اخواتى واخوانى المدونات والمدونين
السلام عليكم
النهارده هفتح معاكم ملف محزن من ملفات السويس الباسله
ومن غير فتاحه ولا مفتاح كله على عينك يا تاجر
من فتره رن تليفونى المحمول وانا من الناس اللى خدوا على قفاهم فى موضوع التليفونات المحموله
اشتريت خط من عمنا كليك الله يرحمه اللى اسمه دلوقتى فودافون ب 1200 جنيه جنيه ينطح جنيه
علشان كده اول ما يرن اجرى عليه بسرعه علشان ميزعلش
المتحدثه : سلام عليكم
انا : وعليكم السلام
المتحدثه : احنا شركه كذا كذا حضرتك مدام فلانه؟
انا : انسه فلانه
المتحدثه : احنا عندنا عروض لفلتر علشان الميه ممكن حضرتك تاخدى فكره عنه
انا : اتفضلى
المتحدثه : حضرتك لازم يجى المهندس عندك يورى لحضرتك تجربه عمليه على كوبايه ميه من الحنفيه
انا : بس مينفعش انا قاعده لوحدى
المتحدثه : حضرتك اى عنوان عايزانه نروح فيه اديهولنا واحنا نجيلك
انا : انتوا عرفتوا نمرتى ازاى ؟؟؟؟
المتحدثه : احنا معانا نمر كتير من السويس وناس بترشح ناس علشان نتصل بيهم
انا :ومين رشحنى
المتحدثه : مش فاكره والله يا فندم
انا : طيب سبينى افكر
المتحدثه : اتصل بيكى امتى يا فندم ؟
اانا : سيبينى يومين تلاته
وخلصت المكالمه
وقعدت افكر صوت مين دى
ده مش صوت حد اعرفه
تكونشى ليلى علوى وعايزه تضرب معايا صحبيه
ولا البنوته رانيا علونى بتاعه السباحه
المهم
قعدت مع صديقاتى وكلمتهم فى الموضوع
وقالوا ان فى تليفونات كتير جات لاخواتهم ولازواجهم ولزملائهم عن حكايه الفلتر ده
وفعلا بيجيبوا كوبايه ميه ويعملوا عليها تجربه تطلع الميه وسخه جدا
وبداءت الحوارت والمناقشات عن السويس والفشل الكلوى
وكل واحده قالت رأيها
لكن
علشان مطولشى عليكم انا هختصر
السويس عايشه بتشرب من ترعه الاسماعيليه
وطبعا لما الميه بتيجى عندنا بتبقى لفت ودارت وداخت السبع دوخات والناس عملت معاها الواجب ورمت فيها جميع انواع القاذورات من كذا وكذا
احنا بقى بناخد الفضله بتاعه الترعه
وبيكرروها
لكن بتطلع ميه مالحه وطعمها اعوذ بالله لا يسر عدو ولا حبيب
الناس بدءت تتعب والفشل الكلوى بداء ينتشر بسرعه فى السويس
والساده الكبار ملهومش دعوه
بيشربوا ميه معدنيه
او بيجيبوا فلاتر
طيب وبقيه خلق الله
يغوروا فى ستين داهيه ؟؟؟؟؟؟
ولا يعملوا ايه ؟؟؟
الناس اشتكت سنين طويله
وفى الاخر
اتكرموا علينا وجابوا خط ميه حلوه من القاهره
لكن السيد المحافظ اعزه الله اخد الخط ووداه على السخنه
وقال السياحه مهمه جدا للبلد
وطبعا كلامه سليم
الناس الضيوف يجوا هنا يشربوا ميه وحشه والملاعين بتوع السويس يشربوا الميه الحلوه
لا طبعا
الضيوف بطنهم نضيفه ومتستحملشى الميه بتاعتنا وجسمهم لطيف ميستحملشى القرف بتاعنا والزرع كمان بتاعهم فافى لازم له ميه حلوه وعربيتهم لازم تتغسل بميه نضيفه انما احنا معانا عجل يبقى علينا وعلى الميه التعبانه
وكمان نسيت اقولكم
انا الدوله تشكر
وبعض الشركات ربنا يكرمهم
مع بعض الافراد
عملوا مبنى لغسيل الكلى فى السويس
وكده حلوا المشكله
احسن ما يتعبوا نفسهم بالميه والخط الجديد وخلافه
لا
اديها غسيل
وكله بيطلع فى الغسيل
ملحوظه مهمه
الفشل الكلوى منتشر جدا فى مصر كلها وانا عارفه ان ممكن حد يقولى الكلام ده
لكن
نسبه الفشل الكلوى فى السويس مرتفعه جدا جدا جدا
ونسبه الاصابه بامراض الكلى مرتفعه للغايه
ويكفى الحكم على الميه
من تناول كوب واحد منها
اسألوا عن ميه السويس
واسألوا عن ارتفاع نسبه الاصابه بامراض الكلى فى السويس
واشربوا كوبايه واحده من ميه السويس
واحكموا
نداء
الى كل محبين فرنسا هانم
لو زرت السويس
اشرب ميه معدنيه
الاشتراك في:
تعليقات الرسالة (Atom)
هناك 90 تعليقًا:
هههههههههههههههههههههههههههههههههه
هيييييييييييييييييييييييييييييييه
اول تعلييييييييييييييييييييييييق
حجزنااااااااااااااااااااااااااااا
:))))))))))))))))))))))))))))
مش مشكلة انا تاني تعليق
والله يا فرنسا مبقتش المية دلوقتي لوحدها
ربنا يعينك ويعين اهل السويس
وربنا يستر ويشفيي كل مريض
بس فعلا جيبي فلتر ينقي المية او اغلي المية وربنا يسترها واللي عاوزه ربنا بيكون
الف سلامه عليكي يا قمر
اختك
رودي
اعلق بقي
:)))
شوفي يا فرنسيس
انتي لازم تجيبي فلتر و لما تجيبي فلتر هتعرفي ان احنا بنشرب مية بالسبانخ مش ميه سادة
تاني حاجة يا سيتي لازم تجيبي فلتر من شركة محترمة مش من الشركات اللي بتصطاد في المية العكرة و عاوزة تكسب و خلاص
لازم تعرفي مصدره كويس
اوكي؟؟؟؟؟
انا من زمان عارفة ان نسبة الاصابة بفشل الكلة و الكبد مرتفعة في السويس
و في مصر عامة يعني
معلش ربنا يعننا و يحفظنا
و يحفظ أهل السويس كلهم ان شاء الله
كل سنة وانتي طيبة
و بطللي بقي حقد علي السياح يا حاقدة
دول بيجيبوا دخل قومي
احنا بنستهلك الدخل ده
ياعيني عليكي يا مصر
شحططتينا يا بلدنا
الله يسامحك
:))
السلام عليكم
ما شاء الله اديني بتقدم اهو وبقيت تالت تعليق بعد الرابع
بس يا رب معملش زي الزمالك وارجع الرابع تاني
عزيزتي فرنسا
عايز اقول لحضرتك معلومه مهمه جدا
انتي متصورة ان الاجانب بيشربوا من النيل بتاعنا ده في القري السياحية
دول بيشربوا مياه معالجه
يعني مش بفلاتر حتي
بتبقي حاجه كده زي براميل الميه اللي بنطلق عليها معدنية
وبتكون ممنوعه عن الاصطف اللي بيشتغل في المكان يشرب منها
ويشرب من مياه الحنفية
اللي بتبقي عبرت القارت لحد ما وصلتهم
انا اشتغلت في السياحة وعارف الحكاية دي
مفيش غير دولة اسوان اعزها الله هي اللي بيشربوا فيها الميه من النيل
لانها حلوه من الاساس
اما خط المياة اللي اخدوه من حضراتكم ده
بيستعملوه في الطبيخ وممكن يستحموابيه
او يغسلوا ايدهم او يحموا الكلاب
انا شوفت الكلام ده بعيني
المهم انا عارف ان محافظات القناة بتعاني فعلا معاناه شديده
بالذات في المياه
مياه مالحة ووشوش ...... زي العسل
هههههههههههه
ربنا مع الشعب المصري كله ويعطيه علي قدر البلاء ده
تحياتي سيدتي
:(:(:( شوفتي عملت زي الزمالك ومحافظتش علي مركزي
مع اني اهلاوي والله
والاهلي دايما البطل
هنعمل ايه بس
يالا لنا الله
لكم ولنا جميعا الله
بس حبيت اقول إن البنية التحتية للمواسير ولك حاجة حتى داخل الشقق أصلا كفيلة بتلويث المياة بالصدأ على الأقل
وإن تكلفة تنقية المياة كلها بسوا واحد سواء لاستخدام الحمام أو غسيل العجل أو خلافه هو خطأ في حد ذاته وإهدار المفروض يكون فيه مية للشرب ومية للعجل
العجل بفتح العين
بصى يا فرنستى
انا مابفهمش اوى فى حكاية المية دى ومكوناتها والحاججات دى
لكن انا مرة من ذات المرات كنت بتفرج على منى الشاذلى فى العاشرة مساء
ووالكلام ده من حوالى سنتين كدة كانت حكاية فلاتر المية والمية الملوثة كانت لسة سخنة وعلى ودنه
وكانت منى الشاذلى مستضيفة واحد كدة بيتكلم عن المية وفلاتر المية والتجارب اللى الناس اللى بيبعوا الفلاتر دى بيعملوها علشان يقنعوك ان مية الحنفية وحشة وانك لازم تشترى الفلتر من عندهم علشان ينقولك المية بتاعتك
الراجل قال كلام غريب جدا
بيقول ان المية اللى احنا بنشربها دى اللى هى بتاعة الحنفية دى بيكون فيها نسبة املاح ومعادن معينة وده شئ طبيعى لان الاملاح والمعادن دى مفيدة لجسم الانسان بدل هى موجودة بنسبة معينة مش زيادة اوى
وقال ان الناس بتاعة الفلاتر دى بيعملو التجارب قدام الناس اللى فى البيوت علشان يقنعوهم ان مية الحنفية وحشة ولازم يشتروا فلتر
التجربة عبارو ان الراجل بيحط جهاز فى المية كدة وبعد فترة بتكتشفى ان المية بتاعتك بقى لونها اصفر غامق جدا
والراحل قال ده شئ طبيعى لان الناس بتوع الفلاتر بيحطوا حاجة فى المية الحاجة دى لما بتتفاعل مع المعادن والاملاح اللى موجودة فى مية الحنفية بتخلى لونها كدة
لكن مية الحنفية مافيهاش حاجة وكله تمام
وبصراحة انا لحد دلوقتى مش فاهمة حاجة
انا بالنسبالى بقالى حوالى تلاتين سنة بشرب مية من الحنفية وعمرى ماغليت المية يعنى بملا ازايز المية من الحنفية وبشرب عادى وشريف لما كان لسه صغنون كان لظروف معينة كدة حصلتلى ماكنتش بقدر ارضعه طبيعى كنت بارضعه صناعى وكنت لو مزنوقة اوى ومعنديش مية معدنية كنت بعمله الرضعة من مية الحنفية
المية بالنسبالى ليس لها طعم او لون او رائحة
لو المية حسيت فيها ان ليها طعم او لون او رائحة تبقى كدة مية مش تمام
وعلشان كدة عمرى ماغليت المية لان ماما مرة فكرت انها تغلى المية لقيت المية بقى ليها طعم ماعرفتش اشرب خالص
هانى مؤخرا جاب فلتر بجانب حنفية المطبخ يعنى بقى عندنا حنفيتين حنفية فلتر وحنفية عادية
هانى بيقولى املى ازايز المية من الفلتر
بس انا ساعات بنسى واملاها من الحنفية العادية وهانى عمره ماحس بفرق بين مية الحنفية ومية الفلتر
ولحد دلوقتى انا مش فاهمة ايه لازمة الفلتر اللى احنا مركبينه ده
انا مش عارفة هو انا كلامى مفيد ولا لا
لكن انا قلت اقوللك على اللى اعرفه عن موضوع المية والفلتر
انتى حرة بقى تجيبى فلتر ماتجبيش انتى ادرى بالمية بتاعتكم
وانا عن نفسى لما اروح السويس هابقى اشرب مية معدنية
وده لان اختى فعلا من كام شهر كدة سافرت هى وجوزها السويس وقالتلى على موضوع المية ده
انها مالحة جدا جدا جدا
وربنا يكون فى عونكم
اختك خيخة
حااااضر ياخالتو فرنسا لما ننزل السويس هانشرب مية معدنية والحساب يجمع على الصالون
بالمناسبة محافظة المنوفية كذلك مشكلة المياة فيها مشكلة
وحتى القاهرة مش سلمت من مشكلة التلوث ده وباء عام في الجمهورية كلها
والاسم انه النيل جواه وبيرعاه ..
لنا الله ياخالتو
السلام عليكم ورحمة اله وبركاته
والله يا خاله الحال من بعضه
احنا هنا اهه في الدلتا وبلدنا علي النيل عدل يعني لا الميه بتلف ولا بتدور وكمان عندنا ترعة الساحل الشهيره اللي ماشيه بطول الدلتا لحد دمياط وجايه برضو من النيل علي طول ترعه مش قليله ، كل ده والميه عندنا لا تسر عدو ولا حبيب مش ناقص الا اننا نفتح الحنفيه نلاقي صراصير نازله مع الميه
والطعم اجارك الله بعد ماكانت من كام سنه في منتهي الروعه والنظافه
وكمان عندنا في تقليد غريب كده انهم يقطعواالميه اول سبت من كل شهر نص يوم ال ايه بيغسلوا المواسير ويعملوا صيانه للشبكه
كل ده مش محوق لان خلاص الشبكه كلها بقت زباله وعاوزه تتغير عن بكرة ابيها وماينفعش فيها حاجه
علشان كده ولان ماعنديش مكان اركب فيه الفلتر بقالنا فتره بنشتري الجراكن المعالجه اللي مهند بيتكلم عنها
وربنا يسترها معانا بقي
ولعلمك حالات الفشل الكلوي في الدلتا نفسها كتير جدا جدا يكفيكي بس انك تعدي فيوم من جنب مركز الكلي في المنصوره وتشوفي المآسي اللي هناك ربنا يعافيك ويعافينا ويعافي امة محمد
يااااااه يا فرنسا
بجد ماساة المشكله دى مش فى السويس بس دى فى مصر كلها
وحالات الفشل الكلوى كتييييير جدا وفى ازدياد
ربنا يشفى الجميع ويستر علينا
ويرحمنا من الى احنا فيه ويهدى الى بالى بالك
سلامى يا فرنستى
يا جماعة انتو ديما ظالمين البلد والحكومة
اولا موضوع المية ده بيحل مشاكل كتير من مشاكل المواطنين
يعني خدي مثلا عندك مشكلة الكثافة السكانية
لما ناس تخلع بسبب الفشل الكلوي
اولا هما هيستريحو من القرف اللي هما عايشين فيه
ثانيا سابو مكان لغيرهم
يا جماعة
انظر حولك وشوف احنا كاام
وبعدين واحنا برده فافي عشان المية بتاعت الفلاتر والكلام ده
ده احنا شعب الفووول
!!!!!!!!!!
ربنا يرحمنا برحمته
تحياتي
MerMaid
تحياتى لكى فى استحواذك على الالفه
بعد كده هتقفى على الفصل
واللى يتكلم
او يدون
او يكتب
اكتبى اسمه
وهمده فى وسط الطابور
ويجيب ولى امره
بنوته مصرية
ازيك يا رودى
انا عارفه انها مش الميه لوحدها
لكن
برضه المشكله دى عامله كالو فى دماغى
تحياتى
MerMaid
ابااااااااااااه
لبستينى تهمه
انا بحقد على السياح ؟؟؟؟؟
لا
ده انا حتى بقولهم
خد قوتى يا عبد الهادى
فاهمه
معلومة جديدة ال مرة اعرفها
كان الله فى عونكم
لسه احنا فى هذه المرحلة
المفرو الحاجات دى
زى ما بنسمع فى اقاصى الصعيد او المحافظات الصغيرة مش محافظة كبيرة زى السويس هو المفروض اصلا ميبقاش فيه ده من اصله اللى يغيظ ان فيه مصريف طائلة بتصرف فى توافه الامور
وحاجات مهمة وخطيرة زى دى محدش ياخد باله منها
ممكن يكون بتوع تظيم الاسرة ليهم علاقة بالموضوع عايزين يخلصوا بسرعة ويخفوا الشعب وحدش عارف
mohand
شكرا يا مهند
انك فهمتنى ونورتنى
وانا اللى كنت غبيه خالص وفاكره انهم خدوا الخط بتاعنا علشان يشربوا منه
طلعوا خدوه علشان يغسلوا ايديهم ويحموا الكلاب
انا اسفه
ظلمت الناس
مدام كده يبقى من حقهم يخدوه
طبعا
هى الكلاب شويه
واللى كمان لو فى قطط
لا
لا
لا
من حقهم
نموت نموت وتحيا الكلاب
انا بتكلم عن فرنسا هانم بس
mohand
بس انت غير الزمالك
عصفور المدينة
عمنا عصفور
واستاذنا
مسكت فى زماره رقبتى على العجله
اللى بحميها كل شهر مره
ومش بصيت لتعليق مهند
بيقولك يا كبيرنا
انهم بيحموا الكلاب بالميه اللى استخسروها فينا
بت خيخة وأى كلام
ايه الجمال ده يا بت يا خيخه ؟؟؟
تصدقى بالذى خلقك
تصدقى بالله
والله
انا كنت شكه انهم فعلا بيعملوا حاجه فى التجربه دى
حاجه زى شغل الحاوى
وانتى اكدتى كلامى
خلاص يا خيخه
انتى هتيجى تشهدى معانا
وتقولى الكلام ده كله قدام حضره البيه الظابط
لكن
برضه انتى مشربتيش ميه السويس
ومش عايزاكى تشربيها
حاجه غريبه خالص
خلصت على البلد
اااااه ياقلبى
((كلكم راع.. وكل راعى مسؤل عن رعيته)) طيب لما ربنا يسأل المسؤلين.. هيقولوا ايه؟
اللهم ارحمنا
تحياتى لاغلى فرنسا
كاميليا
همسة قلم
الصالون
وبنات الصالون
كله تحت امرك
شاورى انتى بايدك
وكله يتفرش لك ورد
بس
هى الحكايه حصلت المنوفيه كمان ؟؟؟؟
السلام عليكم
احم احم
انا مازلت هنا
حضرتك وبيطبخوا بيها كمان
نسيتي ديه
هههههههههههههههههه
الحمد لله اني مش زي الزمالك
خمسة فضفضة
اذا تحدث الطب
فاذاننا تصغو
طبعا يا دكتوره هنسيب العيش لخبازه
وانتى دكتوره
وده مجالك
لكن
المشكله بجد عندنا كبرت قوى
لدرجه فظيعه
لدرجه ان موضوع الغسيل ده بقى حاجه عاديه
ربنا يستر علينا كلنا
mohand
مهند بما انك معايا على الهوا
ايه رأيك فى بتروجيت
لكع صحابك واحد صفر وخد منهم ال 3 بنط
بتروجيت من السويس
shayma
ويهدى الجميع
بس
نشرب ميه
ولا ايه ؟؟
ربنا يشفى مصر كلها
هموا مستنين لما نموت خالص ولا ايه ؟؟؟؟؟؟
القلم السكندري
حكمه اليوم
فعلا هى دى الحكمه اللى انا مش كنت واخده بالى منها
تحياتى لبعد نظرك
ولدمك الخفيف
اشكرك جدا
امام الجيل
ممكن يا امام
وخصوصا
انى كل ما اشوفهم وانا رايحه مع حد من اخواتى او صديقاتى
الاقيهم بيضحكوا
يبقوا فعلا
ليهم علاقه بالموضوع
اللولب مش نافع
والشرايط مش نافعه
وسلامى
كاميليا
تحياتى لاحلى كاميليا
هو المسئولين
يهمهم حاجه
رعيه مين اللى هيخدوا بالهم منها؟
يخدوا بالهم من بنوك سويسرا
كل سنه وانتى طيبه يا كاميليا
Dear >>>Canal el-Esma3ilia... comes out from shobra..and U will never Imagine what is shobra Al-Kheima..and the factories R allocated on that canal and drain its wastes in that canal...big factories...besides ..the biggest Oil refinery ..( Mostorod)...so...it is not good 4 Land errigation nor 4 drinking..
but who cares...if we R all dies...who care..
the question is...if all that happened in another Country ..would not People do whatever they can 2 change it???!!
sorry 4 writting in english...U say I write my blog in arabic...yes now I do ..but it takes a lot of Time... and 2 B able 2 read posts and comment I have no such long time..so appologize..
Best wishes
a Dreamer with feet on the Floor
سيدى الكريم
لايهم ان تكتب بالانجليزيه او العربيه
المهم ان يصل صوتك
فعلا ترعه الاسماعيليه تمر بمصانع تلقى بها ما تلقى
وحكايه صرف مصفاه البترول دى جديده على
لكن
يلا
تزيد الطينه بله
وكم تالمت جدا لكلمتك
but who cares...if we R all dies...who care
فعلا لن يهتم احد ان نموت
ولو حدث ذلك فى دوله اخرى
لتغير فعلا الوضع
اشكرك جدا جدا
على اهتمامك
ولكن
اطلب منك الحصه الجايه
تجيب معاك كتاب العربى
هي الحكاية حصلت المنوفية ..
ده انا بيتهيألي انه المنوفية هي اللى بتصدر المية الملوثة لباقي المحافظات
:)
فكرتيني بحكايه مش لاقيين عيش ياكلوا بسكويت
ما علينا لو عايزه تعرفي جابوا رقمك منين بسيطه
في ناس هي شغلها كده تجيب ارقام تليفونات الناس من مواقع على النت بتقدم خدمة الرسائل المجانيه او من الحلات بتاعة المحمول اللي بيبع الخطوط او من اصحاب ليكي اشترك في خدمه او مسابقه او موقع وبيطلب منه يحط نمرة ناس يعرفهم علشان تذيد النقط اللي هيكسبها وبرده في طرق تانيه بتبقى عجيبه قوي
المهم انهم يوصلوا لأكبر عدد من ارقام التليفون وطبعا بأساء اصحابها علشان متحسبيش انه بيعاكس وتقفلي في وشه
اما عن الميه الوحشه اللي عندكم
معلش الحال هنا في مصر مش مختلف قوي يعني بس طبعا مش كل مصر زي ما انتي ناصحه وفاهمه في ناس يا حرام بطنهم مش تستحمل الميه الوسخه بتاعتنا علشان كده بيقدمولهم ميه نضيفه في المواسير
انما احنا فأنا اعرف من مصادر مهمه قوي في الخرابه اللي جنبي ان الدوله قررت تعتمد سياسه التطوير في البني ادمين يعني هيختاروا الصفوه وافضل العناصر من الشعب اللي يستحقوا يعيشوا وطبعا في ناس كريمة المجتمع دول خلاص موافقين عليهم لكن الناس اللي زي حالتنا يختبروهم ازاي فالدوله قررت تشوف مين هيستحمل يعيش بالظروف دي
ميه وسخه
امراض
عيش قليل في الفرن
اسعار نار
ادخنه وتلوث
ظلم وتسلط
اجور ضعيفه
حقوق مهضومه
استغلال
اغتصاب
و
و
و
و
يا بنتي هتوديني في داهيه
اسكتي بقى واشتري الفلتر وريحينا
سلااااااااااااااااام
من السويس للغربية والشرقية والدقهلية وكل الجمهورية والاهرام وأخر ساعه
يا قلب لا تحزن
لا يا قلب احزن
تحياتى
والله يا خالتنا مش عارف أقول ايه
كشفت راسي ودعيت عليهم
حسبي الله ونعم الوكيل
يا جمااااعة ... يا جماااعة .. انظروا للجزء الممتلىء من الكوب (دة لو فيه كوب مليان أصلا) .. المية فى الأصل بتجيلنا من النيل نقية جدا .. و بعدين الحكومة بتضيف عليها مكونات عضوية و كيميائية على طول مسارها من المحطة لغاية البيوت .. يعنى دى مكونات متكلفة .. و سيبوكم بقى من الإشاعات المغرضة اللى بتقول إن دة تلوث .. ثم إن اللى هايقول إن دة تلوث بعد كدة أنا هابلغ عنه شيخنا الكبير عشان يفتى له فتوى بإن الإشعاعات - قصدى الإشاعات - ضارة جدا بالصحة ... و هى سبب حالات الفشل الكلوى اللى منتشرة
ثم انتم احمدوا ربنا انكم لاقيين مية أصلا ... مش أحسن من اللى مش لاقينها .. أحسن و لا مش احسن ؟؟
و قبل ما أمشى خدى الجواب دة
إحضر حالا لاستلام جايزتك فى استراحة الكاشفة
الهيئة المصرية العامة للبريد
ياستى
كبرى دماغك
ده كويس انهم وصلولكوا ميه اساسا
كمان مش عاجباكوا
ده دلع شعب
غيرنا مش لاقيين الميه دى
وبيشربوا بيبسى
هههههههههههههه
ربنا ينتقم من كل مقصر فى حقنا
هو انا دايما اجى متأخر معلش الكوكب عندى زحمه شويه
المهم كل سنه وانتى طيبه
وعاوزة اقولك على اقتراح ما تصعدوا المشكله للمسئولين هنا يعنى عضو مجلش الشوعب المرجانيه اللى عندكم يقدم طلب احاطه جمعوا توقيعات مش مظاهرات ولا اعتصامات وروحوا وشوفا حد يتبنى الموضوع وربنا معاكوا هبقى اجى ازور السويس من ضمن رحلاتى ان شاء الله
انا جبت سيرتى فى البوست بتاعى بعد إذنك يعنى ابقى نورينى انا مفضيه لكى حته فى الكوكب بتاعى
بصراحة 100 100 يا فرنسا هانم
ربنا يعينك و يصبر أهل السويس على ماأبتلاهم
و متزعليش أوى الحال من بعضه
فى الدلتا المياه فى كتير جدا من الأيام تنزل من الحنفية ماشاء الله شاى صعيدى
متقوليش بقه فلاتر و لا الحاجات المتقدمه دى
حلها بعض الاهالى و فتحوا مشاريع تحلية المياه و بيعدوا على البيوت يغيروا الجراكن
طلعلهم بتوع المياه المعدنية و شكاوى و قضايا
عارفه علشان يبيعوا المياه كتبو عليها للاستخدام الصناعى
سبحان الله
اييييييه دا كله اييييييييه دا كله
طيب اعلق فين واللا فين انا بقى
اللهم لاحسد يعنى
شكلى غبت كتير اوى عن المدونة هون
لامؤاخذة وعذراا
بس هقلك كل سنة وانتى طيبة
وان شاء الله ارجع تااااااانى واشوف اللى خالتو فرنسا كتبته
__??_??
_??___??
_??___??_________????
_??___??_______??___???? H
_??__??_______?___??___??
__??__?______?__??__???__?? A
___??__?____?__??_____??__?_____
____??_??__??_??________??
____??___??__??
___?___________? P
__?_____________?
_?____?_____?____? P
_?____/___@__\\___?
_?____\\__/?\\__/___? Y
___?_____W_____?
_____??_____??
_______????? NEW
YEAR 2008
كشف جهاز حماية المستهلك عن عدم صلاحية ستة أنواع من المياه المعبأة المتداولة في الأسواق للاستخدام, وذلك من بين21 نوعا جري تحليلها في المعامل المركزية لوزارة الصحة. وأوضحت الدراسة أنه لا يوجد في مصر مياها معدنية, وأن جميع أنواع مياه الشرب المعبأة في مصر مياه طبيعية مصدرها آبار جوفية يجب ألا يقل عمقها عن160 مترا إلي170 مترا. وأشارت الدراسة إلي أن أنواع المياه التي ثبت عدم استيفائها الاشتراطات الصحية, ربما لا تلتزم بعمق البئر, أو موقعها, أو محيط البئر, وهو ما يتسبب في التلوث. وبينت الدراسة ـ التي أجرتها الجمعية المصرية لحماية المستهلك واستمرت شهرين ـ أن الأنواع غير الصالحة, وهي: الندي, وشويبس, وأكواستون, ونهل, وأكوامينا, وحياة هي مياه ملوثة بميكروبات دقيقة, وأن ست شركات من بين الشركات الثلاث عشرة التي تبين صلاحيتها بالفحص تتضمن اختلافا في بعض بيانات البطاقة المرفقة بالعبوة, وهذه الشركات هي: بركة, والمنار, ودلتا, وأكوافينا, بالإضافة إلي العبوات الصغيرة من نهل, وحياة.
Read it online here: http://www.ahram.org.eg/Index.asp?CurFN=fron9.htm&DID=9442
هى جت على المية يا فرنسا
ما الفاكهة والخضار يا قمرى مسرطنين
والدم الاكياس فاسده
دى المية تعتبر احسن من غيرها
تحياتى يا جميله
ربنا يعينكو
صدقينى الحال فى السويس مش أسوأ من عندنا فى القاهرة
احنا كنا طول السنين اللى فاتت بنشرب من مية الحنفية ومش فى دماغنا حاجة ومن حوالى سنة او اقل طقت فى دماغنا نجيب فلتر .. عادى يعنى .. تخيلى بقى بنغير شمعة الفلتر كل 3 شهور وبتبقى لونها رمادى بعد ما كانت بيضا .. مع ان المفروض انها متتغيرش قبل 6 شهور .. بس لو قعدت الست شهور هتلاقيها سودة مش رمادى .. وتحسى كدة زى ما يكون عليها حاجات مزحلقة تقوليش مية مجارى
اشترى فلتر يا فرنسا بجد وصدقينى هتشوفى العجب
يلا سلام بقى
فرنسا هانم
كل سنه وانتى طيبه دايما وبخير
انا هبقى اجيب الميه بتاعتى وانا جايه
بس الغدا عليكى مش معقول هجيبه برده
ههههههههههه
ربنا معاكو يارب
تحياتى وتقديرى
فرنسسسسسسسسسسسسسسا
وحشاااااااااااااانى
عارفة احلى حاجة فى البوست دة اية
انى كان نفسى اشوفهم وهما بيعملوا تحليل المية
بحب العب اوى بالحاجات دى
عاااااااااااااااااااااا
ماليش دعوة
همسة قلم
يعنى افهم من كده ان الميه الملوثه
ميد ان منوفيه
خلاص
احنا استوردنا واللى كان كان
تحياتى يا قمر
لقد اثبتت الدراسات العلنيه والعلميه والسياسيه
ان جميع المصادر الموثوق بيها المتواجده فى الخرابه او جنب الخرابه او على يمين او يسار الخرابه
صحيحه بنسبه 99 فى الميه
ولذلك نحن نقدم لكل الخرابات الشكر والعرفان
وعرفان اقصدى وعارف ؟
اقولك ان مشروع الدوله ده جيد جدا
وهيجيب نتيجه ممتازه
ابقى اعرفها فى الاخره
لانى كده من المغضوب عليهم دوليا
الطائر الحزين
فعلا يا قلبى احزن
بس هو لسه محزنش
ده حزن وحزن
هى اخر ساعه من محافظات قبلى ولا بحرى
علشان واحد قريبى عايز ياخد ارض هناك
دكتور حر
بتكروتنى
انت مستعجل ولا ايه ؟؟؟؟
طب ده انا مستنياك انت بالذات
تقوم تيجى
وتفلسع فى ثوانى
لا
معندكش حق
ابن حـجـر الـعـسـقـلانـى
طيران وعلى استراحه الكاشفه
اجيب معايا العجله ؟؟؟؟
ولا عربيه نص نقل ؟؟؟؟
ولا نقل بمقطوره ؟؟؟؟
انا هاجى واجيب قطار بضاعه
ياترى ايه الجايزه ؟
ياترى ايه الجايزه ؟
ياترى ايه الجايزه ؟
ياترى ايه الجايزه ؟
ياترى ايه الجايزه ؟
لا
ده انا بكلم نفسى وانا ماشيه
Dr Emad
بيبسى من الحنفيه ؟؟؟؟
خلاص
مش عايزين ميه
عايزين من ده
appy
رحت عندك وعلقت
وعملت تخفيض كمان
علشان خاطر عيونك
عبدٌ من عباد الله
صناعى صناعى
مش مهم المكتوب
اهم حاجه انهم عرفوا يفكروا
لكن بتوع الميه المعدنيه دول ايديهم طايله يعنى ؟؟؟؟
صدقينى فرنسا هانم و بورسعيد أشد فشل كلوى مثل السويس ،الظاهر شعوب هذة المنطقة لا تستحق الا الفشل الكلوى لأنها لم تدفع ضريبة الوطن الأم كما ينبغى ..
أخيك أبو خالد
أولا أسجل أول زيارة وبإذن الله لن تكون الأخيرة
ثانيا : أنا نفسي أعرف إجابة لهذا السؤال منذ أكثر من ثلاثين سنة(تاريخ أول زيارة لي لمدينة السويس الباسلة وكانت في ضيافة المجاهد العظيم : حافظ سلامة في مسجد السهداء ونحن طلبة في الجامعة) هذا السؤال هو : لماذا السويس تحديدا الخدمات فيها من أسوأ ما يكون دو باقي منطقة القناة ؟؟؟
..............
ألطف ما سمعت في هذا الموضوع من المضحكات المبكيات
تم عمل جراحة تحويلية للنيل و أصبح
.
.
.
.
.
.
نيلة
السلام عليكم
ايه رايك يا فرنسا
اناهشجع بتروجيت عشان انتي بتشجعيه
بس قدام الاهلي لاء
خلاص؟
وكمان عشان ادي لصحابنا الصابونه
وطلعهم الرابع
ههههههههههههههههههههه
منور انا صح؟
انا عارف انا عارف
فرنسا هانم
كل سنه وانت طيبه وسنه سعيده
عليكى وعلى كل حبايبك
حتى المياه المعدنيه بيقولوا
انها ملوثه ومش معدنيه
وحتى المياه الغازيه بالحشرات
بروتين يعنى وده مش فى السويس
فى كتير من المحافظات
ربنا يجازى اللى بيموتونا بالبطىء
سنه سعيده علينا وسوداعليهم
انشاء الله
وربنا يحمى السويس واهلها
ومصر كلهاويشفى المرضى
ويبتلى اللى كان السبب
سلاااااااااام
فرنستنا هانم ست الهوانم ... ما هى الميه زفت فى كل حته حتى فى الجيزة مش المحافظات بس ... و بعدان الاهالى لازم يتلموا و يعملوامستشفى لغسيل ضمائر المسئوليين و هو كله بيطلع فل غسيل برده :)
والله فشل كلوي فشل عقلي فشل وخلاص الفشل ده بقي امر طبيعي في كل حاجه في مصر
بس كان في موقف مل مااسمعه او اقرئه اتأثر بيه جدا موقف سيدنا عمر عندما قال (اخافلو ان بغله تعثرت في العراق ان يسأل عليها رب عمر عمر )لاحول ولاقوة الابالله طب كام بني ادم تعثر ومات هي الناس دي مابتخفش من ربنا هو الفشل الكلوي بس طب والسرطان اللي بيجي بسبب المواد المسرطنه والكبد اللي بيجي بسبب نقل الدم والامراض كلها
ربنا يسترها علينا يارب
وجزاكم الله خير يااستاذتنا
والله يا خالتنا ما اقدر كروتك ابدا
دانا والله فعلا مشغول ومبروحش لناس كتير اليومين دول
بس انت لا
لازم اطل عندك كل شويه
اي نعم مشوار طويل لحد السويس
بس صلة الرحم واجبه برضه
بس الموضوع فعلا مش قادر اقول عليه حاجه
أني شايف منه كتير في كل مكان
بس احنا موصلين موتور عالترمبه بتاعتنا 27 متر
فربنا يسترها معانا
واوعي تزعلي ابدا
السلام عليكم ورحمه الله
فرنستنا الحبيبه
والله مشكله الميه دى صعبه اوى....ناس بتقضيها معدنيه ودول طبعا طبقه معينه وناس بيشربوها ربع ربع بس اهو رضا احسن من غيرهم كتييير وناس نص نص واعنى بالاربع والانصاص دى نسبه التلوث وده طبعا حسب موقعك على الخريطه وحدد موقعك يا بيه والعيب يبقى عندك مش عندنا وفى ناس بقى بتشربها وهيا مغمضه عنيها وبتول يارب سلّموادينا عايشين عيانين بقى ولا اهو محدش بيعيش اطول من عمره وناس مش لاقياها خالص ودول بقى ربنا يكون فى عونهم وف الاخر لازم نحاول نستمر "كل ميسر لما خلق له" واهى ماشيه وربنا يصبرنا على اللى باقى من عمرنا ويصلح حال البلددى
اشكرك وعلى فكره انا لسه " مستجدة" ...سلاااااااااام
ال يعني السياح بيشربوا في الحنفيه
السياح بالكامل بيشربوا من المياه الشرب الطبيعيه التي يطلق عليها في مصر مياه معدنيه
و انا من موقعي هذا بتحدى لاو اي زجاجه مكتوب عليها مياه معدنيه
كلها مياه شرب طبيعيه
في بقى فلتر حكايه
بس ب 3500
ده اخو بتاع الريس
و بصراحه شوفت مفعوله
تجيب الميه من الحنفيه جنب الميه منه تلاقي ميه الحنفيه معكره
ŞoŖśậŖấầ
وانتى طيبه يا صرصاره
وانشاء الله ربنا يكرمك بصرصار ابن حلال
ويبعد عنكم
قر الخنافس
عبدٌ من عباد الله
الله عليك وعلى معلوماتك القيمه
انا متشكره جدا
على تلك الجرعه الهامه من معلومات
مفيده
لكن
جمعيه حمايه المستهلك
كانت طالعه زى الصاروخ من كام سنه
وكانت بتطلع توجيهات بتتنشر اسبوعيا فى جريده اخبار اليوم
وولاد الحلال
وقفوا لها بالمرصاد
لانها كشفت ناس كتير
Desert cat
واحده واحده يا قطه
ماهو انا مش هينفع اتكلم على كل حاجه مره واحده
ومفيش حاجه اهم من حاجه
لكن
ممكن نستغنى عن حاجات كتير
الا
الميه
طمع جشع استقطاع
عاوزة ايه يعني انتي اكتر من كده الناس بيجبلكم المرض وبيعملوا ليكم اماكن للعلاج يا ساتر يارب عليكم احمدوا ربنا بقى وبعدين ده احنا معدة تفرم البرسيم وتطحن الطوب الي في العيش اسكتي اسكتي عمالة تخوفينا احنا ميا ميا ياساتر على الحقد
ghalia
عارفه يا غاليه
مش المشكله انى اشترى الفلتر ولا لا
لو المشكله مشكلتى انا بس
كان يهون
لكن
فى ناس كتير
مش قادره تشترى عيش حاف
ومش قادره تدفع فاتوره الميه
مش الفلتر
احنا يهمنا الميه تكون صالحه للاستعمال الادمى
نظيفه من غير فلتر
ra7eel
برضه كده يا رحيل
تجيبى الميه بتاعتك وانتى جايه عندى
ده كلام
لا
الميه المعدنيه موجوده
اما من ناحيه الغداء
لو تجيبى معاكى
كام جوز حمام
على كام ديك بلدى
على فخده لحمه
على
شويه فاكهه
وانا عندى العيش
اوعى تجبيه معاكى
برضه هنغرم الضيوف
يا عيب الشوم
مروة الزارع
ولا يهمك يا حبيبتى
وبلاش عياط
متبكيش
مسيرهم يوم يتصلوا بيكى
وتتفرجى وتلعبى براحتك
خلاص؟؟؟؟؟
أبوخالد
تحيه ابو خالد
احنا فعلا مش دفعنا الضريبه
احنا
مدن القنال
كانت عندنا اجازه حروب
كلامك فيه الكثير والكثير
وطني
ههههههههههه
والله اضحكتنى
وابكيتنى
النيل جاى من اخر الدنيا
فل
واحنا
بنخليه نيله
وللاسف الشديد الجراحه نجحت
mohand
منور
صح
انت
منور
بس عرفت منين
اكيد بتبص فى المرايه
وعلى فكره
انا قدام الاهلى مشجعش اى فريق
حتى بتروجيت
السلام عليكم ورحمة الله وبركاته
فرنستى الجميله
ازيك كيف احوالك وحشانى والله حمد الله على سلامتك يا قمر ومبرك فك الجبس وان شاء الله ربنا يمن عليكى بالصحة والعافيه
نيجى بقى لموضوع الكلوى
هو ايه فى بلدنا دى ما يجبش المرض
على راى الطائر من السويس للجميع المحافاظات يا فلبى
قلبى واجعنى من حالات المرض الى بشوفها واعرفها ربنا يتولانا برحمته
فرنسا حبيبتى والله وحشانى اخر حاجه
بصى ياستى شركات الميه المعدنيه اصلا بتجيب ميتها من مية الحنفيه
ومن غير ما حد يضحك او يتريق عليا
أنا من مده قريت على مصراوى أعتراف من شركة اكوافينا
أن أكتر من نصف المياه بتاعتها
مياه حنفيه
بس أنا مش عارفه بصراحه موضوع الفلتر ده مفيد ولا لاء
أحنا حتى عندنا هنا مححطات تحليه للمياه وعمرنا ما فكرنا نشترى منها
ربنا يشفى كل المرضى
ويبعد عن مصر كلها أى حاجه وحشه
كل سنه وأنتى طيبه هابى نيو يير
klmat
ربنا يسمع منك
ويجازى اللى كان السبب
بس
بندعى اكتر
ربنا يهديهم علينا
علشان
النا مش تروح فى الرجلين
littel angel (2alb el 2ased
غسيل ضمائر المسئولين
يبقى عايزين ميه نار
الفاتح الجعفري
عندنا 75 مليون متعثر
مش بغله واحده
يعنى بالصلاه على النبى
الحساب هيكون عسير
قوى قوى قوى قوى
دكتور حر
برضه ازعل منك
ابدا
بس عشم
انت عارف مدى تقديرى لكلامك
ولازم اعشم فيك طبعا
مستجدة
لا
مستجده مين ؟؟؟
انتى خلاص من احباب فرنسا
وفعلا كلا خلق لما يسر له
ولكن
مش معنى كده
ان احنا نرضى بالموت البطىء ده
ربنا سبحانه وتعالى
نهانا ان نلقى بانفسنا الى التهلكه
Mohamed_sobhy84
اعلان مدفوع الاجر
قلوب حائرة
لا
وعملين الصلاه علينا فى المساجد كمان ببلاش
لا
يبقوا فعلا
ناس حلوه
واحنا
اللى وحشين
ام الابناء
مبروووووووووووووووووك
ومن
هنا
من مدونه فرنسااااااااااااا
اعلن
خبر
بدايه ام الابناء فى عالم التدوين
وافتتاح مدونتها
واحب ان اشير
ان ام الابناء
ستكون علامه فى عالم التدوين
3ala asm masr
هابى نيو ير
خبر جديد يا هند
ميه حنفيه ؟؟؟؟
كويس
نصب تانى
لكن اهم حاجه
ايه اخبار الامتحانات
والله يا فرنسا يا اختى الفشل بقى فى كل حاجه مش فى الكلى بس ..بس عندك حق الحكومه ربنا يخليها عملت اللى عليها وعملت ليكو مستشفى هى الناس مبتشركش ليه وبكرة هتعمل مدافن علشان تكمل دورها ربنا يخليها لينا ....وحسبيا الله ونعم الوكيل ....فرنسا بلاش تشربى ميه عاديه والنبى انا بحبك اوى هاتى ميه معدنيه على حسابى اختك حنين
فرنسا حبيبتى
والله يا فرنسا اول امتحان مكنش كويس
تانى امتحان كان الحمد لله كويس
وادعولنا بقى فى الباقى
حنين القلب
خلاص انا موافقه
كلمت البياع
وحجزت الميه
بس ابقى فوتى عليه علشان الحساب
ولا ناويه تخلعى
3ala asm masr
ربنا يوفقك يا هند
شدى حيلك شويه
وربنا يذيب الصعب
يا حبيبتى مش السويس بس اللى كده
لالالالالالالالالا ده كتير
انا خلتى وجدتى ماتوا بلفشل الكلوى
اسفه مقصدش اخوفك او افول على اهالى السويس حبايبنا
ولكن علشان متحسيش انكم انتم وبس اللى فى هذه المأساه
متشكر على الموضوع الجميل ده،
انا من السويس وعارف كويس معنى ومعانات الناس هنا ازاى من موضوع الميه.
ومركز الغسيل مليان بس مفيش حاجة بتطلع من الغسيل زى منتى قلتى ده الدنيا بطين اكتر .
الى خلى مفيش ضمير ومراعاة ربنا فى الناس العايشه اكيد برضه مفيش مراعاه فى المستشفيات ..
دائما ما نسمع عن بعض الناس التى تموت بسبب الغسيل وهذا بسبب سوء الخدمة ... وربنا يرحمنا جميعا
واتمنى من الله ان يشفى الجميع
إرسال تعليق