنفسها فى سبيل دينها وبيتجمعوا فى مكان واحد كل سنه بالملايين بملابس بسيطه فى خشوع
بس اللى هيحيرنى
ليه بيتجمعوا مع بعض ويرجعوا يقتلوا بعض ويشتموا بعض يلعنوا سلسفين بعض
اكيد دينهم حاجه ومخاخهم حاجه تانيه خالص


لوقالولك إنت بقيتى رئيسه جمهورية هتعملى إيه؟

واحد زى ابو سويلم علق عندى وقال على جثتى ان المرأه تبقى رئيسه جمهوريه
اول واحد هتخلص منه
راح فى شربه ميه الجدع
جات من عند ربنا
لكن
هتخلص من سيطره الحربايه المتسلطه امريكا
وبنتها المتشرده اسرائيل
واخلى اللى يعدى القناه
يدفع بعمله البلد الجنيه المصرى
واطهر ميه الشرب
واشترى صفقه نظارات طبيه لشباب السويس بالاجبارى علشان محدش خد باله من فرنسا وسابوها تعنس


لوكان ينفع ترجعى طفله تاني وتخليكى طفله علطول هترجعى؟ وليه؟

لا طبعا مش هوافق
علشان كنت هفضل طول عمرى اتمنى اكبر ومش هيحصل


لوإنتى طبيبه وعندك مريض ميؤوس من حالته أيهما تفضلى إنك تصارحيه بالوضع وتقوليله كل شيء بأمر الله في الاخر ولا تغرس فيه الامل لغاية لما يموت؟

اصعب حاجه فى الدنيا لما الانسان يعرف انه هيموت
لازم الامل
لان المريض بيموت فى اللحظه اللى بيعرف فيها نهايته
وكنت قريت رد لصديق قال
اقوله علشان يحسن نهايته مع ربنا
لكن
المريض او اى واحد بيحسن لربنا كده كده لما يتزنق
وده طبيعى فى الانسان



لوسمح لكى برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟

كنت هاقول لسيدنا النبى
ادعو لنا بالنصر
فانت مجاب الدعوه


لو
خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخر غير قادر على الإنجاب هيكون تصرفك إيه؟



لو انا بحب الشخص ده خلاص ارضى بنصيبى
زى مانا راضيه دلوقتى

ولو جواز تقليدى
لا
كل واحد يروح لحاله
لان الزواج اصلا للحفاظ على النوع
وبعدين
بعد الانسان لما يكبر هيحس فعلا باحتياجه للابناء


لوطلعت القمر هتكتبى إيه عليه؟

لا اله الا الله سيدنا محمد رسول الله

وتحت هاكتب

بحبببببببببببببببببك
موووووووووووت
يا مصر


لوكنا في عصر ازدهار الأندلس كنت تتخيلى نفسك إزاي؟

فرنسا هانم برضه
انا عجبانى تركيبتى قوى
وعجبانى طريقتى
ولسانى اللى عايز قطعه
وحبى للناس وحب الناس لى



لوأن مررتى التاج ده لحد وما جاوبش عليه أعمل فيه إيه؟

ده اول تاج لى ومجربتش الحكايه دى


لو أحب أمرره أمرره لمين ؟

لكل واحد يدخل عندى ويحب يجاوبه


على فكره
انا طبعا احب كونى مصريه ولا احب ان اكون غير مصريه ولا غير مسلمه ولكن احببت ان اكون واقعيه

الأربعاء، نوفمبر 21، 2007

بص شوف منتاجتنا الوطنيه بتعمل ايه

الصين وما ادراك ما الصين
نزلت يا جدعان على منتاجتنا فى كل شبر من ارض المحروسه جابت المنتاجات دى على الارض
بلمس الاكتاف والارجل والارداف والضهر كمان
مخليتهاش تنفع تانى
لا انعاش نافع
ولا عنايه مركزه هتفيد
السر الالهى طلع واللى كان كان
الجماعه احبابنا بتوع الصناعه بيقولوا
شجعوا منتاجات مصر
فرنسا هانم بتحب مصر مووووووووووت
ونفسى اعمل اى حاجه فى سبيل الغلبانه المسكينه مصر
قلت اشجع منتجات مصر وبلاها النادى الاهلى اللى انا بشجعه من زمان
طيب منتجات مصر بتلعب فى انه درجه
دورت ملقتهاش فى الممتاز ولا فى دورى الدرجه الاولى ولا حتى السبعين
طيب هشجعها ازاى ؟
قعدت مهمومه وحزينه وحاطه طاجن ستى على راسى
ومش عارفه اعمل ايه
هجرت الاكل والشرب والفسح وقعدت افكر اشجع المنتاجات دى ازاى
بصراحه ملقتش حل
لغايه لما ربنا هدانى وفكرت كويس ولقيت ان الايه مقلوبه
وده رأى فرنسا هانم وانتوا قولولى رأى حضراتكم
مفروض ان المنتجات المصريه هى اللى تشجعنا
ازاى ؟
اقولكم
لو الساده اصحاب المصانع والمسئولين عن الصناعه فى المحروسه اهتموا بالمنتج كويس من حيث الدقه فى التصنيع ومن حيث جوده الخامات ومن حيث( الفنش )السليم لاستطاع المنتج المنافسه فى جميع الاسواق العالميه مش بس هنا فى مصر
وكده المنتج هيشجعنا ان احنا نشتريه
لو انا او انت او انتى او اى مصرى راح محل وعنده منتجين الاول مصرى والتانى اى مله والاتنين بنفس الجوده اكيد المنتج المصرى هيكسب وهنشتريه على طول
وكده المنتج شجعنا ان احنا نشتريه
يبقى هما عكسوا الايه ولا لاء
وبعدين مش الصين بس هى اللى ضربانا فى السوق
ده دول كتير يا باشا دخلت فى اللعبه
واحنا قاعدين تحت العارضه بنمص قصب
ضاربنها طناش
واللى يعلا يعلا
لغايه ما غرقوا البلد
من فوانيس رمضان اللى متميزه مصر بيها للكبريت لجميع انواع العدد للعربيات للموتوسيكلات لحبال الغسيل للثوم ابو كياس للملابس للمشاط والفلايات
بس عندى رجاء اخير
اعلان الى المسئولين عن الصناعه المصريه
تعلن فرنسا هانم عن جائزه كبرى لاى مسئول عى الصناعه يتضح ان جميع محتويات منزله او مكتبه
صنع فى مصر