الثلاثاء، فبراير 19، 2008

مظاهرات ...حركه جوعى

خلاص الاجازه بح كام يوم وارجع الشغل تانى ( بفكر اخد اجازه لحسن انا تعبت من القعده ) اتبطرت على النعمه اللى كنت عايشه فيها طوال 3 شهور وانا نايمه فى بلاص العسل
النعمه دى ايه ؟؟؟
ابن اختى ميدو ربنا يكرمه كل يوم كان بيجيب لى العيش لغايه عندى ويقولى اتفضلى يا خالتو وانا مره اشكره وعشره اطنشه واصدر له الطرشه واخد منه العيش واركنه من غير ما اكلم الولد
لما قربت انزل الشغل قلت لاختى مفيش لازمه تبعتى عيش تانى انا خلاص بقيت زى الحصانه وهانزل اجيب طلباتى بنفسى . اختى قالتلى هاتى اللى عايزاه بس العيش زحمه قوى ومش هتقدرى ... قلت لها ماحنا واخدين على كده
لبست الملايه اللف قصدى لبست الهدوم واخذت الميداليه اللى فيها ليزر بتاعه ابن اختى وخرجت اجيب عيش وسمك مشوى
اشتريت السمك وتمام التمام ووديته للشوايه ورحت للفرنه وياريتنى مارحت الفرنه
ويلهوى على الفرنه
لقيت بشر كتييييييييييير واقفين على الفرنه .. افتكرتها خناقه او مظاهره
سألت كتكوته شابه حلوه ماشيه فى الشارع قلت لها هما الناس دى كلها ليه ؟؟؟؟؟؟
البنت بصيت لى من اول رجلى لغايه السطوح فوق وقالت لى من تحت ضرسها بيشتروا عيش يامدام اصل دى فرنه يا هانم.......... هانم؟؟؟ هى البت عرفت اسمى منين ...خياااااانه
قلت لها مانا عارفه ان دى فرنه طيب هما سابوا كل الفران وجم هنا ليه ؟
قالت لى كل الفران بالشكل ده هو حضرتك مش من هنا ولا ايه ؟
وراحت مفلسعه على طول بالخطوه المعتاده وكل ما تمشى كام خطوه تبص عليا .... باين كانت فاكرانى مسعوره هعضها ولا ايه ؟
قربت من الحشد الهائل من المواطنين ووقفت جنبهم تلات دقايق بس ومقدرتش اكمل وده طبعا لانى مكسوره فى عامود السرير قصدى فى العامود الفقرى ومينفعشى اقف كتير .. عملت للخلف در وعلى العيش الطباقى معتاده هرش
اول حاجه عملتها لما روحت اتصلت باختى وسألتها عن ميدو ابنها . ولجل الحظ كان موجود قالى ازيك يا خالتو .... قلت له ازيك ياروح خالتك وحشنى موت يا ميدو تعالى بسرعه عايزاك
واول ما دخل عندى رحبت بيه كانه محرر القدس وحضنته وبوسته واصريت يتغدى معايا ... وكل ده علشان المعاناه اللى كان بيعانيها لمده 3 شهور فى الفرنه واشتراكه فى مظاهرات حركه جوعى التى تطالب بالمم اى بالطعام
ايه الحكايه ؟؟؟؟؟؟؟؟؟
ايه اللى حصل ؟؟؟؟؟؟؟؟؟؟؟؟؟؟؟
ليه الزحمه دى على الفران بالطريقه دى بجد زحمه غير عاديه
اثرت الموضوع ده فى الصالون بتاعى مع اصدقائى لقيت ان انا بس وحيده القرن قصدى انا الوحيده اللى مكنتش واخده بالى من النقطه دى
وده طبعا لانى كنت محبوسه احتياطيا على ذمه الاجازه
ايه سبب مظاهرات حركه جوعى
كل واحده من صحباتى قالت حاجه وكله بيفتى
اللى قالت ان المكرونه والرز غلوا فالناس بطلت تجيبهم وغنولهم بودعك اخر وداع وركزوا على العيش
واللى قالت ان العلف غلى فالناس اللى عندهم حيوانات كييفه علف قلبوا على العيش
واللى قالت ان الوزاره قللت حصه الفران للنص يعنى الفرنه اللى كانت بتاخد 30 شوال دقيق بقت بتاخد 15 شوال
وبعدين انا بصراحه مش عارفه اجيبها لميدو ازاى يرجع يجيب لى العيش من الفرنه تانى
انا بفكر اشترى درع وسيف وحربه وحصان واروح اقف فى طابور الفرنه

هناك 161 تعليقًا:

أحمد منتصر يقول...

الدعم اتشال يا هانم :)

مصر حتشوف أيام سودة أحلك سوادا من بطن الأم

خالد حفظي يقول...

الله يسامحك يا فرنسا هانم
طيب التخاريف راحت فين بس ؟؟؟
و الله لا أدري ... إلى أين نسير
منذ عدة أسابيع مات أحد المواطنين في طابور عيش ... طبعا الله يرحمه كان غلطان لأنه أصر ياكل عيش من بتاع الحكومة عشان موصوف له كعلاج , و كان ممكن ياكل جاتوه و بسكوت بس الراجل ... الله يرحمه ... كان مصر ياخد الوصفة... قصدي عيش الحكومة
..............
يشرى سارة لكل الهوانم الفرنسيات وغير الفرنسيات
خلاص .. مفيش طوابير عيش بعد كدة لأنهم خلاص حيشيلوا الدعم و الرغيف حيبقى بـ 25 قرش

عصفور المدينة يقول...

طبعا تغير وجه مصر خلال تلك الشهور الثلاث من سيء إلى مابعد الأسوأ والأسوأ قادم فعلا

الطائر الحزين يقول...

هو انتى مش واخدة بالك لما قلت عندى انى كنت واقف فى الطابوووووووووووور ولا ايه

وبعدين سنقسم مصر الى مرحلتى

مرحلة ما قبل كسر فرنسا
ومرحلة ما بعد ما فرنسا اتصلحت

هى دى الشفافيه يا هانم ان التاس كلها تعانى


عارفة كنت راكب ميكروباص امبارح ولقيت ناس عمالين بيتناقشوا فى حال البلد

وقالوا الآتى

ما هما عندهم حق اصل الصنايعية لو جريت فى ايديهم الفلوس هيبلطوا فى الخط ويبطلوا شغل فهما مضياقينها عليهم علشان يشتغلوا وما يبطلوش واللى كان متبطر على شغل فى بلدة يروح المدن الجديدة واللى مش لاقى يهاجر ايطاليا واللى مش لاقى يركب عبارة تغرق بيه


فى البلد اللى دمبنا بيجى لهم كل يوم بجنيه عيش ويدفعوا 4 جنيه فى الشهر

جمييييييييييل





تحياتى

صانعة الحرية يقول...

حبيبتى فرنسا اللى زعلانه منها
الف سلامه عليكى والحمد لله انك بقيتى كويسه وهترجعى الشغل تانى
وسلميلى على ميدو ربنا يباركلك فيه
وانا بفضل الله يا فوفه مش بخرج خالص اجيب عيش
علشان انا شاطره ههههههههههه بعمله عندى فى البيت
ففعلا مش حاسه باللى بيحصل ده
بس سمعت عنه
اخويا جاى يقولى كنت هصورلك فيديو وابيعه لكى بعشره جنيه
فيدوي ايه يا ابنى؟؟
قالى راجل شايل طولة عيش والناس ضربوه ووقعوه على الارض وقعدوا ينتشوا العيش والله اكبر ولله الحمد
فى ايام سعادته حتى العيش مش لاقينه
حسبنا الله ونعم الوكيل
اللهم ابعث فينا عمرا

الـسـيـدة نـون يقول...

والله يا فرنستى انا مش هاقدر افيدك فى الموضوع ده
لان مش انا اللى بقف فى الفرن جوزى هو اللى بيقف وبيجيب العيش وانا عمرى ما حاولت اسأله الفرن كان زحمة ولا لأ
وعلى ما اعتقد انه مش بيبقى زحمة لأن لو كان زحمة كان جوزى ماجابش عيش من الفرن وكان جاب العيش اللبنانى
بس انا فعلا شوفت طوابير كتير على افران تانية
بس بصراحة طول عمرى باشوف الطوابير دى على العيش من ايام ماكنت عيلة بضفاير فى بيت ابويا
يعنى مش حاسة ان الموضوع مختلف
لدرجة انى افتكرت ان ده العادى بتاع اى فرن
ولو حد اشتكى من الطوابير اقعد اقول فى عقل بالى امال هى افران العيش كانت عاملة ازاى قبل كدة ما طول عمرها عليها طوابير اشمعنى دلوقتى بيشتكوا
هو ده اللى انا اعرفه عن العيش وطوابير العيش
وربنا يكملك شفاكى على خير علشان عمود السرير يرجع لحالته
وربنا يخليلك ميدو ابن اختك
بس نصيحة منى ابقى شوفيه بربع جنيه
علشان مايتراجعش عن خدمتك
سلام
اختك خيخة

غير معرف يقول...

أختى العزيزة /فرنسا هانم
بالامس كنت راكب ميكروباس سرفيس داخل بورسعيد و عادة انا لا أحب سماع أغانى و أجبرت على سماع أغنية من أغانى العبقرى أحمد عدوية و لاول مرة أسمعها كاملة و تصورى الراجل ده عبقرى فعلا
زحمة يا دنيا زحمة ومعايا إلا ربع ومعادى معاه تمانيه أجى من هنا زحمه و أروح هنا زحمه هنا أو هنا زحمه ..زحمه و لا عدش رحمه و تذكرت مشهد محمود عبد العزيز فى فيلم الشفة من حق الزوجة هو و إنعام الصغيرة ، و كذا فيلم ذهب و لم يعد للفخرانى و وصلت الشغل و أنا فى غاية المرح أنصحك بسماع أحمد عدوية الراجل ده أنظلم و حرموه من الأذاعة و بعدها أغنية سلآمتها أم حسن راجل عشرى و بيسأل على جيرانه و على الدور اللى ماشى و الظاهر الدور ده جالى و الظاهر تخاريفك عدتنى فأنا جالى الدور ..أخيك السعيد بأخوته لك .
أبو خالد

مشروع انسان يقول...

هو احسن حاجة نرجع للماضى بتاعنا
وكل واحد يعتمد على نفسه اعتماد ذاتى

ونرجع صحيح بقى للحربة والدرع
ونمشى فى الغابات
قصدى الشوارع
واى كائن حى يمر
نصطاده

اعتقد ان كل بلاد الدنيا بتتقدم
واحنا هنا بنتاخر وبنرجع لورا
حتى السودان دلوقتى بقى فيه نمو وتطوير رهيب وسعر الجنيه السوجانى بقى تلاتة مصرى وبقوا الناس بتروح بعقود زى الخليج
ربنا يخليلنا السيد المسئول

Empress appy يقول...

بصى يا احلى فرنسا اه الحكومه شالت شويه من الدعم بس علشان يا خالتى يا حبيبتى الناس بتبيع الدقيق والله العظيم قدام ماما فرن عيش من اللى هو بخمس قروش ده وبيبيعوا الدقيق وقررت ابلغ عنهم فى الخباثه بس بعد ما هنصحهم المهم الناس مش بترضى تقف طابور عارفه لما بسافر عند ماما بيكون نفسى انزل اضربهم واقولهم اقفوا طابور وهتخلصوا ويا عينى بتاعت الفرن تقولهم اقفوا طابور بس تقولى لمين احنا منعرفش نظام يا حبيبتى بس اقولك ماما بتعمل ايه ههههههههههه بتقف تنادى من البلكونه وتقولها هى عاوزة بكام ولما بتاع الفرن يجهز العيش ينادى على اى حد فى البيت يأخده هههههههههههههه محسوبيات بقى لو انتى ساكنه قريب كنت جبت لكى يا حبى والله بس لو بقينا منظمين ولغينا الجنان بتاعنا كله هيأخد عيش ويمشى

Doba يقول...

زى مقلتلك فى تعليقى بتدوينتك السابقة
يظل الانسان المصرى مكبل بمسؤولياه حتى يظل يلف ويدور فى الطاحونة لانه لو فاق هيسأل وساعتها الدنيا هتبوظ والعك كله هيقفل الدنيا

فلازم ياخدو البنى آدم من الصبح
فى طوابير وبعدها زبالة الميكروباصات
وبعدها الشغل وقرفه والمديرين ومشاكلهم النفسية

والرجوع بالمواصلات الخنيقة مرة تانية
ويقما الشخص يروح يلاقى مراته بتصوت من قرف العيال والتعليم او الغلا والفلوس وقلتها وما الى ذلك حتى يدرك مخدته لتنتابه الهواجس فيما سيفعله باليوم التالى

وعلى هذا المنوال دواليك
وربنا شاهد ومطلع
وربك كبير
وربنا يستر

سلام بقى
هبة

امانة يا ستو انا تسلميلى على ميدو قوى وتبوسيهولى من هنا ومن هنا

وربنا يستر قوووى بقى على بكرة بتاعهم
تحياتى

القلم السكندري يقول...

أولا ألف سلامة علي حضرتك

ثانيا يا مولاتنا الأميرة.. هما الأميرات بياكلو عيش زي اللي احنا بناكله؟؟

ده انتي تلاقي العيش بيجيلك مخصوص من فرانسا في طيارة مخصوص

ولا بلاش دي واسعة شوية..

تلاقي تحت أمر حضرتك 10 خبازين علي الاقل بيعملولك عيش مخصوص

ولا تلاقيكي بتفطري بدل العيش جاتووه

يلا بقي بلاش نحسد.. خلينا من المواطنين المقربين

بس بلاش التواضع الزائد بتاع حضرتك ده وقال تروحي الفرن زي بقيت الشعب

وبعدين الأعداء في كل مكان وممكن حد كدة ولا كدة يدبر مؤامرة كدة بعد الشر يعني.. خصوصا وانتي مروقة الشعب ع الآخر ونفسه يعمل لك حفل...... بعد الشر يعني



تحياتي

آفاق الحرية يقول...

فرنسا هانم
واضح ان حضرتك كنت فعلا نايمة في العسل نوم
كل حاجة غلت ياهانم
ده احنا حتي العيش اللي هو ب 10 قروش مش لقيينه
يعني رضينا بالهم والهم مرضيش بينا
ربنا ينتقم من اللي كان السبب
كلام في ودنك اللي كان السبب هو اللي بالي بالك بس اصل المدونات لها ودان مش ودنين اتنين زينا

الفقيرة إلى الله أم البنات يقول...

فرنسا الجميله
بعد ارتفاع سعر الرغيف والرغيف ابو 25 قرش انسخط وبقى زى المرحوم ابو 5 قروش
قلت لابو البنات ..ايه رأيك اعمل عيش
فى البيت ضحك وقالى مينفعش
طيب مينفعش ليه...؟
خميرة ودقيقه وشوية رده
طيب هاعمل واخد منه على الرغيف جنيه..

بجد صعبانين على الناس اللى عندها عيال كتيير ..هيعملوا ايه

ولكن علشان ربنا يرفع عنا الهم والحزن ده لازم نصلح ما بيننا وبين الله يرفع عنا هذا البلاء
فرنسا..مبسوطه قلبيته ركن سياسى
ولا أعرفك
خلتينى نفسى اجى السويس..علشان اشوفك

صوت من مصر يقول...

بعد كده مش هناكل عيش
ممكن ناكل باتون ساليه او ساليزو او كرواسوا
الحاجات دى اصل العيش ده بلدى موت
ياعالم ارحمونا هناكل منين قوليلهم يا فرنسا الفقر هيعمل فينا ايه تانى ؟

أم أحمد المصرية يقول...

زعلتني يا فرنسا انت ما اختيش بالك لما زرتيني بخصوص مدونة د / الزعفراني و قلت ان ماحدش منالمصريين بيعمل حاجة غير الوقوف في طابور العيش انت كنت فاكراه تشبيه و لا ايه لا يا حبيبتي ده شعار مصر الان العيش التمام أو الموت الزؤام مع اني واحدة من المرفهين جدا لن حارس العمارة الله يخليه بيجبلي العيش بس بيجيب الكميه اللي علي مزاجه مش اللي انا عيزاها حسب ظروف الفرن اما بقي لو طلعت في دماغه يسافر البلد يشوف العيلة الكريمة سنضطر اسفين نصوم لغاية مايجي هو ده الراجل اللي بيضحي بحياته عشانا ربنا يحميه و يخلي لك ميدو باشا البطل اروح بقي اعاتب احمد ابني و اعطيه درس في الشجاعة عشان يبقي زي ميدو و يحارب حرب العيش اهو نوفر قرشين من اللي بياخدهم عم الحارس

Desert cat يقول...

هو انتى عندك ميدو ابن اختك وبيجيب لك العيش طيب خدى بالك منه كويس اوى وراعيه وكل يوم اعزمية على الغدا
اصل انا عندى ميدو ابن اخويا هو حاجه كدا قد القلم وكل يوم الصبح يجى ياخد منى جنيه اتاوة ولا بيعملى اى حاجه ولا بيبعرنى ... اصله مش ينفع يعملى حاجه ده لسه 3 سنين الا كام شهر .. بالنمسبة للعيش بصراحة مجربتش وقفته ... لان فى ولد يجيب لنا طلبات البيت كل يوم بما فيهم العيش ... بس بشوف المنظر وانا رايحة الشغل ... وتلاقينى ماشية اكلم نفسى هى الناس دى ساكتة على نفسها ليه ... مش بتطالب بحقها فى بلدها ليه ... ده مش فيلم عايز حقى .. بس احنا كمواطنين فعلا لينا حقوق ... هى فييييين .. ارجع برضه واقولك احنا السبب
" ان الله لا يغير ما بقوم حتى يغيروا ما بانفسهم
كل واحد يشيل البلاستر اللى حاطه على بؤه ويتكلم ويطالب بحقه
وحمد الله على سلامتك يا حبيبتى

خمسة فضفضة يقول...

السلام عليكم ورحمة الله وبركاته

الحمد لله الذي عافانا مما ابتلي به كثير من خلقه

الحمد لله عمري ما اضطريت اني اقف في طوابير العيش طكول عمرنا بنعمل العيش في البيت ومستغنيين عن الافران العامه والحمد لله

بس عندي ملاحظة زي خيخه ما بتقول فعلا الطوابير دي طول عمرنا بنشوفها
بس الجديد بقي انهمبيتحكموا في كمية العيش يعني تبقي عاوزه اكتر من نيه يقولك لا مافيش الا جنيه ، وممكن كمان يقولوا مافيش الا بنص جنيه

ربنا يرفع عنا البلاء ويغنينا من فضله

آمين

Unknown يقول...

استاذه فرنسا
لازم تعرفي ان ميدو ده عمله نادره جدا ياه هو لسه في حد بيجيب لحد عيش اليومين دول,ده انا كنت بفكر اعقد معاهم اتفاقيه في البيت اننا نعمل اكتفاء ذاتي في العيش يعني كل واحد يجيب العيش بتاعه بنافسه اللي يجيب رغيفين تلاته عشرة كل واحد يخدم نفسه,بس خوفت الحاجه تقول نعمل اكتفاء ذاتي في الطبيخ وغسيل الهدوم وشغل المطبخ,والحاج يعملها في المصروف وغيره ,لاقيت نفسي انا اللي خسران فانكتمت وسكت
علي العموم ميدو ده يستحق وسام فعلا.
-----------------
علي فكره انا واليعقوبي مش اخوات,بس اكتر والله معرفه بقالها 18 سنة ده انا اللي علمته الكلام والمشي وعلمته يتلامض وكده ده كان ننوس خالص
ههههه
وجزاكم الله كل خير

mado80 يقول...

فرنسا هانم

أول تعليق ليا عندك وان شاء الله مش هايكون الأخير

بصي انت حطيتي ايدك علي الجرح
مشكله العيش دي مشكله كبيره أوي وللأسف مش الحكومه وحدها السبب في المشكله دي

صحيح ان الحكومه قللت كميه الدقيق المدعم اللي كان بينزل للأفران بس صحيح برضه ان فيه بعض أصحاب الأفران اللي معندهمش زمه ولا ضمير بيبيعوا الدقيق اللي بينزلهم في السوق السودا والنتيجه ان كميه العيش اللي بتطلعوا الأفران قل بصوره كبيره أوي وبالتالي ظهرت الزحمه وثوره الجياع اللي انتي اتكلمتي عليها

يلا ربنا يعينا علي العيشه في البلد دي

بس صراحه حقك تعملي لميدو ابن أختك تمثال، ده واد مقاتل بصحيح

معلش طولت عليكي يا فرنسا هانم

تحياتي ليكي وألف تقدير لشخصك الكريم

Unknown يقول...

لبست الملايه اللف قصدى لبست الهدوم واخذت الميداليه اللى فيها ليزر بتاعه ابن اختى وخرجت اجيب عيش وسمك مشوى ... أيه التلقائية الجميلة دى ؟

عادى الحرب بتعة العيش دى للأسف لسة سامعة انهاردة فى الشغل بتقول تصوروا العدس بتاع الغلابة الكيلو بتاعه باه ب 8 جنيه
كنت عاوزة أقولها خلاص ما بقاش فيه طبقات باه كله غلابة :))))

فرنسا هانم يقول...

أحمد منتصر
يارب استر
وادينا بنصدق العباره الشهيره
لامساس بالدعم

فرنسا هانم يقول...

وطني
والله يا استاذنا الجليل
انا قلت اخد اجازه من التخاريف
علشان محدش يمل
اما المواطن المتوفى عليه رحمه الله
توفى فى مظاهرات جوعى
ويبدو اننا سوف نسير فى تلك المظاهرات بدون ارادتنا
وليس جوعى عيش فقط
ولكن
ما خفى كان اعظم
تحياتى

فرنسا هانم يقول...

عصفور المدينة
يبدو ان حضرتك قصدت ما قبل الاسوء
طالما الاسوء قادم
ادعوا لنا يا باشمهندس
ربنا يرحمنا من تجاره الرقيق
وليس الدقيق

فرنسا هانم يقول...

الطائر الحزين
تعليقك ممتاز اخى العزيز
وفيه الكثير من النقد الساخر
انسجمت وانا بقرأه
بس
خلاص
وانا قريت تدوينتك عن الطابور
وفكراها تماما
وبالاماره
التدوينه بتاعه معرض الكتاب
ولكنى لم اكن اتصور ان يكون الحال كذلك
تحياتى
وسلامى لام الابناء
وارجوا ان تقول لها
فرنسا بتدخل مدونتك يوميا
ومش لاقيه جديد

فرنسا هانم يقول...

صانعة الحرية
لالالالالالالالالالالالالالالالا
لالالالالالالالالالالالالالالالا
لالالالالالالالالالالالالالالا
لا انا مقدرشى على زعلك خالص
بس قوليلى زعلانه منى ليه يا قمر ؟؟
برضه حد بيزعل من حبيبه ؟؟؟
فرنسا بتحبك ومتقدرشى على زعلك ابدا
وبعدين
فاز محررى الخبز من القفص
ورفعوا شعار الله اكبر ؟؟؟؟؟؟
احنا باين علينا كلنا وقعنا بالطياره الكبيره فى وسط الصحراء
والجوع قرصنا كلنا
تحياتى لاجدع
صانعه للحريه
بس امانه تقوليلى زعلانه ليه ؟؟؟؟

فرنسا هانم يقول...

بت خيخة وأى كلام
من جهه الربع جنيه خلاص
عصره انتهى وانقرض
دلوقتى عصر الجنيه الكامل
اما الزحمه على الفرنه بقيت بصوره فظيعه
اول مره اشوفها من ايام ما اتولدت
لا اذكر العصر ده بالظبط
ولكن انا مولوده بعد عصر بناه الاهرام
تحياتى لكى

فرنسا هانم يقول...

أبو خالد
هههههههههههههه
ههههههههههههه
ايه الجمال ده كله
اخى العزيز ابو خالد
تقديرى لكلماتك الساخره
ولقلمك الذهبى
بس انا زعلانه من عدويه
سأل عن ام حسن
وانا لما اتكسرت مسألشى عنى ولو بمزدايه صغيره
عموما
جميله تخاريفك
وجميله كلماتك
والدور الدور ..موعوده ياللى عليكى الدور

فرنسا هانم يقول...

امام الجيل
اذن من الان
ساذهب الى اجدع حداد واقفل العجله واخليها مصفحه
واعمل فيها فتحه لاطلاق السهام
وهالبس هدوم ريش
زى الهنود الحمر
واخرج للصيد
ولا الحوجه للفرنه وطابور العيش
بس
هصطاد فين ؟؟؟؟؟
ولا هبيع الميه فى حاره السقايين
بما ان الكل هيتحول لصياد

فرنسا هانم يقول...

appy
من زمان قوى واصحاب الفران بيبيعوا الدقيق برضه فى الخباثه
ومكنشى فى ازمه
الحكايه فيها سر
وياريت كنت ساكنه جنب فرنه
كنت بقيت من المحظوظين
تحياتى الغاليه لكى

فرنسا هانم يقول...

Doba
يوميات مطحون
احنا فعلا مطحونين
ومهروسين
ومجروشين
ومظلومين
بس هنعمل ايه؟؟؟؟
وسلامك لميدو وصل
وبالنيابه عنه بسلم عليكى
علشان هو ميعرفشى حاجه عن المدونه دى
تحياتى لاجمل هبه
بحبك

فرنسا هانم يقول...

القلم السكندري
لا انا كنت رايحه الفرنه اتابع الامن
وابص على الرعيه

بس اقولك بصراحه
انا واخده اجازه من الرئاسه
ودلوقتى فرد من افراد الشعب
بقف على الفرنه واجيب خص وجرجير
وباكل ملوخيه وفول مدمس
وبشرب عصير قصب

واوعدك لما ارجع الرئاسه تانى
هاعمل لك استدعاء
على مانسب اليك من تحريض الجماهير على الريسه فرنسا والتهديد والوعيد فى سوق العيد وباب الحديد
تحياتى لخفه الدم الاسكندرانيه

فرنسا هانم يقول...

آفاق الحرية
ودان المدونات
اااااااه
ربنا يستر علينا من الودان
والمناخير
والحواجب كمان
وحواجب جمع حاجب
والحاجب على ايام السلاطين والملوك
كان حاجب الميه والنور عن الشعب

فرنسا هانم يقول...

ام البنات
السويس كلها تفرح بيكى وتفرش لك الارض ورد وفل وياسمين
بس
انا مش قصدى اقلبه ركن سياسى ولا حاجه
على فكره
انا بكتب اللى بيجى على بالى من غير ما افكر فى السياسه
لانى ببساطه ما ليش فيها
بس كويس ان انتى تعتمدى على نفسك فى موضوع العيش ده
تحياتى الخاصه لاختى الكبيره

فرنسا هانم يقول...

صوت من مصر
مين ؟؟؟
باتون ساليه او ساليزو او كرواسوا
هو سؤال بس من غير فضايح
الاسماء دى لماركات تليفزيون ولا ايه ؟

فرنسا هانم يقول...

أم أحمد المصرية
متزعليش منى يا حبيبتى
انا مقدرشى على زعلك
وبصراحه بخاف من الفلكه
اصل على ايامنا زمااااااان فى عصر ما قبل التدهور كان فى حاجه اسمها فلكه المدرسين كانوا بيخوفونا بيها وكانوا بيعلقوا فيها الولاد
المهم
انا قريت مدونتك وقريت كتييير عن الطوابير دى
لكن اللى يشوف غير اللى يسمع
بجد ماكنتش متصوره المنظر خااااااااالص
تحياتى لاحمد
ولام احمد
وكل اسكندريه

dina يقول...

بصى احنا جنبنا فرن..فبتفرج على فيلم صعبان عليا جفاك دا من البالكونة و لكى ان تتخيلى المشهد الرائع..ايه دا الطبور بجد اطول من اطول سلسلة جبال فى الدنيا...النكتة بقى ان اللى ماسك الفرن بردو بيسرب دقيق من اللى الحكمة بتجيبهوله و بيبيعه و يضرب التمن فى جيب سيادته الشريف و بيغنى للناس خلى الشعب يجوع

فرنسا هانم يقول...

Desert cat
ربنا يخلى ميدو ابن اخوكى
ويكبر وتشوفيه فارس كبير من فرسان انتزاع العيش من الفرنه
عارفه
مع كتر الحاجات اللى الناس بتعانى منها
الناس بقيت متعايشه مع المعاناه دى لدرجه جااااااااامده جدا
تحياتى لكى
قطتى الجميله

فرنسا هانم يقول...

خمسة فضفضة
بس مش بالدرجه دى ولا بالشكل ده يا دكتوره
الطوابير زادت عن حدها
لدرجه كبيره
والله انا عمرى ماشفت المنظر ده
وبعدين الناس الغلابه كتير جدا
ومتقدرشى تشترى العيش الطباقى
واحده زى انا ممكن اشترى
لكن
الغالبيه العظمى من الناس متضرره
وبتعانى
عارفه
تعليق من اخواتى فى الصالون وانا نسيت اكتبه
واحده بتقول
انا بشوف كل يوم الصبح ناس كتير ماسكين قفاص ورايحين على الفرن اكتر من الناس اللى رايحين على الشغل

فرنسا هانم يقول...

الفاتح الجعفري
ههههههههههه
ضحكتنى جدا
اكتفاء ذاتى فعلا انت الخسران
فى كل حاجه
اما البطل ميدو
فانا بفكر اديله وسام الشجاعه من الطبقه مرات الطبق
قصدى من الطبقه الاولى
وتحياتى لليعقوبى
وقول له
انت مخاصم خالتك فرنسا ولا ايه ؟
وادعو من ربنا يحفظكم

فرنسا هانم يقول...

mado80
انا فكرت فى كده
الولد ليه 3 شهور
بيدافع ويقاتل فى سبيل الحصول على الرغيف
ومن حقه عليا الاشاده والاعتراف ببطولته النادره
مع الاعتراف ببطوله جميع من يشارك فى مظاهره جوعى
والاعتراف ببطوله الشعب كله
وبطوله افريقيا كمان
واحلى سلام للدعم الهمام

فرنسا هانم يقول...

عاليا حليم
انا سمعت انه وصل 9 جنيه
الطبقات بقيت طبقتين بس
حصل فيهم تخفيض
بدل طبقات
لا
طبقتين
طبقه اصحاب المعالى والفلوس اللى زى الرز
وطبقه الشعب اللى مش لاقى الرز

فرنسا هانم يقول...

dina
خلى الشعب يجوع
سمعتها فين الاغنيه دى ؟؟؟؟
سمعتها فين ؟؟؟؟؟؟
ااااااااااااه
افتكرت
بيحضروا انها تكون السلام الوطنى للبلد
تحياتى لكى

مهندس مصري بيحب مصر يقول...

الحمد لله عندنا نظام الإشتراك في توصيل العيش للمنازل بـ 4 جنيه في الشهر و يديكي بجنيه واحد عيش في كل يوم

لكن إفران العيش فيها ضرب بالجزم
و مفيش طوابير فيه شكل ربع كروي متكوم عند الشباك و بيتحارب مع بعضه للحصول على العيش
المخبز الآلي لدمنهور كلها جنبنا و لما بأكون معدي جنبه ساعة البيع بأشوف مهازل
الحمد لله ان ربنا تاب عليا منه

انتي مش من البلد دي يا فرنسا و لا ايه؟
حتخليني أصدق انك من فرنسا
:)
أما بالنسبة للصور يا ستي
ايه هتطلعي قرار جمهوري بمنع الحلاقة و لا ايه ؟
صورة البروفايل كنت حالق و مروق و بالبدلة و على سنجة 10
بقية الصور كنت عادي وبشعر طويل و على سنجة 7
فرق سنج يا فرنسا
:)

nigro يقول...

أولاً يا ريت حضرتك توصّلي تحياتي للجندي المقاتل الرفيق ميدو لأنه ما شاء الله عليه باين عليه كده واد خلاصة من اللي بيفوتوا في الحديد و دي أهم صفات رجل الطوابير الفرنية
ثانياً الحكومة عندها نية خفية في موضوع الطوابير دي.. شايفة المواطنين كل واحد منهم في وادي و ملهوش دعوة بأخيه المواطن
فقالت انها تجمّعهم على أفران العيش و ذلك من توحيد قوى الشعب و القضاء على الفردية و مقاومة الإحتلال و جمع الدعم المادي و المعنوي للفدائيين و و و
و السلام عليكم و رحمة الله و بركاته
ربنا ينتقم من الظالم

صوت من مصر يقول...

يا فرنسا دى اسماء اكلات الوزرا وال رؤسه

كاميليا بهاء الدين يقول...

أقولك على حاجة؟

مش فيه حد هايحل حاجة
يبقى لازم الناس تفكر فى الحل

كل واحد يفكر ويقترح فكرة ازاى نوفر لنفسنا خبزنا؟؟
وأنسب فكرة تتطبق
على الاقل كل اصحابك اللى علقوا فوق يطبقوا الفكرة وتبقوا بدأتوا بحاجة

يمكن
يجيى يوم
نقدر نحل فيه مشاكل تانية
ونبقى بدأنا بنفسنا

تحياتى

غير معرف يقول...

أختى فرنسا
والله أنتى دمك خفيف دى طبيعة،من ناحية أخرى صدقى يا شابة أنا أول واحد بعث لك E MAIL أتمنى لك الشفاء العاجل و أرجعى لرسائلك ستجدينه ..
أبو خالد

غير معرف يقول...

خاااااااااالتو فرنسيس هانمو
تحياتوووووووو
والعيش العيش العيش
وقفنا طاوابير الجيش
هههههههههه
تسلمى يا قمر المدونات
بطه

الربان يقول...

تحياتي

و الله ميدو يحتاج تمثال... ياريت تديري بالك عليه( علي رأي الاخوة اهل الشام).

المشكلة هي الفساد الذي ضرب كل شيء و احلام الثراء السريع...و عدم القناعة
و الرضي عند التجار....

الكل يصلي...و يحدثك بقال الله و قال الرسول...و هو محتكر...و لا ادري هل يعلم ان الاحتكار حرام ام لا يدري..

يسرق قوت الغلابه المطحنوين ...و لا يتورع عن زيادة مشاكلهم...

الحل...؟

العودة الي الله في السر و العلن... ووزارة تعرف كيفية حل مشاكل الاغلبية العظمي المطحونة و إلا فلترحل ، عسي ان يأتي بعدها من يحل.....



تحياتي و تقديري...و حمدا لله علي عودتك سالمة مرة أخري .

غير معرف يقول...

سيدتى الكريمه
الطوابير اصبحت كالماء والهواء
واحنا بقينا زى السمك
لو طلعنا بره الطوابير نموت
ابو الفدا

MerMaid يقول...

فين اسمي و لينكي في قائمة امفضلة بتاعتك ؟؟حطيتي فيها طوب الارض و نسيتيني يا فرنستتي ؟؟؟ مكنش العشم يا خالة فرنسا هانم
----------------------------------
انا عمري ما نزلت رحت الفرن ولا وقفت في الطابور علشان نجيب عيش
هقولك بنعمل ايه
بنجيب الدقيق و المكونات بتاعة العيش و نبعتها لاي حد بيعرف يخبز كويس و هو يخبزلنا عيش نضيف و طعمه حلو وخالي من اي مكونات حكومية اخري مثل المسامير او البلاستيك او الخيوط او الشعر
ابقي جربي الفكرة دي
اكيد يعني سمعتي عنها قبل كدة
تحياتي ليكي بس بجد واخدة علي خاطري منك يا فرنسا
:(
سلام

صاحب المضيفة يقول...

ولسه الجاي أكبر

ربنا يستر علينا وعلى مصر

انمتي كده طمنتيني على مستقبلي في الزوجية

ربنا يسهل بقى ونعرف نكمل في الحياة بالمنظر ده

سلاماتي يا خالتي

raspoutine يقول...
أزال المؤلف هذا التعليق.
raspoutine يقول...

جميلة القصة والف سلامة عليكى
اما بالنسبة لطابور العيش بقى يا ستى انا بيتهيألى انه بقى طابور اجبارى زى طابور المدرسة وان كل البشر لازم تقفه غصب عنها
انا الحمد لله عمرى ما وقفت فى طابور مدرسة لكن ربنا يشيل عنا وعن السامعين انا وقفت كتير فى طابور عيش
ده انا سمعت فتوى بتقول ان اللى يموت وهوا واقف فى طابور عيش يعتبر شهيد على ان لا يقل طول الطابور عن نص كيلو متر مربع والا اصبح منتحراً

تحياتى ليكى

سلطان الغرام يقول...

ما تزعليش يافرنسا هانم قريب انشاء الله هيوصلو العيش لحد عندك

زى ماعم ذكريا بيوصلهولنا

طبعا هتسالى مين عم زكريا

اقوللك ياستى دا صاحب الفرنه اللى فى شارعنا

بحبك يامصر يقول...

فرنسا هانم
انا شايف انك تعينى حراسه على ميدو ابن اختك لانه ممكن يتخطف ده فى الزمن ده زى سوبر مان
مش انا اللى هخطفه مشكلة العيش عندنا محلوله بنعمله فى البيت بس انا حسيت من الردود ان فى نوايا مش سليمه
وانا بعتذرلك عشان انا استخدمت اسمك فى البوست الاخير بتاعى من غير استأذان

mohamed emera يقول...

السلام عليكم
بوست جميل قوى ودمه خفيف
بس الحمد لله احنا مش عندنا الازمه دى
اقصد الزحمه على فرن العيش
الحزب الوطنى عندنا عامل مشروع توزيع الخبز على المنازل وباشتراكات شهريه
اهو بيشغل ناس توزع قوى عامله اهو
وفى نفس الوقت بيحل مشكله الزحمه
ربنا يخليلنا المشاريع المحترمه ويكترها يارب
ملحوظه المحترمه بس
يلا سلااااااااااام

mohamed emera يقول...

صحيح الف سلامه بعيد الشر عنك
اتمنى تكونى احسن دلوقت
اسالك الدعاء لاهل غزة
اشوفك بين حروفك
سلاااااااااام

انين الحزن يقول...

فرنسا

وحشتيني مووووووووووت

الواد محمد دخل قبلي انتهز فرصه غيابي وقالك علي عمو زيكو بتاع العيش

بصي خدي بالك من ميدو بن اختك كويس

الراجل كان بيحارب

.........

كان نفسي اكون اول تعليق يارب حققلي الامنيه دي بقه

بحبك .... وزتك

ابن حـجـر الـعـسـقـلانـى يقول...

إيه دة يا فرنسا ؟ انتى لسة بتاكلى عيش من الفرنة ؟؟ انت ليه مش بتاكلى كرواسون ؟؟ أو باتون ساليه ؟؟ أو سيمون فيميه ؟؟ أو حتى سيمون من غير فيميه ؟؟

أنا مش عارف انت معقداها على نفسك ليه مع إن الحل بسيط

--------

و بخصوص رحلتى إلى السويس .. إحنا روحنا صلينا الجمعة فى جامع مش فاكر اسمه على القناة عدل .. جنب نادى اجتماعى مش فاكر اسمه .. بس دخلنا النادى دة شربنا شاى و أكلنا جاتوه .. و يبدو إن النادى دة خاص بالناس اللى شغالة فى هيئة قناة السويس .. لأن أبو صاحبى شغال قبطان بيسوق الفرقاطات (جمع فرقاطة يعنى) عشان يعدى بيها من أول القناة لآخرها

بعدها روحنا أكلنا سمك من محل مش فاكر اسمه لكن المحل كان جنبه محل تانى مش فاكر اسمه برضه لكن المحل التانى اسمه كان مكتوب بطريقة تغزلل عين اللى بيقراه

بعد كدة روحنا عملنا الحادثة .. و بعد ما خلصنا الحادثة روحنا صلينا العصر و بعدها اتفرجنا على البوارج و هى تعبر القناة و بعد كدة صلينا المغرب و العشا عشان كنا على سفر فى نفس الجامع اللى مش فاكر اسمه .. و بعدها روحنا اشترينا فطير بالكستر (أحلى فطير بالكستر أكلته فى حياتى) من عند محل فى شارع ضيق مش فاكر اسمه (اسم المحل و اسم الشارع كمان) .. أخدنا الفطير و انطلقنا.. روحنا أكلنا الفطير فى نادى مش فاكر اسمه برضه لكنه النادى المدور اللى حوالين البحيرة اللى أنا مش عارف اسمها .. و احنا فى النادى المدور استغربت جدا لأنى سمعت من بعيييييد صوت واحد بيدى درس فى جامع و بيشكر فى حسن نصر الله على دوره فى المقاومة (خدى بالك من "مقاومة" دى) روحت قايل لصاحبى السويسى: أنا مستغرب من الراجل دة .. ازاى بيشكر فى حسن نصر الله كدة على منابر المساجد على مرأى و مسمع من الناس على غير عادة كل أئمة المساجد اللى بيشتموا و يسبوا فى الشيعة و خصوصا حسن نصر الله .. لقيت صاحبى بيقول لى: دة الشيخ عيد (تقريبا دة اسمه أصل أنا مش فاكره قوى) دة كان قائد المقاومة الشعبية فى السويس .. بصراحة قلت:السويس دى بلد رجالة .. و كل اللى فيها رجالة .. و تاريخها تاريخ رجالة .. رجالة رجولة الآية اللى بتقول "من المؤمنين رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا" .. لكم تحياتى يا أهل السويس

و بعدها طلعنا قعدنا على قهوة جميلة جدا اسمها قهوة الزمالك (الوحيدة اللى أنا فاكر اسمها) .. بصراحة استغربت إنى لقيت ناس زملكاوية غيرى على وجه البسيطة .. و بعدها انطلقنا عائدين إلى القاهرة مضطرين إننا ناخد معانا النور اللى نورنا بيه السويس

لكن بجد .. مدينة السويس جميلة جدا .. و الناس هناك كلهم أخلاق جدا و بيتعاملوا بهدوء على عكس القاهرة تماما

طولت فى التعليق معلش

فرنسا هانم يقول...

مهندس مصري
اه ان كان فرق سنج يبقى انا فهمت
الميزان هنا طابب
وهناك برضه طابب
الصورتين حلوين
وبعدين انا من البلدى
بلد ابويا وجد جدى
انا من البلد دى
بس
كنت فى اجازه 3 شهور بسبب الكسور
علشان كده مكنتش اعرف ايه اللى بيحصل
رغم انى سمعت عن طوابير العيش
الا ان الرؤيه غير السمع

فرنسا هانم يقول...

Nigro
شوف والنبى ازاى
ياعينى ظلمنا الحب
قصدى يا عينى ظلمنا الحكومه
اتاريها كانت نيتها خير واحنا اللى مش واخدين بالنا
خلاص
تبقى تعمل الفرن فى استاد القاهره
لزياده تجمع قوى الشعب
وعجبى
تحيه لقلمك الساخر

فرنسا هانم يقول...

صوت من مصر
امال انا لما كنت رئيسه فى التخاريف
كانوا بيجيبولى عدس وبصل اخضر
وكشرى
وبطاطس نيى فى نيى

فرنسا هانم يقول...

كاميليا
كاميليا يا حبيبتى موضوع العيش ده بالذات صعب على المواطن انه يحله
لو قلنا الناس تخبز فى بيوتها
70 فى الميه من الناس متعرفش تخبز
الحل فى الموضوع ده
عارفه ايه ؟؟؟؟؟؟؟؟؟؟؟
الحكومه عايزه تزق الشعب انه يطالب برفع سعر الرغيف ابو شلن وزياده حصه الدقيق
هو ده قصد الحكومه
والظاهر ان الحال هيمشى على المنوال ده
تحياتى لحبيبتى الغاليه

فرنسا هانم يقول...

أبو خالد
والله يا ابو خالد يا اخويا اخر حاجه بفكر انى اقراها الايميلات
لكن لو حد قالى انا بعت لك اميل بجرى بسرعه البرق واستلم الاميل
وبجد اطلاعى على البريد الالكترونى بسيط جدا

فرنسا هانم يقول...

بطه
اغنيه السلام الوطنى دى ولا ايه؟
تحياتى لبطتى الغاليه

فرنسا هانم يقول...

الربان
والله ماجصر الولد ميدو
على رايى السعوديين
وزاره ترحل ؟؟؟؟؟؟؟؟؟؟؟؟؟
اهو ده اللى مش ممكن ابدا
احنا هنا بنعرف
حاجه اسمها الاقاله
ولا نعرف الاستقاله
وتحياتى العطره لك

فرنسا هانم يقول...

ابو الفدا
هى بقيت ميه وهواء ؟؟؟؟؟؟؟؟
خير

فرنسا هانم يقول...

MerMaid
من حقك تزعلى
وانا اقدم اعتذارى على طبق فضى
وانا اهو
جيت وشايله كفنى معايا
يلا
الصلح خير
واسمك فى الصداره
بس بجد
انا اسفه
امواااااااااااه

فرنسا هانم يقول...

صاحب المضيفة
ايه يا عريس ؟؟؟
انت هتتلكك من اولها ؟؟
احنا لسه مباركين لك
بلاش التلاكيك
ولو كان على العيش
هاقف لك انا يوميا واجيب لك عيش وابعته فى الاتوبيس
سلامى وتحياتى

فرنسا هانم يقول...

raspoutine
ياسيدى مراحب بيك
لكن
دى مش قصه ده فعلا حصل معايا
بس سؤال
ازاى عمرك ماوقفت فى طابور المدرسه ؟؟

فرنسا هانم يقول...

سلطان الغرام
ايوه ياسيدى
اللى ليه ضهر مينضربشى على بطنه
تحيه لعم زكريا
وللتوصيله الحلوه ديه

غير معرف يقول...

فرنساهانم
انا كنت عايزه اقولك
هى السويس مفيهاش توصيل عيش للمنازل

فرنسا هانم يقول...

بحبك يامصر
رحت وشفت البوست
وكتبت الوصيه
وانا لله وانا اليه راجعون

فرنسا هانم يقول...

mohamed
ياريت المشروع ده يتعمل هنا فى السويس
هيحل مشاكل ناس كتير
وقلوبنا مع اهل غزه
ونسأل الله لهم بالنصر
اللهم وحد صفوفهم
اللهم وحد صفوفهم

فرنسا هانم يقول...

انين الحزن
خلى بالك ممكن انتى ومحمد تعملوا دويتو هايل
انتوا الاتنين روحكم حلوه
وفوق راس بعض
وولد وبنت
وبتحبوا الفكاهه
يعنى ممكن تتفقوا مع بعض وتعملوا تدوينه ورد عليها من خلال القفشات المضحكه
وتكون عن الصراعات الداخليه بين الاخ والاخت
بس من غير زعل
تحياتى
وقبلاتى
لوزتى الحبوبه

فرنسا هانم يقول...

ابن حـجـر الـعـسـقـلانـى
حمد لله على السلامه
ونحمد الله انك افتكرت انك فى مدينه اسمها السويس
ايه يابنى ده؟
ولاحاجه فاكرها
على العموم المسجد اللى انت صليت فيه

http://img101.imageshack.us/img101/160/37053607xdgumafs6jl.jpg
والشيخ اسمه الشيخ حافظ سلامه وهو قائد المقاومه الشعبيه بالسويس
http://www.islamonline.net/arabic/famous/2003/11/images/pic04b.jpg
وبكده
انت هتفتح نفسى انى اتكلم معاكم شويه عن السويس والثغره والمقاومه الشعبيه

فرنسا هانم يقول...

غير معرف
لا مفيهاش توصيل للمنازل

عبد الرحمن مدني يقول...

من كان يؤمن بالله و اليوم الاخر فليزور مدونه
اخوان ستايل ويفرج عن كرب اخوكم المسلم

انين الحزن يقول...

فرنسا حياتي

انا كدا هابتدي اغير من الواد محمد

بتدخلي عنده من غير ما يعزمك علي حاجه تشربيه وانا وزتك العسل الا بتعزمك علي سحلب وبيقلب معاكي نسكافيه مش بتيجي عندي

فرنسا يافرنسا انا بحبك وكتر تكرارها هيزهق مني بس اعمل ايه بحبك

وزة

رفقة عمر يقول...

تصدقى يافرنستى الجميله انا زعلانه منك
مين استاذه دى ازاى تقوليلى استاذه انا عندى حساسيه من الكلمه دى جدا
انا اختك رفقه وبس بجد باحس بالالفه اكتر
وباحس استاذه دى سخريه لانى لا استحقها كدة زى لما نقول للسباك يادكتور
حيبتى انا اختك وبس
بحبك فى الله

فزلوكة يقول...

العيش
والبنزين
والسكر
والشاى
وكللللللللللللله غلى
وكلللللللله بيتسرق
بس ديه الحكاية

خايف من الحقيقة يقول...

الحمد لله على السلامة يا هانم
اعرفك بنفسي
محاسب برضه
بورسعيدي
عشت في السويس احلى ايام عمري وليا فيها اخون قصدي اخوة لحسن حد يفهمني غلط اروح في .......
المهم انا حاليا بعيد عن مصر اوي بس والله قريب منها قوي
وتعبان من اللي بسمعه كل يوم
ومش عارف اتصرف ازاي حاسس ان انا مسئول ولازم اعمل حاجة يمكن ده احساس بالذنب لاني مش مشارك فعليا في الوجع مع الناس مش عارف
بس عموما البوست جميل
وشكرا يابنت السويس
وابقي زورينا

ana ga3an يقول...

مدونتك دمها خفيف جدا
وقريبة من لسان حال البشر الغلابة
و ان شاء الله تقومي بالسلامة و تنزلي تقفي في طابور العيش بنفسك
برضة الواحد ملوش غير فرنة

هو البني ادم مننا اية غير طابور
وكيس سكر

Ehab يقول...

واخيرا وبعد طول انتظار

كتاب يوميات اتنين مخطوبين نزل يا رجاله في المكتبات والمحلات

متوافر بمكتبة عمر بوك ستور
مكتبة مدبولى
الديوان بالزمالك
مكتبة ساقية الصاوى

وكمان حفل توقيع في: عمر بوك ستور
15 شارع طلعت حرب فوق مطعم فلفله ( عند محطة مترو السادات
من الساعه 6 مساء الى الساعه 9 مساء
وذلك يوم الجمعه الموافق 22 فبراير 2008


وقناة OTV هتيجي تصور حفل توقيع الكتاب
والدعوه عامه وهنبقى لمه
تعالوا شرفونا واحضروا معانا اللحظه دي
كلكم مدعوين

رئيس جمهوريه نفسى يقول...

فكرتينى ببوست كنت كتبته على البلوج القديم اسمه محدس بياكلها بالساهل الواقع امر يا خالتى فرنسا من الى شفتيه لانى الحمد لله عندنا العيش بيتحط ليه رحاسه من الشرطه على كل فرن لضمان التوزيع العادل

عروسة ننوسة يقول...

والله عندك حق الواحد لازم يعين حد مخصوص علشان يشترى له العيش ...تحياتى لكى

الباحث عن الحقيقة يقول...

السلام عليكم
ممكن خمسة ارغفة الله يسترك قالولى انك فتحتى فرنه فى المدونة سبت طابور العيش وجتلك جرى
ما شاء الله حتى هنا زحمة برضه
بس انتى مننا وعلينا مش هنقر يعنى
خمسة ارغفة بس اتوصى يعنى من العيش بتاع البنى ادميين ..ولو مفيش خليها رغيفين علف والباقى بنى ادمين
انا امبارح قريت كل المدونات اللى فاتتنى
بجد ايه العظمة د يا ريسه ..وتكريما للست الريسة انا قرقرت افتح ورشة عجلاتى جنب الاستراحة لاجل خاطر عجلة الست الريسة وهسميها ورشة فرنسا
بس المشكلة انك حاطة صورة عبلة كامل فى عودة الندلة
ده الملحق ولا ايه
ربنا يستر
متنسيش تدى الواد ميدو وسام الفروسية ومنحه لقب سير

مدحت محمد يقول...

خالتو فرنسا تنزل تشترى عيش بنفسها
وتقف فى الطابور والنبى بجنيه عيش
ووااحدة تقلها
لو سمحت ده طابور الخمسات اقفى فى طابور العشرات
وهى لسة راجعه من تعبها على طول كدة
لا مالكيش حق انتى ظلمتى نفسك ياخالتو
الحقيقة انى فعلا انا من اول ماسيادتى اتولدت
وعمرى ماشفت الفرنة رايقة غير فى وقتين
بعد صلاة العشا
وبعد صلاة الفجر
اما غير كدة بتبقى ضرب نار وخاصة بعد صلاة الجمعه
لو سمحت انت برة الطابور ارجع ورا
ميدو هو الحل
ومتفكريش تعملى كدة تانى يابنتى
خلى ميدو ابن اختك يجبلك كمية حلوة وحطيها فى الفريزر
عشان متتعبيش الواد
سلامات ياخالتو

Unknown يقول...

لو قدرتي تقنعي ابن اختك
ينوك ثواب خليه يجبلي بنص جنيه عيش معاكي
الاهي ما يوقفك في طابور عيش قادر ياكريم..
صدقوني بكره الهروين هايبقه ببلاش والدقيق هوه اللي هايتشم

Dr.khaled يقول...

يا بختك بـ ميدو...
ملاقيليش تلات اربع مواديد

يريحوني من الليلة دي !!؟؟

غير معرف يقول...

first i'am sorry i have no arabic letters in my keyboard

el7amd lellah enek shofte tabor 3esh bs
omal law shopfte tabor 3amal shehadat elmelad bl computer 3lshan el tamween
hte3mele eah

(احمد سكر ) يقول...

خالتى

وهو ايه انهارده مبقاش فيه طوابير

انتى بتقولى رحتى للعيش الطباقى واشتريتى
انتى اشتريتى كدا بسهوله بردو ؟؟؟

يبقى انتى محظوظه !!!

والله دا حتى العيش ابو ربع جنيه بقى زحمه موووت
اللى رايق عندنا العيش ابو نص جنيه

ايوا انتى سمعتى صح

عيش بنص جنيه

ولا الفينو ابو جنيه
اسكتى ياخالتى متقلبيش المواجع

عارفا من يومين كدا

وبعد فترة نقاهتى انا كمان

رحت علشان اعمل شهادات ميلاد كومبيوتر لاولادى محمد ومحمود

يلهووووووووووى

اتخضيت ذهلت صعقت

من الناس اللى كانت هنااك

والله بدون مبالغه اكتر من الف واحد وواحده

ايه يجدعان ايه الزحمه دى

قالو على الشهادات


اشمعنه يعنى

واحد قالى طب انت جاى تعمل ليه

قلتله عاوزينهم فى الشغل
المهم علشان مطولش
قالى يعم دووول بيضيفو المواليد على بطاقة التموين!!!!

قلت ليه ايه

يطاقة تموين

هو لسا فيه دعم

طبعا الراجل اذمهل ونفس شعور البنت اللى بصتلتك
طب والحل انا عاوز اعمل الشهادات مش معقوله اكون اجازه من الشغل شهر
ومش هعمل الشهادات

المهم قلتلهم شضغالين للساعه كام

قالى للساعه 10 بليل

قلت كويس الساعه دوقتى 4

اروح اتغدى عند بابا

وارجع على الساعه 9

وحصل ورجعت
ولقيت طابور بس فيه تقريبا 100 واحد وواحده
قلت كويس ااقف فى الطاابور

هههههه
ووصلت اخير للشباك

كنا عشره اللى فاضلين
وعشر ستات
ههههههه
وكانت الساعه 10
امممممممم
والمنحوس منحوس
حتى الساعه 10

هههههههه
الموظف قالى خلاص
الساعه بقت 10
يعم حرام عليك دانا واقف من العصر
>>>>>>>>>>> كذاب ال يعنى واقف من العصر

قالى والله دى الشيكه الرئسيه هى اللى قفلت

هههههه
ولكى ان تتخيلى
مدى الاحتقان

يعنى ياخالتى
توقعى
القااادم اسوأ

وربنا وحده هو اللى قادر يرحمنا

معلشى طولت عليكى

اخوكى

احمد

لـــى لــــىِ يقول...

مش عارفة اعلق اقول ايه
مش لاقية كلام

بس عندى سؤال
هو فيه شعب تانى على وجه الكرة الارضية
بيقف طابور على العيش؟

طيب ايه الفرق بينا وبين جوعى الصومال
اللى واقفين طابور بصحن فى ايديهم علشان ياخدوا
حبة رز ولا دقيق؟؟؟؟؟؟

يارب ارحم عبادك
من عبادك التانين

لى لى

فرنسا هانم يقول...

عبد الرحمن مدني
طيب هو فين رابط المدونه

ندعو من الله ان يفرج كرب المسلمين اجمعين

فرنسا هانم يقول...

انين الحزن
هو مقلبشى معايا نسكافيه ولا حاجه
مش انا الضيفه
طلبت اشرب نسكافيه من ايديكى الحلوه
وشربت
هو انتى نسيتى ولا ايه ؟؟؟
اما عن محمد
هو واد جدع
وكفايه ان اخو وزتى الحلوه
بس قوليله يهتم بالرد على التعليقات

فرنسا هانم يقول...

رفقة عمر
اختى وحبيبتى الغاليه
رفقه عمر
انا قلت استاذه
لانى حسيت بتدوينتك جدا
وحسيت ان ده كلام استاذه
والله انا مش بتريق ولا حاجه
انتى اكبر من لقب استاذه وليس اقل
فكلماتك ممتازه
وانا قلت اللقب عن التدوينه
اما انتى
فاختى وحبيبتى رفقه عمر بدون القاب

فرنسا هانم يقول...

فزلوكة
كله فى الطراوه يابا
كله فى الطراااااااااوه
بس
هو ده الامر الواقع

فرنسا هانم يقول...

خايف من الحقيقة
طبعا انت مسئول
ومفروض تشارك معانا فى الطوابير والمعاناه
انت قلت انك خارج مصر
وعلشان تكفر عن غلطتك
ونسامحك
مفروض تروح السفاره المصريه فى البلد اللى انت فيها
واكيد هتلاقى ريحه الطابور هناك
اقف لك ساعه
وبكده تبقى شاركت معانا
وتكسب معانا
_
وبعدين احنا زمايل مهنه
وزمايل قناه
تحياتى لك

فرنسا هانم يقول...

ana ga3an
انت جعاااااااااان
ياروح خالتك
بقى تيجى وتتعب نفسك لغايه هنا
وتكون جعان ومتقولشى لخالتك فرنسا
تعالى اقعد وكل بالهنا والشفاء
وكل ماتيجى وبرضه تكون جعان
افتح التلاجه على طول وكل اللى نفسك فيه
عنوان التلاجه
55 ش المطبخ الركن التالت جنب المطبقيه
وتحياتى لك
وشكرا على تشريفك

فرنسا هانم يقول...

الشنكوتي الكبير
مبرووووووووووووك يا شنكوتى
وابقى شوفنى بنسخه
كادوووووووووووو

فرنسا هانم يقول...

رئيس جمهوريه نفسى
احنا لسه متقدمناش لكده ياريس
عبقالنا ما تطولنا يد المدنيه والتحضر

فرنسا هانم يقول...

gannah
لا
انا مقولتش الواحد يعين حد يشتري له عيش
انا بستنكر المشهد فقط
لان حتى لو عينتى حد يشترى عيش برضه هيعانى من اللى بيحصل
وتحياتى وشكرا على تشريفك

فرنسا هانم يقول...

الباحث عن الحقيقة
المعلم الكبير عندنا
يا مرحبا يا مرحبا
بس ايه يا معلم انت جاى على طمع ولا ايه ؟؟؟
عايز رغفين علف والباقى من عيش البنى ادمين ؟؟؟
المقرر بيقول 90 فى الميه علف
وعلشان خاطرك وخاطر اخونا ابو العساقيل
هنخلها فيفتى فيفتى
اما عن ميدو
فحدث ولا حرج
خلاص
انا بفكر ابعت سيرته الذاتيه عن طوابير العيش لموسوعه جنيس للارقام القياسيه

فرنسا هانم يقول...

دوحة
ياهلا ياهلا
اخيرا دوحه ؟
وحشنى جدا
مش عارفه فى ايه فى مدونتك
كل ما ادخلها الجهاز يهنج
ومش لاقيه مكان للتعليق
انا دخلت عندك من خلال مدونه اونلى بوست فضفضه
فى ايه ؟؟؟؟؟؟؟؟؟

فرنسا هانم يقول...

دمعاتي
وعندك بنص حنيه عيش لدمعاتى حالا

ياعينى عليك يا ميدو
سمعتك هتبقى عالميه فى طوابير العيش
دمعاتى
بكيت لملاحظه الدقيق والبودره
وان كانت واقعيه

فرنسا هانم يقول...

ض/خالد
من كان عنده ميدو
فقد امتلك ابواب البلع
تحياتى

فرنسا هانم يقول...

عبدٌ من عباد الله
لسه مشفتش طوابير شهادات الميلاد
لكن
سمعت عنها المأسى
فى السجل المدنى عندنا فى منطقه المستقبل
سمعت ان الامن المركزى يغلق ابواب السجل ويقوم بادخال المواطنين بالعدد
عشرين وبعدين عشرين
وذلك
لوفاه مواطنه تحت الاقدام نتيجه للزحام
بس خلاص

غير معرف يقول...

ya faranca:
koly 3esh feno ya sety wala rich bake howa lazem tebahdely medo ma3akay
sa7e7 3azamty 3ala 2eh 3al 3'ada
nefsy 2a3raf
salam leky o l medo

فرنسا هانم يقول...

سكــر

اولا
انا معرفشى انك كنت تعبان
الف سلامه
ثانيا
برضه مسمعتش بجد عن الرغيف ابو نص جنيه
ولا الرغيف الفينو ابو جنيه
اما عن شهادات الميلاد
اقراء ردى فى الاعلى على عبد من عباد الله
وتحياتى لك
وسلامى وقبلاتى
لاولادك محمد ومحمود

فرنسا هانم يقول...

لـــى لــــىِ
مفيش فرق
بس هما جوعى الصومال
واحنا جوعى مصر
الفرق فى البلد
ولكن حاله الصومال موجعه جدا
ربنا معاهم

فرنسا هانم يقول...

Soletoo
لو على الفينو ولا البسكويت
ولا اى حاجه سهله
انا بتكلم عموما
مش على حاجه فرديه تخصنى انا بس
وعموما
انا عزمت على ميدو يتغدى
وطبعا اتغدى معايا
هو يقدر يخالف كلام خالته
سيبك انتى من ده كله
وحشااااااانى جدا

(احمد سكر ) يقول...

مهو المشكله يا سيداة الريس

ان الناس اللى حوليك

سدين ودانك من اصراخ الشعب

وعاميين عنيك عن الامهم


ياريس والله والله

رغيف الفينو بجنيه

والعيش فى الفرن بربع جنيه وبنص جنيه

دا طبعا بعد الظهر

بعد الافران اياها ماتقفل

وتروح للطباقى

وطبعا على مزاجه

اذا عمل رغيف بربع

بيعمل قدامه 5 من ابو نص

وانت طبعا مستعجل

هتاخد الموجود

ربنا يستر

امممممممممم
ااقولك تانى ياريس
ولا بلاش

علشان انت بردو خارج من فترة نقاهه زى

تحياتى ليكى اختى الغاليه

هههههههه
كل حاجه غليت اشمعنه انتى

احمد سكر

سلطان الغرام يقول...

مرسى بجد يا فرنسا هانم على اهتمامك

وشكرا بجد على النصيحه

ربنا يخليكى للشعب

رفقة عمر يقول...

فرنساا حبيبتى
انا عارفه انك مش بتتريق طبعا بس انا باحبك وبجد باحس بالالفه اكتر لما تقوليلى رفقه بس مش باحب كلمه استاذه نهائى واى حد بيقولهالى بقوله مش تقولها تانى
وربنا يخليكى ليا يارب
وجزاك اله خيرا على تشجيعك ليا دايما وكلامك الكبير عليا قوووى
ربنا ييسر لك كل خير ويارب يجى اللى يجيبلك العيش وكل حاجه وانت معززة مكرمه اللهم امين يارب العالمين
وبعدين انا مش كنت زعلانه ولا حاجه دة كلام كدة بس علشان تعرفى انى احبك تعاملنى زى اختك من غير القاب بينا
دمتى بكل خير

Unknown يقول...

:)
درع وسيف وحربه وحصان ؟؟؟
والله لو عملتى ايه...
طوابير العيش دى محتاجه دبابات ومدرعات...
دى ماساه يوميه والله...حاجه بقت تقرف
وياريتك بتطلعى برغيف عدل...دا بقى محتاج ميكروسكوب عشان يتشاف..ومعده حديديه عشان تهضمه
:)
------
زيارتى الاولى يا خالتو فرنسا..وان شاء الله هكرها
تحياتى،،،

همس الاحباب يقول...

انا لسه جاى من الفرن قصدى لسه جاى المدونة بتاعتك بس لقيتها زحمة برده وعليها طوابير ده مش حسد ده قر بس ومفيش حد احسن من حد
انتى فى السويس وبتقولى زحمة ومال لو جيتى عندنا فى الجيزة وشوفتى الطوابير اتقولى ايه ولسه
تحياتى خالد

همس الاحباب يقول...

وعملتى خير انك رجعتى العلاقة مع ميدو وعزمتيه على الغدا

حبة حاجات (ايمان) يقول...

قال يامصريين يكفيكو شر المصريين برضه

فرنسا هانم يقول...

سكــر
لا خلاص هتقول ايه تانى ؟
انا مصدقاك
وتحياتى لك
اخى الغالى
بالمره انت كمان غالى
الزيت وكل حاجه غليت
اشمعنى السكر
ههههههههههههه
برضه دمك خفيف

فرنسا هانم يقول...

سلطان الغرام
العفو يا محمحد
لاشكر على واجب
تحياتى لك
ولوزتى القمر

فرنسا هانم يقول...

رفقة عمر
حبيبتى الغاليه رفقه عمر
انا متفهمه كلامك
ومفيش بين الاخوات القاب
تحياتى الخاصه لكى

فرنسا هانم يقول...

حطم القيود

اهلا بك فى اول زياره
وهافكر فى حكايه الدبابات دى

وسعيده بحضورك

فرنسا هانم يقول...

همس الاحباب
هو الطوابير زى ما سمعت كده منتشره فى كل المحافظات
لكن السبب ايه ؟
هو ده السؤال
شرفنى حضورك

فرنسا هانم يقول...

همس الاحباب
هو الطوابير زى ما سمعت كده منتشره فى كل المحافظات
لكن السبب ايه ؟
هو ده السؤال
شرفنى حضورك

فرنسا هانم يقول...

حبة حاجات (ايمان)
صدقتى
من دقنه وافتله

آخر العنقود يقول...

ههههههههههههههههههه
لازم يعنى تفكى الواحد
والله دى بقت مآساة
بس هنعمل ايه لااااااااااااااااااامفر

تحياتى ليكى ياخالتو
على فكرة ده تانى تعليق ليا وانتى مش بتردى عليا:(
ازعل عنى..ازعل
:)

فرنسا هانم يقول...

آخر العنقود
انا ميخلصنيش ابدا زعلك
هو انا اقدر
تحياتى

أمـ الله ـة يقول...

ربنا يبارك لكِ فى ميدو وفى أخت حضرتك

أنا كنت مفكرة ان الزحمة فى طوابير العيش عندنا فى بورسعيد علشان بيشتروه ويبعوه بره البلد الرغيف بربع جنيه

مكنتش اعرف ان الزحمة فى الجمهورية كلها

صالح سعيد يقول...

بصراحه انتى اكتشاف يا فرنسا
اسلوبك جامد وساخر جدا
فكرتى تكتبى سيناريو كوميدى
السؤال ده بجد مش هزار
فعلا لو عندك الاستعداد او القدره انا ممكن افيدك
تقبلى تحياتى

عبده الرايق يقول...

بشششششششششششششششرى
بشرى كبرى
تم افتتاح مدونه
عبده الرايق
الى كل المدونين والمدونات
والتعلب فات فات وفى ديله سبع لفات
الى كل اصحاب الورش
الى عم غزالى
الى فريد بيه
وام حسن
وصفيه عادل
واهدى السلام الى ماما وخالتو
وهانى عبد المجيد
تحيييييييييييييييه
لفرنسا هانم
ملكه النص
والنص نص
وسمعنا السلام الفرنساوى يا جدع

عبده الرايق يقول...

عدنا
بعد الفاصل
دعونا نواصل
عبده الرايق
فى ميدان الجيزه
والجزيره
عبده الرايق يقدم السلام والتحيه
لكل الليله ديه

عاشــــــ النقاب ـقــــة"نونو" يقول...

ايه الناس البلدي دي ما تاكلوا باتيه ولا باتون ساليه ولا حتى فينو
ازيك اختشي الحبيبة
دة انتي مش بس تغدي الواد وتبوسيه دة انتي تروحي تجيبيله شوية لعب على شوية هدوم يعني وتعوضيه هدر الساعات اللي وقفها في الفرن وانصحك تحسني علاقاتك بيه وبامه لابعد الحدود لانك لو وقفتي في الفرن مرة واحدة هتشوفي العجب العجاب سواء من الرغيف نفسه او من البشر
اسفة على تاخيري في التعليق على مدونتك الغالية
دمتي بخير وسعادة

عاشــــــ النقاب ـقــــة"نونو" يقول...

نسيت اقولك بجد انتي كنتي مكسورة الف مليون سلامة عليكي طمنيني عليكي مش الحمد لله تمام وربنا يعافيكي باذن الله

احساس لسه حى يقول...

عزيزتى
سمعت ان الرغيف هيغلا فى شهر 7

والناس تانى هتروح للمكرونة والرز
وطابور العيش يخف شوية

بس اكيد برضوا هتلاقى المكرونة والرز غلوا

يا هانم بلدنا بقيت فى النازل ما اصل لو مال قارون مش هيستحمل بجد

اللى مزعل الواحد انه عايش فى مصر
يعنى المفروض الخير كله والعز كله يكفينا ويكفى اللى حولينا

مش طابور على عيش

تحياتى
سلام

أم أحمد المصرية يقول...

صديقتي فرنسا الجميلة شكرا علي ردك و لو اني كنت داخلة اقراانتاجك الجديد لقيت كسلانة ايه رجعت الشغل يا قمر و انشغلت عن مهام رياسة الجمهورية اللي بحب اقرا يومياتك فيها علي العموم انا في انتظار جديدك
علي فكرة قبل مامشي انا مدرسة طيبة ما عندهاش فلكة تصدقي اني بأعامل تلميذاتي علي اننا صحاب مش دايما يعني لكن غالبا مالم اضطر لموقف تربوي صارم و بما اني مش بعطي دروس مش بحتاج انكد علي الطلبة فمتخافيش مني خالص مش حاعلقك في الفلكة انا مس ديموقراطيه
تحياتي وسلاماتي ورغفين عيش هدية لفرنسا هانم اللذيذة

عبده الرايق يقول...

عبده الرايق
مدونه ساخره
عبده الرايق
لعب وجد وضحك وضرب ................
عبده الرايق
يقدم لكم احلى تشكيله من المكسرات والمفتفتات والمطحونات والتعلب فات فات وفى ديله سبع لفات
عبده الرايق
راااااااااااااااااااااااااااااااااااايق
ومرووووووووووووووووووووووووووق
والدنيا كاسحاه فى ديلها

عبده الرايق يقول...

عبده الرايق
مدونه ساخره
عبده الرايق
لعب وجد وضحك وضرب ................
عبده الرايق
يقدم لكم احلى تشكيله من المكسرات والمفتفتات والمطحونات والتعلب فات فات وفى ديله سبع لفات
عبده الرايق
راااااااااااااااااااااااااااااااااااايق
ومرووووووووووووووووووووووووووق
والدنيا كاسحاه فى ديلها

مدحت محمد يقول...

ايوة ياخالتو
معلش بغير العفش اللى فيها قدم
بس اعتقد دلوقتى هى اتعدلت الحمد لله
رب العالمين
وبقى ليها شكل ولون تانى
يارب يخليكى ياخالتو

HeBa يقول...

فرنسا هانم

ألف سلامة عليكي ويارب تكوني بخير

في سبب تاني جوهري لطابور العيش غير الغاء الدعم أو ارتفاع سعر الرز والمكرونة

أقولك بقى ايه هو

أنا يا ستي ساكنة قدام فرن

وبعد صلاة الفجر - تقريبا علشان ربنا يوفقه يعني- بيروح عموصاحب الفرن مسرب له كام شوال على الماشي بطريقة نفع واستنفع

طبعا يتنفع تجار الدقيق ويستنفع هوا

وعليه على الساعة 12 بالكتير أوي يعني تلاقي الفرن شطب

ومش عايزة أقولك على كم الخناقات والشتايم اللي بسمعها يوماتي

الناس بتضرب بعض وعندهم استعداد يموتوا بعض كمان

فنصيحة أوعي تخلي ميدو يفلت من ايدك لأن الدروع والسيوف مش هتنفع المعركة دي خالص

تحياتي

Empress appy يقول...

انتى فين مختفيه

عايش... ولكن !!!! يقول...

هههههههههههههههههههه
اول زياره للمدونه
وبجد ماشاء الله عليكى
عيش ايه اللى انتى جايه تقولى عليه
بكره لما تشمى ريحته هتقولى هيه
كان زمان بيقولوا عيش ويطالبوا بيه
يارب اكرمنا ونفضل بس ع اللى حنا فيه
ادعى معايا
يارب اكرمنا ونفضل بس ع اللى حنا فيه
يارب اكرمنا ونفضل بس ع اللى حنا فيه


حلو الشوية الارتجالى دول
يلا تحياتى
علاء

انين الحزن يقول...

فرنسا حياتي

انتي فين مش بتباني ليه

اوعي تكوني بتجيبي عيش وواقفه في الطابور

وحشاني بجد

وزتك

بنت الصالحين يقول...

ده بيقولو هيبقي علي بطاقه التموين يافرنستي

الا ايه بطاقه التموين دي
هي لسه في حاجه موجوده اسمها بطاقه تموين


لاحول ولاقوة الا بالله
لنا الله

كاميليا بهاء الدين يقول...

سبحان الله

عندى احساس غريب بالشوق ليكى

وحشتينى اوى

فرنسا هانم يقول...

أمـ الله ـة
بصراحه انا كنت فاكره زيك كده ان الزحمه فى السويس بس
طلعت عالميه
وعلى ميه وعشرين

فرنسا هانم يقول...

صالح سعيد
انا بحب النوع ده من الكتابه
لكن لغايه دلوقتى مفكرتش
واعتبرنى فكرت
ايه نوع الافاده ؟؟؟؟
انا بتكلم جد برضه
يمكن افكر اكتب حاجه

فرنسا هانم يقول...

عبده الرايق
ايه المظاهره دى يا عم عبده يارايق
ده افتتاح مدونه
ولا محل ملابس ؟

فرنسا هانم يقول...

nonoymm
اه
انتى مكنتيش تعرفى اللى حصلى من ام دبوه
انا عندى كسر فى الفقرات القطنيه نتيجه وقعه على الضهر
كسرين فى الفقره الاولى والتالته
والتفاصيل فى المدونه فى شهر نوفمبر
كنتى بجد وحشانى

فرنسا هانم يقول...

احساس لسه حى
لو كان كلامك صحيح
وهيغلوا العيش
تبقى الطوابير ارحم
لان فى ناس غلابه كتير
انا 3 ارغفع يكفونى فى اليوم
انا كل كلامى على الناس اللى عندها عيال

فرنسا هانم يقول...

أم أحمد المصرية
طيب ماهو باين عليكى الطيبه والاخلاق الحميده
من اول ما قريت ليكى حسيت بيكى بقلبى
وانا فى الحاجات دى حساسه قوى
يعنى ممكن احكم على الاشخاص وكتير بيجى حكمى صح
تحياتى لكى

فرنسا هانم يقول...

عبده الرايق
الرايق
تانى
اهلا بيك
وربنا يجعل حياتك كلها روقان

فرنسا هانم يقول...

دوحة
علشان تعرف انى كنت بسأل عليك

فرنسا هانم يقول...

Heba
ده اكبر مثال لقله الضمير والدين
بيع الدقيق المدعم
طيب ما الحكومه ممكن تضرب عصفورين بحجر
وتعمل هى افران تبع الحكومه
وتضمن ان الدقيق مينباعشى

فرنسا هانم يقول...

appy
انا هنا هنا يابن الحلال

فرنسا هانم يقول...

appy
انا هنا هنا يابن الحلال

فرنسا هانم يقول...

عايش ولكن
شويه محفوظات

يارب اكرمنا ونفضل بس ع اللى حنا فيه
يارب اكرمنا ونفضل بس ع اللى حنا فيه

امين يارب
ونورت المدونه

فرنسا هانم يقول...

انين الحزن
انتى اللى وحشانى ياقمر
انا هانزل بوست جديد انهارده انشاء الله

فرنسا هانم يقول...

عاشقه الفردوس
ده المصيبه الكبيره
انهم فى عز المعمعه دى
هينزلوا مواليد جديده فى بطاقه التموين
بس
دى
حركه تموين

فرنسا هانم يقول...

كاميليا
زى ماكان احساسى باظبط
صح
وحشتينى جدا

سلوى يقول...

وحشتيني يا فرنسا
مع إنك ما سألتيش عليا

ما علينا

المهم
كل حاجه ولعت يا فرنسا
وربنا يستر ع الشعب
وحسبنا الله ونعم الوكيل

المهم
ميدو بعد كده تعامليه معامله خاصه

أسلوبك مميز كالعاده

تحيااااتي