زمان قوى وانا لسه ننوسه صغيره وبعد مارجعنا من الهجره سنه 1975 ايام ما كنت باكل المانجه واهطل على هدومى وانا ماشيه فى الشارع ولابسه شبشب والدتى كنت بسمع اغنيه
يا بيوت السويس يا بيوت مدنتى استشهد تحتك وتعيشى انتى
وكنت با حب الاغنيه دى فرى ماتش رغم انى ماكنتش عارفه معناها
لما كبرت واصبحت فتاه فهمت معنى الاغنيه وحبيتها اكتر واكتر وللصبح
لكن
وما ادراك ما لكن
بعد نهايه الحرب مع المشمشه المتوحشه اسرائيل
وبعد تطيب الخواطر بين البلدين
وقربنا من بعض احنا نديها الغاز بتاعنا وميه النيل
وهى بكل براءه ومحبه تدينا الاغذيه المسرطنه
الاغنيه بتاعه السويس
اتغنت بشكل تانى
يا بيوت السويس يا بيوت مدنتى اغرق تحتك فى الصرف الصحى ويعيش الحراميه
وهو ده اللى حصل ياساده يا كرام
عندنا محافظ اسمه جلجل
محمد سيف الدين جلال
جلجل يا ساده فكر هو والعباقره اللى حواليه فى قاعده عسليه على الكورنيش الجديد
وقالوا السويس بلد منتجه وغنيه فيها مصانع وايراد قناه وسواحل بالهبل
عايزين نعمل حاجه للبلد واهو ينوبنا من الطيب نصيب
فكر العباقره الناصحين قوى
وقالوا نرصف ونسفلت الشوارع بتاعه المحافظه
فرنسا وكل شعب السويس من عليه كفته لغايه مستر على بتاع الانجليزى فرحوا قوى بالخبر
وبدء تنفيذ الفكره
لكن
وما ادراك ما لكن
والعباقره بيسفلتوا الشوارع علو البلاعات العموميه بتاعه المجارى من 50 الى 80 سنتيمتر
وجابوا زلط وتراب من ابو بلاش
من جبل عتاقه الغلبان اللى نتفوا ريشه شويه شويه
وبعد كده سفلتوا
وياريتهم ما سفلتوا
الشوارع بنت الناس اللى فى الوش اهتموا بيها وباقى الشوارع الغلبانه مكسوره الجناح منتوفه الريش
كروتوها
يعنى عملوها اى كلام
والحساب مدفوع مقدما من جيب فرنسا وكل السوايسه وكل المصريين
المهم
لما العباقره علو البلاعات غرقت بيوت الاربعين
تتصوروا الناس فى القرن الواحد وعشرين وفى عصر لوسى وانوشكا وسكود وباتريوت والبلوتوث والرنات والعالم قريه صغيره بيحطوا طوب علشان يدخلو بيوتهم وعايشين سوا سوا مع احفاد عائلات الناموس والجراثيم والذباب المتوحش
وداعا للضمير
ومع السلامه يا صحه
وباى باى يا هندسه
الاشتراك في:
تعليقات الرسالة (Atom)
هناك 34 تعليقًا:
انا اول تعليق
:D
معلش بقى المكشلة دي والله موجودة في محافظات كتير مش عندكو بس
وفعلا احنا بنعاني ف الزمن ده من أزمة ضمير على كل المستويات
ربنا يصلح الأحوال
السلام عليكم ياخالتو
تانى بوست ليكى
وجميل برضه
انتى بتحبى السويس اوى للدرجة دى
رغم انى سويسى
زى حضرتك
بس متعقد منها الصراحة
هههههههههه
ماعلينا
على فكرة انتى طلعتى مشكلة ياخالتو
هى وصلت للمحافظ
كمان
بس انا اول مرة اسمع اغنية الصرف الصحى دى
ههههههههه
بس استنى بقى انا اخالفك فى الراى بجد
انا مش حزب وطنى ولا نيلة والله
بس الواحد يقول اللى ليه واللى عليه
الراجل ده ظبط البلد
والله
قبليه كان فى محافظين
منهم لله
الراجل ده لو انتى متابعه
خلى البلد شكل تانى
وبصماته باينة جدا
سواء فى الشوارع
او الاسواق
زى سوق المثلث
والموقف
الجديد
والمدن الجديدة
والسلام
ومحلات الصباح
هو بجد غير
مع احترامى لوجهة نظرك اللى بحترمها
بس دى كلمة حق
ياللا تحياتى بقى
سلام
آلام وآمال
هى موجوده فى الكل ؟؟
يبقى اهمال بالجمله
انا احسبه قطاعى
طلع يا قلبى لا تحزن
يلا
يمكن بكره احلى من انهارده
حطى همك على همى
انا لسه معدى الصبح وانا رايح الشغل الشارع بالعافية
والحمد لله على خفة الوزن والحركات الأكروباتية
يا بختك عندكم الشوارع اتسفلتت والبلاعات عليت
عندنا بلاعة فى وسط الشارع العباقرة مش عارفين يعلوها ازاى مرة يحطوا فوقها حجر من الاسود بتاع البليدة طبعا عارفاه علشان يميزوها وبلاعة تانية سايبها والله الماية بتخرج منها ومش عاوزة ترجع لها تانى ولسه مش عارف مصيرها
كلنا فى البلاعه سوا
doha
سلامات سلامات سلامات
سلامات على البلديات
بما اننا طلعنا سويسيه زى بعض
يبقى انهو قسم تحبه
قسم فيصل منطقتى
ولا قسم الاربعين
ولا قسم الجناين
ولا قسم عتاقه
علشان انا وانت هنتخانق خناقه كبيره
وفرنسا عندها عضلات
ولا يهمنا سنج ولا مطاوى
مدام الوحش على الحرب ناوى
ازاى تتعقد من السويس ؟؟؟؟
انا مش معاك خالص
وده هيكون سبب الخناقه
ولكن انا المره دى هسيبك
لكن المره الجايه
فى جناح خاص فى المستشفى الاميرى باسم ضحايا فرنسا هانم
لكن بجد
انا زعلانه انك متعقد من السويس
وعن انجازات المحافظ
مدينه السلام مخططه من قبل ما يجى بكتير وهى للاهالى وليس للمحافظه اى تدخل فيها لانها موزعه على جمعيات وكل جمعيه موزعه على اعضاءها
اما سوق المثلث
من انجازات المحافظ فعلا
الموقف الجديد
برضه مخطط له من قبل المحافظ
والشوارع دى موضوع تانى من بره هلاهله ومن جوه يعلم الله
كما ان لعبه التزيين والتجديد دى معروفه اسال خالتك فرنسا انا قريبه وعارفه
محلات الصباح بدل محلات المثلث راس براس
وانت نسيت كوبرى التوفيقيه ؟
الكوبرى اللى اتعمل فى غير مكانه خالص
ولو لاحظت
مش هتلاقى ولا بنى ادم بيعبر الكوبرى ده
مسألتش نفسك الكوبرى ده اتكلف كام ؟
وفى الاخر اتركن على الرف
سمعت عن تجديد عمارات المثلث والفضايح اللى فيها ؟
على العموم
الاختلاف فى الراى لا يفسد للود قضيه
بس مش عاوزاك تتعقد من البلد
الطائر الحزين
هى وصلت للحجاره كمان
انا معلش اختك مبتسافرش كتير بره الحدود السويسيه
وفاكره اننا مظاليم
طلعنا كلنا مساكين
طيب انت بحركه اكروبات عالميه عديت الشارع يبقى الستات يعملوا ايه
لو على اختك فرنسا
انا ممكن بعون الله امشى على الحبل
واعد لغايه 100 كمان
لكن الستات الكبار يعملوا ايه ؟
دي مش السويس
و لا اي بلد مصر كلها كده
القاهره صلاح سالم وسط البلد روكسي مدينه نصر
الاسكندريه الكورنيش
و جوه زي الزفت
بالنسبه لمش هتجوز ده الجواز رزق زيه زي الفلوس و ربنال مقسمها و ربنا يرزقنا جميعا الرزق الطيب
هو عشان أصل الموضوع إن أي رصف جديد يشيلوا القديم لكن عندنا بيرصفوا فوق القديم ويظل يعلو ويعلو بس عندي حل كل بيت يلغوا منه دور
مش عندك انتى بس يا حبيبتشى
هو تقريبا قعدة العسلية دى كانت على المستوى الدولى
كل محافظ جاب لوشة قصب
وقعد يمصمص فى القصب ويفكر ازاى ينضف جيوب البشرية
يعنى عندنا رصفوا الشوارع وبعد اسبوع بيفحروا فى الرصف اصلهم ناويين يدخلوا صرف صحى
وبالتالى محتاجين نرصف تانى
سبوع كمان ونزل بقرار زى الفل
كل محل يدفع عشرة جنيه رسوم نظافة فى الشهر
وكل منزل يدفع 2 جنيه برضه فى الشهر
وتعالى اتفرجى على الشارع اللى فيه كوم زبالة اطول منى
تقريبا احنا اللى فينا حاجه غلط
والمحافظين بتوعنا دول ناس زى الفل
لاخت فرنسا
ياستى مش تحمدى ربنا انهم يفكرو يسفلتو الشوارع من الاساس وبعدين دى الرسول قال الاعمال بالنيات وهما فى نيتهم يسقلتو الشوارع يبقا خلاص الشوارع اتسفلتت وطلع فى مجارى دى مش مشكلتهم هما لانى هما عليهم التفكير وبدل فكروا يبقا جزاهم الله خير انما يطلع غلط فى التنفيذ ده بقاء مشكلتكم انتو بس
بس ثقى شويه اعتمادات للنهب جديده ويغيرو المجارى احمدى ربنا انتى عايزه رصف ومجارى
الصعيد يا ستى لا رصف ولا مجارى ومشروع المجارى فى بلد مش عامله زى حى من احياء مدينه نصر ليهم شغالين فين 12 سنه ويا عالم حيشتغل امتى
موضوع البلاعات ده في مصر كلها
وهو هواه اسلوب الرصف
بس انا ما اعرفش هنا بيجيبوا الراب منين؟
والفين سلام وتحيه للبنية التحتية
ونورتي عالم التدوين
مدونه حديثة زيي
Mohamed_sobhy84
ماهو انا كنت فاكره السويس بس
طلعت النصيبه قوميه
وكله شارب من نفس الكاس
اما عن موضوع الزواج
انا عارفه انه رزق
لكن وقته بالنسبه لفرنسا راح
عصفور المدينة
استاذنا الكبير منور المدونه كلها
كلامك طبعا هندسى
وفعلا بيكوموا ده على ده
لغايه ما هيساونا بجبل عتاقه
اما الدور الارضى
فكره هايله
لكن لازم نلاقى سكن للناس بتوع الدور ده
وسلام من فرنسا
Desert cat
اكيد يا اختى العزيزه
احنا اللى غلط وهما اللى صح
يعنى هيبقى كل المحافظين شروه واحده وحشين لا طبعا
الشعب هو اللى وحش ومش عارف يمشى افكارهم
نورتى يا احلى قطه صحراء
رئيس جمهوريه نفسى
حرس شرف
هو النشيد الوطنى للجمهوريه بتاعتك ايه؟
علشان لما تيجى نعمل الواجب
بس على رايك هننهب
كفايه علنا حاجه وياريتها اتعملت بضمير
سها
يعنى انتى جديده زيى
الله عليكى نبداء مع بعض كى جى وان
منوارنى جدا
وانا هاخطف رجلى وطيران عندك اشوف اخبارك
واضربلى واحد شاى عندك
واضح إن البداية جامدة أوي ):
عموما الحال عندنا في المدن أفضل مئات المرات من غالبية قري مصر . ومنهم قري لم نسمع عنها ولا مرة من قبل
الحمد لله الذي عافانا مما ابتلي به غيرنا
لكن ميمنعش نعترض ونكتب ونقول كلام جامد زي ده برضه
السلام عليكم ورحمة الله وبركاته
فرنسا الى زى العسل
من الواضح انك كما توقعت هتكتبى مواضيع غايه فى الروعة ومش بس كده لاء وهادفة بس يا ريت اخوانا البعده يحسو شويه على دمهم ويشوفو بيعملو ايه فينا حسبى اله ونعم الوكيل فى كل حاكم لا يراعى الله فى رعيته
انت عارفة عندنا فى مدينتى التى كنت اعيش فيها قبل ان اتزوج واتركها لمدينه اخرى عندما اذهب اليها الان للزيارةاجدهم وطبعا اقصد اخوانا البعدهفحتين الطريق الى اترصف اكثر من مرة قال ايه ده مرة تركيب غاز ومرة تركيب مواسير مياه ومرة لاء دى كابلات كهرباءضغط عالى
لحد مجابلنا الضغط العالى والواطى سوا
وطبعا الى بيتفحت وبيتردمش تانى
وسلميلى بقى على بنوك سويسرا وفيلل مرينا والساحل الشمالى
ربنا يتولانا برحمته بقى ويبعت لنا حاكم يراعى الله ورسوله فينا
وفعلا دى مشكله موجودهفى كثير من محافظات بلدنا
لنا الله يا فرنسا
ام الابناء
راجيه عفو الله
و
السلام عليكم ورحمة الله وبركاته
طيب الله يكون في عونا بقي
عندكم بيسفلتوا الشوارع علي حساب الحكومه ، احنا لسه مسفلتين الشارع بتعنا علي حسابنا
ماهو في مدينتني بيسفلتوا الشوارع الرئيسيه وبس ، اما الفرعيه فاللي عاوز يسفلت يبقي علي حسابه ،
شفتي بقي ان اللي يشوف بلوة غيره تهون عليه بلوته
اه بالنسبه للبلاعه امبارح في القاهره اليوم عرضوا صورة بلاعه في احد شوارع مصر واعتبروها اعلي بلاعه في العالم ، مش عارفه بقي كانت في السويس ولا في حته تانيه
كانت عاليه حوالي نص متر او اكتر عن الارض
:-D
تحياتي
يااااااااااه المشكله دي الكل متعقد منها
بس ده مش سرقه قد ما هو جهل
يعني الناس المتحضرة بره بيسفلتوا ازاي عشان البيوت متدفنش تحت الارض ؟
بيحفروا جامد قبل ما يسفلتوا عشان مستوى الشارع يفضل زي ما هو
انكا عندنا بيحطوا فوق الاسفلت القديم او التراب او اي حاجه المهم بنفس الارتفاع فالبيوت بتنتقل الى رحمة الله وتدفن تحت الثرى
حاجه كمان بخصوص الاسفلت والتراب .. الشعب ده مش نافع معاه حاجه والله
يسيبوا الشوارع مش مسفلته الناس ترش ميه وتطينها آل إيه " عشان نهدي التراب "
يسفلتوها يرشوا ميه برضه ليه يا ست ؟ " عشان الاسفلت سخن نرش ميه عشان يجيب طراوة !! مفيش فايدة
خالتي فرنسا البلوج بتاعك شكله هيبقى عالمي
الى الامام
دى اول زيارة لمدنوتك الجميلة
وعجبنى اسلوبك قوى
دى مشكلة منظومة محافظين فاشلين ... طالعة من تحت عباية منظموة وزاء حرامية....
طالعين من تحت عباءة منظومة حزب بيروقراطى
لابس عبايته ومدفى بيها سعادة الباشا حسنى بيه مبارك
تحياتى
شيماء
المهـ إلي الله ـاجر
من وجهه نظر فرنسا المتواضعه
ان المدن يسكنها خلق الله
والقرى يسكنها برضه خلق الله
مفيش فرق بين المدن والقرى
الا
ان القرى مساحتها كبيره بالنسبه لوجود زراعه
ونسبه عدد السكان بالنسبه للكيلومتر الواحد اقل بكثير من نسبه سكان المدن
لذلك كان طبيعى اهتمام زائد بالمدن
واحنا فى بلدنا اهتمام زاد وذاد قوى
لحد ما ذاد عن حده
Anonymous
الحبوبه ام الابناء
ازيك يا عسل نحل اول قطفه
ضغط عالى وواطى ونص نص ومشكل كمان يجيلهم هما وبعد الشر عليكى يا قمر
وخليهم يودى على سويسرا وغيرها هما ناسيين ان الكفن مالوش جيوب
ربنا ينتقم منهم ومن اعمالهم ومن افكارهم ومن نياتهم
وخلى بالك
الطائر الحزين بتاعك يستاهل قفص ذهب
راعيه وخدى بالك منه ومن الاولاد
ومن نفسك
الف سلام مربع
لاحلى ام الاولاد
هو انتى اسمك ايه ؟؟
ولا اقولك
طالما هو طائر
تبقى انتى كراونه
خمسة فضفضة
حلوه حكايه يسفلتوا الشوارع على حساب الناس
دى حاجه اسبشيل خالص
مفروض تتكتب فى اخر صفحه فى الاهرام
صدق او لا تصدق
تعرفى لو كنت مكانكم كنت فرجت عليهم امه لا اله الا الله
وقعدت فى وسط الاسفلت بتاعنا
واى عربيه حكومه معديه تدفه كارته
حتى البوكس برضه هيدفع كارته
يعنى هما ياخدوا واحنا لا
بس المشكله لو الشارع ناسه مش متوافقه مع بعض
يبقى هيفضل بترابه
وسلميلى على ضريبه المبيعات
The Queen
جلاله الملكه
اولا الفين سلام وتحيه ليكى على تعاطفك ونزولك الى الشارع
ومراعاه شعبك المدون وزياره مدوناته
ثانيا انا معاكى جلالتك ان دى مش سرقه
دى من وجهه نظرى نهب
ولو الموضوع زى ما جلالتك قلتى انه عدم فهم وبالعربى جهل
فى شوارع عندنا اخدت طبقه رقيقه جدا وماكانتش اتسفلتت قبل كده
واتحسبت طبقتين
ثالثا بالنسبه للناس ورش الميه او اى نوع من انواع الاهمال
انا ارفضها ومعاكى ان فى اهمال من المواطنين
شقاوة شعب
رحنا فى داهيه
*
انا يا ساده هوضح كلامها
شيماء قصدها
منظومه محافظين
وهم من يحافظ على الكتب والتراث
ومجموعه وزراء
تقصد جمع وزر او ذنب
وحزب بيروقراطى
حزب مين البنيه مقالتش حاجه ومذكرتش اسم
حسنى باشا مبارك
الباشويه انتهت من زمان يبقى البنيه قصدها على اسم فى الماضى
*
شيماء
انا معكى ان الكل حراميه
فلوسنا ودوها فين ؟
نهبونا وسرقونا وعرونا
الحزب الوطنى الديمقراطى
حزب اللصوص وقطاع الطرق
ولا يهمك يا عسل
انا فداكى
السلام عليكم ورحمة اله وبركاته
فرنستى الجميلة
مش عارفة اقولك ايه اخجلتم تواضعنا بكلامك الجميل دهالله يبارك فيكى ويرضى عليكىويجازيكى كل الخيراما عن القفص الذهب
يكون ايه فايدته للطائر وهو محبوس جم
ال الطائر وروعة الاستمتاع بيه وهو يغرد ويشدو اجمل الانغام
والله خيرا حافظا وهو ارحم الراحمين
وله منى كل الرعايه
وكذالك الابناء فهم اكبر نعمة وهبه من الرحمن
والله الحافظ وهو خير الحافظين
يا احلى فرنسا
فى العالم كله
لكى احترامى وتقديرى
الا الى يحب يتكلم معاكى كثير يعمل ايه
ام الابناء
راجيه عفو الله
كروانه
انتى اللى كلامك شربات
انا مش قصدى قفص بمعنى كلمه قفص
انا قصدى
بيتك وحياتك كلها تبقى قفص ذهب
برعايته
لكن القفص المعروف مش للازواج ولا للبنى ادمين
دعى طائرك يغنى ويغرد كيفما يشاء
اما عن كلامك معايا
زى ما ميناتل بيقول
اتكلم براحتك
انا بحب تعليقاتك جدا وبستناها
ياخالتو فرنسا وهي دي حاجة جديدة بس
ماهى كل البلد كده
عايزة اقولك انه الشارع اللى كنا ساكنين فيه قعدوا 12 سنة يقولوا انهم هايسفلتوه ولما خلصوا سفلته كسروها وقالوا هاندخل الغاز الطبيعي ولما رجعوا السفلتة اللى يوم عن يوم بتسوء قاموا مشقلبين حاله تانى وقاله نظبط المجاري
واهو الحال على ماهو عليه وفيه تباعة صرف صحي عالية عن الشارع تقطم اجدعها عربية معدية فيه :)
ربنا يكون في عون مصر كلها مش السويس لوحدها اللى بتعاني ياخالتو :(
هى مش السويس دى برضه اللى فيها قناه السويس
يعنى المفروض يعنى تكون احسن مدينه هو اللى بيجى من قناه السويس شويه
حتى على الاقل علشن منظرنا قدام الاجانب اللى بيمروا كل يوم عليها
بس تعرفى نفسى قوى ازور السويس
لان للاسف حظها انها مدينه الحروب
حاولى تعملى لينا زياره
همسة قلم
لا تعايرنى ولا اعايرك الهم طايلنى وطايلك
كله فى المجارى يابا
ياحلاوه قعدوا 12 سنه يسفلتو فى الشارع
اكيد عملوا تحاليل واشعه وظبطوا له السكر ونقصوا وزنه
وبعد كده حموه بالشامبو
واستنوا السنه المناسبه للضربه السفلواتيه الاولى
وفى اللحظه المناسبه
عملوا العمليه
وللاسف
برضه فشلت
رفقة عمر
صاحبه السبق
هى فعلا السويس اللى فيها قناه السويس
وبيعدى عليها الاجانب
لكن المحاريس
جمع المحروس
منضفين قوى الشوارع العموميه
والشوارع اللى بتطل على القناه
يعنى الاجانب هيشوفوا كل خير
لكن احنا عايزين نشوف الخير ده احنا كمان
زيارتك للسويس
شرف لكل سويسيه
وان مشالتكيش الارض نشيلك على دماغنا من فوق
بس اوعى تكونى تقيله توجعى دماغ خالتك فرنسا
سلام يا اغلى تعليق عند فرنسا
معلش يافرنسا
لكن لازم تعرفى ان سيف الدين جلال
موجود نسخه منه عندنا فى القاهره وف كل المحافظات , ومش انتوا بس اللى بتستخدموا طوب عشانة تخشوا بيوتكوا
كلنا فى الهم شرق !
يبقى الامركان جربوا فينا موضوع الاستنساخ
واستنسخوا
لكه محافظين
إرسال تعليق