الخميس، ديسمبر 27، 2007

طن تفاؤل

السلام عليكم
وصلنى عبر الحمام الزاجل تاج من العزيزه همسه قلم
وطبعا انا مش هينفع افتح الصالون وعندى واجب تدوينى
علشان كده قفلت الصالون وحطيت لافته بتقول
مغلق للتجديدات
والتاج ده جاوبه قبلى كتير من المدونين الكرام
وانا مش هينفع ازايد عليهم
ولكن
ما باليد حيله
هنجاوب واللى يحصل يحصل
بس ياريت ميكونش فيها اعدام
اجابه السؤال الاول
والتانى والتالت علشان الوقت


طن تفاؤل

لما اروح اجيب عيش من الفرنه والاقيها فاضيه مش طوابير للقاهره


طن تفاؤل
لما اللهف القبض بتاعى من الصراف والاقى ورق الفلوس زى بقيه دول الله مفيهاش ورق متقطع ومتبهدل وديبان

طن تفاؤل
لما اشترى كبريت مصرى ويولع من اول شطه
من اول شطه يا كبريت ولعت القلب يا عفريت

طن تفاؤل
لما امشى فى الطريق وملقيش ميه المجارى مغرقه الشوارع

طن تفاؤل
لما اسمع صوت طفل حديث الولاده

طن تفاؤل
لما افتح الشباك الصبح بدرى واسمع صوت العصافير

طن تفاؤل
لما اشوف الاولاد الصغيرين يوم العيد لابسين هدوم جديده وفرحانين

طن تفاؤل
لما الاقى ميكروباص فاضى وقت الخروج من العمل او المدارس

طن تفاؤل
لما اعدى قدام مدرسه فى الطابور واسمع نشيد بلادى بلادى بصوت الاطفال

طن تفاؤل
لما يعكش المفتى بتاعنا فتوى وميرجعشى فيها

طن تفاؤل
لما اسمع ان جلجل محافظ السويس اتشال

طن تفاؤل
لما اروح السوق والاقى حلبه خضراء

طن تفاؤل
لما امشى فى الشارع بالليل وملقيش شباب بيضرب بانجو على الناصيه

طن تفاؤل
لما الاهلى يكسب

طن تفاؤل
لما اسمع اسم المأذون

طن تفاؤل
لما اروح انفخ العجله والاقيها مش مخرومه

طن تفاؤل
لما اسمع صوت عبد الباسط عبد الصمد

طن تفاؤل
لما اسمع جمله لا مساس بالدعم

طن تفاؤل
لما اقعد على شط القنال وملقيش سفن امريكيه معديه

هناك 88 تعليقًا:

صاحب المضيفة يقول...

الحمد لله أول تعليق

نحجز ونرجع

صاحب المضيفة يقول...

بعد كده نكتب براحتنا بقى

خلاص احنا خدنا اول تعليق وخلاص

المهم


اجابات جامده

وانا مش عارف انتي بتجيبي الاجابات دي منين


بجد


انت تنفعي سيناريست هايلة

يعني هاتمشي معاكي السطة وعال العال في السينما والمرسح كمان

ايوة المرسح

ربنا يبسطك كمان وكمان

سلامات يا خالتي

ابن حـجـر الـعـسـقـلانـى يقول...

و الله لو الحاجات اللى انت كاتباها دى بتبعث على التفاؤل ... فالمكان الوحيد اللى غالبية الحاجات دى متحققة فيه هو عند "أم ترتر" فى جنينة المشمش .. مش "فى المشمش" بس .. لأ .. جنينة بحالها

ثم انت بتشجعى الأهلى ليه ؟؟ انت مش من السويس ؟؟ يبقى المنطقى إنك تشجعى أسمنت أسيوط

mohand يقول...

السلام عليكم

طن التفاؤل
لما الاقيني رابع تعليق عندك
يا رب الحق


انا الحمد لله بخير
وبصحة جيده
انتي اخبارك ايه؟

Unknown يقول...
أزال المؤلف هذا التعليق.
Unknown يقول...

انا كنت آخر تعليق في التدوينة اللي فاتت كان نفسي اكون اول تعليق في التدوينة دي اكون حققت رقم قياسي لكن ماحصلش
خيرها في غيرها
ماشاء الله وحدة الأوزان عندكم الطن؟
خير والله

مروة الزارع يقول...

ياختى عليكى

الله عليكى

خلتينى اتافئل بجد

وحشتينى

نسيتينى كدة لية؟

ghalia يقول...

جميلة اوى يا فرنسا
ايه التفاؤل ده كلو

لما الاقى ميكروباص فاضى وقت الخروج من العمل او المدارس

بس دى بالذات واسعة أوى أوى

بس ربنا يسمع منك

عصفور المدينة يقول...

يا بنتي الناس اللي صنعوا التاج ده كان نفسهم نطلع شوية من مود الكآبة حتى الراجل الطيب اللي عمله سماه تاج بالشيكولاتة أصلا انت حولتيه وبقدو قادر
تاج بالفرن

نقدر نقول بما أن الأشياء المذكورة متوفرة فقط بمزارع أم ترتر كما اشار بن حجر يبقى اكيد انت متشاءمة معظم الوقت

بس الحمد لله إن كل يوم العصافير بتصوصوصوصو

غير معرف يقول...

السلام عليكم مش شايفه ان التفاؤل ده كتير شويه لدرجه انه يوصل للوهم وان شاء الله يتحقق احلامك كلها حنين

غير معرف يقول...

جامده اجاباتك يا فرنسا هانم
بجد حلوة اوى

خصوووووصا موضوع الدعم والسفن الامريكانى

هههههه
وسلامات يا خالتشى
:))

رئيس جمهوريه نفسى يقول...

خالتى فرنسا اهلاويه يا جدعاااااااااان
يارب تكونى دائما وابدا متفائله وتعيشها على طول فى تفاءول الى هى حياتك وعلشان تكونى متفائله وردت للجمهوريه عندنا شويه كاوتش عجل استبن تحفه حجزت ليكى دسته جوانى ودستتين برانى

Unknown يقول...

واضح ان حضرتيك متفائله جدا جدا بس اظن ان الحجات دي مبقيتش موجوده او معظمها انقرض
واسأل الله ان يجعل حياتنا كلها تفاؤل
وجزاكم الله خير

فرنسا هانم يقول...

صاحب المضيفة
انا اللى اتشرفت بكونك اول تعليق
ومتشكره على السناء ده كله على كلماتى البسيطه التى تخرج من قلبى بكل تلقائيه
وبعدين مش اسمه مرسح
لا
اسمه
تراترو
بنت اختى سمعتها كده

فرنسا هانم يقول...

ابن حـجـر الـعـسـقـلانـى
عند ام ترتر بجد
لو كان كده تبقى سهله
ام ترتر حبيبتنا
وساكنه عند ام اللالى
صاحبه محلات دوخينى يالامونه
ابن حجر ياباشا
انا بشجع الاهلى من ايام ما كنا بنحط حجر الاساس للهرم بتاع خوفو
وصحيح انه منطقى اشجع اسمنت اسيوط
كلمه فى سرك
تعالى
هات ودنك
بجد بجد دمك عسل

فرنسا هانم يقول...

mohand
بجد
انت جنتلمان
احييك على ذوقك الجميل يا مهند
والحمد لله انى اطمئننت عليك

فرنسا هانم يقول...

مناجاة
لا
دحنا جبنا واسطه كبيره قوى علشان نخليها بالطن
ابن خاله جار ابن عمتى شغال عند جوز عمه واحد عنده ميزان كبير ادهولنا سلف

فرنسا هانم يقول...

مروة الزارع
اه
ليكى حق عندى
وانتى وحشتينى جدا
وهعاقبك على كده بانى ازورك دلوقتى واعملك هيصه بالعجله تحت المدونه

فرنسا هانم يقول...

ghalia
ههههههههه
ضحكتينى
واسعه جدا صح
بس لما تحصل يبقى من حقى اتفاءل
صح ؟؟؟؟ظ

فرنسا هانم يقول...

عصفور المدينة
تاج بالفرن مع الشيكولاته
تبقى اكله ممتازه يا استاذنا
وصوتك من الاصوات اللى بحبها
فى الصوصوه
وفى العزف على اوتار التدوين

فرنسا هانم يقول...

حنين
وهم
وهم
بس ممكن تتحقق
ولو اتحققت
يبقى تفاؤل

فرنسا هانم يقول...

shayma
الله يبارك فيكى
وفى لسانك السكر
وفى زيارتك المعطره
بجد انا حبيتك جدا جدا

فرنسا هانم يقول...

رئيس جمهوريه نفسى
ايه ياريس
سمعت الجيران
انا كنت مخبيه الموضوع بتاع الاهلى ده
غريبه جدا ازاى انت عرفت ؟؟؟؟؟
انا مستغربه خالص انا كنت مكتمه على الخبر ؟؟؟؟؟؟؟
وشكرا على الكاوتشات
والاستبن
وانا مكسوفه اطلب
تاره
وكفتين
وجنزير
ورمان بلى
وكادر
وفرامل
وجرس
وجوز مرايات
وكرسى ورانى
وحماله
وياريت من كل نوع خمسه
للزمن
مكسوفه اطلب حاجه تانيه

فرنسا هانم يقول...

الفاتح الجعفري
ياريت كل ده يتحقق
وده يكون خير
وبعدين
فى حجات كتيره متحققه فعلا

فرنسا هانم يقول...
أزال المؤلف هذا التعليق.
دكتور حر يقول...

فرنستنا

يا فرنستنا

هو احنا قولنا نحلم

قولنا نتفائل من اللي موجود

ودتينا
عند ان ترتر
وام اللالي
واللمونه

خلينا هنا ونحلم يا خالتنا

بس ده لا يمنع ان اجاباتك جميله وممتعه كالعاده ربنا يخليكي لنا
ويتم شفاكي على خير ان شاء الله

3ala asm masr يقول...

لما أسمع نشيد بلادى بلادى بصوت الاطفال
الله عليكى يا فرنسا
وحشتينى اوى بجد
المهم أنتى تكونى كويسه
أدعيلى أنا بدأت أمتحانات

Barrak يقول...

طن احترام مني لهذا التفاؤل

غير معرف يقول...

ياسلام على اطنان التفاؤل ياخالتو

ربنا يديمها عليكي

بس بلاش ام ترتر دي الله يكرمك لحسن دي تبعث على التشاؤم مش التفاؤل خالص :)

جميلة حكاية العصافير اللى بتصوصو الصبح ..:)

بنت الصالحين يقول...

ايه الاجابات دى


والله العظيم انتى عسل
حلوة بتاعه اول شطه كبريت دى هههههههههههههههه


بس ياريت الحاجات دى كلها تتحقق
سلام ياخالتى

غير معرف يقول...

خالتي ربنا يجعل حياتك كلها تفاؤل يارب ويسعدك دايما وتصدقي فكرتيني بتاج فعلا عندي هروح اجاوب عليه يالا ربنا يجعله عامر

القلم السكندري يقول...

زادك الله تفاؤلا .. وفرج همومك

وياريت تفتكرينا بنص طن تفاؤل علي سبيل المعونة عشان مفيش اكتفاء ذاتي

وتحياتي

littel angel (2alb el 2ased) يقول...

saba7 el 7'eer ya 7'alty :) ... de awel mara azore feeha modwantek 2wo salonek be ma3na as7 ... gameel gedan wallahy wa damo 7'feef ... wa beeb beeb ahly...beeb beeb ahly hahahaha

فرنسا هانم يقول...

دكتور حر
دكتورنا الحبيب
يسعد مساك قوى قوى
ام ترتر وام اللالى من ابطال المقاومه اللغويه
وهما اللى اكلوا السمكه حتى رأسها
بس ابطال من ورق
وسيبك منهم
خلينا فى موضوعنا
انا فعلا بحلم
وخلطت الحلم مع التفاؤل
علشان يطلع عصير
مستقبل بتمناه
ربنا معاك ويكرمك

فرنسا هانم يقول...

3ala asm masr
كنت حاسه ان غيابك ده وراه حاجه
بس الحمد لله انها طلعت الامتحانات
ربنا يوفقك
وينجحك
وينور بصيرتك
يا هند يابنت اخت فرنسا هانم

فرنسا هانم يقول...

Barrak
و2 طن شكر منى لهذه الزياره
مين يزود ؟؟؟؟؟؟

ا بـن عــمــر يقول...

طن تفاؤل
الواحد
محتاج
1000000
تفاؤل

فرنسا هانم يقول...

همسة قلم
نداء الى اصحاب القلوب الرحيمه
نداء من فرنسا الى كل الوحدات
نداء
عندى سؤال محيرنى
ومش عارفه اجابته
ليه ساعات الاسم بتاع المدونه فى التعليق ساعات بيظهر اسود
ولما اضغط عليه ميروحشى للمدونه
اللون ده ظهر فى تعليقك همسه قلم وفى تعليق حنين
وبيظهر كتير ؟؟؟
اريد حلا

فرنسا هانم يقول...

عاشقه الفردوس
ياريت والله يا اجمل عاشقه لاحلى فردوس
لو اتحققت
ابقى
متفائله فرى ماتش

فرنسا هانم يقول...

قلوب حائرة
الحمد لله انى فكرتك
ها
استاهل ايه ؟؟؟؟؟؟؟؟

فرنسا هانم يقول...

القلم السكندري
تجاره داخليه يعنى ؟؟؟؟
مفيش مانع
انتوا ميناء
واحنا ميناء
والموانى لبعضيها
جارى ارسال المعونه
يرجى التأكد من خدمات الشبكه

فرنسا هانم يقول...

littel angel (2alb el 2ased)
يمكن يكون خفه الدم من الزوار الكرام
واهلا بك فى اول زياره
وبيب بيب اهلى

فرنسا هانم يقول...

ا بـن عــمــر
بلاش طمع يا ابن عمر
ناخد الطن الاول
وبعدين نفكر فى ال 100000 طن
هو الرقم ده اكتر من 200 طن بكتير؟؟؟؟

فرنسا هانم يقول...
أزال المؤلف هذا التعليق.
بنوته مصرية يقول...

بحد بجد اجابات تحفة

خليتني بجد احلم بكل ده

انتي مية مية يا فرنسا بجد وتجنني

اختك رودي

Desert cat يقول...

طن تفاؤل
لما الاقى فرنسا كاتبة بوست جامد كله تفاؤل فى تفاؤل
مش عارفه ليه بحبك اوى كدا
انتى تعرفى ؟

غير معرف يقول...

ربنا يخليكى يا فرنستى
انا كمان حبيتك جدا جدا جدا جدا جدا جدا جدا

:)))))))))))
ربنا يديم المحبه يارب
:)))

رفقة عمر يقول...

عجبتنى كل اجاباتك
وخصوصا لما اسمع كلمه ماذون
انا كمان باحس بالتفاؤل
ربنا يكرمك يارب وتسمعيها فى بيتكم قريب جدا
المهم اخبار صحتك ايه يارب تكونى بقيتى احسن

فرنسا هانم يقول...

بنوته مصرية
شكرا يا رودى
انا سعيده جدا بيكى وبكلامك
اشكرك جدا
ويارب كلنا نتفائل

فرنسا هانم يقول...

Desert cat
طبعا اعرف
شوفى يانانا
فى تقارب ملامحى استراتيجى بينا
يعنى ايه؟؟
انا مش فاهمه لكن هقولك
انا بحب الكتابه الساخره
وانتى كمان
وانا بحب مصر وبغير عليها
وانتى كمان
انا بنت مرحه
وانتى كمان
انا بحبك
وانتى كمان
فهمتى حاجه ؟؟؟؟
وانا كمان

فرنسا هانم يقول...

shayma
امين يارب
انا بدعى من كل قلبى

فرنسا هانم يقول...

رفقه عمر
انا الحمد لله كويسه جدا جدا
ويارب
المأذون يدخل كل البيوت
بس علشان يجوز بس

دكتور حر يقول...

خالتنا

بالنسبه لتساؤلك عن الاسم اللي بيطلع اسود

في ناس ساعات بتكسل تعمل تسجيل دخول للمدونه
فبتكتب اسمها في الخانه اللي جنب
Nickname

فبيطلع الاسم من غير رابط

بس

عــلاء ســالـــم يقول...

السلام عليكم

إجابات جميله والله وفي منتهى العمق والموضوعيه.
لو الأشياء اللي ذكرتيها دي حصلت مع بعضها في نفي الوقت نقدر ساعتها نقول ان فيه أمل غن البلد دي حالها يتصلح
تحياتي

كاميليا بهاء الدين يقول...

ليدى فرنسا

توقيت رائع للتاج

انا هاعتبر الاجابات دي كلها أمنيات العام الجديد
وادعو الله ان يحقق لك كل ماتمنيتى يارب آمنية آمنية
ويزيدك عليها الصحة وسعادة القلب وراحة البال يارب

كل عام وانتى بآلف خير
عام سعيد عليكي

مع حبى

كاميليا

مدحت محمد يقول...

خالتو فرنسا
اولا مبروك ياستى التاج
تاجاتك كترت
وهبتدى احسد
بسم الله ماشاء الله ياعم
ماشاء الله كل ده تفاؤل
حاضر وماضى واتى ومستحيل
حدوثه
بس ماله جلجل
بس
انا عاجبنى فيه والله
انى شايف انى البلد اتظبطت حبة
حتى لو التخطيط زى مانتى قلتى قبل كدة قبل ماسعادته يشرف
بس فى عهده اتنفذت الافكار تحسبله برضه
الخوف انى يجى واحد ينهب ويمشى
زى كتير قبليه
بس برضه السويس مش هتجيب محافظ زى تحسين شنن
ماعلينا شكلى طولت
ربنا يديم عليكى السعادة والتفاؤل دايما ياخالتو

المهـ إلي الله ـاجر يقول...
أزال المؤلف هذا التعليق.
المهـ إلي الله ـاجر يقول...

ما أحلي التفاؤل و اعظمه من نعمة نعطر مرار الأزمات


طن تفاؤل : ان استيقظ من نومي فأجد أن الحياة ما زالت تدب في واني استطيع ان اتوب من ذنوبي

Empress appy يقول...

لا بلاش مطبات
ومبروك عليكى التاج عقبال يا رب كده التاج بتاعك وانتى عروسه حلوة فى الكوشه والله وأجى ازفك ببطوط عربيتى الصغيرة بس ساعتها هبرشط على اى حد من أصحابى واجيب عربية اكبر وافضل معاكى لاخر الفرح
ويار ب كل اللى بتتمنيه تلاقيه

الطائر الحزين يقول...

طن تفاؤل بحالة

انتى عارفة طن التفاؤل وصل لحد كام دلوقتى

ما انتى مش هاهمك حاجة

جبل عتاقة جنبك وبتحملى منه تفاؤل براحتك


انتى عندك تفاؤل لما الكبريت بيولع من اول شطة

انا بقى لما أدور عليه والاقية اصلا

تحياتى

klmat يقول...

طن تفاؤل
لما عرف مكان ام ترتر
ردودك جميله وتعليقات
حبايك دمها خفيف
وسلامى لأم ترتر
وربنا يفرح قلبك
وتكونى متفائله دايما
تحياتى لك

rainbow يقول...

الاخت الغالية فرنسا هانم

حبيت اقولك كل سنة وانتى طيبة ويا رب تكون 2008 افضل من الموكوسة 2007 على جميع اصعدة حياتك

تحياتى لاجاباتك المليئة بالود الانسانى الصافى وهذا التوق للجمال فى كل ما حولك الذى ينم عن روح جميلة لانسانة اجمل

دمت بكل خير وسعادة
حبى ودعائى

هدى

سلوى يقول...

يارب كل اللي إتمنتيه يتحقق
يا فرفورة
عند أم ترتر
عند أم خرز
المهم يتحقق
ولو حتى بالحلم

دمتي بكل خير عزيزتي

د/اجدع بنوته يقول...

ههههههههههههههههههههههههههههههههه

هههههههههههههههههههههههههههههههههه

ههههههههههههههههههههههههههههههههههه

اجابات طالعه م مواطنه مصريه صرف زى السكرررررر

ههههههههه عسل عسل ياخالتوو

تسلم ايدك

MerMaid يقول...

فرنسا هانم ست الهوانم يا أحلي هانم و ستهم كلهم

بجد ربنا وحده يعلم انا حبيتك قد ايه النهاردة انتي والاخت خيخة

بجد والله في ناس كدة نضاف و دمهم خفيف زيكم الواحد يفتخر بمعرفتهم و المرور عليهم

حقيقي انا سعيدة
مدونتك روعة روعة روعة
و يكفي ان عندك هنا اسماء عظيمة من المدونين اللي بفتخر اني بدون معاهم رغم الفارق بيني و بينهم

ربنا يكرمك يارب
و يوفقك و يرضي عنك

:))))
تحياتي

MerMaid يقول...

احب اضيف لك حاجة كمان

كل بوستاتك روعة روعة روعة

و بجد غيرتي رايي في حاجات كتير
ربنا يوفقك و يرضي عنك يارب

:))

فرنسا هانم يقول...

دكتور حر
دكتورنا الحبيب
محمد
والله
والله
والله
انا حاسه ان المدونه دى
عمادها الاساسى
د / حر
لان معنى ان انت تجاوبنى على تسألى
انك متابعنى كويس
انا فرحانه بيك قوى
ومش هقدر اقولك اكتر من كده
انا اتشرف انى اكون خالتك بجد
وعلى فكره
فى ناس تانيه محوطين المدونه دى
بجناحهم
وحبهم
وانا بحبهم جدا جدا

فرنسا هانم يقول...

علاء سالم
عمنا علاء
كله يتحقق مره واحده ؟؟؟؟
بلاش طمع
حتى لو فى اوقات متفرقه
المهم يتحقق

فرنسا هانم يقول...

كاميليا
تصدقى انها جات صدفه
فعلا
العام الجديد على الابواب
ودى تنفع امنيات للعام الجديد
برافو كاميليا

فرنسا هانم يقول...

doha
تحسين شنن
الله يرحمه
هو فى محافظ هيجى زى تحسين ؟؟؟؟
يااااااااااااه
فكرتنى بيه
وبفتره توليه المحافظه
فتره مذدهره فى حياه السوايسه

فرنسا هانم يقول...

rainbow
هدى
سنه 2007 مش موكوسه قوى
لا
سنه 2007 انا عرفت فيها عالم التدوين
وعندى اصدقاء
واتعرفت بيكم
علشان كده انا بعتبرها
مش موكوسه قوى
رغم الكسور

وانا كمان بقولك كل سنه وانتى طيبه

فرنسا هانم يقول...

المهـ إلي الله ـاجر
المهاجر الى الله ممن يرعون مدونتى ويهتمون بها وانا اعجز عن شكرك
ويارب تقدر وانا اقدر
نتوب عن ذنوبنا
كل سنه وانت طيب

فرنسا هانم يقول...

appy
فرحى ؟؟؟؟؟؟؟؟؟؟
الكوشه ؟؟؟؟؟؟؟؟؟؟؟؟
حلم ده ولا علم
انا عارفه انك هتقدرى تنفذى كلامك
لكن جواز فرنسا باطل
جواز فرنسا باطل
باطل ايه هو فى اصلا جواز ؟؟؟؟؟

فرنسا هانم يقول...

الطائر الحزين
جبل عتاقه جنبى اه
لكن مقدرش ادوس فى التحميل
الكارته تمنها ولع
لو عايز كبريت
قولى
اختك سداده
من عود لميه
وشطاطه كمان
يلا
انشاله ما حد حوش

فرنسا هانم يقول...

klmat
بس كده
غالى والطلب رخيص
اكتب عندك
درب التبانه
كوكب الارض
قاره افريقيا
ج م ع

فرنسا هانم يقول...

Salwa
ام خرز كمان دخلت القائمه
كويس
ام ترتر
ام اللالى
وام خرز
كويس
وربنا يحقق لك انتى كمان كل طموحاتك واحلامك
وكل سنه وانتى طيبه
وعام سعيد

فرنسا هانم يقول...

د/اجدع بنوته
ربنا يدوم ضحكتك
واشوفك دايما مبتسمه يا رب
كل سنه
وانتى
عسل
وسكر

فرنسا هانم يقول...

MerMaid
انا متشكره على الاطراء ده كله
وده اكبر منى بكتير
وخيخه تستاهل فعلا المحبه
انا بحبها قوى
بس اوعى تقوليلها علشان
متتمرعش فيها
انا سعيده بيكى
وبكلامك
جدا جدا

منوفيـــايــة يقول...

السلام عليكم
اسمحيلى انضم لمعجبينك بجد مدونتك جميلة وبالذات اخر بوست بتاع التفاؤل ده هوا لوحده يبعث على التفاؤل بس انتى بجد دمك شربات...ربنا يكرمك ويوفقك يارب.

فرنسا هانم يقول...

مستجدة
ممستجده انت فعلا مستجده على المدونه
ومدونتى اتشرفت بيكى جدا جدا
لكن عندى سؤال مهم
انتى لو جيتى مره تانيه هتبقى برضه مستجده ؟؟؟؟؟

غير معرف يقول...

السلام عليكم ورحمة الله وبركاته
فرنستى الجميله
اولا كل عام وانتى بالصحة والسلامة بمناسبة عيد الاضحى والسنة الجديده
وان شاء الله تكون سنه سعيده على امة الاسلام اجمع
ثانيا والله عتابك ده على عينى لان الابناء كانو بعافية شويه من قبل العيد لحد اليوم والحمد لله على كل شىء وكمان النت عندنا مقلكيش عاوز شويت سلر ويتولع فيه
وبعدين انا مقدرش على زعلك يا قمرة المدونات وسكر سنترافيش المسكريين كلهم

اما بخصوص التفاؤل فهو مطلوب جدا النهارده وخصوصا فى ظل الظرف القاسية التى نعايشها حاليا
لنا الله احتى الحبيبة سلامى اليكى والى صالونك الرائع
اختك ام الابناء
راجية عفو الله

Unknown يقول...

طن تفاؤل
ان الاهلي يكسب
مهي دي القاعده و الاستثناء طن تشاؤم انه يخسر

فرنسا هانم يقول...

ام الابناء
راجية عفو الله
الف الف مليون سلامه على الاولاد
البرد مش سايب حد فى حاله
انا بعتب عليكى من حبى ليكى بس
لكن
الاولاد اهم من الزيارات واهم من اى حاجه تانيه
خلى بالك منهم
والف سلامه ليهم
وادعوا الله لهم بالصحه والعافيه
واهم حاجه انى سمعت صوتك الكروانى
سلام لاختى العزيزه
ام الابناء
راجيه عفو الله

فرنسا هانم يقول...

Mohamed_sobhy84
طن تشاؤم ان الاهلى يخسر
تبقى انت اهلاوى
لانك عكست الكلمه
وعكس العكس ايجاب

عاشــــــ النقاب ـقــــة"نونو" يقول...

كلامك كله رائع وحقيقي جدا ودمه خفيف مع انه بيعيطني وجزاك الله خيرا

فرنسا هانم يقول...

nonoymm
مرحبا بكى فى اول زياره
والكلام الساخر
ديما يضحك ويبكى

غمض عينيك يقول...

طن مرح وابتسام

لما بدخل المدونة عندك يافرنسا هانم

فرنسا هانم يقول...

غمض عينيك
شكرا
ويارب كتر المرح والتفاؤل