كلاكيت تانى مره ...فرنسا بتخرف

السلام عليكم
رجعت فرنسا تخرف تانى يارجاله
اللهم انت الشافى المعافى يارب

ندخل فى التخاريف
عبد الجليل :- اهلا وسهلا ياريس نورتى قصر الرئاسه
فرنسا هانم :- اهلا بيك ....مين حضرتك ؟
عبد الجليل :- محسوبك عبد الجليل ياريس ...مستشار حضرتك الخاص ....شعارى يا فندم . مع عبد الجليل مفيش مستحيل
فرنسا هانم :- منور يا استاذ برسيل قصدى عبد الجليل ...الا قولى يا عبد الجليل القصر ده كله بتاعى انا ؟
عبد الجليل :- طول ما حضرتك فى الحكم يا فندم
فرنسا هانم :- بس كده ؟ .. ماشى . قرار جمهورى رقم واحد .... الغاء جميع العملات المعدنيه واستبدالها بالعملات الورقيه وسد جميع الاماكن الضيقه اسفل الكبارى ...... يبقوا يورونى بقى هيختاروا رئيس تانى ازاى وفين
عبد الجليل :- تم التنفيذ ياريس
فرنسا هانم :- عايزين نشتغل بقى يا جلجل فين الاجنده بتاعه الخارجيه ؟
عبد الجليل :- ليس اجنده واحده ولا اتنين بل 15000 اجنده ياريس نعمل ايه علاقات واتفقيات والذى منه
فرنسا هانم :- والاجنده الداخليه ؟؟؟
عبد الجليل :- لا دى معايا فى جيب المحفظه اهه
فرنسا هانم :- ايه دى نوته ؟؟؟؟؟؟؟؟
عبد الجليل :- شعبنا شعب طيب ياريس مش محتاج لا اجندات ولا اتفاقيات خلى الطابق مستور
فرنسا هانم :- شوف يا جلجل انا عايزه اراجع علاقاتنا مع الدول كلها وخصوصا دول الجوار
عبد الجليل :- نراجع يا ريس تحت امرك وادى كل الدول اهه قدام سيادتك
فرنسا هانم :- ايوه الدوله دى غيظانى وفاقعه مراره امى وعايزه اقطع العلاقات معاها خالص
عبد الجليل :- للاسف ياريس مفيش عندنا مقص نقطع بيه العلاقات .. وبعدين من اخر خناقه بينا واحنا قعدنا قعده عرب وحطينا اتفاقيات بينا وبينهم ومستحيل نخالف الاتفاقيه والشرعيه الدوليه
فرنسا هانم :- مستحيل ؟؟؟؟؟؟؟ امال ايه بقى مع عبد الجليل مفيش مستحيل ؟
عبد الجليل :- ياريس بره غير جوه .... جوه النور مولع والاوده محكومه ونقدر نبرطع براحتنا . اما بره الدنيا ضلمه ومينفعشى نبرطع براحتنا ... جوه الشعب بتاعنا وممكن نغنى له شعبى وانا حره فيه . شعبى اغسله واكويه . شعبى اعمله بفتيك . شعبى اتعشى بيه
اما بره مستحيل ..الناس دى معاها نبله ياريس وبيصطادوا عصافير
فرنسا هانم :- لا تقولى شرعيه ولا مكرونه شعريه .. هو فيه حد بيراعى حد
عبد الجليل :- ولا يهمك ياريس سيبك انتى من وجع الدماغ والهوس ده وخلينا فى المهم .. انا حضرت لحضرتك تليفزيون 115 بوصه ومعاه فيديو اخر بهججه وجبت لك كل شرايط السندباد وعلى بابا وياسمينا وعلاء الدين وتوم وجيرى

بعد اسبوع
عبد الجليل :- ايه يا فندم الشياكه والاناقه دى اللهم صلى على النبى يا ارض احرصى ما عليكى
فرنسا هانم :- ارض مين وتحرص مين ؟ . الحارث ربنا .... مين الناس دول كلهم ؟؟؟
عبد الجليل :- الوزراء بتوع حضرتك ياريس . اكيد فاكراهم . بتوع الكوبرى والرفه
فرنسا هانم :- هما بتوع الكوبرى هما هما الوزراء ؟
عبد الجليل :- امال هنجيب من بره يا فندم .... الشعب بتاعنا مشغول ومعندهوش وقت ... واحنا بنختارها مننا فينا
فرنسا هانم :- فين وزير الداخليه وفين وزير الخارجيه ؟
عبد الجليل :- كله برزقه ياريس ... اى وزاره واى حد الناس دول مبيدقوش ياريس .. ادى لاى واحد اى وزاره ولو رجعها بحق .. الناس دى عايزه تسترزق وتربى عيالها وعيال سويسرا .. وهنيه لك يا فاعل الخير
فرنسا هانم :- امال هنختارهم ازاى ؟؟؟؟
عبد الجليل :- سيبى دى عليا انا .... وزراء صفا وزراء انتباه .. وزراء استرح
شايفه حضرتك الاشقرانى ابو عنين معمصه ده ايه رايك نديله وزاره الصحه ؟ يمكن ربنا يكرمه ويتعالج ببلاش
فرنسا هانم :- يلا مش خساره فيه اديهاله غلبان .... هو اسمه ايه ؟
عبد الجليل :- لغايه امبارح كان اسمه فكرى مش عارف غير ولا لاء
فرنسا هانم :- وايه رايك فى الفسفوس ده نديله الخارجيه ؟ ... تعالى يا كتكوت اسمك ايه ؟؟
وزير :- تونى ياريس ..محسوبك تونى كاد عادل
فرنسا هانم :- ايه الفرق بين اليابان واللبان ؟
وزير :- يا فندم دى معروفه طبعا اليابان دوله ... اما اللبان دوله تانيه خالص
فرنسا هانم :- طب ايه معلوماتك عن العولمه ؟
وزير :- اييييييييه دنيا ... فين صاجاتك يا خالتى شخلع ...كانت استاذه فى العولمه
فرنسا هانم :- تسمع عن القانون الدولى ؟
وزير :- انا كان عندى القولون وكان عصبى بس راضيته ودلوقتى عال العال
فرنسا هانم :- طب روح اقف هناك فى الصف ..... ايه ده يا عبد الجليل ؟ .. دول الوزراء بتوعك ؟؟
عبد الجليل : يا فندم ماشيها خلى المركب تمشى .. هو حد بيحاسبنا-؟
فرنسا هانم :- على رأيك كده احسن .. خليهم فى بطن الزير .. بس بقولك ايه اوعى تنسى شرايط بكار. ابو كف رقيق وصغير

واخدنا الكاس

السلام عليكم
من عميق قلبى ومن التاجى والاورطى وبلاد الواق واق
اقول لمصر
مبروووووووووووووووك
كاس افريقيا فى احضانا للمره السادسه وللمره الثانيه على التوالى
( مش على التوازى )
والله دمعت عينى والابطال ساجدون لله شكرا
حسيت كانى عايزه ادخل جوه التليفزيون واجرى واتنطط واتشقلب معاهم
حسيت انى عايزه اشيل علم مصر
الناس زهقت
بجد
الناس محتاجه تفرح
كل حاجه قصادنا لونها مش ابيض
كل طريق قدامنا ابوابه مش مفتوحه
واحد يسألنى
يقولى كابتن فرنسا هانم هو احنا لما اخدنا الكاس حررنا القدس ؟
ولا هزمنا الشرشوحه اسرائيل ؟
ولا طردنا العدو الامريكانى من ارضنا العربيه ؟
اقوله
لا
لا حررنا القدس ولا هزمنا اسرائيل ولا طردنا الامريكان
احنا انتصرنا فى محفل رياضى
بجد الاسئله دى والاستنكارات دى سمعتها من الناس فى الشارع وفى العماره
لكن
احنا محتاجين نفرح
والله محتاجين نفرح
سبونا نضحك من قلبنا سبونا نلتف حوالين فرحه واحده
الله عليكى يامصر
الله عليك يا منتخبنا يا قومى
الله عليك يابوتريكه - يازيدان - يا متعب - يا عمرو زكى - يا معوض - يا حسنى - يا شوقى - يا جمعه - يا حضرى - يا احمد ياحسن -يا فتحى -يا شحاته - يا مذيعه يافرنسيه يام وش حلو
كان نفسى اركب على المحفه زى البنت الصغيره اللى جابت الكاس
واللف الملعب 732 واقول
تحيا مصر تحيا مصر
مبرووووووك ليكم كلكم

تخاريف ......فرنسا هانم

اعذرونى على التدوينه اللى كلها تخاريف فى تخاريف
تانى حاجه انا سمعت ان فى سفنتين جايين من بريطانيا يوم الثلاثاء وكل واحده جايبه كابل نت لعل وعسى
التدوينه دى تعويضا عما سببته لكم فى التدوينه السابقه
ندخل فى التخاريف
المعلم :- ايه ياد الناس اللى بيجروا فى الشارع دول هو فى ايه ؟
الصبى :- مش عارف يا معلم دا حتى القهوه فضيت خالص
المعلم :- طيب اسأل اى بنى ادم ماشى وشوف لنا الحكايه بدال مانت واقف كده زى خبيتها
الصبى - لو سمحت يا سيد .... يا استاذ .... يا مدام .... يا كابتن .... لو سمحت هو فى ايه بتجروا ليه كده ؟
عابر سبيل :- واحده ست مسكت رئاسه الجمهوريه وهتحلف اليمين دلوقتى حالا وتقول خطاب للشعب
المعلم :- ست ؟؟؟؟ ليه هى هوزلت اخره المتامه ست تحكومنا ده لايمكن يحصل ابدا انا لايمكن ست تحكمنى وتمشى كلامها عليا ابدا
الصبى :- احمممممممم
المعلم :- ايه ياد انا قلت ست مجبتش سيره ام العيال متودناش فى ابو نكله لحسن الحيطان ليها ودان ... اجرى انجر افتح المخروب ده نشوف الحكايه ايه
الصبى :- اهو يا معلم انا فتحت التليفزيون والمذيعه بتقدم الرئيسه الجديده ....اهى رايحه للمنصه اهى المذيعه بتقول اسمها فرنسا هانم
المعلم :- دى ست تحكمنا دى يابنى دى شبه الفلاح اللى عنده بلهارسيا ...اتصوا فى نظرهم وجابوها منين دى ؟؟؟؟ ... هى بتعمل ايه ؟؟
الصبى :- دى هتحلف اليمين يا معلم ... هاعليلك الصوت شويه علشان تسمع
فرنسا هانم :- اخواتى واخوانى شعبى الحبيب السلام عليكم
وحياه الاخوه والعيش المدعم والملح اللى هناكله سوا لاخليكم فل الفل وانعنشها معاكم واروقكم ميه ميه واتعهد لكم بالابقاء على قناه سبيستون بتاعه الاطفال وزياده انتاج الفلفل الرومى
وزير :- كح كح كح كح
فرنسا هانم :- مالك يابنى بتكح ليه ؟؟؟؟
وزير :- احنا اتفقنا يا فندم لو حضرتك غلطى اكح .... وحضرتك غلطى لان مش ده القسم بتاع الرئاسه
فرنسا هانم :- انت مين وبشتغل ايه وايه اللى موقفك جنبى ؟؟
وزير :- يا فندم انا وزير الاعلام بتاع جمهوريه سعادتك
فرنسا هانم :- بلغ نفسك خصم اسبوع .... ومكافأه الف جنيه ومتقاطعنيش تانى سيبنى اضرب الخطاب وانزل لحسن العجله لوحدها
شعبى الحبيب
انا جيت احكمكم من غير انتخابات ولا يحزنون ....هى كده جات مع العمى طباش
انتوا عارفين انى من سكان الاقاليم وجيت العاصمه اتروشن شويه واديها فسحه وخدت العجله بتاعتى وهاتك يالف على الكبارى
وانا نازله اتدلع من على كوبرى لقيت عربيات كتير مركونه تحت الكوبرى . مديت راسى واديتها بصه لقيت يجى اربعين بنى ادم فرشين تراب على الارض وبيلعبوا رفه
دخلت بحكم الفضول اشوف ايه الحكايه طلعوا عليا بالقصافات وقالولى سلمى نفسك ... عدو ولا حبيب ؟؟
قلت لهم حبيب ... انا ماليش اعداء
انا فرنسا هانم قالولى فرنسا ؟ انتى بتاعه باريس ومارسيليا
قلت لهم لا والله انا ماليش دعوه بباريس ولا مارسيليا ولا حتى بساركوزى ..ده انا من الشعب
قالوا انتى من الشعب .....قلت ايوه والله من الشعب وانا الشعب
قالوا خلاص طالما انتى الشعب اقعدى معانا وحكمى بينا
قلت على ايه يا باشا
قالوا احنا مش فاضيين لانتخابات ووجع قلب وصرف فلوس على الفاضى احنا قررنا نختار رئيس الجمهوريه بالقرعه ..هنلعب رفه واللى هيكسب هيبقى الرئيس وانتى الحكم
وفضلوا يلعبوا وكان فى واحد نصاب بيقرص على البريزه ويوقفها وعماله يكسب وطلع نص اللى قاعدين ... انا برضه مش سهله كشفته وقلت له بلاش القرص هنعملها رفه على الطاير ... واحد انسحب وطلب منى ادخل مكانه وهتتك بتتك كسبت ووصلت للدور قبل النهائى وبعدين النهائى وهوب كسبت الكل
قالولى انتى الرئيس بتاعنا الجديد .. يلا بقى علشان تحلفى اليمين وتضربيلك خطاب بسرعه
جيت اركب العجله قالولى لا
لازم تركبى العربيه المصفحه
قلت لهم يا خلق الله انا جايه بالعجله ...قام واحد باين عليه كباره ضرب يمين طلاق لانا را
وزير :- كح كح كح كح
فرنسا هانم :- ايه يابنى مالك تانى ؟؟ومين انتى ؟؟؟
وزير :- يافندم انا وزير الاعلام وحضرتك قلتى يمين طلاق وده مرفوض فى الخطابات
فرنسا هانم :- جدع انك نبهتنى مكافأه خمسميت جنيه وخصم شهرين من مرتبك .. واوعى تتدخل تانى بينى وبين شعبى
كنت باقول ايه يا شعبى انا نسيت ؟؟؟
المعلم :-كنتى بتقولى حلف بالطلاق
فرنسا هانم :- شكرا يا معلم الراجل فى اخر الدنيا فى قهوته متابعنا فى التليفزيون . وفاكر وانتوا لا .... نهديك السلام يا معلم
نرجع لكلامنا تانى
الراجل دب طلاق تلاته من مراته كل ما تحل تحرم انى اركب المصفحه ... اخدت العجله معايا وركبت المصفحه وجيت على هنا على طول و هاعملكم خلطه وزاره وقرارت بالهبل وهاخلى حياتكم بمبى وهطالب بزياده اراضى المزروعه كرات وفجل وبقدونس لزوم السلطه .. وان امكن هازود البنجر كمان والى اللقاء فى خطابات اخرى
والسلام عليكم
المعلم :- يانهار ابيض هى طلعت فوق المنصه ووقفت عليها ليه ؟؟؟
الصبى :- مش عارف يا معلم . ده باين عليها لابسه شبشب حمام

الوجه الاخر...لفرنسا هانم

السلام عليكم ورحمه الله وبركاته
طبعا علشان الصقعه والبرد الجامد ده هادخل فى الموضوع عدل
حكيت للعائله الكريمه اللى حصل بالظبط . وبداءوا يشتغلوا زى العسس (العسس معناها الشرطى وسمى بالعسس لانه بيعس جسم الشعب عند دخول القسم حتى يعرف اكتر الاماكن ايلاما علشان الضرب يبقى مفيد )
وجابوا قرار العريس والعائله بتاعته وكان تقديره جيد جدا فى كله
واخوايا الكبير كان يعرفه عن قرب وفرح جدا لان اخلاق العريس ممتازه
جات والدته واتقدمت وطلبنا مهله للتفكير . رغم اننا كنا مفكرين وموافقين لكن العادات بتحكم
المهم حددنا ميعاد لقراءه الفاتحه ودخلت بالعصير وقعدت معاهم شويه صغيرين وقمت
فى الفتره الصغيره عاينت العريس واديته جيد جدا برضه
العريس كان مهندس فى شركه مقاولات قطاع خاص وكان ملتزم وفى حاجات كويسه كتير جدا
حددنا ميعاد الشبكه بعد اربع شهور
وفى خلال المده دى حبيته جدا جدا
وهو حبنى جدا جدا
وكنا بنقعد فى الصالون اياه
فى حضور الاسره ولكن كانوا اوقات بيسبونا لوحدنا فى حضور حرس شرف وكان اخى الاصغر منى
لكن العريس كان ذكى جدا
جاب القرشانه وخلاها تشغل اخى بالكلام علشان يتكلم براحته
وفعلا نجحت القرشانه فى تحويل اهتمام اخى عنا
وفى يوم قبل الخطوبه حصل بينى وبينه سؤ تفاهم وبداء صوتنا يعلا فى الكلام
لقيت القرشانه من نفسها راحت قايله لاخويا فى واحد صاحبك فى العماره رقم كذا شتمنى وقلتله انى عارفاك قالى ميهمنيش منه
اخويا رغم انه اكبر من القرشانه الا انها كلفتته وكروتته وخادته للبلاكونه علشان توريه الولد او عمارته
المهم اخويا اكل الطعم وراح معاها
اول ما افرجت عنه القرشانه كنا متكلمين براحتنا وكل واحد وصل وجهه نظره للتانى واتفقنا على ما كنا نختلف عليه
وتمت الخطوبه
ولبست الدهب ابو 24 جنيه للجرام اللى دلوقتى وصل ميه وحاجه وتلاتين
حددنا ميعاد الفرح بعد سنتين
مرت سنه
وعرفت معنى الحب الحقيقى
الحب الصافى
الحب المحترم
اوض قلبى الاربعه بالصاله بتاعتهم احبته
وهو كذلك
كان يهيم بى حبا

....(ربنا يقوينى على كتابه الباقى )
....( ارجو ان تسامحونى لما سوف اسببه لكم )
....( للعلم والله العظيم ترددت اكتر من مره قبل كتابه باقى الحكايه وتمنيت الا اكملها )
رن جرس التليفون فى يوم حزين واخبرونى ان خطيبى وقع من على شده معدنيه وهو يتابع عمله
جريت على المستشفى انا وكل اهلى
وهالنى ما رأيت
خطيبى
و
حبيبى يتجهز لغرفه العمليات وهو يصرخ من الالم
والدم فى كل موضع من جسمه
كان للاسف الشديد
او لقضاء الله عز وجل
وقع من ارتفاع عالى على مكعبات خرسانيه يسمونها عينات
بعد العميله نصحونا بنقله الى القاهره
ومكث فى القاهره فتره 35 يوم
كنت خلالها مقيمه معه
لا اغادر الى مساء عند اقاربى فى القاهره
واعود فى اليوم التالى صباحا
طوال 35 يوم لم ينظر لى نظره واحده بملء عينه
لم اعرف السبب
ولكن عند عودتنا الى السويس
عرفت
انا كنت اعرف انه اشتباه فى شلل نصفى
ولكن الاطباء اكدوا انه مصاب بشلل نصفى وليس هناك اى امل
اصررت على اكمال مراسم الزواج
وحتى ان تزوجنا فى شقتهم
بدون اى عفش
ولكنه كان يعلم انه لن يستطيع الزواج
صارحته بانى مؤمنه بالله وسابقى معه طوال عمرى
اريد انسانيته
لا اريد رجولته
اريد قلبه
لا اريد جسده
اريد حبيبى
ولكنه بدء يعاملنى معامله جافه
كنت اعلم انه يريدنى ان اكرهه
فاحببته اكثر
لكنه زاد فى سوء معاملته لى
حتى انه بدء يخرج الفاظا لا تستحب
وبعد 5 شهور وانا على يقينى انى لن اتزوج غيره
وساظل معه
سبقنى اليه القدر
توفى

ملحوظه مهمه جدا جدا

لا اريد عزاء

لقد تقبلت الامر منذ حوالى 16 سنه ولا اريد فتحه مره اخرى

من يحبنى لا يعزينى
فهو حى فى نفسى
انه يعيش دوما معى
انا اراه دائما
اضحك معه اجرى معه احلم معه انا حى فى حياتى
وعلى عطر ذكراه اعيش

فرنسا والحب

السلام عليكم
اخواتى المدونات اخوانى المدونين
وصلتنى رساله عبر بريدى الالكترونى من صديقه عزيزه طلبت منى عدم ذكر اسمها
تقول الرساله
خالتى العزيزه فرنسا
انا وكتير من المدونين عايزين نتعرف عليكى اكتر واكتر
لو تقدرى تبعتيلى صورتك ابقى متشكره
ولو مش تقدرى
عايزه منك توصيفى لى شكلك
وعندى سؤال تانى
لو مفيش عندك مانع يعنى
انتى حبيتى ؟
قصدى قابلتى الشخص الذى حسيتى فيه بالحب والاعجاب
وسلامى
اختك الصغيره
..............

اول الرساله دى ما جت على الكمبيوتر بتاعى
الجهاز اترعش وسخن وخاف منى لااضربه واطين عيشته
لكن
انا خدت الرساله بصدر رحب (حلوه صدر رحب دى )
وقررت انى ارد فى تدوينه او اكتر على حسب العجله ما هتقدر تمشى بيا

اولا
وصف نفسى ده حاجه انا مش هاقدر اعملها
لانها تخالف الدين والتقاليد والاعراف
وبعدين انا مش علشان متجوزتش ابقى وحشه
لا
ده نصيب
وانا راضيه بيه
وبحب اقولها كمان
لو وصفت نفسى ممكن اطلع نفسى زبيده ثروت
او
ام الخلول

اما السؤال التانى
جلى عالم بالاشواج الحب حلو ولا حراج ؟؟؟؟؟؟؟
فعلا
انا مريت بتجربه حب
زمان قوى
لا مش زمان قوى قوى ايام عصر بناه الاهرام
انا مش كبيره للدرجه دى
وانا فى الثانوى العام
كنت بهتم قوى بالدراسه وقراءه الكتب وكان عندى شنطه خشب كبيره كنت حاطه فيها كتب من جميع الاصناف وكان وقت فراغى كله اطلاع ومذاكره
وايام الكليه وماكنتش فى السويس كنت برجع محمله بالكتب من سور الازبكيه وبرضه ماكنشى عندى وقت للحب
فى اخر سنه فى الكليه كنت بلاحظ ان فى شاب ساكن فى العماره اللى قصادنا فى السويس كان بيحاول يلفت نظرى باى شكل ولون لدرجه انه كان بيعمل زى بتوع تجاره المخدرات يولع النور ويطفيه اكتر من مره اول ما اطلع على البلاكونه وده فعلا جذب انتباهى ليه وبقيت احس بوجوده
وعلشان اكون صريحه كنت باخرج للبلاكونه واول حاجه بدون ارادتى ابص على بلاكونته
بعد التخرج
بقيت فى السويس على طول
وذادت فتره تواجدى فى البلاكونه
وذادت فتره تواجده وتوليع النور وقفله
فى يوم
بعد ما وقف فى البلاكونه فتره طويله لقيت الباب بيخبط فتحت اختى الباب ووجدت عيله صغيره بتسألها عنى
نادتنى اختى ووقفت جانبى على الباب
الا والاقى البنوته الصغيره بتقولى انا عايزاكى يا ابله فى كلمه
استغربت واخدتها للداخل وقعدت جانبها
البنت كانت فى تالته ابتدائى
لكن
كانت قرشانه وكانت اكبر من عمرها بمراحل وكان كلامها كلام عواجيز
قالتلى بصى يا ابله من الاخر كده ومن غير لف ودوران اخويا معجب بيكى وعايز يتعرف عليكى
البنت قالتهالى كده خبط لزق من غير احم ولا دستور
تصدقوا انا اتكسفت من البنت
واتلجلجت فى الكلام وسألتها اخوكى مين ؟؟؟
قالتلى مانخلينا صرحا يا ابله مع بعض علشان الامور تمشى
يانهار ابيض بنت صغيره دى ولا ست قزمه سالتها انتى فى سنه كام ؟؟؟؟
قالتلى فى تالته ابتدائى وسنى مش هيفرق معاكى يا ابله ماهو مش انا اللى معجبه بيكى ده هو
قلت فى نفسى حد يخبينى يا عالم من القرشانه دى البنت دى قادره وانا مش قدها
لملمت اعصابى وشحنت البطاريه بتاعه الشجاعه بتاعتى وسألتها اخوكى مين كده الكلام معاكى مش جايب تمنه كلمينى على طول احسن
بصت لى بصه
طول عمرى ما هنساها
وقالتلى اخويا اللى ساكن فى العماره اللى قدامكوا وانا عارفاكى ازاى انتى متعرفنيش ؟؟؟
قلت لها معلشى مش واخده بالى
قالت اخويا اللى بيولع النور بتاع البلاكونه ويطفيه ومن الاخر كده هو بعت لك معايا جواب وغرضه شريف بس عايز يتعرف عليكى الاول وتتعرفى عليه وادى الجواب اهه وعلشان خاطرى خديه
مسكت الجواب منها ومن غير ما افتحه سالتها فيه ايه الجواب ده ؟؟
قالتلى عيب طبعا يا ابله هو انا برضه وش كده اقراء حاجه غيرى . الجواب مكتوب فيه انا معجب جدا بيكى وعايز اتقدم لخطبتكى وعايز اعرف رأيك وياريت نتعرف على بعض اكتر
ضحكت وفتحت الجواب لقيت الكلام اللى قالته مكتوب بالحرف الواحد
سألتها امال ازاى عيب كده وانا اقراء مش عارفه ايه ؟؟
قالت لى انا بوسطاجيه اه لكن حد يدينى حاجه اوصلها من غير ما اعرف اللى فيها لا
انا استأذنت اخويا قبل ما اقرأه وقلت له لا يمكن اوصل حاجه انا مش عارفه ايه اللى فيها
بصيت للقرشانه الجدعه دى ومتكلمتش
نطقت هيا وقالت يلا يا ابله اكتبى لى الرد علشان امشى
قلت لها قوليله يدخل البيت من بابه انا مش بتاعه جوابات يتفضل يجى هنا ونتعرف على بعض فى النور
البنت بصت لللمبه اللى فى الاوده وقالت لى عندك حق يا ابله حتى اللمبه بتاعتكوا نايلون
وقامت وقالت استاذن انا بقى يا ابله
قلت لها لا لازم تشربى حاجه
قالت لى يااااااه انتى لسه فاكره ...... متزعليش انا بهزر ....نخليها شربات احسن لما نيجى عندكم
وعلشان الحكايه كبيره والقرشانه الجدعه ليها مواقف جامده
هاكمل بعدين
للحديث بقيه

مفيد فوزى ...ووزير الداخليه

قلبت زرار التليفزيون امبارح الجمعه وانا بدور على الماتش بتاع الدوره الافريقيه بتاع نيجيريا


ومن غير احم ولا دستور ولاحتى عواف


لقيت عمنا مفيد فوزى مستضيف عمنا حبيب العدلى وعمالين يدردشوا فى برنامج حديث المدينه


قلت يابنت يافرنسا اسمعى وشوفى الدنيا فيها ايه ماهو برضه الناس الكباره دول ليهم ودان غير ودانا وليهم عنين غير عينينا ومناخير غير مناخيرنا يبقى مفيش مينى مانع انى اتفرج واتعلم


بصراحه عمنا حبيب العادلى كان بيضحك على طول ومبتسم من الابتسامه الطباقى ام نص جنيه مش ابتسامه من المدعمه ام شلن


وقال قوااااااااااله اخترت منها حاجه ببلاش كده


عمنا العادلى زعلان من appy ومن بطوطها هو مقالشى ابى بالتحديد لكن قال ان اصحاب العربيات بيعتدوا على رجل المرور الغلبان بالسب والضرب وان المسكين عمنا العسكرى مظلوم وان فى المانيا القانون صارم عن هنا والعسكرى بتاع المرور بيرعب الناس باشاره من ايده من غير ما ينزل من عربيته


ونسى سيادته ان العسكرى الغلبان مكسور الجناح يتيم الخاله والعمه . ناهب السواقين فى الرايحه والجايه وخير مثال على كده عسكرى ظريف لطيف بيقف فى دوران السلام التوفيقيه عندنا فى السويس بيقسم مع سواقين النص نقل فى البنديره ومفيش نملايه تعدى الا لما يقلبها


وقال كمان


ان الناس اللى بيسافروا ويغرقوا امام السواحل الاوربيه مجرمين لانهم يقومون بعمل اجرامى بالاشتراك مع مافيا متخصصه فى السبوبه دى وان الهجره غير الشرعيه دى بتسبب لهم حرج امام دول اوروبا وان المجرم ده قدر يدفع 60 الف جنيه كانت كفيله بعمل مشروع يعيش منه


وطبعا عمنا مفيد بتاع حبشتاكانات وشويه الفطه يقوله ايوه مع حضرتك الناس دول عملوا عمل اجرامى


عمل اجرامى اكيد يقصدوا الواد اجرامى بتاع الاهلى كان حارس مرمى زى الدبور


وقال كمان


ربما تحدث تجاوزات فى قسم الشرطه ضد المواطن ولكن فى الغالب سببها المواطن الوجيه


والمواطن الوجيه بيجى مش عايز يستنى دوره وعايز ياخد دور غيره وممكن ينرفز الضابط او الامين وهنا تحدث بعض التجاوزات نتيجه ان الضابط او الامين بشر والراجل نرفزهم


ايه يعنى كلامك دلعنى بجد دلعنى ....فرشه كده وفرشه كده


المواطن يا جدعان اللى بيمشى على بعد 100 متر من القسم ورجليه تخبط فى بعض ويجرى على الحمام عدل ولو دخل القسم يتكلم بالعافيه والكلام يخرجوه من زوره بالمغرفه ويتلجلج ويتعلثم


ال ايه بيستفز الظابط


ونسى سيادته جميع انواع التعذيب فى الاقسام واللى وصلت لمرحله قله الادب وقله الضمير


لا وقال ايه كمان


ان المخدرات جريمه مواطن والسرقه جريمه مواطن وتوظيف الاموال جريمه مواطن والكثافه السكانيه جريمه مواطن


اقفش


امسك


حلق حوش


قرب ياجدعان كله يقرب اللى مايشترى يتفرج قرب


الكثافه السكانيه جريمه مواطن


ازاى الكثافه السكانيه جريمه


يعنى لو فى عماره عدد سكانها زاد عن خمسين يلفوهم بملايه ويعملولهم قضيه ؟


ولا لو واحد اتلطش فى نافوخ امه وراح سكن فى شارع كبير وفيه كثافه سكانيه يتخبط له 15 سنه اشغال شاقه مؤبده





اما بقى عمنا مفيد فوزى


كان مفيد جدا فى الحلقه دى


مفيد للوزير بالطبع


وراح عمل مقابلات مع المسجونين


وقالوله احنا مبسوطين ومرتاحين وعندنا مراتب وبطاطين والحاله ميه ميه
والاشيه معدن وكان ناقص كمان يقولوا احنا مش عايزين نطلع من الجنه دى
وانا بهمس فى ودن مفيد باشا فوزى والسيد حبيب العادلى واقولهم
الناس خلاص الغلاء بتاع الاسعار خلاهم يسرقوا بعض وعلى عينك يا تاجر
وصلت الحاله لسرقه غطاء البلاعات فى الشوارع علشان يبيعوها لان الحديد ولع ولعلع فى العلالى ومش مهم عيل ولا عربيه ولاحتى ابو قردان يقع فى البلاعه
الناس دلوقتى بيسرقوا المواعين من بعض
الحلل والطشوت والشبابيك والهدوم المنشوره على الحبال كله بيضيع وبيتلهف
احنا خايفين من عوده السرقه بالاكراه على نطاق واسع
خايفين الناس تاكل بعض
والمسئوليه مش على السيد حبيب العادلى وحده
لا
المشكله على حبيبتنا وعمتنا الحكومه
الغلاء هيولع الدنيا
الحقونا قبل ما نضيع
الحقونا
الحقونا
الحقونا
الشعب بيغرق يابشر

تاج من فرنسا لفرنسا ....مجلس الشعب

اولا
خبر وصول شاحنه محمله بالوقود الى قطاع غزه وبدء تشغيل محطه الكهرباء هو بدايه لفك الحصار عن غزه
ندعو الله ان ينصريحفظ غزه

ثانيا
انا مقموصه وزعلانه من المدونين اللى ساكنين فى القاهره
انا بقالى 3 ايام فى القاهره ومحدش سئل فيا ولا حد عزمنى حتى على شفطه ميه
ليه البخل ده
وانا اللى نازله ومنفوخه وعامله نفسى ياما هنا ياما هناك وفاكره الاخوه هيقابلونى بالورد والفل والياسمين
انزل رمسيس الاقى الزحمه افتكر الناس دى كلها المدونين اصدقائى استنى حد يمد ايده ويسلم عليا محدش معبرنى
ولا حتى يافطه مكتوب عليها مرحبا فرنسا هانم
ابتسمى فرنسا هانم انتى فى بلد المعز لدين الله الفاطمى
المهم
انا رجعت السويس دلوقتى حالا وهاحكى لكم عن زيارتى للقاهره رغم كيد الاطباء
اما الان مع فاصل اعلانى
عدنا من جديد

اخوانى الان مع التاج ....مجلس الشعب

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟

المركب

كنت تفضل الدخول مستقل او تتبع حزب معين ؟؟؟؟

مستقله


اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟

النقطه دى بالذات انا قرفانه منها وعايزه اصرخ منها
العضو اللى ينجح مستقل ويمضى للحزب الوطنى فى نصاص الليالى زى الحراميه لايستحق دخول المجلس من اصله
لانه ضحك على الناخبين
الناس انخبته علشان هو مستقل
وبقى ناجح بحكم الناس
مش من حقه انه يضرب بالناس دول عرض الحائط ويمضى للحزب الوطنى او حتى حزب ام حنفى


ايه اول حاجه هتعملها لنفسك ولاسرتك ؟؟؟؟؟

الانتقام من ام دبوه

ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت

خط ميه حلوه بنت ناس تتشرب للسويس
خط ميه حلوه ياخلق
خط ميه حلوه ياهووووو


قعدت فى المجلس جنب نائب مميز . من هو النائب ؟؟؟

كنت اتمنى اقعد جنب النائب المميز ممتاز نصار عليه رحمه الله
اما الان فاجلس بجوار النائب سعد خليفه


قدمت سؤال للحكومه ايه هو السؤال ؟؟؟؟؟

فين فلوسنا ياعسل؟
فين المنى يا اموره ؟
بعتى الدوله ياكتكوته .....وديتى القرش فين ؟؟


طلب احاطه موضوعه ايه ؟؟؟ وبتقدمه لمين ؟؟؟؟

اولا تعريف طلب الاحاطه هو طلب يتقدم به أعضاء البرلمان لنظر قضية ما على نحو عاجل. ويجري قيام بقية النواب بالتوقيع عليه خلال انعقاد الجلسة.
علشان كده الطلب حول منع مصر دخول المساعدات الى قطاع غزه بناء على توجيهات الست اسرائيل باشا كعب الغزال

استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟

الست اللى كتبت التاج ده غلطانه فى السؤال
كانت مفروض تكتب استجوابين لاتنين من الوزراء
مش استجواب
هى بتهزر ولا ايه ؟؟؟؟؟
عموما
الاستجواب الاول
لوزير التربيه والتعليم
حول تطوير التعليم وعدم تناسبه مع عقول اطفال الابتدائى
وخاصه الصف الثالث الابتدائى
كان فى تانيه قديم
ودوه فى ثوانى على تالته حديث من غير لا احم ولا دستور
العيال مخها ضرب
مش فاهمه حاجه
واسألوا
الاستجواب الثانى
لوزيره القوى العامله حول استحداث شركات القطاع الخاص لموضه جديده
هى طلب الشركه من الراغب فى العمل امضاء جواب الاستقاله قبل الامضاء على العقد
بمعنى ان اللى عايز يشتغل يمضى على جواب استقاله مع العقد ويفضل جواب الاستقاله مع الدوسيه بدون تاريخ لو العامل همس همسه واحده بدون امر المشرف او المهندس يطلع جواب الاستقاله
مش دى اسمه العمل بالسخره برضه ولا ايه ؟؟

هل انت مع الخصخصه ؟؟؟؟؟؟

خصخصه
مش سرقصه


هل انت مع قطع العلاقه مع اسرائيل ؟؟؟؟؟

نعم وبشكل نهائى


هل تؤيد الحرب الحرب على العراق ؟؟؟؟؟؟؟؟

بالطبع لا


هل تؤيد مرور الامريكان فى القناه ؟؟؟؟؟؟

بتحسر وانا على شط القنال والاقيهم متنيلين على عين ابوهم وماشيين فى القنال



هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟

مين فرنسا هانم ومين ام دبوه ؟
انا معرفشى الاشكال دى
بلدى قوى


بتمرر التاج ده لمين ؟؟؟؟؟؟؟؟

مررته وخلاص

شكر خاص للاستاذ وطنى على استجابته الفوريه للتاج

صالون فرنسا هانم....والقوميه العربيه

السلام عليكم ورحمه الله وبركاته


اخواتى اخوتى


اسمحوا لى ان اكتب تلك التدوينه بالغه العربيه الفصحى لانها تتعلق بالقوميه العربيه


فى صالون فرنسا هانم تدور مناقشات عده عن مختلف الامور وتخرج من تحت عباءه المناقشات اتجاهات عده


وبعض تلك المناقشات تتخذ طابعا حارا للحوار وربما تتطور الى صراعات . الا انها فى كل الاحوال لا تصل الى مرحله شد الشعر او الخربشه او القرص او العض


ومن الحوارات التى دارت بيننا وكان لها باع طويلا معنا





القوميه العربيه





كان حوارا بسيطا بداء مثله مثل اى حوار بين الاصدقاء ثم اشتعل الموقف وتحول الى حوارا مدويا اهتزت له ارجاء الصالون


انا ساوجز لحضراتكم ما دار فى هذه الحوارات


لضعف الذاكره او لعدم وجود مضبطه او للاختصار





تحدثت طبيبه اسنان قائله





القوميه العربيه ماتت اكلانيكيا ولا امل فى شفائها


صحيح ان الله قادر على كل شىء وانه سبحانه اذا قال لشىء كن فيكون


وهو وحده القادر على اعاده الحياه الى الميت اكلانيكيا


والقوميه العربيه وصلت الى تلك الحاله وانا لا ارى لها عوده مره اخرى





تحدثت زميله (محاسبه ) قائله





القوميه العربيه لم تمت انها باقيه وستظل باقيه انها ماتزال تجرى مجرى الدم فى عروقنا اننا عرب ونفتخر بعروبتنا وما ضحى من اجله ابائنا واجدادا لاحرى لنا ان نحافظ عليه ونجاهد فى سبيل تحقيقه وانى ارى وحدتنا العربيه قريبه جدا جدا . ان اليهود تجمعوا من اشتات الارض افرادا وجماعات ليكونوا دوله


فهل يصعب علينا تجمعنا ونحن دولا حره


اننى لا اوافق على هذا الكلام وان قوميتنا باقيه باقيه باقيه





تحدثت زميله اخرى قائله





لقد تجمع اليهود بدافع دينى وهو ما قد تجمعنا عليه ايام الخلافه الاسلاميه فقد كنا دوله كبرى واستطعنا تكوين دوله خلافه عظمى امتدت حتى اوروبا


اما الان فحتى الوازع الدينى اختلف


لقد تفتتنا دينيا


لا تؤاخذونى على تلك الكلمه ولكننا بالفعل متفتتون دينيا


فقد تحولنا الى ديانات داخل ديانه واحده


وذلك لان منا من يكفر الاخر


وهو يعلم انه مسلم مثله تماما الا انه يكفره لاختلافهم فى امور غير توحيديه


فهم جميعا مؤمنون بالله ورسوله


الا انهم مختلفون فيما بينهم من امور دينيه . كلا منهم متمسك بما يراه

وقالت اخرى وهى مدرسه

ان الوحش المسمى بالقوميه العربيه هو سبب ما نقاسيه فى تلك الايام

لقد قدمنا الكثير من المال والرجال فى سبيل القوميه العربيه وكنا من اكثر الشعوب تضررا من تلك القوميه اتذكرون اليمن وما حدث لنا فيها اتذكرون حروبنا مع العدو الاسرائيلى ومع تجرعنا فيه من ويلات وويلات يشيب لها الوليد

لا تعتقدوا انى لا اوؤمن بالقوميه العربيه بالعكس انا ابكى عليها بدلا من الدموع دما

ولكن لا اريد ان نكون نحن دائما كبش الفداء

وان نكون دائما فى اول الصفوف

اننى احبذ قوميه عربيه كامله متكامله يتساوى فيها الجميع من خلال مساوئها قبل حساناتها

وقالت اخرى وهى زميله ايضا

اننا نفتقر الى التحضر

نعم نفتقر الى التحضر

اننا شعب عربى واحدا لغتنا واحده وديننا واحد وعاداتنا وتقاليدنا تقريبا واحده ورغم ذلك لم نتوحد فى قالب واحد

انى ارى شعوبا قد توحدت رغم اختلاف اعراقهم وثقفاتهم

وما كون الاتحاد الاوربى ببعيدا عنا وغيره من القوميات التى نفتقر اليها

الاتحاد السوفيتى كان كيانا واحد قويا رغم اختلاف دوله

الولايات المتحده الامريكيه ايضا مختلفه الولايات والقوانين والعادات الا انها اقوى دوله فى العالم

اننا ككيان عربى نفتقر الى التحضر

وانا فرنسا هانم قلت

اننا لم نموت ولكننا مرضى

نعم القوميه العربيه مريضه الا انها تقوى وتصبح ماردا داخل الشعوب العربيه اذا مر احدنا بمأزق

اننا تكاتفنا اثناء حرب اكتوبر حين منع العرب البترول عن العالم الخارجى وكا ن سلاح فتاك فى حربنا المجيده

ولا ننسى موقف الشعوب العربيه حين اجتاح العدو الصهيونى لبنان عام 82 وحين قامت امريكا بحربها القذره على العراق

صدقونى والله لقد دمعت عينى اثناء الحرب على العراق وكنت كمن فقد عزيزا عليه

فقد تابعت برنامج تليفزيونى بعد الغزو بايام وكان برنامج عادى وثائقى يتحدث عن الحضارات وجاء اسم العراق بمثابه قنبله مدويه انفجرت بداخلى فأجهشت فى البكاء

ولا ننسى ايضا موقف الشعوب العربيه اثناء الحرب الاخيره على لبنان والتفاف الجميع حول حزب الله وتناسى الجميع من شيعى ومن سنى ومن كردى ومن ومن

وقف الجميع خلف حزب الله وتمنوا عدم هزيمته من الاسرائيليين

ان القوميه باقيه

ولكنها مريضه

وفى اشد حالات مرضها

اخوتى واخواتى

ماذا تعتقدون وما هى ارائكم تجاه القوميه العربيه ؟؟؟؟؟

هنيه لك يا فاعل الخير

اخواتى واخوتى
السلام عليكم
انا متعوده انى اقوم الصبح بدرى اضرب لى نفسين على الريق
تقويه ونشاط للجسم طول اليوم
وتحولت الحكايه دى لادمان وبقيت فعلا مدمنه انى افتح باب البلاكونه الصبح الساعه سته واضرب لى نفسين هواء نضاف . لان الصبحيه بتكون العربيات لسه نايمه والشوارع هواها يرد الروح
المهم
فتحت باب البلاكونه ولسه هضرب اول نفس
لقيت بنات بينضفوا منور العماره بتاعتنا
انا صرخت فى نفسى من الفرحه
خلاص بح ناموس وبح دبان وبح صراصير
لا ده انا لازم اقدم يد العون والمساعده فى العمل الخيرى ده
وشمرت على سواعدى واخذت اهبه الاستعداد وانطلقت
نزلت اساعد البنات فى العمل الجليل ده
قلتلهم سلام عليكم انا ممكن اساعدكم
بصيت لقيت واحده ست وانا لغايه دلوقتى شاكه فى امرها الوليه دى
كونداليزا رايس جنبها ملكه جمال
امنا الغوله جنبها عسوله
الست بصت لى بعنين نشافين وقالتلى انتى مين يا اختى ؟
بس ايه صوتها كان طالع من ركبها ومن مناخيرها ومن ودانها
صوت على الشريف جنبها كروان
المهم قلت لها على مكان شقتى وفضلت اساعدهم لغايه الساعه سبعه ونص وبعد كده طلعت اجهز نفسى علشان اروح الشغل
بعد كام يوم
لقيت الناس دول بيجيبوا زرع وبلاط ورمل واحتلوا المنطقه واعلنوا عصيان عرابى
وبدأوا فى بناء الاسطول وفرض الضرائب على الشعب
فاتت ايام وعرفت الحقيقه المؤلمه

بعد عمل احصائيه مبدئيه بواسطه لجنه تقصى الحقائق المشكله من خيره سكان العماره
ناضورجيه صف اول ام فلانه وام علانه
اتضح الاتى
عدد سكان الشقه المطله على المعسكر 15 وظوظه وراجل وصاحبه
قصدى وراجل ومراته
ال15 وظوظه مش بناتهم
لا
دول قرايبهم وبيشتغلوا شحاتين
ايوه شحاتين
استولوا على منور العماره وحولوه لمنطقه خضراء زى بتاعه الامريكان فى العراق
ممنوع منعا باتا التجول داخل معسكرهم
او التصوير
او النظر لاكتر من لحظه
والا
جرا ايه ياعمر ايه ياروح ...............الخ
وهاتك يا ضحك ويا طبل وزغرده طول الليل
وجرى ولعب وسرمحه
ولبس وخلاعه وكلام قبيح جدا
تشوف الواحده منهم بالنهار وهى بتشحت تصعب عليك
وتزعل على بهدلتها فى سنها الصغير ده
معظمهم فى العشرينات
طبعا
فرنسا هانم بالاشتراك مع الاس ام كى
سكان المنطقه كلهم
طلعناهم من العماره بطريقتنا
لانهم كانوا مؤجرين من واحد صاحب شقه
افتكرت الموضوع ده انهارده لما واحده صاحبتى قالت لى ان فى شحاته قطرتها من اول شارع الجيش لغايه ما ركبت الميكروباص وكانت مصره تاخد منها حسنه
وهى كانت شايفه انها لاتستحق
سؤال الحلقه
هل هذه النوعيه تستحق الاحسان مع العلم ان اكلهم كله من محلات الكبابجى ؟؟؟
وازاى بيقدروا يخدعونا بمظهرهم وجعلونا نخلط بين المستحق والغير مستحق ؟؟؟
ترسل الاجابات على العنوان التالى
كولالمبور
شارع المثلث المتساوى الساقين
بركه البط
وهنيه لك يا فاعل الخير والثواب

طيب .........ياولاد ادم

هو :- صباح الخير يا عسوله
هى :- خير؟ وهيجى منين الخير
هو :- ايه جراء على الصبح ؟
هى :- خلاص انا زهقت وطهقت من عمايل ابنك ولو فضل كده على حاله انا هستحمى
هو :- ياااااااه تستحمى ليه الدنيا اتهدت؟؟؟

لا انا اكسر رقبه ابوه واللى خلفوه ولا انك تستحمى قوليلى بس ايه اللى حصل؟
هى :- انا هنادهولك وانتى اتصرف معاه
يا بيسو يابيسو انت يا بيسو
الابن :- جراء ايه يا مره
هى :- مره ؟ انا بيقولى مره سامع كلام ابنك ؟
هى :- كلم ابوك يا ولد
الابن :- طب ما يجى هو هنا هى رجله اتشلت ولا ايه ؟ وبعدين انتى فاتحه جاعورتك على الصبح كده ليه ؟ مصحيانا بالسارينا بتاعتك والواحد منامشى طول الليل
هى :- قوم بسرعه كلم ابوك لحسن اشق هدومى وادخل استحمى
الابن :- تستحمى ايه يا مره يا مجنونه انت اتهبلتى فى نافوخك انا طالع اهه
الابن :- ايوه يا عم البرنس - ايوه يا الخديوى - ايوه يا عم اللورد عايز ايه على الاصتباحه بتاعتكوا دى ؟
هو :- ايه يا واد الكلام الغريب ده ؟ اتكلم محترم
الابن :- ما غريب الا البنى ادم سيبنى وحياه ابوك وابو ابوك انام لى ساعتين اريح الجثه شويه وبعد ما صحى ابقى هبل وقول اللى انت عايز تقوله وخلى بالك من المره الخرفانه دى لتستحمى يلا بقى اشوفك امس
هو :- هههههههههههههه
الام :- انت بتضحك على ايه ؟
هو :- الولد ده هيطلع ابليس ناصح وهيعلم البنى ادمين الادب
الام :- انت طول عمرك مخك صغير بنى ادمين مين اللى هيعلمهم الادب ابنك يا استاذ بيلعب مع عيال بنى ادمين وهما اللى بيعلموه الكلام ده والالفاظ دى
هو :- طيب كويس يتعلم منهم الشقاوه ولما يكبر يطلعها على جتتهم
الام :- شوف يا ناصح طالما عيال البنى ادمين هما اللى بيعلموه يبقوا اساتذته وكل ما هيتعلم هما هيبقوا احسن منه ولما يكبر مش هيقدر يقصر عليهم وينتصر علينا البنى ادمين
هو :- ايوه صح كلامك مظبوط طيب والعمل ؟
الام :- مفيش غير حل واحد يروح يا خد كام يوم عند واحد متمكن فى الابلسه يعلمه ويوتكه ويخليه احسن من البنى ادمين اللى طلعوا لنا فى البخت واحسن واحد هو ابليس افندى المسئول عن المحارم والاصدقاء واللى شغله كله يفرق بين الاهل والاصدقاء ودى شغلانه مش سهله وعايزه خبير
هو :- عندك حق انا هاروح له يخلى الواد عنده
الاب فى ثوانى راح طاير على ابليس افندى لقاه قاعد فى الخرابه بتاعته وبينام على نفسه والدبان ملموم عليه بالعبيطه
هو :- ابليس افندى ازيك
ابليس افندى :- مين انتى وعايز ايه ؟
هو :- انا جوز بنت اختك مش عارفنى ؟ انا بتاع الرشاوى والخنصره والذى منه
ابليس افندى :- اه افتكرت ايه المطلوب ؟
هو :- الواد ابنى بيسو بيلعب اليومين دول مع عيال البنى ادمين وعلموه يقول كلام منيل بستين نيله وامه خايفه عليه وهددت انها تستحمى لو انا مش جبتوهولك علشان تعلمه وتخليه اقذر واحسن من عيال البنى ادمين
ابليس افندى :- شوف يا قمر......واسمع كلامى كويس
كل الابلسه اللى قاعدين هناك دول وملموم عليهم الدبان عاطلين
خلاص الشغل بح
مش لاقيين لنا شغلانه
البنى ادمين نسفونا وخلونا مش لاقيين اللقمه الحاف
هو :- ازاى ؟؟؟؟؟؟؟
ابليس افندى :- البنى ادمين دلوقتى غير زمان خالص
دلوقتى مفيش وسط
فيه ناس عارفه ربنا كويس وبتعلم عيالها انهم يبعدوا عننا وميسمعوش كلامنا خالص ودول بيكتروا ومش عارفين نعمل معاهم حاجه
وفى ناس ودول الغالبيه خلاص نيسوا الضمير ونيسيوا الاخلاق ونيسيوا المبادىء وكل ما نحاول نوسوس لهم بحاجه نلاقيهم عملنها وبيفكروا فى غيرها
مش قادرين نلاحقهم
كل ما نفكرهم فى خطه ينفذوها نلاقيهم نفذوا خطه يعلمونا بيها فن الابلسه
احنا مش قادرين عليهم
هما دلوقتى الاسطوات
هما دلوقتى اللى بيخترعوا فن الابلسه
فى السرقه خلاص فنونهم ملهاش مثيل
فى النصب كمان
فى كل المحرمات ادونا بمبه ومسكوا هما الملاعب
وزى مانتا شايف
قاعدين ننش دبان
ويمكن احنا كمان نستحمى علشان البشر يرتاح

-
تمت

مش انا جانى استدعى فى الجيش

معرفتوش ايه اللى حصل لى ؟؟؟؟
جانى استدعى فى الجيش
بجد
من فتره وانا راجعه من الشغل قبل حادثه ام دبوه بكام شهر لقيت جارتى الحاجه ام على بتنادى عليا
انا :- نعم يا حاجه
الحاجه ام على فضلت تبص لى من تحت لفوق وعنيها مبرقه
انا :- خير يا حاجه
الحاجه :- مش عارفه يابنتى اقولك ايه
انا اتسمرت مكانى وخفت وقلت خير اللهم اجعله خير فى ايه يا حاجه ؟
الحاجه :- اصلى انتى جالك جواب استدعى فى الجيش
انا :- جواب ليا انا وفى الجيش فين الجواب ده ؟ اكيد فى غلط
الحاجه :- الجواب مع ابنى شايله فى دولابه وهو دلوقتى راح الشغل فى ورديه الضهر
انا :- مين اقرا الجواب يا حاجه ؟؟
الحاجه :- ابنى عبده قراه وقالى ده جواب استدعى للجيش لجارتنا فرنسا وراح حاطط الجواب فى دولابه وراح الشغل
انا :- هو عبده معاه موبيل يا حاجه ؟
الحاجه :- ايوه يابنتى عبده وعلى الكبير معاهم موبيل لكن انا معرفشى نمرته
يمكن على يجى باليل هو ومراته واخد منه النمره
انا :- شكرا يا حاجه
ودخلت الشقه وانا حاسه ان الحاجه مكسوفه منى وهى بتكلمنى كانت بتبص فى الارض فاكرنى عسكرى بجد وجدانى
الله ايه يا فرنسا الورطه دى
الواد عبده معاه معهد حاسب الى وبيعرف يقراء كويس
ايه المصيبه دى ؟؟؟؟
طيب اعمل ايه انا دلوقتى
انا كده محتاجه اتنين افارول واحد زيتى والتانى مموه
ومحتاجه اروح للحلاق احلق شعرى
ومحتاجه بياده
وطاقيه
وشراب ميرى
وقعه ايه الفللالى دى
رميت نفسى على الكنبه بتاعه الصالون وشعلقت عينى فى السقف وسرحت
ممكن يكون ده حقيقى
طب فين الكتيبه بتاعتى وسلاحى كان ايه ؟؟
وكانت رتبتى ايه ؟
اكيد كنت ظابطه احتياطى
وقعدت افكر اتصل باخواتى
اتصل بصديقاتى
اتصل بمين واعمل ايه ؟
قب يا فرنسا لو كان ده حقيقى
كنت اروح ولا لا
اروح لغايه لما اثبت لهم ان فى غلط
وساعتها
هاكون عملت سته استعد وسبعه استعد
ووقفونى خدمه باليل وانا بخاف من خيالى
لا
انا مش هاروح
واللى يحصل يحصل
طب مايمكن يلبسونى تهمه التهرب من الخدمه العسكريه
واكون انا السبب فى فتور العلاقه بين مصر واسرائيل
واكون انا السبب فى هزيمه جاك شيراك
وانا السبب فى غرق العباره سالم اكسبريس والعباره السلام
واكون انا السبب فى زلزال 92 وممكن اكون انا السبب فى زعل امريكا من عم خليل بتاع البطاطا علشان باع بطاطا لولد اسمه صدام عبد الله
ولا ممكن برضه ابقى السبب حريقه القطر
وممكن يقولوا ان انا اللى مقويه كوريا الشماليه ومخليها تركب دماغها وتحلف بالطلاق انها مش هتسمع الكلام ولو حتى جابو ا لها ام رجل مسلوخه ولا حتى العو
ولاممكن يقولوا على انى زعيمه تنظيم القاعده فى بلاد كولامبور ودشنا
وان المرأه الحديديه تاتشر سابت لى الدنيا وطفشت
وان انا السبب فى الخناقه بتاعه 1948 و 1967 وانا المسئوله عن الهزيمه
لا ياعم
انا اخدها من قصيره واسلم نفسى الصبح للشرطه العسكريه وهما يودونى ماطرح ما هما عايزين
ونمت بهدومى ومن غير ما اكل
وصحيت باليل على صوت الجرس
ولقيت الحاجه ام على جابت الاستدعى وقالت لى على ابنى جه وفتح دولاب عبده وبيقولك خلى اخوكى يروح الاستدعى يوم 15 فى الشهر
اخدت الجواب وقريته لقيته باسم اخويا الصغير وهو كان عنوانه الشقه دى وهو فى الجيش
واتارى عبده كان يقصد ان الجواب ليا انا يعنى مش بتاعهم
واخيرا
اتنفست الهوا
واخيرا
مش هدخل الجيش
ولا هلبس البياده
واخيرا
تصبحوا على خير

مبروك.....كسبنا مقعد فى مجلس الشعب

رهنت العجله بتاعتى
وخدت المبلغ بتاع الرهنيه واشتريت بيه حصانه
ايوه حصانه
لا متودوناش فى داهيه مش الحصانه بتاعه مجلس الشعب
قصدى حصانه مرات الحصان الفرسه يعنى من الاخر
وجبت لها كام لجام محترمين صنع فى الجيزه مع بردعه اخر شقاوه وجرس بتلاته نغمه وحميتها وسرحت لها شعرها وقصيت حوافيرها
وركبت لها بطاريه جنب الديل وشغلت ام بى ثرى
وكام فلاشر يمين وشمال
وخرزه زرقه علشان عين الحسود فيها عود
ومشيت العلع فى السويس
كل اللى ماشى واللى رايح يقول مين الفارسه دى
شجره الدر ؟؟؟؟؟؟؟
لا طبعا اصل القباقيب انقرضت
دى فرنسا هانم
المهم اخذت الحصانه
لا مش الحصانه مرات الحصان
هتودونا فى داهيه برضه
اخدت الحصانه بتاعه مجلس الشعب
الناس رشحونى ونجحت بدون تزوير ولا فتوانه
وطبعا انا كريمه قلت اشارك اخوانى واخواتى المدونين والمدونات فى الحصانه
قمت عملت تاج
وكل واحد يجاوب عليه ياخد الحصانه لغايه لما يخلص التاج وبعدين يرجعها
معلش علشان عايزين نرجع العجله
هى ايدى ورجلى بتحرك بيها فى اى مكان واى وقت نفاثه

طبعا من المفروض ان تكون مؤلفه التاج اول من تجاوب عليه
ولكن
لاننا فى مجلس الشعب
فيجب ان يرأس الجلسه اكبر الاعضاء سنا
واكبر الاعضاء عندنا اللى انا اعرفهم
الاستاذ وطنى
مينفعشى اجاوب قبله
وانا ادعوه لبدء الجلسه والاجابه على التاج

تاج

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
كنت تفضل الدخول مستقل او تتبع حزب معين ؟؟؟؟
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
ايه اول حاجه هتعملها لنفسك ولاسرتك ؟؟؟؟؟
ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت
قعدت فى المجلس جنب نائب مميز . من هو النائب ؟؟؟
قدمت سؤال للحكومه ايه هو السؤال ؟؟؟؟؟
طلب احاطه موضوعه ايه ؟؟؟ وبتقدمه لمين ؟؟؟؟
استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟
هل انت مع الخصخصه ؟؟؟؟؟؟
هل انت مع قطع العلاقه مع اسرائيل ؟؟؟؟؟
هل تؤيد الحرب الحرب على العراق ؟؟؟؟؟؟؟؟
هل تؤيد مرور الامريكان فى القناه ؟؟؟؟؟؟
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
بتمرر التاج ده لمين ؟؟؟؟؟؟؟؟
وانا عن نفسى اقدم التاج هديه لاول خمس تعليقات على تلك التدوينه
يعنى من نفسهم كده بعد عمنا وطنى يحضروا نفسهم لاستلام الحصانه
رفعت الجلسه
على ان تعود للانعقاد بعد فك رهنيه العجله
فرنسا هانم
السويس
فى يوم السبت الموافق فى المشمش

فرنسا هانم .....تحاور بوش

الاخوه المدونين الاخوات المدونات
كل عام وانتم بخير
بمناسبه العام الجديد
الصقعه اليومين دول جامده قوى وفى ايام بتيجى رصراص تخلى سنان الواحده تعمل زى مزيكا حسب الله . وبما انى فى اجازه ام دبوه ولسه قدامى شهر وخمسه وعشرين يوم تانى اجازه . بمدد براحتى ليل نهار عصر مغرب عشاء ساعه مايجى فى عينى النوم انام كويكلى
علشان كده بقلق كتير وانهارده وانا ممدده ومكعمشه وسط البطاطين وعينى فى السقف سرحت
وحلمت حلم من احلام اليقظه
انا مذيعه
قال ايه انا بقيت مذيعه مشهوره جدا وبتدلل على كل القنوات وكل مندوب قناه يجى لى ويقولى فى عرضك يافرنسا وفى طولك يافرنسا عايزينك فى برنامج خاص بالمحطه بتاعتنا
وانا ارفض وهما يتحايلوا ويبوسوا الجدم ويبدوا الندم على غلطهم فى حق ......
لا مش دى
المهم
انا اخترت الفضائيه المصريه واشترطت انى اعمل حوار مع جورج بوش
يهديكى يا فرنسا
والنبى يا فرنسا
عيالنا يا فرنسا
ارجوكى يا فرنسا
وانا راسى والف صرمه قديمه يا بوش يا بلاش
وطبعا تحت الحاح المليارات من البيبل ( الناس)عبر العالم وافق بوش انه يعمل معايا حوار على الهواء
طبعا الناس الجدعان بتوع البيت الابيض فى ابيض ادونى ورقه مكتوب فيها الاسئله اللى انا مفروض اسألها وادونى نص الاجابات بتاعه السيد بوش والكلام اللى انا هرد بيه على سيادته بعد ما يجاوب
انا اخذت الورقه وحفظتها
وعملوا دعايه للحوار جامده قوى
قريبا
على الفضائيه المصريه
فرنسا هانم تحاور بوش
على جميع القنوات الفضائيه والدش المتحرك والثابت وفى الاذاعه والتليفزيون والمحطات الارضيه والعلويه والموجه المتوسطه 350 كيلو هرتز والموجات الفرعيه والموجات المتوسطه وموجات تسونامى والمد والجزر وفوانيس رمضان
وذلك يوم الثلاثاء 1-1-2008 على الهواء مباشره
هذا الحوار برعايه ام دبوه كولا رائده صناعه المنتجات البشليه فى الشرق الاوسط
وطبعا
زى بتوع الملاكمه
استضافونى فى الفضائيات ووكالات الانباء بتجرى ورايا فى كل مكان وجابوا خيم ايواء ونصبوها على طول الطريق بتاع السويس القاهره والمراكب ملت البحر الاحمر والطيارات غطت المنطقه بتاعتنا .. وفى صدر النشرات الاخباريه وفى شريط الاخبار الموجود فى القنوات وفى الصحف والنت الاقى اخبار فرنسا هانم
فرنسا فطرت فول بالزيت واكلت رغيف كامل
فرنسا فطرت فول بالسمنه البلدى ومخلل وشربت كوبايه لبن
فرنسا تشرب الشاى الساعه العاشره واحدى وعشرون دقيقه
فرنسا عطست اليوم ثلاث مرات
فرنسا فتحت الشباك فرنسا قفلت البلاكونه فرنسا كحت فرنسا كوت الهدوم فرنسا فرنسا فرنسا
كل الناس بتتكلم على فرنسا
وانا طبعا قطعت الورقه بتاعتهم ورميتها فى الزباله
وكتبت كلامى انا
السيد بوش
س - لماذا غزوت العراق ؟
س - من يصرف على الحرب ؟
س - هل ذهبت الى الصدام فى سجنه ام احضروه اليك ؟
س - اين اسامه بن لادن ؟
س - ما حقيقه انتصاركم على الصدام ومن الخائن ؟
س - لماذا تحارب الاسلام ؟
س - كم عدد الجنود اللامريكيين القتلى وما هى الارقام الحقيقيه للجرحى ؟
س - لماذا حاربت افغانستان والعراق وفررت امام كوريا الشماليه ؟
س - ما حقيقه اعاده فرز الاصوات اثناء الانتخابات التى اتت بك الى الحكم ؟
س - لماذا غابت الحريات فى ابو غريب وجوانتنامو ؟
س - من اطاح بكلينتون وما حقيقه دور الموساد فى الفضيحه الامريكيه ؟
وطبعا اول ما اصحابنا فى البيت الابيض فتشونى وشافوا الورقه بتاعه الاسئله وعرفوا انى غيرت الاسئله رجعونى بالعجله بتاعتى من المطار ورحلونى على مصر والحكومه قامت بالواجب اعلان السلطان العثمانى عصيان فرنسا هانم
وتمت خصخصتها
وبيعها بالذاد العلنى
طبعا هتقولوا نامى واتغطى يا فرنسا
احلمى على قدك يا فرنسا
تستهلى يا فرنسا
انا مستعده اسمع اى كلمه تقولوها
ولو حد عنده سؤال لبوش نحطه مع الاسئله
ومليش دعوه لو اتخصخص