اولا
خبر وصول شاحنه محمله بالوقود الى قطاع غزه وبدء تشغيل محطه الكهرباء هو بدايه لفك الحصار عن غزه
ندعو الله ان ينصريحفظ غزه
ثانيا
انا مقموصه وزعلانه من المدونين اللى ساكنين فى القاهره
انا بقالى 3 ايام فى القاهره ومحدش سئل فيا ولا حد عزمنى حتى على شفطه ميه
ليه البخل ده
وانا اللى نازله ومنفوخه وعامله نفسى ياما هنا ياما هناك وفاكره الاخوه هيقابلونى بالورد والفل والياسمين
انزل رمسيس الاقى الزحمه افتكر الناس دى كلها المدونين اصدقائى استنى حد يمد ايده ويسلم عليا محدش معبرنى
ولا حتى يافطه مكتوب عليها مرحبا فرنسا هانم
ابتسمى فرنسا هانم انتى فى بلد المعز لدين الله الفاطمى
المهم
انا رجعت السويس دلوقتى حالا وهاحكى لكم عن زيارتى للقاهره رغم كيد الاطباء
اما الان مع فاصل اعلانى
عدنا من جديد
اخوانى الان مع التاج ....مجلس الشعب
دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
المركب
كنت تفضل الدخول مستقل او تتبع حزب معين ؟؟؟؟
مستقله
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
النقطه دى بالذات انا قرفانه منها وعايزه اصرخ منها
العضو اللى ينجح مستقل ويمضى للحزب الوطنى فى نصاص الليالى زى الحراميه لايستحق دخول المجلس من اصله
لانه ضحك على الناخبين
الناس انخبته علشان هو مستقل
وبقى ناجح بحكم الناس
مش من حقه انه يضرب بالناس دول عرض الحائط ويمضى للحزب الوطنى او حتى حزب ام حنفى
ايه اول حاجه هتعملها لنفسك ولاسرتك ؟؟؟؟؟
الانتقام من ام دبوه
ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت
خط ميه حلوه بنت ناس تتشرب للسويس
خط ميه حلوه ياخلق
خط ميه حلوه ياهووووو
قعدت فى المجلس جنب نائب مميز . من هو النائب ؟؟؟
كنت اتمنى اقعد جنب النائب المميز ممتاز نصار عليه رحمه الله
اما الان فاجلس بجوار النائب سعد خليفه
قدمت سؤال للحكومه ايه هو السؤال ؟؟؟؟؟
فين فلوسنا ياعسل؟
فين المنى يا اموره ؟
بعتى الدوله ياكتكوته .....وديتى القرش فين ؟؟
طلب احاطه موضوعه ايه ؟؟؟ وبتقدمه لمين ؟؟؟؟
اولا تعريف طلب الاحاطه هو طلب يتقدم به أعضاء البرلمان لنظر قضية ما على نحو عاجل. ويجري قيام بقية النواب بالتوقيع عليه خلال انعقاد الجلسة.
علشان كده الطلب حول منع مصر دخول المساعدات الى قطاع غزه بناء على توجيهات الست اسرائيل باشا كعب الغزال
استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟
الست اللى كتبت التاج ده غلطانه فى السؤال
كانت مفروض تكتب استجوابين لاتنين من الوزراء
مش استجواب
هى بتهزر ولا ايه ؟؟؟؟؟
عموما
الاستجواب الاول
لوزير التربيه والتعليم
حول تطوير التعليم وعدم تناسبه مع عقول اطفال الابتدائى
وخاصه الصف الثالث الابتدائى
كان فى تانيه قديم
ودوه فى ثوانى على تالته حديث من غير لا احم ولا دستور
العيال مخها ضرب
مش فاهمه حاجه
واسألوا
الاستجواب الثانى
لوزيره القوى العامله حول استحداث شركات القطاع الخاص لموضه جديده
هى طلب الشركه من الراغب فى العمل امضاء جواب الاستقاله قبل الامضاء على العقد
بمعنى ان اللى عايز يشتغل يمضى على جواب استقاله مع العقد ويفضل جواب الاستقاله مع الدوسيه بدون تاريخ لو العامل همس همسه واحده بدون امر المشرف او المهندس يطلع جواب الاستقاله
مش دى اسمه العمل بالسخره برضه ولا ايه ؟؟
هل انت مع الخصخصه ؟؟؟؟؟؟
خصخصه
مش سرقصه
هل انت مع قطع العلاقه مع اسرائيل ؟؟؟؟؟
نعم وبشكل نهائى
هل تؤيد الحرب الحرب على العراق ؟؟؟؟؟؟؟؟
بالطبع لا
هل تؤيد مرور الامريكان فى القناه ؟؟؟؟؟؟
بتحسر وانا على شط القنال والاقيهم متنيلين على عين ابوهم وماشيين فى القنال
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟
مين فرنسا هانم ومين ام دبوه ؟
انا معرفشى الاشكال دى
بلدى قوى
بتمرر التاج ده لمين ؟؟؟؟؟؟؟؟
مررته وخلاص
شكر خاص للاستاذ وطنى على استجابته الفوريه للتاج
الاشتراك في:
تعليقات الرسالة (Atom)
هناك 87 تعليقًا:
حمدالله على سلامتك يا فرنستى
طب مش كنتى تقولى انك فى مصر كنا عملنا معاكى الواجب
عموما منورة القاهرة ومصر وكلها
حلوة اجاباتم على التاج
اختك خيخة
كدة يا خوخة
بقى انا جاية جرى عشان احجز اول تعليق الاقيكى سبقتينى
تيب مش فارقة
أنا بحجز وحشرب فنجان شاى وراجعة
ياااااااااااااااااااااااه
حمدالله عالسلامه يا فرنسا
اجابات جميييييله
أي نعم متسربه
بس روعه
خاصة أسئلتك للحكومه
حمدالله عالسلامه تاني
رجعت
ازيك يا فرنسا يا قمر
بقى متيجش القاهرة الا اليومين دول
ده الجو منيل بنيلة هنا
عموما يا ستى نورتى القاهرة والحمد لله على السلامة
اجاباتك تمام التمام
تحياتى ليكى وعقبال التاج الجاى
أيوة ما انت محضرة الإجابات وانت اللي عملتي التاج
إجابات جميلة بس انا باعارض خط المية الحلوة عشان مش يروح كدة ولا كدة
عظيمة يا فرنسا هانم فى اجابتك على التاج، و حمدا لله على سلامة و صولك لبيوت السويس بيوت مدينتى ،و أرجو أن تصفحى عن أم دابو لتكونى من العافيين عن الناس .
أبو خالد
انتى كنتى فى القاهرة طب مش تقولى واحنا كنا احتفلنا بيكى
:))))))
اجاباتك على التاج فى الجووووووووون خصوصا سؤال الحكومه جاااااامد
هههههههههههه
حمدلله على سلامتك يا فرنستى
سلامى يا جميل
اهلا باحلي خالتشي
علي فكره انا مكنتش اعرف انك جايه
لو اعرف كنت فرشتلك الارض رمل
بس الله انا اصلا مش من هناك
انا منوفيايه
ههههههههههههههههههههههههههههه
نسيتيني شوفتي بقي
بس اجاباتك عسل ياخالتو
خصوصا انك طلعتي زيي متعرفيش ام دبوه
الا بيني وبينك كده هي مين ام دبوه دي
جامدة الاجابات
بصراحه كنت ناويه امرلك التج بس انى سبقتى
على العموم انتظرى اجابتى عليه قريب ان شاء الله
تعالى عندن اسكندريه يا خالتى وانا اوجب احلى واجب معاكى بس انى اعمليها
تحياتى لك
دى تانى مره اكتب التعليق
فرنسا حبيبتى الاول حمد الله على سلامتك
ثانيه والنبى معاكى بالمره أسألى وزير التعليم العالى لامتى هنخرج ناس من الكليات مش فاهمين حاجه والاسم معاهم شهاده
لامتى هنفضل نشترى مخلصات فيها كلمتين نكتبهم وخلاص
لامتى هنفضل كأننا بنتعلم
لامتى التعليم هيفضل كده
السلام عليكم
لو كنت قاهري كنت عزمتك
معلش
مبروك لمصر
يا خبر فرنسا بحالها عندنا فى القاهرة
معلش خيرها فى غيرها
إيه حكاية الأطباء يارب حضرتك تكونى بخير
خط ميه حلوة للسويس وصلحه يابنى عشان فرنسا هانم متسحبش الثقة
غلابة يا أهل بلدى خط مية حلوة فى بلد النيل يا أيها الخجل أين حمرتك من خدود الناس إياهم
لا شكر على واجب يا فندم
ندعوكم لمشاركتنا في حملة المدونة صمود
إنا عائدون
http://somood.blogspot.com/2008/01/blog-post.html
طب حضرتك تصدقي بردو ان احنا نكون عارفين انك ف القاهرة ومنرحبش بيكي
لالالالا
مكنش العشم
المرة الجاية ان شاء الله بس ابقي ادينا معاد نزولك القاهرة وهتشوفي
D:
انا بئا نفسي اعرف ايه حكاية ام دبوه؟
وازاي اصلا تتنطق؟
انا كاتبها بالشبه كده
D:
انا جاوبت يا خالتى على التاج ده
تعالى شوفيه وايدك على الحلاوة وزغروطه كده وانتى داخله من باب المدونة
طيب والله ما حد قالى عيب كده بقى تصدقى انا زعلانه طيب كنتى قولتى انا بس بلغونى منزلش وسط البلد لان زحمه فكده فهمت ليه علشان انتى هناك طيب كنتى قولى كنا فرشنا لكى الارض فل وياسمين وورد بدل المطر ده
خالتي فرنسا
اجابات تاج جميلة بصراحة
ربنا يوفقك
ادعوكي لتدشين حملة الدفاع عن غزة في مدونتك
وليكن هذا ما نستطيع ان نقدمه في هذه الفترة تجاه اخواننا المحاصرين في غزة
ويكون لكي الاجر عند الله
بالروح بالدم
نفديكى يا فرنسا
اول ما شوفت البوست وعرفت انك فى القاهره فرحت وانبسطت وكنت هطير من مكاى وقولت حنتقابل يوم الجمعه فى معرض الكتاب .. لكن رجعت تانى كشرت عن انيابى ولو شوفتك دلوقتى هفترسك علشان سحبتى فرحتى من تانى ورجعتى السويس
المهم مش مطمنتينا ايه الاخبار بعد رجوعك بالسلامة من بنت المعز لدين الله
بت خيخة واى كلام
الله يسلمك يا خيخه
انتى و شريف ايه اخباركم ؟
وحشتونى جدا
ومتشكره على كلامك عن التاج
اختك فرنسا
ghalia
ولايهمك ياغاليه
انتى وخيخه واحد
والف هنا على الشاى
بس فوتى لى شفطه
دكتور حر
ابن اختى الغالى
وحشنى جدا
ايه اخبارك ؟
انا متشكره على كلامك لكن يعنى ايه متسربه ؟
ghalia
كويس ان الاجابات عجبتك
وعلى فكره
المطره عملتها معانا فى القاهره
وكملت واحنا راجعين فى الطريق
وزيارتى للقاهره
هاحكى لكم عليها
عصفور المدينة
استاذنا ابو يحيى
ليه المعارضه دى يا استاذ ؟
يمكن عقلهم يرجع فى راسهم ويجيبوا الخط
ولو ملقيوش الخط
معندناش مانع ناخد كرت وخلاص
أبوخالد
منورنى دايما يابو خالد
عارف
انا فعلا صفحت عن ام دبوه وسامحتها
لكن الوليه مش عايزه تتهد
ورجعت تانى لافعال زمان
يعنى رجعت ريمه لعادتها القديمه
shayma
يعنى عايزه تفهمينى انك انتى والمدونين مكانوش يعرفوا ميعاد وصولى
ده كان متذاع على الهواء مباشره
وكان فى استقبالى حشد كبير من الناس
بس الغريبه
ان ولا واحد عرفنى
كل الناس مشيت فى حال سبيلها وطنشونى
عاشقه الفردوس
مين قال انى نسيتك ياقمر ؟
اللى يقول كده مش هاسمحه
حلو منوفيايه دى
يعنى انى سويسيايه
على فكره
ام دبوه مذكوره فى التاريخ
كاسره فرنسا هانم
صاحبه اقدم صفيحه زباله فى السويس
واحسن انكى متعرفهاش
لماضة
على شط اسكندريه ورمانا الهوى
لماضه انتى فينك من زمان ؟
كنى نسيانى ولا ايه ؟
على العموم
لما ازور اسكندريه هاقولك
ونشوف الواجب
3ala asm masr
هند ؟
ايه اخبار الامتحانات الاول
سبع ولا ضبع
انا هاوصل رسالتك للوزير
بس بعد الامتحانات فى نهايه السنه
انتى عايزه الدنيا تتقلب على الطلبه ولا ايه ؟
mohand
مهند
وحشنى جدا جدا
مبروك رجوعك للاضواء
شفت الاربع تجوان سيما يابنى
ولا الجون بتاع محمد زيدان التالت
فى المقص
عبقال السودان
طال الليل
متستعجلش
فى التانى السلامه انا هكتب عن رحلتى فى بلاد العجائب
قصدى للقاهره
حلوه السخريه الحزينه بتاعه ميه النيل دى
ربنا يستر
وطني
انت عارف
لسه قاعده اتجول انهارده
هاروح اشوف الحمله
وانا مستعده
آلام وآمال
حكايه ام دبوه
هتلاقيها هنا
http://faransahanm.blogspot.com/2007/12/blog-post.html
اقراها وانت هتعرف مين ام دبوه
انا عارفه ان كلكم واجب
لكن ده كان فى 34 قناه بيذيعوا الزياره على الهواء مباشره
لماضة
انا فى الطريق اليكى
بس جهزى الساقع
appy
طبعا وسط البلد كان زحمه جدا
والناس حواليا ملمومين زى الرز
عارفه ليه ؟؟؟
عماله انادى
يا appy فين البطوط يابن حجر يا دكتور حر يا خيخه يا اخوانى المدونين
الناس اتلموا وقالوا وليه مهروشه فى مخها
بس الحمد لله
مكنشى فى عيال صغيرين
والا كانت هتبقى زفه
الجمعاوي الاصيل
انا معاك
ومستعده لاى حاجه
انا كنت هاكتب عن غزه
لكن اليوم اللى جيت فيه السويس
لقيت خبر بدايه فك الحصار
عبدٌ من عباد الله
شعبى الحبيب
لاداعى للهتاف
دعونا نسرق فى صمت
قصدى دعونا نعمل فى صمت
Desert cat
السفر والرجوع كانوا فجاءه
وانا هنزلهم فى تدوينه
لكن اطمئنى عليا
غلبت الاطباء ورجعت سليمه بفضل الله
فرنسا هانم باشا, اولا سلامتك مال الدكاترة ومالك ما سيبوكى فى حالك,بتمنى ليكى كل الصحة والعافية, وبشكرك على زيارنك لمدونتى أولا وثانيا وثالثا وعلشان اظهر أمامك وأمام الاخوة المدونين كريم حقول رابعا وخامسا,أما بالنسبة لزيارتك الى القاهرة فلو كنت عرفت كنت فرشت لجنابك شارع الشانزليزية الى فى باريس ويبتدى من متحف اللوفر وينتهى عند قوس النصر(أيتوا) ورد وياسمين وقرنفل, لية بقى هناك مش هنا, عارفة لية, لان شوارعنا المحروسة لو فرشنا فيها الورد حيتسرق وأحنا برنشة عينى عينك! أما بالنسبة لمجلس مش عارف اسمة اية أنا لما أعرف هو فين أبقى أعلق علية, أما بالنسبة لغزةفالحمد للة دخلوا مصر وبيشتروا أكلهم من رفح والعريش وربنا يسترهم وينصرهم وكفاية كلام, سلمى لى على بيوت السويس بيوت مدنتى الى دفعت عن كل مصر ولم جرب الاسرائلين دخولها شافوا يعنى أية مصرى فى حالة غضب وجروا منها زى الفيران.
مبروك التاج
الا صحيح مين ام دبوه دي؟
طب ممكن تشكلي الكلمه عشان اعرف انطقها
والله انت عسل
القاهرة ضلمت بعد ما مشيتي
طب مش كنتي تقوليلي انا لسة جاية من شبرا يوم السبت كنت استقبلتك والله
اجاباتك في الجوووووووووون
يلا تعالي زوريني
طلبت منك اجاوب على التاج دة من زمااااان لكن ما ردتيش علي
اعتبر السكوت علامة الرضا ولا ايييييييييييييييييه
mohamed
ايه ده كله ؟؟؟؟
ورد وفل وياسمين احمدك يارب
كل بيوت السويس بترحب بك
كل بيوت السويس فداء لمصر
وعلى فكره
الاسرائيليين ملحقوش يهربوا
اللى دخل
خرج على جهنم عدل
حل وسط
ام دبوه موجوده هنا
http://faransahanm.blogspot.com/2007/12/blog-post.html
ومنها لله
على العموم شكرا على الزياره
nonoymm
انا جايه ازورك حالا
والتاج تحت امرك
ويشرفنى انكى تجاوبيه
بس اقولك
هاشرب شاى خمسينه
وجهزى حاجه حلوه جنبه
غير معروف
الله يبارك فيك
اخيراً بعد ما جاوبنا عليه كلنا جاوبتي عليه
:)
إجابات موفقة يا فرنسا
و سلامتك الف سلامة
و بتقولي :
ولو ملقيوش الخط
معندناش مانع ناخد كرت وخلاص
انتي بتهزري
طيب تقولي ايه لو عرفتي ان فيه دراسة مطروحة لتحويل جميع العدادات من مياه و كهرباء و غاز إلى عدادات تعمل بكروت الشحن و توجد منها عدة موديلات أرخصها و انسبها لنا العداد الصيني
و قد انتهت الدراسة الى أن قرار تحويل العدادات من فاتورة الى كارت يحتاج قرار سياسي و هو ما يعتقد أن الظروف غير مناسبة الآن و لكن القرار ينتظر أول فرصة
يعني بجد مش بهزار
مهندس مصري
مش الكل جاوب
لسه فى ناس مجاوبتشى
وماليش دعوه لو الوقت بتاع الامتحان خلص هالم الورق وخلاص
اما بالنسبه للدراسه بتاعه العداد ابو كارت فانا ابشرك انه شغال فى السويس
واى حد بيقدم دلوقتى على عداد جديد بياخد ابو كارت
كلامى عن عداد الكهرباء
حمد الله على السلامة يا فرنسا .. قلقتينا عليكى
و أنا اللى كان بقالى 3 ايام بقول ابه النور اللى هل فجأة على القاهرة دة ؟؟ أدينى عرفت السبب
إجابات حلوة بصراحة ..الله ينور عليكى يا فرنسا .. المفروض كانوا يعينوكى مستشارة فى الخارجية
ابن حـجـر الـعـسـقـلانـى
انا كنت لسه عندك فى المدونه وقريت موضوع الاحجار وتركت تعليق دلوقتى حالا
انا جيت وانت مشيت
يلا
حصل خير
ياخالتى انتى اللى مقلتيش انك نازله مصر
انتى لو كنتى عرفتينى بس
المهم انا كمان بطالب لكم بخط ميه جميل ونظيف
لو كان الامر امرى لو كان فى شىء بيدى كنت اوصلك الخط من بيتى لكل اهالى السويس الحلوين
egaba gamila awe
bas ana za3lana eno mafysh esta2belek fe masr.
ya3ni law gyt masr mafysh 7ad 7ayesta2belny wala 7ata yra7ab bya !!!!!
Wida el maghrebia
اجابات حلوة ودمها خفيف
جزاكى الله خيرا
شكرا جداااا على التوضيح والله وبكده أكون انا كمان اتعرفت على ام دبوه
D:
---------
بالنسبة لتعليق حضرتك عندي
انا مفهمتش يعني ايه بيكلفك كتير عند المتخصص
بس احب اقول لحضرتك حاجة
بجد ومش عزومة مراكبية
لو احتاجتي اي برنامج او اي شرح لأي برنامج أرجووووكي متتردديش وقوليلي على طووول وانا تحت أمرك ف اي حاجة
سيادة النائب فرنسا
كلامك جميل اوي بس يا رب تفضلي كده بعد الدخول انشاء الله
اصل بصراحة كلهم بيقولوا كده في الاول
وبخصوص خط المياه اللي بتناشدي بيه ممكن تبدليه بكرت بدل خط يمكن توافق الحكومة هههههههه
وبعدين قاهرة ايه اللي تنزليه
جربي كده وتعالي الشرقية عندنا وانتي تعرفي الكرم على اصله
اخوكي عابد الرحمن
يا خالتى الله يكرمك انا جى اقطع دابر البوست دة دة طلع من عندك ووصل القاهرة وهيجننا وهجبلنا امن الدوله فى القاهرة هنا رحمه يا خلتى بيناانا جالى التاج دة قعد الف ورة زى المباحث لخيت مجبنى عندك
حرام احنا شباب حرام تحبسينا
ههههههههههههههههههه
دة حاجه تانى حاجه بصراحه التاج دة فعلا انا انتخبك عليه عضوة بس يا خسارة انا بطقتى الانتخابيه جيزة لو ينفع السويس كنت جيت
تحياتى
احمد الجيزاوى
انا بره مدونين القاهره ليه عزرى تعالى الصعيد وانتى تشوفى الكرم على اصوله من فطير وخلافه
اجابتك نموذجيه يا فرنسا هانم تحياتى
دنيتى الجميلة
مرحبا بالدنيا وجمالها
اسمك جميل جدا
وزيارتك تشريف لمدونتى
ومتشكرين على استعدادك لتوصيل خط الميه الحلوه
وياريت الحكومه تسمع منكى
سلام يا عسوله
Wida
برضه كده
احنا نفرشلك الارض ورد
من المغرب لمصر
بس انتى نورينا
ا بـن عــمــر
شكرا يابن عمر
ربنا ما يحرمنا من زياراتك اللطيفه
آلام وآمال
انا اللى متشكره على اهتمامك
اما بخصوص تعليقى عندك
انا قصدى اقول
انى لو عايزه انزل برنامج معين او اعمل ويندز جديد بودى الجهاز عند متخصص فى الكمبيوتر وهم منتشرون فى السويس
واى برنامج بينزل بفلوس
برامج الحمايه والرايل بلير وغيرهم من البرامج
لو عايزه انزل اى حاجه بتكلفنى وخصوصا الويندز
رغم انى عندى اسطوانه ويندز
mthlykaweyy
الاستاذ مثلى قوى
هذه المدونه لست لاذدراء الاديان
لماذا تهتف بسقوط الاديان والاسلام
وتقسم بالله
اى اله تقصد
من فضلك
ارجوك
عدم الدخول هنا مره اخرى
عابد الرحمن (الاستاذ
الشرقيه معروفه ومشهوره بالكرم
وانا لو زرت الشرقيه هاكون سعيده بذلك
انا لو دخلت البرلمان هفضل زى مانا
مش هتغير
الا قليلا
احمد الجيزاوى
وانا اقول المدونه منوره ليه
اتارى احمد الجيزاوى هنا
انا اعرفك من فتره
وشرفنى تعليقك
ولو كان التاج مزعلك
بمطواه قرن غزال اشقلك بطنه
وارميه فى اقرب ترعه
لكن
سبق السيف العزل
تحيه وشكر لكل اهل الجيزه
ولشرلوك هولمز
قصدى
للصديق الجديد العزيز
احمد الجيزاوى
رئيس جمهوريه نفسى
طبعا ياريس
انت ليك عذرك
ومحدش يقدر يلومك
وعلى فكره انا جزور عائلتى صعيديه
الله يحرق الحكومة وامريكا واسرائيل
فى يوم واحد
حمد الله على سلامتك ياخالتو
انا برضه كنت فى القاهرة النهاردة
ولسة راجع
استقبلونى استقبال ظريف جدا
وقالولى فوت علينا بكرة يافندم
ياجماعه انا جاى من سفر بكرة ايه
هو بكرة مبنشتغلش الخميس
اكيد دول موظفين طبعا
ماعلينا
التاج
بخصوص النائب المستقل اللى يدخل مستقل
وبعدين ينضم للحزب الوطنى الموضوع ده فاقعنى اوى
بسبب النائب الغير ....
ماعلينا
اكيد عارفاه دخل مستقل واعاد الانتخاب
ويعلق يفط وبوعد شعب السويس العظيم هفضل مستقل
ومش هنضم لاى حزب
لحد ماكسب سنة وقعد على حجر بابا نظيف وبقى فى الحزب
ونقض وعده
بالنسبة للنائب المحترم جدا والخلوق جدا سعد خليفة
انا الحقيقة بحبه لله فى لله الصراحة
ولما جه زميلى قاللى انت هتنتخب مين
راح عرض عليا ابقى وكيل ليه فى الانتخابات كمراقب عملتها
رغم انى عارف خطورتها
بس بينى وبينك كنت فعلا عايزه يكسب
خط المية
احنا المدير بتاعنا مات
بالفشل الكلوى اول ماتعينت
خلاص كفاية انا طولت اوى
خالص تحياتى
غير معرف
معاك فى حرق امريكا واسرائيل
اما الحكومه
ربنا يهديها
فوت علينا بكره ياسيد
شعار موجود
وراسخ
وشامخ
ومأصل
فى كل الحكومات المتعاقبه
وكمان صالح لكل زمان ومكان
اما عن الفشل الكلوى
ناس كتير اعرفهم ماتوا بالمرض
وناس بيغسلوا
وربنا الشافى المعافى
وندعو الله ان تمر الازمه بخير
انا سعيده اوى انى عرفت مدونتك يا فرنسا انا قريت كام تدوينه كده تحفه ماشاء الله خفه دم السواحليه مش على حد وسرعه بديهه وروح حلوه وقلب طيب
ربنا يديم عليكى نعمه التصالح مع النفس
تحيه و ود
هههه
مدونة زي العسل
وصاحبتها عسلين
الله يبارك لك فى صحتك يارب
تعالى بصى بصة على مدونتى
وقولى لى رأيك ايه
سلاماتى
لى لى
انتى بجد مشكله عسل خالص
صعبانه عليا ام دبوة هاتروح ورا الشمس
اخبارك ايه وحشتينى جدا معلش كنت مش بتابع كنت بعيد عن ارض الوطن اللى هو اوضتى بس الحمد لله رجعت تانى وباكلمك من المقر الرسمى لرفقه عمر
من على كرسى المكتب
الحرية للمدون الدكتور ابراهيم الزعفرانى
وقع على وثيقة الالف مدون للافراج عن الطبيب المدون
www.dahayaa.com
مش دى اسمه العمل بالسخره برضه ولا ايه ؟؟
ده اسمه عمل بالمسخرة
Nsreen Bsunee
مش خفه دم السواحليه بس
لا
دى شعب مصر كله مشهور بخفه الدم
وعموما انا متشكره جدا على الاطراء
لـــى لــــىِ
وانتى تلات عسلات فى بعض
انا يشرفنى اجى مدونتك
بس ياريت نلاقى سحلب سخن
رفقة عمر
رفقه اجمل عمر
كنت منتظراكى من فتره
وسعيده بعودتك الى ارض الوطن
وسعيده ايضا بوصولك بسلام الى كرسى المدونه الجميله بتاعتك
عودا حميدا
مدونة يلا نفضحهم
اوقع
ماوقعشى ليه ؟؟؟
دعوة الفردوس
مش فاهمه حاجه
ارجو التوضيح
بجد والله لو انا عرفت انك هنا كنت لاوم اخلي دوبا تعزمك بس برده اللي حصل ده يخليكي تفكري في أصدقائك من تاني واعرفي صاحبك وعلمي عليه
تحياتي
Yahia
دوبا صاحبه واجب ولو كانت عارفه وصولى كانت قامت بالواجب كله من اكل وشرب ونسكافيه وكسوه كمان
هو انت تعرف دوبا عن قرب ؟
1000 facebook likes
buy facebook likes
http://www.sanduskyregister.com/registercam http://phasmid-study-group.org/content/Phasmid-Studies
get facebook likes facebook likes get facebook likes
I have a Dell Latitude Laptop using Windows XP. I took it to Geek Squad because it was skipping and the freezing up when I played DVDs or any kind of audio. When it freezes I have to turn it off witut shutting it down. It also wouldn't freeze right away..it freezes into about 10 minutes of playing DVDs or youtube videos. It was also making weird noises when it froze. Best Buy informed me that the noise wasn't any hardware issue, but the kind of noise the computer makes when it's frozen. They said nothing was wrong hardware wise, and that I had 6 viruses on the laptop. Well now, all those viruses are removed, and my laptop is still skipping and freezing when I play DVDs..to the point where I have to turn off the computer without shutting it down. If it's not viruses, and geek squad said everything is fine with the computer physically, then what is it?
1000 facebook likes buy facebook likes [url=http://1000fbfans.info]buy facebook likes [/url] buy facebook likes
إرسال تعليق