اصدقائى واحبائى
كل سنه وانتم بخير
واللى عنده بلوفر او جاكت صوف ميلبسوش الايام دى خالص
انا عن نفسى ساعات اكون صقعانه والبس صوف جوه الشقه
لكن الايام دى وحياه امى ابدا
محدش ضامن
جزار يعدى كده ولا كده نروح بلاش
انا انهارده هكلمكم عن نفسى شويه
من حوالى كام سنه كده مش فاكره كام لكن متأكده انهم اقل من مليون سنه
كان عندى 34 سنه يعنى من حوالى خمس سنين
مجموعه من زميلاتى فى العمل عملوا منظمه سريه
وكان عددهم اربعه وترأسهم زميلتى فى المكتب (س) وهى الرأس المدبره لتلك المنظمه
وفى يوم دعت س باقى افراد المنظمه الى اجتماع طارىء لمجلس الامس واستمرت فاعليات الاجتماع لايام متتاليه
وخرج الاجتماع بقرارات ملزمه لجميع الافراد
القرار رقم 6678 لسنه 2002 ونص القرار
مطلوب عريس لفرنسا فورا
وتعهدت كلا منهن بالف والدوران والبحث عن العريس
كل ده واختكم نايمه على ودانها
اصل انا معنديش مرتبه ولما بنام بنام على ودانى
كل الاجتماعات دى وتوزيع الادوار والذى منه وانا فى الباى باى خالص
المهم
فى يوم جات زميلتى س وقالتلى
فرنسا فى عريس عايز يتقدملك
رديت عليها ومين هو العريس ده ؟
قالت صاحب خطيب اختى
سألتها وشافنى فين ؟
قالت شافك عندى وهو موصل اختى عندى فى البيت
طبعا انا هبله وعبيطه وصدقت كلامها ومخدتش خوانه
وفكرت شويه ولكن انا لسه مكنتش قفلت باب الجواز فوافقت
وطلبت منها قبل مقابلته لاخواتى انى اشوفه هنا فى المكتب
وفعلا
جه المكتب
ودخل ومسلمش على حد فينا
دخل زى النسمه المعديه وفضل واقف بكل ادب
وقلت له اتفضل
قعد صاحبنا وهو مؤدب قوووووووووووى
وفضل يبص للارض ومركز عينه على الارض وحاطط ايديه الاتنين على ركبه وعماله يفرك فى ايده
واستمر صاحبنا يفرك فى ايده
انا قلت يمكن نحله لسعته ولا حاجه وهو داخل الشركه
واستمر
يفرك ويفرك لغايه لما ايده صعبت عليا
المهم
زميلتى عملت نفسها ناصحه وقالت اروح اطلب حاجه ساقعه مع العلم انهاممكن تطلب بالجرس
قلت لها خليكى قاعده انت اختى
وبصيت على صاحبنا لقيته لسه بيبص للارض نفس الحته اللى كان بيبص عليها
هو فى ايه ؟
هو بيبص على ايه ؟
يكون جنيه ولا عشره جنيه واقعين منى وصاحبنا بيأمن عليهم
قمت من مكانى واتمشيت فى المكتب بحجه انى بشيل اوراق وبصيت على الارض ملقتش حاجه
رجعت مكانى
وقعدت
وبصيت لصاحبنا
لقيته
لسه بيفرك فى ايده
يمكن عنده جرب
لكن انا مالى هى ايدى ولا ايده خليه يفرك فيها براحته
المهم
قلت لزميلتى روحى هاتى حاجه صاقعه
راحت البنيه تجيب الصاقع وغابت
ولسه صاحبنا بيفرك فى ايده
سألته ازى حضرتك ؟
جاوب برعشه من راسه وبهمهمه فهمت منها انه عايز يقول انا كويس والحمد لله
وسكت
ورجع لايده
يخرب بيت ايدك سيب اللعبه دى وانطق قول اى حاجه
انا قلت كده فى نفسى
وعلشان انا معنديش وقت
قعدت اسرسبه فى الكلام
وهو زى العذراء الخجول
بعد ما زهقت انهيت الحوار واعطيته ميعاد يقابل اخواتى
وقابل اخواتى وكان فى غايه الادب والاخلاق
لغايه لما انا عن نفسى عجبنى ادبه
وقلت انا احب النوع المؤدب ده
وكده احسن من الشباب السنكوح بتوع اليومين دول
ووافقت
عارفين وافقت ليه
علشان الادب بتاعه والاخلاق العاليه
قبل الخطوبه
كنت فى المحكمه بعمل توكيل لمحامى العائله رغم ان صاحبنا محامى لكن محامى العائله عنده اوراقنا كلها
المهم عبقال عندكم كنت اشتريت حته ارض فى السلام منطقه عندنا فى السويس
وانا نازله من سلم الشهر العقارى لمحت صاحبنا واقف مع زميله
وعماله يضحك ويكركر ويتكلم بصوت عالى ويشوح بايده يمين وشمال
بصراحه
واحد تانى خالص
نزلت من على السلم وخدت ساتر قريب منهم واتصنت عليهم
وطبعا التصنت حرام
لكن
فضول منى
المهم سمعت كلام
من المنقى خيار
سمعت شرشحه وصرقعه مش قادره اوصفها
المهم
عملت للخلف در
وعلى البيت معتاده مرش
وعملت تحريات مكثفه على العريس
اتضح الاتى
العريس محامى تعبان قوى موله
عنده 34 سنه
شريب بانجو معتبر
وحشاش
وبتاع افراح ومطاوى وميه مساء على العيون المدعمسه
ومفلس
وقحطان
وكل الفرك والادب ده كان تمثيل على فرنسا
وهو عكس كده خالص
كل ده ليه ؟؟؟؟؟؟؟؟؟
عرف ان فرنسا عندها شقه وارض وفلوس فى البنك
ميعرفش ان الشقه تبع ورثه
والارض شركه مع جوز اختى والفلوس اللى فى البنك بح
راحوا فى الارض
على فكره
زميلتى س هى اللى جابت لى كل المعلومات دى
وخطيب اختها هو اللى جاب اراره اول ما عرف بالموضوع
وفى النهايه
تم فصل باقى افراد التنظيم
ومحو الطلب
وغير مطلوب اى عريس لفرنسا
الاشتراك في:
تعليقات الرسالة (Atom)
هناك 124 تعليقًا:
طب الحمد لله
ربنا أنقذك
منه
بس بيني وبينك لو كان زي الصوره اللي كان بيمثلها دي
كان هيبجى غلبان عليكي خالص
ولا ايه
آخد انا الساقع بتاع س بقى
ربنا يوفقك ان شاء الله
وادعيلي بشده
السلام عليكم ورحمة الله وبركاته
فيه ناس كتيراوي من النوعيه دي ، اللي تتمسكن لحد ماتتمكن ، وتفضل تتدحلب لحد ماتنول غرضها وبعد كده تظهر علي حقيقتها
الحمد لله انك اكتشفتيه قبل الفاس ماتقع في الراس
سلام يا قمر
الحمد لله يا فرنسا انها عدت على خيييييير
وسبحان من خلاكى تقابليه وتسمعى كلامه مع صاحبه
ويا ستى القادم افضل باذن الله
هما اللي بيناموا على ودانهم دول مشكلة
يعني انت الدقرمة دي كلها ويخيل عليك التمثيل ده يا بنتي سبحان الله انا مستغرب جدا ازاي ينجح إنسان في الخداع بهذه الدرجة طب ده ممكن الواحد يفهم الشخص من اول نظرة مش أول قعدة
امال كنتى ركنه العجله فين وانتى فى المحكمه
*********
بس انتى ربنا نجاكى
*****
يلا الجنة احسن
بلا عرسان بلا وش
ولا اقل لك
الحقى فى الدنيا احسن
فى الأخره محدش عارف
احنا فين
خالتي
الحمد لله إن ربنا انقذك وحماك منه
إنتي باين كدة عاوزة تجوزي
ومال أجيبلك عريس زي أفراد المنظمة السرية ما عملت
هنظم فرقة .....متخصصة في إحضار العرسان..والناس إلي عاوزين يجوزوا ..وإحنا نجوزهم
في ناس كتير هتتقبل الفكرة دي
إنتي عارفة الشباب والبنات اليومين دول
بس الفرقة هتكون أكثر تنظيما من فرقة "س"ظ
هههههه
والله إنتي دمك زي العسل
أخبارك إيه دلوقتي
عاملة إيه في البياض إلي عليكي ده
ربنا معاكي يارب
والله بدعيلك كتير
عموما كل سنة وإنتي طيبة
وعيييييييييييد سعيييييييييد
تحياتي لك
سلام
فكرتينى بموقف لسه حاصل معايا
اتى رجل لخطبة اختى
وقعد نفس القعدة ووشة فى نفس الحتة اللى كان باصص فيها صاحبنا
ازى حضرتك يرد يقول شوشوشوشو ايه ياعم
عرفت انه بيقول كويس الحمد لله
اسمك ايه
يرد يقول
(م)
ياعم اسمك ثلاثى
عندك كم سنة
يقول بالضبط 38
38 ايه يا عم انت شكلك معدى ال45
ماشى
بتشتغل ايه
مهندس مهندس
مهندس فى ايه يعنى
فى الزراعة
يعنى مهندس زراعى
بتشتغل فين
فى الميكنة
مؤهلك ايه
عمال اسئلة علشان يبدأ ينطق ويتكلم ويقول مؤهلاتة وهو عاوز ايه ومؤهلاتة ايه
ولا حياه لمن تنادى
فقلت له اتفضل اشرب
ورجع بلا عودة
حاجة تفقع
بصراحة
انا اظن ان الشخص الذى يتقدم للخطبة
يقول انا فلان عندى كذا وامكاناتى كذا
مقبول ولا مرفوض؟
ونخلص
لكن ادخل ايدى فى بقة علشان اطلع الكلام مليش مرار لكدة
تحياتى كل عام انت بخير
أحلى صباح وأحلى مسا على أحلى فرنسا
ياختشى انا فيوم قالولى انهم جايبينلى عريس واسمه ميعتز وياختشى الراجل داخل عامل فيها سبع البرومبه وكأنه جايب الديب من ديله وقاعد منفوش قوى بس برده مطاطى راسه
اخويا وجوز اختى يسألوه وده شششششششش
سااااااكت وعمالين يتكلمو فى مواضيع بحيث ينطق ولا يتكلم وده ولا هو هنا
الاول ربك والحق انا كنت عاملة مكسوفة بقى وبتاع - بس لما لاقيته كده قلت مبدهاش - هضيع قاعدة حلوة علينا ليه وقعدت اهرج مع اخويا وجوز اختى واغلس عليه بالكلام وده كل شوية يرفع يبص عليه بعينه بصه وينزل وشه فى الارض
مشى قلتلهم ده خير ان شاء الله بيتكسف قدام الناس ولا ايه - وعرفت بعد فترة انه هو كمان قال عليا لا - لانى على حد قوله خفيفة كده مش رزينة تقريبا كنت محتاجة ازيد فى الوزن قد ميتين كيلو كده علشان ابقى ثااااااااابت
ياختشى بلا هم
المهم انتى كويسة ولا ايه
خلصتى النيسكافيه اجيب تانى وانا جاية
وكمان يارب منساش اجيب معايا سلك الكهربا علشان اكهربك انتى والبت خيخة يا سفاحين نيسكافيهى
وحشتينى
خلى بالك من نفسك كويس
ها
سامعة يا بت
تحياتى يا قمر
هبة
جاته نيله
ده انتى ربنا بيحبك
ياخرابى ده انا لو مكانك وواحد جاى يتقدملى وعامل فيها وش كسوف كنت هاموت مشلولة
لا والاكادة انه طلع مش وش كسوف ولا حاجة وطلع بيعرف يهزر ويتكلم ويتمرقع مع خلق الله
كنت اديتيله على قفاه وانتى واقفة تتصنتى
بلا هم
اسيبك انا دلوقتى وهاعدى عليكى على المغربية كدة
وهاجيبلك معايا النسكافيه لحسن البت هبة دوبا مشردانى خالص عندك
عموما انا لسة قابضة الجمعية وهاخلى نسكافيه الشهر ده على حسابى
ماجبلكيش معايا حاجة تانى وانا جاية
انا هاخد فى ايدى الهدمتين دول اغسلهملك وهاجيبهم لما ينشفوا
وانتى حضرى الساقع
وانا هابقى اعدى اشوف اخبار العجلة ايه
اصل وانا طالعالك شوفت عيل من العيال عمال يلعب فى الجرس
يلا فوتك بعافية يا حبيتى
اختك خيخة
مش له فى الطيب نصيب..
هو اللى خسران
علشان لو كان مؤدب وجميل زى ما كان بيمثل.. كنتى هاتكونى هدية ربنا له..
اخد الشر وراح
وتحيا فرنسا حرة مستقلة
انا مستنية هدية العيد
مع حبى لك
كاميليا
على فكرة انا اكبر منك سناً ومتجوز .. يعنى ماليش مطمع..لا فى الارض ولا الشقة ولا فلوس البنك و لا حتى العجلة.. عشان كده هاخد راحتى فى الكلام
نتكلم جد؟
طيب حتى لو كان طلع زى مشاهد الفيلم الى وصفتيها فى مكتبك كنتى فعلا هتتجوزيه؟
احيانا بحس ان الناس الايام دى بتتجوز عشان تتجوز فقط موش عشان تستكمل قصة حب شريفة ومحترمة او تأتنس بروح شخص اخر ربنا رزقه بيه
متزعليش منى.. لو عرفتى نسبة الطلاق فى مصر الان اكيد هتقدرى تحددى كام فى الميه من نسببة الطلاق بيكون نتيجة الجواز على هذه الطريقة الشلنكباتية بتاعت بختك يا ابو بخيت
خللينى ااقولك الاتى
انتى الان حتى لو شارفت على الــ 40 لكن اسمك انسة افضل 100 مرة من اللقب اللعين اللى بيسمم حياة كل انسانة .. لم يكتب لها حظ فى انشاء بيت زوجية مستقر اامن مريح مسالم عمرااااااااااااان ليوم الدين بحاجة اسمها الاحترام اللى بيتبنى عليه الهباب اللى اسمه الحب
الجواز لمجرد الجواز؟ هو اكيد مشروع اجتماعى فاشل 100% و لن يستمر الا فى حالات نادرة للاسف
خدى بالك وفتحى عينك
و خللى بالك من العجلة دى اهم من كل عرسان الدنيا
اابقى ردى عليا لما تفضى
اخوكى الكبير / عمر
الشقيقة
أولاً كالعادة الله يسامحك
انا نزلت القاهرة ابارح وغالبا بانزل بالهدوم اللي علي
واخوكي، ماركة أنا مصري وابويا مصري، ولا باعرف ألبس غير من محل مصري
لقيت الجو تلج، قلت خلاص، أشتري من المحل اللي بحبه، موباكو، رحت اشتريت صوف، وقاعد لوقتي بشرب قهوتي، وأنا لابس البلوفر الصوف،
تصدقي بالله،من ساعة ما قريت كلامك وأنا قاعد بتلفت حواليا، لأحسن حد يغلط، حتى لو لون الصوف لا يمت للخرفان بصلة، بعد اللي كتبته مين عارف
الحاجة التانية
ربنا نجاكي من عريس الغفلة
وربنا يستر على بنات الناس ، كل سنة وانت طيبة يا شقيقة
ياحبيبتى ياخالتى
والله ربنا بيحبك
يلا بلا هم انتى كنتى ناقصه ده كمان
ليه يعنى
سبحان الله
كل اللى يعملو ربنا خير
وربنا يخليكى ياخالتى ويكرمك يارب
ياستى مش بيقولو
كلهم بيقولوا كده فى الأول
الحمد لله
إن ربنا نجاكة منه
وعرفتى الحقيقة
وانتو على البر
والله اعرف ناس فى منتهى التعاسة
لأنهم اكتشفوا للأسف متأخر
الحمد لله بجد
وفى الانتخابات الجاية
لازم تغيروا
رئيسة مجلس الأمن
*****
سلام يا قمر
أحمدى ربنا يا فرنسا يا أختى أنها جت على كده
أه
وربنا نجاكى منه وعرفتيه على حقيقته
أنا من الاول مكنتش مطمنه لفركة الايد دى
يلا خد الشر وراح
طمنبنا عليكى أنتى عامله أيه دلوقتى؟
ده عشان إنتى طيبة ونيتك صافية ربنا أوضحلك حقيقته قبل أى حاجة
بس أحلى حاجة الأمانة إللى عند الأخت (س) وخطيب صاحبتك
ربنا يوفقك وتشتريلك أرض لووووووووحدك
مش معقول
يخربت عقلك
أوعى تكونى بتسرحى بينا
زى العيل دة
دكتور حر
اخى
وابن اختى العزيز الفاضل دكتور محمد
انا بدعيلك من كل قلبى ربنا يوفقك ويسدد خطاك
قادر يا كريم
اللهم افتح له ابواب رزقك
وابواب رضاك
اللهم بارك له
وارزقه الطريق المستقيم
امين
وبالهنا والشفا
احسن صاقع اجيبه لك بايدى
خالتك جدعه برضه
خمسة فضفضة
هى فعلا جات صدفه
وفعلا فضل يدحلب
لكن
انتى عارفه
عمره ماكان هيتمكن
ده كان هيقع مع فرنسا
كنت هوريه صوابع النمله صابع صابع
واخليه يقص للناموسه ضوافرها
غير العجله
كان هيبقى محامى الصبح
وعجلاتى باليل
صانعة الحرية
انا طبعا بحمد ربنا كثيرا
ولكن
لو كان كمل المشوار
كنت هعمل فيه عمايل
ربنا نجده من ايدى
كنت هخلص فيه التمثيل اللى كان بيمثله
واحجز له عنبر كامل فى العباسيه
وعلى حسابى
العجله اليومين دول شغاله على ودنه
وبفكر اركب لها مقطوره
ونعدى المليار
عصفور المدينة
استاذنا
وكبيرنا
ونواره مدوناتنا
تعرف يا باشمهندس
النصاب او محترف التمثيل
بيبقى جامد اوى فى اداءه
وعلشان انا معنديش لؤم
صدقته
ولو كان كمل المشوار
واكتشفت حقيقته بعد كده
كانت امه هتبقى دعت عليه فى ليله مطر
ا بـن عــمــر
عندى قفل صينى صنع تايوان مستورد من تايلاند
بقفل بيه العجله
ويا ويله اللى يقرب من القفل
العجله تعضه
ا بـن عــمــر
حيرتنى بقى
دنيا ولا اخره
ارسى لك على قاره
ها
دنيا ولا اخره ؟
عبدالرحمن ياسين
ازيك يا عبد الرحمن
لا
انا مش عايزه اتجوز
زمن الصبا ولى وراح
وبلاش التنظيم ده
لحسن نزوح وراء الشمس
هو وراء الشمس فيه ايه ؟؟؟
حلو اوى مشوار المحكمة ده جالك على فايده
اصلك بنت حلال علشان كدا ربنا انقذك
اموااااااااااااه
الطائر الحزين
ده كلاكيت تانى مره
نفس الحكايه
ونفس الشخصيه
هو بيعدى على كل المحافظات ولا ايه ؟؟
خد بالك منه كويس
وتبلغ الحكمداريه
من فرنسا هانم الى العريس القاطن بدير النحاس
اشرب الدواء الذى ارسلت جارتك فى شراءه
الدواء مفيد لحالتك
الدواء مفيد لحالتك
سلامى للقمر المنور
بهجه المدونه
ام الابناء
راجيه عفو الله
بصى بقى .. بعد الكلام اللى أنا شوفته فى التدوينة و الكلام اللى الناس قالته فى التعليقات .. أنا ان شاء الله لما هاروح أخطب أول حاجة هاعملها لما أشوف العروسة هى إنى هاروح ضاربها بفاس فى دماغها عشان مايقولوش على خجول
ثم يا جماعة مش عيب عليكم كدة تتجمعوا تشربوا نسكافيه لوحدكم ؟؟ أمال القهوة اللى إحنا فاتحينها دى إحنا فاتحينها ليه ؟؟ دة إحنا كمان ممكن نعمل خدمة صيانة العجل عشان خاطرك و الله يا فرنسا .. اللى ييجى عندنا يركن عجلته .. و احنا نقوم بعمليات الصيانة الدورية من تنظيف بالجاز و تشحيم المحاور و تغيير كاويتشات الفرامل و تزويد العجلات هوا .. و كله بالمجان يا جدعان .. بس انتم شرفونا و اضربوا النسكافيه عندنا
Doba
دوبه حبيبتى
اجدع هبه
فى الكره الارضيه
انا فعلا خلصت النسكافيه
وبلاش تظلمى خيخه
هى شربت النص بس
وانا شربت النص التانى
وعلى فكره انا مش عايزه اتعبك معايا
هاتى معاكى
النسكافيه
وكام كيلو لحمه علشان العيد
وشويه مفروم
وشوال فحم
وقفصين تلاته فواكه
وكاكا
وموز كتير
وتلتميه او ربعميت علبه عصير
وعيش
ومخلل
وشاى وسكر
وبس
هههههههه
ياخالتو الحمد لله انه ربنا نجاكي منه
بس تصدقي
انا كانت صعبانة علىّ ايده من كتر الفرك بس في الاخر قلت احسن يستاهل :D
كل سنة وانتي طيبة ياأعسل خالتو في الدنيا
وبعدين فين العيدية اللى قلتي عليها :D
السلام عليكم
كان داخل علي طمع ياختي
ايه العالم دي
بس سيبك احمدي ربنا انك خلصتي منه
تحياتي
ربنا يعافينا من صحاب الوشين ده
على العموم ربنا كرمك ومش وقعك الوقعة المهببة دي
لكن اللي بيحب يوجب معاكي المفروض يوجب عدل ولا بلاش
على العمو ملحوقة لسه وربنا يرزقك بأحسن منه إن شاء الله
وبعدين ماله النونم على الودان على الأقل لاقيتي حاجه تنامي عليها أحسن من غيرنا كتير مش لاقيين حاجه يناموا عليها
ادعيلي كتير يا حاجه فرنسا هانم
وربنا يقومك بالسلامة يارب
السلام عليكم
احلى حاجة عجبتنى اصحابك الاربعة...شكلهم بيحبوكى قوى
وكفاية ان نيتهم كانت خير
ربنا يديم عليكى محبة الناس
اخبارك ايه يا جميل دلوقتى ؟؟
الحمد لله برضه ان الجبس ده جاى فى عز السقعة...يعنى تكييف منه فيه
:)
انا جيت اهه
ومعلش اتاخرت عليكى بس الشمس ماكنتش شايفة شغلها النهاردة كويس ومنشفتش الهدوم بسرعة
المهم انا حطتلك الهدمتين فى الدولاب
وعندك اهه نسكافيه بتاع الشهر وجبتلك كمان كاكا
عارفاكى بتحبيها يا مضروبة
الواد ابن الجيران
اللى كان بيلعب فى العجلة
لقيته خرم الكاوتش ابن الايه
بس ولا يهمك
انا وديتها تتلحم وهاستلمها بكرة
وجبتلك شوية موز يستاهلو بقك
يلا اسيبك بقى ترتاحى وهاجى بكرة اشقر عليكى
اتغطى كويس
تصبحى على خير
اختك خيخة
بت خيخة وأى كلام
احسن انه طار
وش كسوف ؟؟
دى وش مكشوف
خيخه الحقينى دوبه جايبه سلك الكهربا وراسها والف سيف تكهربنى
وانتى عارفه انا متشحوره اصلا
ومش هقدر ادافع عن نفسى
وطالما انتى قبضتى الجمعيه
يبقى اشطه
هنهيس
وهنجيب احلى نسكافيه
واحلى فواكه
وخلى بالك
انا لميت لم من الوقعه دى
كل اللى داخل واللى طالع يحط فلوس تحت المخده
حكم اختك فرنسا صاحبه واجب والناس بيردوا الواجب
لغايه لما فكرت اعمل للمخده جيوب
يعنى انا متحينه
والاشيا معدن
وهنضرب نسكافيه بالهبل
مين العيال اللى بيلعبوا فى العجله ؟
اكيد مقاصيف الرقبه
ولاد ام دبوه
كاميليا
عاشت فرنسا حره مستقله
بدون اللئام
انا هجبلك معايا احلى هديه عيد انتى تأشرى بس بصابعك الصغير
وخالتك
تقولك شبيك لبيك
كل سنه وانتى طيبه
Omar... خروشات
انا عارفه انك مالكش مطمع فيا
وعلى فكره انا بجد بعامل الاحباب المدونين على انهم اخواتى
بمعنى انى ممكن اقول لمدون او مدونه حبيب فرنسا
او حبيبه فرنسا
احنا كبار على عمليه المطمع دى
اما عن سؤالك
انا فعلا كنت شبه موافقه
ولولا الحوار السحرى اللى بدون معاد كنت هتجوزه
وفى الحاله دى لو كنت عرفت حقيقته بعد الجواز
كان هيندم ندم عمره
اخى عمر
فرنسا صعبه شويتين
انت عارف
انا واعوز بالله من كلمه انا
كنت هخليه يرسم واحده قرعه على الحيطه ويفليها
لا
بجد
كنت هاخد تارى تالت ومتلت
يوميات عيل مصري
اخيرا دفعنا وصل النور المتأخر
ورجع النور تانى
يااهلا
بالغايب يا اهلا
وشك ولا القمر
العيال بتوع الحته بيقولولى يا طانط فرنسا كل يوم بعد ما تقفلى المدونه وتروحى
واحد بيجى يتسحب ويدخل ويقعد جوه وميعلقش
قلت مين يابت يا فرنسا اللى بيعزك قوى ومعلقش على التدوينه اللى فاتت
يبقى مفيش غيره
احمد باشا الجزار والى عكا
على فكره
البس صوف ومتخافش
انا هعمل نشره باوصافك
واوزعها على كل الجزارين
لا
متزعلش
انا عامله نشره باوصافى انا علشان انا مبحبش الصقعه
ومحدش ضمن
فى جزارين حول
والسكينه طايله
وانا مبقدرش استغنى عن الصوف
واحسن حل كتبت على البلوفر اسم فرنسا
ورقم الفانله 5
علشان عبقال ميوصلوا لخامس يوم العيد يكونوا تعبوا
قصدى على الجزارين
عاشقه الفردوس
فعلا انا مكنتش ناقصه
لكن باين عليه امه بتحبه اللى اتفضح قدامى
قبل الفاس ما تقع فى الراس
ونتجوز
وساعتها
كنت هعرف حقيقته
واتحول الى جودزيلا
واقرمشه
princess dodo
لا
دول عملوا الانتخابات من وراء ضهرى
انا مكنتش اعرف التنظيم السرى ده ولا كنت باسمع عنه خالص
والا كنت بلغت فيهم
وودتهم وراء الشمس
اما بعد كده فصلت المجلس خالص
3ala asm masr
هند حبيبتى انا بستمد قوتى من تواجدكم حولى
حلوه بستمد دى ؟؟؟
من فعل استمد
يستمد
استعدادا
زى شرب
يشرب
عصيرا
انتى ايه اخبار امتحاناتك ؟
طمنينى انتى عليكى
فزلوكة
انا مبحبش اى حاجه لوحدى
حتى لو ارض
انا احب اقعد مع الناس
واتكلم مع الناس
واكل مع الناس
واتفسح مع الناس
واتخانق مع الناس
واعمل مقالب فى الناس
واضحك مع الناس
انا فعلا بحب الناس
fawest
شكرا
Desert cat
هو جه بفايده بعقل
جه باحلى فايده
نسيتى تقولى كل سنه وانتى طيبه يا فرنسا
اقولك انا كل سنه وانتى طيبه يا احلى قطه
ابن حـجـر الـعـسـقـلانـى
وانا من هنا بقول استراحه الكاشفه
احلى استراحه
مشاريب بالمليم
استراحه الكاشفه
كله بالمجان
انا عندى فكره
انا طبعا مش هقدر اقول لضيوفى محدش يجى عندى وكله يروح استراحه الكاشفه
ما تيجى أأجر لك بوفيه كبير فى المدونه
وتعمل فيه الشغل اللى انت عايزه
ويبقى
فرع استراحه فرنسا
همسة قلم
هى العديه موصلتش
اجتماع فورى لكل سكان المدونه
حالا
فين العيديه بتاعه همسه قلم؟
ليه موصلتش ؟
ومين السبب ؟
مش عايزه كلام ؟
ايه فى ايه محدش جه انهارده
امال انا بكلم مين؟
ليكى عندى احلى عيديه
وكل سنه وانتى طيبه
mohand
طبعا الحمد لله على كل الاحوال
وكويس فعلا ان ربنا نجانى منه
ونجاه منى
كل سنه وانت طيب يا مهند
الحمدلله ان ربنا نجاكى منه على خير
بس انا الى مجننى انتى ازاااااااى سبتيه دانتى كان لازم تقفشى فى زمارة رقبته لحد ميبانلو اصحاب
ههههههههههه
يلا الحمدلله
انتى صحتك عامله ايه دلوقتى
farance:
yala sob7an allah rabena 2al el tayebon lel tayebat o el 7'abeson lel 7'abesat ya3ny el 7amdo lelah rabena nagaky ya fandem
yalla saba7ek 2eshta
byes
الحمد لله انتي ربنا بيحبك وعلي فكرة مفيش راجل خجول للدرجة دي الحياء موجود ومطلوب في الرجالة ومن الايمان كمان بس دة خجل مصطنع لان مفيش راجل ينفع يبص للارض ومش هيكون فية سيدنا محمد عليو افضل الصلاة والسلام كان اشد حياءا من العزراء وفي نفس الوقت كان لا يخجل من الكلام وقول الحق يارب يكون وصلك المعني وعرفت اشرح
سلام ياقمر
نسيت اقولك حاجة انا مرة جالي عريس كان جريء جدا ومن اول مرة عشان يشوفني كان صوت ضحكة جايب اخر الشارع ولما شافني قالي انا عايزة اشرب قهوة وانتي تروحي تعمليها وقال لمامتة قدام بابا وماما انتي لازم تشوفي شعرها انا ماخدش سمك في ميا وكلنا كنا بنضحك علية وعلي جراتة في ناس اعتبرتها عيب وانا اعتبرتها ميزة لانة واضح وصريح وفعلا كان محترم مش معني كدة انة كان متشرد ووحش
الانسان لازم يحس الي بيقولو ويظهر الي جواة عشان الناس تعرف تقراة والي مش عاجبوة ميحبوش مش كدة برضة ولا اية
اولا كل سنه وانتى طيبه يا فرنسا هانم
ثاتيا: هى ليه لما واحد او واحده تتاخر فى الجوزا بتبقى مشكله قوميه لكل العرب كان حل مشكله الاخ او الاخت الى لسه متجوزش هو حل مشكله العرب كلها
يا ستى عادى النوعيه دى منها كتير ومن المحامين كمان انا مش محامى بس والله فى محامين عايشين على كده يطلق الست وبعد العده يتجوزها وتنزل تدور على محامى يطلقها من المحامى الاولانى وتحى نقابتنا الغاليه الى مش ناويه تنضف
انا زعلانة
سلام
الحمد لله انك عرفتيه على حقيقته من الاول
على فكرة الحركات دي والادب الزيادة عن اللزوم اللي بيدي على حياء البنات ده مش مطلوب في الراجل
بس ربنا بيحبك يا فرنسا
ربنا يسعدك يارب
كل سنة وانتي طيبة
صاحب المضيفة
طبعا بدعيلك وبدعى لكل اخوانا
ربنا يبارك فيك وينور لك طريقك
ويرزقك رزق طاهر وحلال
خلى بالك دى دعوه من القلب
يعنى مش متكلفه ولا لغه ولا حاجه
اما عن النوم على الودان
كل ما الواحده تنام اكتر ودنها تطول اكتر
Jana
تكييف منه فيه
وبدون كهربا
ما الكهربا غلوها
انا متشكره على سؤالك
واطمئنى علي
هانت كلها كما يوم وافك شويه من الجبس
Desert cat
هو بجد مشوار المحكمه جه بفايده
لكن انقذه هو من ايدى لو كنت عرفت حقيقته بعدين
امواااااااااه
بت خيخة وأى كلام
خيخه يا حبيبتى
شكرا على الهدوم
وانشاء الله اغسلك واكوى لك
يوم فرح شريف يارب
ومتشكره على النسكافيه
ومتزعليش
هاعزم دوبه
معايا
اصلها بتحب النسكافيه
وكمان علشان الفضايح
معلش
هى العجله كلفتك كام ؟؟؟؟؟
shayma
ما احنا كنا على البر
وكل واحد راح لحاله
لكن لو كنا اتجوزنا وبعدين اكتشفت حقيقته
كنت زمانى بابعت له مصاريف العلاج فى مستشفى العباسيه لدلوقتى
Sola
طبعا الطيبون للطيبات
والخبثون للخبيثات
والحمد لله ان ربنا كشفه على حقيقته
شكرا
بس ليه انتى بتكتبى بالانجليزى ؟
مشمش
عليه الصلاه والسلام
مين فى حياء سيدنا محمد
الحياء المصطنع
خال على فعلا
كل سنه وانتى طيبه يا مشمش
مشمش
وانا بأيدك ان دى ميزه لان الراجل العاقل المفتح
بياخد حقه
وبيدى الناس حقوقها
هو طلب يشوف شعرك
واكيد عنده عيوب محدش خالى من العيوب
اكيد هيبقى عارف عيوبه كويس
رئيس جمهوريه نفسى
طبعا يا ريس ما العجله دايره
من دقنه وافتله
ده يتجوز دى ودى تتجوز ده
وسلملى على المحاماه
لكن فى نسبه منهم شرفاء جدا
ونسبه كبيره
وفى نسبه مبوظه سمعتهم
بت خيخة وأى كلام
انا اقدر على زعلك
انا هاروح اشوفك زعلانه ليه
The Queen
طبعا الحياء المصطنع ده مش مطلوب وانا قبلته على حياءه الشديد ده
ولكن
الحمد لله
كل سنه وانتى طيبه
يا جلاله الملكه
لاء جامده يستمد دى
شرب يشرب عصيرا
لاء جامده فى اللغه العربيه يا حبيبتى والله
أنا الحمد لله ماشى الحال
أدعولى أنتوا بس
وكل عام وانتى بخير بمناسبه العيد الاضحى
,وكل عام واهل السويس بخير
ونصيحه بلاش تهور ربنا انقذك منه جت سليمه
احمد الجيزاوى
faranca ya7'ty:
ne2ol tany ya fandem ana leh bakteb english,bcoz im in usa so my lt dont have arabic letters thast it walahy ya fandem
yalla kol sana wenty tayeba ya gamiel
نقول اولا المد لله اللى نجاكى
وبصرك قبل كل شئ
ممكن تكون تجربة قاية بس احسن
من انها كانت تستمر
بلا وجع دماغ رجالة ايه بس
لا بجد كل حياة ليها مميزاتها وعيوبها يعنى
حضرتك ممكن تكونى تشوفى ان ده الافضل انك تعيشى حياتك مع حد
واكيد طبعا ده الصح
بس الله اعلم الحياة كانت هتبقى ازاى
نحمد ربنا ونشكره
وان شاء الله حياتك تبقى كلها سعادة ومرح كده مش على البلوجات بس
ربنا يسعدك دنيا واخرة
تصدقي وتؤمني بالله يافرنسا
والله العظيم والله العظيم والله العظيم
تلاته والله العظيم اهه
انتي مسخره
انا قعدت اضحك لغاية ماعيني دمعت على اول البوست بتاعك وحوار الصوف والجزارين والعيد
بالنسبه لباقي الموضوع اللي هو العريس الطمعان فدول كتيييييييييييير
ومشكلتهم انهم لما بيتفقسو قبل الجواز بيبقى منظرهم زباله فعلا
وحتى لو اتكشفو بعد الجواز .. برضه زباله
وكمان انا بجد مش فاهم فين الرجوله في ان شخص يتقدم لواحده عشان يتجوزها عشان فلوسها
هي نصبايه ياعم
ده جواز
مش مشروع ويا يصيب ويا يخيب
وكل سنه وانتي طيبه
وربنا يسعدك ويكرمك دنيا وآخره يارب
سلاموووووووووز
شقه وارض وفلوس فى البنك
دهب ياقوت الماظ
احمدك يارب احمدك يارب
طيب اسمحيلى ممكن اتقدملك
طبعا انا مش طمعان ولا حاجة
انا حبيتك من اول تدوينة
وبصى انا اخلاقى تمام
البانجو معرفش شكلة
والحشيش عمرى ما دقت طعمة
غير بس نذوات فين وفين كل يجى تلات ايام مرة ولا حاجة
اما بالنسبة للافراح فين وفين لما بطلع مطوة
كل خميس بالكتير
شوفتى بقى
سامعك بتقولى غيرت رأيى وعايزة العريس اللقطة ده
ههههههههه
بجد اسلوبك فى الكتابة حلو اوى
بيفكرنى بالبت نور الخيخة
كل سنة وانتى طيبة
وعيد سعيد عليكى
وابقى تعالى خدى العيدية
تحياتى
طبعا الحمد لله اللي كشفه على حقيقته في الوقت المناسب
اقترح تشتريلك مرتبة بدل حكاية النوم على الودان دي
ههههههههههههههه
كل سنة و انتي بالف خير يا فرنسا
خالص تحياتي
السلام عليكم
كل عام وانتم بخير
عيد سعيد
تقبل الله منا ومنكم
باذن الله يجي احسن منه وتاخدي سيد سيده
مفأجه العيد
http://mat7on.blogspot.com/
عزيزتى
كل سنة وانتى طيبه وبخير يارب
شوفى ما الرجالة بقيت تبص للى من عيلة واهلها ممكن يساعدوه ولو فيها شئ مش عجبه هتتغير بعد الزواج
والبنات بقه عاوزين اللى جاهز ويقدر يعيشهم على نفس مستواهم قبل الجواز
والنتيجه مبقاش فيه جواز
اللى زى العريس ده كتير واى واحده لازم تتاكد من اى انسان ترتبط بيه ومش يلا عريس يلا جواز يلا بهدلة
سلام يا هانم
3ala asm masr
مش انا بقولك
خالتك فرنسا بروفوسيره فى اللغه العربيه
يعنى لو درست عربى للعيال
كل الجيل اللى جاى هيتكلم فرنساوى
انا بدعيلك يا هند
ربنا يكرمك ويوفقك
وتنولى مرادك
قادر ياكريم
كل سنه وانتى والاسره الكريمه بخير
اعاده الله عليكم باليمن والبركات
هههههههههههههههههه
كويس فعلا ان ربنا انقذك منه
بس للحظه تخيلت ان الموقف فعلا يكون بجد
قلت ايه ده معقول الراجل يبقى ف حاله كده وانتى اللى بتساليه كده
وبتسرسبيه ف الكلام
سو نايس بوست
مدونه انا بحبك يا مصر
وانا كمان
انا برضه بحبك يا مصر
نبقى اخوات
كل عام وانتم بخير
اعاد الله الايام عليكم باليمن والبركات
Sola
خلاص ياعسل
انا فهمت الفوله
وكل سنه وانتى طيبه
وكل المصريين فى الغربه بخير
سلامى لكل مصرى
وعربى
ومسلم
عايش فى امريكا
وفى اوربا
وفى كل الكره الارضيه
وعيد سعيد عليكى
هو عندكم حاوى ؟؟؟؟؟؟
امام الجيل
على رأيك بلا رجاله بلا وجع دماغ
بكره الكيلو منهم هيبقى بربع جنيه
وتشترى
خمسه تاخد فرخه هديه
لا
اوعى تزعل
الرجال نور الحياه
انا بهزر
كل سنه وانت طيب
Soooo
مسخره ؟؟؟؟؟؟
برضه كده يا هندسه
يا استاذ الديكور الرفيع
والمستوى البديع
اسمها مسخره ؟؟؟؟
يا سوووووووو
الاحسن تقول
ساخره
تبقى كويسه
قل ساخره
ولا تقل مسخره
ها
قول ورايا
قل ساخره
ولا تقل مسخره
مش سامعه صوتك
ها
بصوت عالى
قل ساخره
ولا تقل مسخره
جدع
يلا فسحه
باشمهندس سوووو
كل عام وانتم بخير
وانشاء الله نشوف اسمك على سرح من سروح مصر المحروسه
هذا العمل الجميل
من ابداع
م / سووووووو
كل عام وانتم بخير مره اخرى
Ahmed Al-Sabbagh
هو ده اللى كنت بادور عليه من زمااااااااان
بحبه يابابا
هو ده عريسى
يامرحب بزينه العرسان يا مرحب
بس فيه عيب
مش هقدر اتجوزك
علشان انا كييفه بانجو
وانت بتشربه كل 3 ايام
ينقى هتجوعنى بانجو
والحشيش متعتى
وانت متعرفوش
والافراح بتروحها كل اسبوع بس
ليييييييييه ؟؟؟؟؟
هنكن فى البيت
انا يابنى ابونيه فى الافراح
فرنسا هانم التت
ومطوتك التعبانه
اللى بتتلع فين وفين
اسأل على مره
فى السويس
عنبر الحالات الحرجه قسم ب جراحه وكسور
ضحايا فرنسا هانم
مستشفى السويس العام الدور التالت
ده انت غلباااااااااان
كل عام وانت والاسره بخير وبركه
وعيد سعيد
وربنا يوفقك فى حياتك
وملكش دعوه بفرنسا
متقفش قدام القطار
موجة
مرتبه ؟؟؟؟؟؟؟؟؟
انت عايز الناس تاكل وشى
مرتبه ؟؟؟؟؟؟؟؟
انت عارف المرتبه عايزه ايه ؟؟
المرتبه عايزه قطن
والقطن عند الفلاح
والفلاح بيتفرج على الدش
والدش مليان افلام
والافلام على كل نوع
فيها احمد وحميده
حميده ولدت ولد
سميته عبد الصمد
مرتبه ؟؟؟؟؟؟؟؟؟؟
وقدرت تنطقها
قدر لسانك يقولها
على العموم سماح المره دى
لكن اعمل حسابك
لايمكن اسامحك المره الجايه ابدا
كل عام وانتم بخير
عصفور اسكندرية
يا اهلا بمفاجاءه العيد
نروح نشوف المفاجاءه
بتفرقوا ساندوتشات لحمه
احساس لسه حى
فيه موضه قديمه كانت زمان اسمها جواز
يا عينى انقرضت
بعد ما كل حاجه غليت
ربنا يستر
ويهدى الحكومه على الشباب
كل عام وانتم بخير
وعيد سعيد
د/اجدع بنوته
هو فعلا بجد
وهو فعلا ده اللى حصل
وهو فعلا كان بيمثل
وهو فعلا كان طمعان
وهو فعلا انكشف
وهو الساعه كام دلوقتى ؟
زياره مشكوره
وشرفتى المدونه
اخبط مشوار لمدونتك اسلم عليكى
كل سنة وانتى طيبة يا هانم
وعيد سعيد يا قمر
كل سنة وانتى بألف خير وسعادة
تحياتى
princess dodo
كل سنه وانتى طيبه يا اجدع برنسيسه
وعيد سعيد
مقدرتش ادخل واقرا والكلام يعجبني واضحك واحس اني شاركتك في كل دقيقة اتكلمتي عنها .. واخرج من غير ما اقول
كل سنة وانتي طيبة وعيد اضحى سعيد
يعني انتي اتريقتي على مسخره وجايه بتقولي عايزه تشوفي اسمي على سرح من سروح مصر؟؟؟
اسمه صرح وليس سرح .. هو انا باسرح ببطاطا
قولي ورايا
صرح وليست سرح
صروووح وليست سروووح
صرح وصروح
والصراحه راحه
وكل سنه وانتي طيبه يا فرنسا هانم
ملحوظه
يمكن خانني التعبير فعلا لما قلت انك مسخره .. بس فعليا ماكنتش اقصد اي تقليل لشأنك او لفكرك
واعتذر عن اي سوء للفهم واعتذر عن هذا اللفظ
سلامووووووووووز
لا حول ولا قوة الا بالله العلى العظيم
اهو انا بقى دلوقتى عرفت هو كان بيفرك فى ايده ليه
وبيبص على الارض ليه
ده اكيد كان
شارب برشام صراصير
وعسى ان تحبو شيئا وهو شر لكم
محدش عارف الخير فين
كل سنة وانتى طيبة
يانهار اسود
انا لابس
صوف
الحق استخبى بقى
سلام
أول صباح وأول تحية وأول عيدية لأحلى فرنسا فى الدنيا
صباح الفل على عيونك يا قمورة
وكل سنة وانتى طيبة
والسنة الجاية تكونى على عرفة أو فى عمرة بإذن الرحمن
عفونا عنك عشن النيسكافيه
ده احنا فى عيد
يلا بقى هاتى البلالين وانا هاجيب البمب والصواريخ ونجيب البت خيخة والواد شريف والبت شاهى وولادها ونقعد نفرقع للصبح وننفخ البلالين
اهلا اهلا بالعيد
مرحب مرحب بالعيد
هييييييييه
هييييييييييييه
هيييييييييييييييه
تحياتى يا سكره
صباحك زى الفل
هبة
الله انقذك
العمى بقلبو شو ممثل
هادي زيارتي الاولى للمدونه وبصراحه بتجنن يا خالتو فرنسا
ويا ريت اشوف زيارتك لمدونتي لأن انا شكلي جيت متأخره كتير وناس كتير قالولي عن مدونتك
والبوست الي قبل هادا دمار
عيدك مبارك يا رب
ينعاد عليكي بصحه والسلامه
RoReE
ده اقل كلمه توصفه انه حقير
الناس همها دلوقتى المصالح
استغفر الله العظيم
بس الحمد لله ان ربنا ظهرة على حقيقته الزباله فى الوقت المناسب
عيد اضحى سعيد عليكى
يا شقيقة كل سنة وانت بالف خير
والسنة جاية تكوني من طيب لأطيب يارب
كل سنة وانتى طيبة يا قمرى فى اول ايام عيد الاضحى المبارك اعاده الله علينا وعليكى باليمن والبركات
وان شاء الله السنة الجاية على جبل عرفات
وبعدين يا سبحان الله فى اقدار ربنا اللى جمعتك بيه فى مكان ما يتخيلوش عشان تكتشفى حقيقته قبل ما رجلك تقع فى الخية
الحمد لله قدر ولطف
تحياتى
شيماء
فرنسا هانم
يارب تكون صحتك بقت احسن
وكل سنه وانتى طيبه
شوف هو غالبا الرجاله اللى من النوعيه دى قلتها احسن بلا نيله
كلهم ملهومش امان
فرنسا هانم
يارب تكون صحتك بقت احسن
وكل سنه وانتى طيبه
شوف هو غالبا الرجاله اللى من النوعيه دى قلتها احسن بلا نيله
كلهم ملهومش امان
نارديــــــن
كل سنه وانتى طيبه
وانا سعيده انى قدرت ارسم البسمه على وجهك
Soooo
سووووووووووو
سلامووووووز يا عجوووووز
من حفر حفره لاخيه وقع فيها
وانا اتشحورت فى الحفره
هات ايدك قومنى
عندك حق
صرح
وليس سرح
خالصين ياعم
وكل سنه وانت طيب
وعلى فكره
انا كنت عارفه قصدك كويس
ومقدرش ازعل منك ابدا
امال مين هيبنى حتته الارض بتاعه السلام
doha
لو كان شارب برشام صراصير
كان بان عليه
انه مصرصر
ولو كان واخد ابو صليبه كان بان عليه
ولو كان مديها جله كان بان عليه
لكن ده واد مشنع
وممثل قدير
كل سنه وانت طيب يا دوحه
Doba
احلى تحيه واحلى عيديه على هبه
ويا مرحب بالنسكافيه يا مرحب
اضرب زغروووووده
بت يا خيخه
فرجت
وهبه افرجت علينا
وهنديها نسكافيه براحتنا خالص
كل سنه وانتى طيبه
MĕŢø & ŘǿŖêĔ
اهلا وسهلا ومرحب بيك فى مدونتى
وانا هروح مدونتك لاتعرف عليها
كل عام وانتم بخير
dina
فعلا الناس همها المصالح
ياختى بلا هم
كل سنه وانتى طيبه
يوميات عيل مصري
وانت طيب يابو حميد
وكل الاسره بخير
هه
جبت ايه هديه معاك
ا((لا مـؤاخـذة ))ا
فاصـل إعلاني :)
زورونا تجدون ما يسركم .
قائمـة من الكتب الأدبية والثقافية والفكرية المتنوعة للعديد من دور النشر
تحت سقف واحد، وبأسعار لا تقبل المنافسة
وعيد أضحى ...كويس :)
السلام عليكم
كل سنه وانتي طيبه
معلش ممكنة الانسان ينخدع في اسنان اخر من اول نظرة ولكن بعد ذلك يتضح انه كان علي خطا
والحمد لله انتي عرفته حقيقته بدري
عدد من سعى ولبى وطاف بالبيت
يعطيك ربى السعادة وكل ماتمنيت
وعيدك مبارك:)
وراااجعة تاااانى اشوف ايه موضوع العريس دا:)
أنا كل مدونات حبايبي تقريباً فيها تعليقات لفرنسا هانم قلت أما ادخل أشوف فيه إيه
بصي يا ستي
أولاً سعيد بمعرفة مدونتك
ثانياً ربنا نجاكي منه الحشاش ده
ثالثاً ربنا يكرمك و يسهل لك ما فيه الخير دي دعوة أمي ليا دايماً لأننا مش عارفين الخير فين
رابعاً نبني لك حتة الأرض يا ستي بس إنتي تأشري
خامساً ياريت تنوري المدونة عندي بتعليق علشان ماحدش من إصحابي يبقى أحسن مني و يعايرني إنك ما بتعلقيش عندي
:)
أما أروح أقرأ بقية مدونتك
:)
والله عال
اهم حاجة الواحد يسأل منيح قبل ما يخطي اي خطوة لانو المظاهر كثير بتخدع
بوست كتير روعة وهالاشياء حاصلة كثير
فرنسا
اسعد الله ايامك
اضحكتينى
وفى نفس الوقت الواحد قلق من اخلاق الناس اللى فى تدهور
نسأل الله رفقة الصالحين
بخصوص قفلتى باب الزواج
لا تغلقى باب رزق ابدا"
لكل عمر ما يناسب ويسعد
اسعدك الله دائما برضاه وتوفيقه
ايه ده عندك شقه و ارض و فلوس و ساكتة
مترفعي حظر الجواز
عمر بوك ستورز
لا مواخذتك معاك
ولا يهمك
اتفضل
son's egypt
الحمد لله طبعا انه ظهر بدرى
ŞoŖśậŖấầ
كل سنه وانتى طيبه
مهندس مصري
انت مشرف المدونه بحضورك
DamnGirl
السؤال مهم لكن فى ناس بتخدع
ام البنات
طبعا انا معاكى وانا مقفلتش باب
الباب هو اللى اتقفل لوحده
Mohamed_sobhy84
ارفع الحظر
بعد ايه ؟؟؟؟؟
اظن بيتعرف اوي يافرنسايه
مش بيخيل ع الواحد يعني الكسوف وام العشره الجنيه اللي محيراه في الارض دي
ولا ايه
بس الحمد لله ان ربنا نجاكي منه
سيبك انتي
مبروك على الارض
ياختي هو ده اللي قاعدلك
فكك
بهزر طبعا
ربنا يرزقك بزوج صالح
وتجيبلنا عيال فرنساويين وفرنساويات
وتتزفي ع العجله
أنا أول مرة أشوف المدونة النهاردة و إن شاء الله ما تكونش آخر مرة...
بصى يا ستى انا جالى و احد زي ده بالضبط و قلنا بدل الإحراج نتقلبل بره أحسن.
عاوزة أقولك البيه جه 30-45 دقيقة متأخر لما كنت حاشيط و بعدين قلت يا بت معلش تعالى على نفسك شوبة.
المهم جه و قعد فى أبعد مكان. قامت قريبتنا اللى جايباه قالتلى ما تيجي يا حبيبتى تقعدى جانبه!!!
اتكسفت طبعا و بعدين بعد الحاح قعدت جنبه على نقس الكنبه. وده كأن عقربة لدعته قام فط و نط من جنبى زى ماكون قعدت على حجره!!!!!(يا عيني عالرجالة)
المهم والدي قعد يطلع كلام منه بالعافية برده و العريس مش بيوجهلي كلام أصلا.وقريبتنا تحاول تهزر ولا أى حاجة لما بقت فى نص هدومها من طريقته. قلت و الله ما أنا مبوظة القعدة و قعدت أهزر و أضحك مع قريبتنا و ده و لا كأنه كرسى قاعد مبوجهلوش أى كلام.
المهم القعدة خلصت و أنا قايمة قلت لأهلى ده مينفعش. (والدى كان له تعليق على موضوع الكنبة: قاللى شكله مش طبيعى!!!)
المهم بعد كدة الست ردت علينا و قالت أنا أسفة قوي بس ده طلع بيشـــــــرب!!!!!!!!!!!
No comment begad:)
Lolla
إرسال تعليق