الأحد، نوفمبر 18، 2007

الجنس الثالث

زمان وفى السبعينات وانا لسه فى الابتدائى
كان عندنا مدرسين عباقره
هو للامانه مش كلهم ولكن البعض العبقرى
كانوا بيقولولنا ان الكائنات تنقسم الى قسمين كائنات حيه
وهى تتغذى وتتنفس وتنمو وتحس وتتكاثر وتخرج وتتحرك
وكائنات غير حيه
وهى اللى مريحه نافوخها من كل ده وبنسميها جماد
بعد سنين طويله وانا على عمايا جيت اذاكر لابن اختى فى كتاب الانشطه من سنتين
لقيتهم كاتبين
فى كائنات حيه
واشياء غير حيه
وده منطقى لان دى اشياء مش كائنات
افتكرت زمان
لما كانوا بيقولولنا ان الجنين فى بطن امه بيتغذى بالحبل السرى- بكسر السين - وانا كنت بافكر ليه سرى يمكن علشان محدش بيشوف الجنين وهو بياكل او انه بيتغذى بالاكل اللى بتاكله مامته وهى بتطبخ فى المطبخ مع نفسها
لكن بعد ما كبرت وفهمت
عرفت انه سرى والاسم جاى من اتصاله بسره الجنين
لكن فرنسا هانم انهارده مش عايزه تتكلم عن مساوىء التعليم اللى اكيد بعضنا اتعرض ليها
انا عايزه اكلمكم عن جنس تالت ظهر فى الافق
جنس ليس من الكائنات الحيه لانه لاينمو
ولا حتى من الاشياء غير الحيه لانه غيرثابت
جنس تالت
بيكش او بيصغر
العيش الفينو
كانو زمان بيقولوا
حمرا ومجنونه يا طماطم
دلوقتى الجنان واللوسه حصلوا العيش الفينو وساحت صواميل نافوخه
من سنتين
عملوا العيش المدعم
وطبعا اصحابنا الحلوين متعودين يعملوا الحاجه ويلغوها
سابوا العيش الفينو على حل شعره
كان الكيس فيه عشره بجنيه
وفجاءه من شهرين بقوا ال سبعه بجنيه
وذادت اللوسه والمرض
وبقى السته
والخمسه بجنيه
البقر جاله الحمى القلاعيه
والطيور جاتلها انفلونزا الطيور
والعيش جاله الكشكشه
ومحدش عارف يعالجه وهيفضل يكش ويكش لغايه ما هنشتريه فى كبسولات من الاجزخانه
وزاره التموين باعت القضيه وكبرت دماغها وضربتها طناش
لا فى ملك يلم الوزراء ويقولهم دبرنى يا وزير يقوله التدبير لله يا ملك
نعمل ايه للغلبان الفينو قبل ما ينقرض
وينادى المنادى
على كل الحكماء ان اللى يعرف علاج للمسكين العيش الفينو الملك هيجوزه بنت عم على الخباز
واللى مش هيعرف مسرور جاهز هيقوله امشى من هنا الله يسامحك
الدوله عمت عنيها عن الدعم
خلاص الدعم بح
وبرضه الضرائب شغاله على ودنه
ومش بعيد
يركبوا لكل واحد عداد فى الجزمه يعد هو مشى قد ايه وياخدوا قرايه للعداد + مصريف النظافه ويحاسبونا عليها
لكن فرنسا مش هبله
وهامشى حافيه
وسلملى على الدمغه

هناك 109 تعليقات:

Desert cat يقول...

انتى بتقولى فيها يا حبيبتى
ده بتوع الضرايب مش لقيوا لهم حاجه يعملوها جايين ياخدوا منى ضرايب على اليافطه .... اللى هى اساسا ملهاش اى لازمه عندى .... لان البنات اللى بيجوا عندى مش عارفين اسم السيبر وعارفين اسمى انا ... ولسه بعد شوية هيجوا يقولوا لى عايزين ضرايب على الرصيف اللى قدام السيبر ... وكمان ضرايب على النفس اللى بتنفسه فى اليوم وامن الدولة والمصنفات من ناحية تانية
والاسعار فى زيادة
والدعم بيتلغى
وعمار يا مصر

3ala asm masr يقول...

اول مره ازور مدونتك وشكلى هسافرلها على طول
لانها بجد جامده موز موز موز
بصى والله مش العيش الفينو بس كل حاجه بتكش وبتغلى واحنا بس اللى بنرخص وبنتعذب وبنموت
واخدالى بالك انتى؟

وبس بقى احنا تمام والعيشه فل الفل ومباركه يا ست مباركه

الضرائب
تشحت اولا

قصدى مصلحتك اولا

عصفور المدينة يقول...

انا سامع حد جاب سيرة الحكماء

هو مش الفينو بس اللي بينكمش ده كل حاجة أي حاجة فيها سلك بيرفع ويقصر
الورق بيخف وزنه
المعادن بترق كل حاجة دلوقت تتبع نفس الأسلوب
ده

وبعدين بلاش أفكار عشان ممكن بتوع الضرايب يستخدموها ضدنا

shahy يقول...

اية دة
انتي ماتعرفيش ان السيد المحترم وزير التومين مش التموين قال انة هايرفع الدعم من على العيش الفينو علشان مش صحي على الاولاد واحسن لهم العيش البلدي ابو ردة

يعني الراجل خايف على الاولاد واحنا مش عاجبنا ياساتر اما صحيح شعب متعب ومايعجبهوش العجب

تحياتي ياخالتي فرنسا هانم

The Queen يقول...

خالتي العزيزة

ايه ده انتي هتلبسي الزبون العمة

والله لأظبطك

وبعدين انتي محاسبة أد الدنيا يعني عارفة كويس إن الضرايب مصلحتك اولا .. با سيدي

المهم يا ستي الرغيف الفينو اتلغى وباين كده انك معرفتيش واستبدلوه بالبقصمات

مش لازم تاكلي عيش خالص أقولك : كلي جاتوه

لحظة يقول...

انا عن نفسي بقيت اعمل سندويتشات العيال في العيش البلدي ابو ربع جنيه
بس سندويتش المربى بالقشطة مش بيبقى حلو الا في العيش الفينوا
منهم لله

تحياتي

فرنسا هانم يقول...

Desert cat
حسبى الله ونعم الوكيل
ولو شيلتى اليافطه هيدوروا على اى حاجه تجيب فلوس والسلام
اهم حاجه ميرجعوش وايديهم فاضيه

فرنسا هانم يقول...

3ala asm masr
ايه يا بنت النصاحه دى كلها
على فكره خالتك فرنسا بتموت فى اللى يفهمها وهى طايره
شرفتينى موز موز موز

فرنسا هانم يقول...

عصفور المدينة
عنك حق والله يا استاذنا
ماهما قاعدين على الساقطه واللاقطه
يعملوها
ويقولوا احسن حاجه تجيب فلوس
وفعلا كله بيكش ويصغر
يعنى المرض انتشر

فرنسا هانم يقول...

shahy
يبقى ربنا يعمى عنياهم عن العيش البلدى
لحسن يطلع وحش هو كمان
وبيضر الصحه
والرجل بتاع التومين
يخاف علينا ويخلى الرغيف بجنيه

فرنسا هانم يقول...

The Queen
جلاله الملكه
هما لغوا العيش
معرفشى انا
اصلى كنت فى السوق ومحدش قالى
يلا بقصمات بقصمات
اهو
نلينه يوم او يومين فى الميه
ونعمل ساندوتشات تحت عدسات المنظار الفلكى

فرنسا هانم يقول...

لحظة
مربى وقشطه
وطى صوتك
لحد يسمعنا
نروح فى ستين داهيه
معلش معلش يا جماعه
قصدها فول وبتنجان
لولا فرنسا
كنتى روحتى فى ابو نكله انهارده
مربى وقشطه ؟؟؟؟؟؟؟
هما دول يعنى ايه ؟
مخدرات ولا سلاح ولا ادويه ولا بعد الشر اكل
بس اسكتى ليحطوهم فى دماغهم ومنعرفش بعد كده نبصلهم

عصفور اسكندرية يقول...

فرنسا هانم
اول زياره لي هنا
الف مبروك المدونه
مش الفينو بس
دا حتي العربي والشامي اتجنن
خلينا نشم في الهوا ونتغذي علي الهوا
بس المشكله ان الهوا مش نضيف

سلامي
عصفور اسكندريه

حبة حاجات (ايمان) يقول...

الظاهر خلاص عصر البركه فى حياتنا انتهى

ربنا يعينا

تحياتى ليكى يافرنسا

فرنسا هانم يقول...

عصفور اسكندرية ( المواطن المطحون
خلاص ننزل البحر ونتنفس بالخياشيم
برضه
السمك الكبير هياكلنا
نعمل ايه؟
نعمل ايه ؟
تعالى بس نطرقع لنا اتنين صاقع من الكشك ده وبعدين ربنا يحلها
نعمل ايه ؟
نعمل ايه ؟
لا
حاسب انتى عبقال لما افكر
نعمل ايه ؟
نعمل ايه ؟

فرنسا هانم يقول...

حبة حاجات (ايمان
ربنا يعين الجميع
كلنا فى الهوا سوا

رحــــيـل يقول...

صحيح هو الفينو بس
اذا كان احنا نفسنا نزل علينا التخفيض وبيكششونا حبه حبه
مش ملاحظه ان العدد بدأ يقل ولا ايه
ياترى الدرو على مين؟
سلام ياحلى فرنسا

مشروع انسان يقول...

كنا لسه بنتكلم فى الفينو ده النهاردة
وامى مكنتش مصدقة
الحاجات فعلا بتغلى كل يوم
كل يوم بجد
بمعنى الكلمة يعنى
تغلى وتكش كمان
امتا البنى ادم يغلى ان شاء الله يكش حتى
بس يغلى
هو الحاجة الوحيدة اللى فاضل يخصخصوها
ويعذبونا عليها النيل
ربنا يستر
ويشتريه مستثمر خليجى
ونشرب احنا من البحر

دكتور حر يقول...

والله يا فرنسا انا مش عارف البوست ده هيهبلني

مرتين اكتب التعليق والنت يفصل
**************

المهم

ان كان على الجنس التالت
مبقاش الفينو بس

خدي عندك بترتيب ما بفتكر

باكو البسكوت
الصابونه
الطعميايه
الفول ابو نص جنيه

البني آدمين كمان
اه والله كشوا كمان

اه يا بلد

بس اهم الحاجه ان الكيلو لسه كيلو

فرنسا هانم يقول...

دكتور حر
هو فعلا كل حاجه كشت
وولعت
لكن موضوع الفينو ده
متلخبط
فى فرن بتبيع التمانيه ب جنيه
واخرى السته بجنيه
وغيرها الاربعه بجنيه
فى لخبطه
وتخبط

دكتور حر يقول...

ماشي يا خالتوا

هتفرق قوي المحافظة يعني؟؟؟

فرنسا هانم يقول...

ra7eel
هنقول ايه غير ربنا يستر
لكن العدد بيقل ازاى ؟
بجد مش عارفه
انا اعرف ان التعداد السكانى بيزيد
هو التانى اتكشكش ؟

فرنسا هانم يقول...

دكتور حر
لا والله
ده مجرد سؤال

فرنسا هانم يقول...

امام الجيل
ربنا يجعل كلامنا خفيف عليهم
لحسن يخصخصونا احنا
ونتباع
ب الدسته
دسته حريمى بكذا
دسته رجالى بكذا
ربع دسته اشرار بكذا
وسلامى للخصخصه

عــلاء ســالـــم يقول...

السلام عليكم

مريت على مدونتك الجميله وعجبتني جداً

بالنسبه للبوست دا فالحكومه تقريباً عايزه تفضل تقصر في العيش الفينو لغاية ما يبقى مدور زي الكايزر وبعد كده يدمجوهم في بعض ويخصخصوهم.

DoMaLaYs يقول...

هههههههههههه

دماغ يا فرنسا و الله

صحيح و الله

ناقص يعملوا ايه ؟

و سلمتين على الدمغه

ارسم بالرصاص يقول...

السلام عليكم ورحمة الله وبركاته

فرنسا هانم .. اهو ده بجد كلام الهوانم بحق وحقيقي ... تسلم ايدك ..

بس تفتكري يعني .. ح يجي علينا يوم ونلاقي ناس مركبة عداد على مناخيرهم .. تفتكري .. يعني متلا .. بما انك م الهوانم ... ماسمعتيش لو ح يصرفولنا الهوا على بطايق التومين ولا برضو بححححححححح

فرنسا هانم ... اول مرة اجي على مدونتك واكيد مش الاخيرة واكيد ح اجي كتير اوي .. ااولك تسلم ايدك

وتحياتي ليكي

هايدي

همسة قلم يقول...

هو الفينو بس ياخالتو

ده كل حاجة كشت ولما بتكش بتولع

كنت بشتري عيش فينو من المبز مرة انا عارفة انه العشرة بجنيه لقيت الراجل بيحط لي اربعة

مش عارفة هو مين اللى باقي لسه مش جاله مرض الكششان ده

تقريبا باقى انه الشعب المصري هو اللى يكش

وعلى اى حال هيكون احسن علشان مش هيلاقوا حد يحكموه بعد كده:D

الـسـيـدة نـون يقول...

انا لسه النهاردة الصبح كنت جعانة جدا نزلت مع ابو شريف وهو بيوصل شريف الحضانة قلت اعدى على المخبز اشترى عيش فينو وافطر براحتى لوحدى من غير دوشة الرجالة

وبقول لراجل ادينى بجنيه عيش فينو على اساس انه هيدينى 10 رغيف
بفتح الكيس لقيتهم سبعة والرغيف اد صباع الايد
يعنى علشان تاكلى وتشبعى تاكلى حوالى خمسة رغيف

بقول لابو شريف الحق ده الراجل ضحك عليا وادانى سبعة بس
راح هانى ضحك عليا وفى عنيه نظرة معناها انى مش عايشة فى الدنيا
يعنى هبلة ولا مؤاخذة

عايزين ننادى بمبدأ
طوله متكشكشهوش
طبعا انا قصدى على العيش الفينو
مش حاجة كدة ولا كدة

سلام يا احلى فرنسا
اختك خيخة

خمسة فضفضة يقول...

السلام عليكم ورحمة الله وبركاته

انتي بتقولي فيها يا خالتي ، دا شويه شويه هايعملوا ضرايب علي النفس والكلام
واهو كله في مصلحتنا مش الضرايب مصلحتنا اولا

3ala asm masr يقول...

ألى من يهمه الامر والى السيد وزير التومين
عرضها متكشكشهاش
والنبى تعرضها
سلام

فرنسا هانم يقول...

alaa salim
يبقى على العيش والكايزر السلام
ونحكى لاولادنا ونقول
كان يما كان كان فى عيش زى الصابع الكبير اسمه الفينو الله يرحمه
شرفتنى زيارتك
وارجوا التواصل

فرنسا هانم يقول...

alaa salim
الله يبارك لك
وعلى رايك نا قص ايه تانى
زيارتك شرف كبير لفرنسا هانم

فرنسا هانم يقول...

ارسم بالرصاص
لا متخافيش
مش هيمنعوا الهواء
صدقينى انا بقولك وانا متأكده
عارفه ليه ؟
هما برضه مش برياله
عارفين انهم لو منعوا الهواء
ان احنا هنموت
طيب هما هيتحكموا فى مين ؟
خليكى ناصحه

فرنسا هانم يقول...

همسة قلم
كشاشان يا خد كل اللى واقف فى طريق الشعب المسكين ده
قفص رقابته
وحول عينيه
وفقع كرشه
كل من يقف فى طريق المصريين الغلابه
يلا
خدوا من قلب فرنسا وصروا

فرنسا هانم يقول...

بت خيخة وأى كلام
كسفتينا قدام ابو شريف
يقول علينا ايه ؟
وزمانه قال فى نفسه من بدرى
نسوان هبل
برضه كده يا خيخا
ولا
انتى برضه معذوره
الحاجه كل يوم فى سعر
هنعرف ايه ولا ايه
الله يكون فى عونا
وسلامى لشريف
قوى قوى قوى

فرنسا هانم يقول...

خمسة فضفضة
الضرائب
مصلحه للجميع
والدوله عارفه انها مصلحه
وعلشان كده بتعمل علينا مصالح

فرنسا هانم يقول...

3ala asm masr
ما قالتلك عرضها
البيه سمعه تقيل ولا ايه ؟

rainbow يقول...

فرنسا هانم
اولا احييكى على روحك المرحة اللى مالية اركان مدونتك الجكيلة

ثانيا موضوع العيش الفينو ده بأه معاناة من ضمن اللى احنا مستحملينو .. ومن الآخر كالعادة اللى مش عاجبه يروح ياكل عيش بلدى دول هما بيقولو كده
خلاص بقو يعتبرو الفينو من الرفاهية او الكماليات

ربنا يلطف بينا

اما بالنسبة لموضوع الضرايب وبهدلتك اولا .. فليا صديقة عندها محل للموبايلات واصلاحها تقدرى تقولى عاملينو مطار كل يومين ينزلو بباراشوتاتهم عليها وهات يا رخامة

ولو ما فيش فلوس ياخدو عدتين وعليهم واحدة هدية

الافترا وحش
وآخرتو وحشة

ربنا يستر

صانعة الحرية يقول...

السلام عليكم
ازيك يا فرنسا هانم
منتظره بوستك الجديد من كام يوم
والله عندك حق فاضل نشتريه فى كبسولات
وحسبنا الله ونعم الوكيل
اللهم ابعث فينا عمرا اللهم ابعث فينا عمرا

الطائر الحزين يقول...

قالوا ضرايب

قلنا ماشى بقينا بندفع على ابرة الباجور ضريبة والفجل كمان


العيش رحت اشترى قالى الثلاثة بجنية قلت يعنى الواحد بكام قالى ما تحسبها يا استاذ قلت يعنى ب35 قرش قالى ايوة قلت مش عاوز هنعمل رز مع المسقعه

وقال ايه فيه دعم

mohand يقول...

السلام عليكم
هههههههههههههههههههههههههههههههههههههههههههههههههههههههههههههههههههههههه

عجبتني قوي حكاية الجزمة
بالعداد

الكايزر سعادتك

بقي في حجم القرش صاغ

ومصر بتتقدم بينا
بس بتتقدم لورا

تحياتي

كلاكيت تانى وتانى يقول...

ضرايب وحجوزات دة نت لو فكرتى تشوفى الخصومات والدمغات والحاجات اللى بياخدوها من مرتبك تأمينات معاشات وهبل كدة تفتكرى ان الحكومة هتبنيلك بيها فالنهاية فيلا اربع ادوار الحمد للة على النفس بناخدة من هوا مصر المحروسة ومبندفعش فلوس
تحياتى لمدونتك الجميلة

غير معرف يقول...

تصدقى احنا شعب فقرى اه والله مش حاسين بكل النعم دى واهى الحكومه علشان تحمدو ربنا على الى كنا فيه قررت رفع الدعم وحتشيل ايدها خالص عن حجات الرعيه والدهماء والسفهاء من ابناء الشعب المصرى الى هما احنا قال يعنى هى كانت حطه ايدها اساسا
ويبقا قابلينى يا فرنسل لو لقيتى العيش الفينو ولا عرفتى تشغلى كهرباء
شفتى اخره البطر على نعمه الحكومه

دكتور كسلان يقول...

ازيك يا فرنسا هانم

انا قلتلك فى الاول ان مدونتك هتكون مميزة

وفعلا هيا كده

بس شكلى كده فاتنى كتير جدا

وواضح انك نشيطة جدا فى التدوين

انا اسف ان ما علقتش ع البوستات اللى فاتت


بالنسبة للبوست ده

والله انا حاسس ان احنا هنكش زى الفينو

منهم لله

ضيعوا البلد

مش مكفيهم النهب من بيع الشركات والاراضى

عايزين كمان يلغوا الدعم

بس خلى بالك لو مشيتى حافية

هياخدوا منك فلوس

ويقوللك انت ماشية على ارض مش بتاعك

احنا خصخصناها


سلااااااااااااااااااااااااااام

كاميليا بهاء الدين يقول...

السلام عليكم
أنا اول مرة ازور مدونتك
قرأت لك أكثر من تعليق فى مدونات صديقة
تعليقات نارية الحقيقة..
فقولت لنفسى .. اتشجع شوية وآجى ازورك

ولاقيت ان كان لازم ازورك من زمان لإنك فعلاً صاحبة فكر مميز ..

بوست هايل .. ولكن هانعمل ايه؟
فلا حياة لمن تنادى

لك تحياتى وتقديرى

كاميليا

أبوسويلم يقول...

ايوه يا سيدى
طيب بالراحة علينا شوية مش ملاحقين على تدويناتك
كل امل ادخل الاقى تدوينة جديدة
ده نظام عرض عظلات ولا ايه؟
ما يبقاش كده برده علشان الغلابة اللى زينا يقدروا يدونوا ويعيشوا برده
كلام جد
انت يا ست الكل بتتكلمى على العيش الفينو اللى سعره بقى فى السما
طب خلينا فى العيش الاسمر اللى الرغيف منه ب5قروش وماحدش لاقيه
والكلام شبه الاكيد ان الدعم هيتلغى خلاص والرغيف منه هيبقى ب 25 قرش
تخيلى 5 اضعاف مرة واحدة
واحب اطمنك رغم ان رفع الدعم عن الدقيق العادى مالوش اى علاقة بالدقيق الفاخر اللى بيتعمل منه العيش الفينو الا ان الاكيد والمؤكد ان العيش الفينو سعره هيزيد هو كمان
ليه؟
مش عارف
علشان تنبسطى كمان وكمان
منهم لله اللى كانوا السبب
باقولك ايه
مستنيك انت والمنديل الابيض
سلام يا فرنسا

فرنسا هانم يقول...

rainbow
بيزلوا بالبارشوتات ؟
كوماندوز
الضرايب بقت كوماندوز يا رجاله
وتحيا الوحده العربيه
تحيا الوحده العربيه
شرفتنى بزيارتك يا رانبو
لا
استنى
قول لصديقتك
اصبرى
وجاهدى
يمكن النور يولع
وتمشى الضلمه

فرنسا هانم يقول...

صانعة الحرية
وانا كمان بستنى تعليقك
لما فيه
من اتزان وعقلانيه
من غير حسد

فرنسا هانم يقول...

الطائر الحزين
ليه الافترى بتاعك ده
بس لما تيجى ام الابناء
هشتكى لها منك
الناس يا مفترى عملوا معاك احلى واجب
وحسبوا لك ال3 بجنيه
بدل جنيه وشلن
تقوم ترفض الاكازيون
وتعمل رز ومصقعه ؟
لاء لاء
معندكش حق

فرنسا هانم يقول...

mohand
خلاص الكايزر بقى فى حجم القرش صاغ
يعملوه بقى العمله الرسميه للبلد
بدله رجالى ب 300 كايزره
بدله اطفال ب 150 كايزره
باكو لبان ب كيزور واحد
ونسوى العمله فى الفرنه

فرنسا هانم يقول...

كلاكيت تانى وتانى
ايوه طبعا الحكومه هتبنى بيها فيلا اربع ادوار
وقصر كمان
متخليش نيتك وحشه
هتبنى الفيلا
وهياخدها الصحبجيه
ايه يا لاللى
عايزين شويه
ايه يا لاللى
حبه اهات على عين على ليل على يا لاللى

فرنسا هانم يقول...

رئيس جمهوريه نفسى
معلشى يا خويا
والله ماكان قصدى
تزعل منى الست حكومه
هات راسها وانا ابوسها
واتاسف لها
يقطعك يا فرنسا
زعلتى الحكومه باشا
وهتشيل الدعم
ونمشى نلالى وتقول
يا ولاد الحلال دعمه تايهه طول كده
فى رجلها الشمال ضربه مطواه زى ده

فرنسا هانم يقول...

دكتور كسلان
الاسف على عدم الحضور مقبول
لكن كشف الحضور والانصراف يا دكتور اتمضى
والموضوع خرج من ايدى
والخصم على المرتب
بس
بجد
لو مشيت حافيه فعلا هيقولوا الارض ملك الحكومه
ومدام ملك الحكومه
يبقى زى اخواتها اتخصخصت
انا اركب دقن
واروح لابوكى

فرنسا هانم يقول...

كاميليا
تتشجعى وتزورينى ؟
هو انتى كنتى خايفه ولا ايه ؟
وعلى العموم
انت زرتينى اهه من غير فاكهه فى ايدك ولا حاجه
طب ازازه صاقع
اول مره تيجى
على العموم برضه
هفوتها المره دى
لكن اعملى حسابك المره الجايه مش هفوتها ابدا

فرنسا هانم يقول...

والله يا زمن ما بايدينا زرعنا الشوك ولا روينا يا زمن
وانت يا بو سويلم زرعت بيناتنا اشواك كتيييير
لا يا ولاد محدش يطخه
احنا مش بتوع دم
كلام بجد
فعلا يا بو سويلم العيش هيبقى سعره فى السماء وربنا يستر
مصر كلها غلابه
اما عن الرايه البيضاء
هتيجى بيها هتيجى
مفيش مفر

أبوسويلم يقول...

بما انك موجودة دلوقت
فاسمعينى
اولا انا مش هاهددك علشان احنا بالليل
شوفت انا قلبى طيب ازاى
ثانيا
انا مش شاريلك الكمبيوتر علشان تفضلى سهرانه قدامه لحد دلوقت
عندك مدرسة الصبح
تصبحى على خير

فرنسا هانم يقول...

أبو سويلم
الرد الاعلى لك
نسيت الاسم

فرنسا هانم يقول...

أبو سويلم
وانتى من اهله
بس انا عملت الواجب بتاع المدرسه من بدرى

فرنسا هانم يقول...
أزال المؤلف هذا التعليق.
Soooo يقول...

يخرب بيت نافوخك
ده انتي عديتي مرحلة الطرقعه خلاص
بس بأمانه .. اشهدلك انك اتولدتي عشان تبقي كاتبه ساخره

ولو الحياه بايدي .. وكتاب الله اعمللك مجله مخصوص عشانك
تقولي فيها كل اللي عايزه تقوليه براحتك وبلا خوف
بلا خوف
بلا خوف


يا مسرووووووور
سلاموووووووووووز

simple girl.. ..simple dream يقول...

ازيك يا فرنسا
مبروك المدونة الجديدة
واضح فعلا خفة دمك واسلوك المتميز
انا قريت كل البوستات السابقة وبجد كلهم عجبونى اوى
خصوصا بتاعة البنت زى الولد
لانها فعلا بتبين اد ايه انت ست جدعة وعشرية وخدومة
وكمان ما شاء الله
رغم ان المدونة لسة جديدة بس انت عملتى صحاب كتير اهو
كل بوست عليه 60 او 70 تعليق
انا مش بحسد
انا بنق بس
بس دة لان زى المثل ما بيقول
من حبه ربه حبب فيه عبده
وانت عشان طيبة وقلبك ابيض ربنا حط لك القبول بين عباده
ربنا يوفقك فى حياتك ويسعدك دايما

Unknown يقول...

فرنسا صباح الفل\
معلش كنت مريح اليومين اللي فاتوا
العيش الفينو والكائنات الحية والجماد، فيه ايه يا فرنسا
حسستيني ان دخلت أودة الكيميا
بأهيس عشان يومين ما نمتش .. قلت لما آجي أشرب القهوة عندك، وأفوق .. ولا بلاش قهوة .. من ساعة العزا وانا بأربع قهوة
أقولك أعملنا سندوتشين جبنة بفلفل، بس سندوتشات عيش بلدي .. مش فينو والنبي عشان جعان .. ونفسي اشبع

حياة الأحلام يقول...

السلام عليكم
هههههههههه والله ضحكتينى بجد

حكايه العيش الفينو دى حكايه ينقرض مش بيكش بس والله انا بقول لبابا ده بقى بقسماط مش عيش ابدا ده

ولا حكايه العداد على رأيك ساعتها هنلاقى مصر كلها ماشيه حافيه

موضوع جميل واسلوبك بجد جميل وخفيف على القلب

تحياتى يا فرنسسسسسسسسسسا يا جميله

مدحت محمد يقول...

ههههههههه
الله يخرب عقلك ياخالتو
انتى مشكلة بجد
هتكلم على ايه ولا ايه
الفينو اللى فى كبسولات
ولا عداد الجزمة
هههههههههه
انتى كاتبة ساخرة عشرة على عشرة
تحياتى ياخالتو

alshared يقول...

والله العظيم أنتي عندك اسلوب جميل ولا أحمد رجب أيام شبابه

علي العموم أعتقد أن الناس دول قالوا كل حاجه ممكن تنقال

تخياتي يا خالتوا يا جميله

Tamer Nabil Moussa يقول...

العيش كلة عموما وحاجات تانية كتير دلوقتى بتروح وتختفى وهنوصل فى لحظة الى الاختفاء كان الله فة عوننا

على فاكرة يافرنسا

ابقى ادخلى على افكار حرة مدام مالكيش فى الانجلش

دى المدونة الرئيسية عندى

تحياتى

فرنسا هانم يقول...

Soooo
مجله بحالها لخالتك فرنسا
الله يكرمك ويخليك
انا متشكره على حسن الظن ده
وسلامووووووووووووووز

فرنسا هانم يقول...

simple girl.. ..simple dream
بتنقى ؟
الحمد لله افتكرك بتحسدى
انا مسروره جدا جدا من كلامك
وهستناكى دايما

فرنسا هانم يقول...

يوميات عيل مصري
يوه
تأنس وتشرف يا خويا
بيتك ومطرحك
اقعد عبقال ما اعملك احلى ساندويتش
بس يا كسوفى
وقفت ساعه فى طابور العيش البلدى وعبقال ما وصلت للاول كانت الفرنه شطبت
والجبنه التلاجه من ساعه ما سمعت انهم هيغلوا الكهربا وانا فصلاها
تاخدشى 200 جنيه وتنزل تشترى لنا ساندوتشات وتيجى
ولا اقولك خليهم الف علشان نشبع

فرنسا هانم يقول...

حياة الأحلام
فينك يا سكره
مش باينه ليه
اوعى يكون حد زعلك من سكان المدونه
قوليلى وانا اقطعه حتت

فرنسا هانم يقول...

doha
كاتبه مره واحده ؟
ربنا يبارك لك يا احسن دوحه
يا بن بلدى

فرنسا هانم يقول...

alshared
الناس فيهم الخير عملوا كلهم الواجب
وانا بشكرهم كلهم
وبشكرك على الزياره الجميله

فرنسا هانم يقول...

Tamer Nabil
ماشى يا عم نبيل
ساقوم بزياره مدونتك
فى كازوزه ؟

3ala asm masr يقول...

أنا سمعت أن الحكومه رفعت أسعار الكهربا والميه
فخلاص مفيش فينو
مفيش كهربا
مفيش ميه
وأنا هروح أقفل المدونه بتاعتى لانى أكيد هوفر عشان أنا غلبانه ومش هعرف أفتح الكمبيوتر تانى

3ala asm masr يقول...

أنا متهيألى أنهم بعد كده هيحنطوا العيش الفين ويحطوه فى المتحف ويقولوا للولاد ده أسمه عيش فينو كانوا الفراعنه القدماء بيتغذوا عليه
سلام

ابن رشد يقول...

مش عاف انتوا عايزين اية ما الاسعار رخيصة و المواصلات فاضية و لادنيا حلةو دي مصر بقت و لا امريكا
الله ينور يا فرنسا

dreaming pocky يقول...

على فكره انتى دمك زى العسل وربنا
بنت جدعه وزى العسل فعلا
والله ضحكتينى لما وانا عماله اقرا كلامك واوصل ل رغيف الفينو
بجد احنا عندنا بردو اتسخط اوى اوى وبقى الواحد المسخوط بريال
انا جيت مدونتك قبل كده بس معلقتش على حاجه بس المره ده مقدرتش بجد انتى عسل اوى
ابقى تعالى مدونتى والكازوزه عليا ياستى اى خودمه
تحياتى ليكى

dreaming pocky يقول...

على رأيك ياشمس
شقق مرميه والشغل فى كل حته واللحمه ب 7 جنيه وساعات نلاقيها ب6

واخدلى بالك من الشغل اللى فى كل حته ده
:D:D

dr.Roufy يقول...

ههههههههههههه

بس حتى لو مشيتي حافية..مش بعيد ياخدوا منك..فلوس على كل متر تمشيه في أرض المحروسة باعتبارها وقف خصوصي لجنابهم..وكتر خيرهم يعني انهم سايبينك تمشي فيها وحافية كمان
:)
بجد بوست جمييييييييل

تحياتي

احساس لسه حى يقول...

عزيزتى
زعلتينى لما قولتى الوقت الضايع فى البوست اللى فات هى الروح تعرف ادمها اد ايه من الايام علشان تفرح فيها ولا الفرحه اساسا بتتقاس بعدد الايام وامتا وفى اى وقت
وايه الاسم ده انتى عامله جريده صفره ولا ايه الواحد فكر هيقرا كلام ممنوع
بس يلا حصل خير
شوفى هى لو تيجى على العيش الفينوا ميهمش المهم متجيش على الرغيف الغلبان
احسن ده خط احمر ممنوع الاقتراب ليه
احسن الشعب مش ناقص جوع
سورى معظم الشعب اللى مش بيجيب الفينو
تحياتى يا افندم
سلام

المهـ إلي الله ـاجر يقول...

المشكلة ان مش بس جنس ثالق دول أصبحوا كائنات فضائية

والله فعلاً انا مش عارف الأسعار بتغلي ليه !!

Doba يقول...

يا ختشششششششششى
مش تقولى انك ساكنة فى العلالى كده

كح كح كح

مش قادرة اخد نفسى
شيلى عنى شيلى

قالولى ان اللى بيجى يزورك من غير ميكون شايل ومحمل بتاخدى على خاطرك وانا ياختشى يا فرنسا حبيتك وقلت لزمن ولابد اجى وازورك وجبتلك اشى تفاح واشى موز واشى كنتلب اللى فيه بزر ده

وعندك يا ستى كيس تانى مليان على تمته كده بلوازم التلاجة علشان نقعد بقى ناكل ونمزمز ونرغى على راحتنا وعشان لو حد من الاحبة حب ييجى القاعدة

بس امانة عليكى ياختشى تنضفى كيس السمك ده للغدا احسن انا بحب السمك قوى ده روحى روحى روحى

ولقيتك زعلانة من الكشكشة اللى حاصلة فى الفينو فوقفت فى الطابور مالصبح لغاية مجبتلك رغيفين بحالهم

=================
مدونتك اكتر من رائعة حقيقى أدمعتى عيونى من الضحك وأثرتى فى عقلى برزانة تفكيرك ورجاحة عقلك

تقبلينى زائرة دائمة لمدونتك وصديقة من الاصدقاء ولكى منى كل التحيات ولاامنيات بكل الخير

هبة

Unknown يقول...

اولا انتى قلتيلى لما تيجى المرة الجاية اطليى اتنين شاى على حسابى يلا باه لحسن انا دماغى مصدعة

ثانيا لو الجماعة الى ناقص يركبوا عداد فى دمنا مش فى الجزمة قروا السكر الى انتى كتباه حيخلوا الثلاتين رغيف فى فينو بنص جنيه

سلام مؤقت يا شربات

اسامة يس يقول...

ههههههههههههههه
الدولة شالت ايدها من كل شيء ...
المصيبه ان الناس فاكره ان الحكومة بتدعم من جيب ابوها وهيه اللي بتوكلنا .. طب مهيه فلوسنا والضرايب اللي بندفعها .. وافدنة القطن والقمح اللي بتشتريها من الفلاحين بستة آلاف وتصدرها بما يعادل 24 الف ... يعني تحتكرها من الفلاح وتصدرها بالسعر العالمي .. وبعد كده يروح الفلاح لطابور الجمعية وكشك العيش ...
والله امر عجيب فعلا

دمت بكل ود..
خالص تحياتي

الحمقاء المضلله innominate x يقول...

هىء هىء هىء هىء احسن انهم شالو الدعم ده كده مدعوم على نشفانه و طعموا المقرف ده لو بيعملوه لصراصير كان طعموا بقى احسن من كده انا عندي اقتراح يدونا فلوس الدعم و نروح احنا نشتري بيه ابو ربع جنيه فكري فيها هي هياها

fawest يقول...

أنتِ اللى بتقولى أحلى كلام

Yahia يقول...

هايل

رفقة عمر يقول...

انا جيت اسلم عليكى
عامله ايه
وبعدين مش لاقين عيش كلوا جاتو
انتم ليه ناكرين النعمه وفضل الحكومه عليكم
والنعيم اللى احنا عايشينه

فرنسا هانم يقول...

3ala asm masr
خودينى فى ايدك
متسبنيش لوحدى

فرنسا هانم يقول...

3ala asm masr
الفراعنه لو كانوا عرفوا الفينو
واتحسروا على انقراضه
ماكانوش عملوا الحضاره دى

فرنسا هانم يقول...

shams
وامواصلات فاضيييييييييه
والحاله اخر مزاااااااااج

فرنسا هانم يقول...

dreaming pocky
مانا شفتك فى المدونه وعرفت انك لم تعلق
وقلت يابت يافرنسا سماح المره دى

فرنسا هانم يقول...

dreaming pocky
لا
والشركات الاستثماريه
عماله تتحايل على الشباب علشان يشتغلوا

فرنسا هانم يقول...

dr.Roufy
يبقى ساعتها اقعد فى البيت
وخلاص
وتجيلى الشركه لغايه عندى
واشتغل منازل

فرنسا هانم يقول...

احساس لسه حى
العيش البلدى
ماهو دى المصيبه
هو هيروح منهم فين
يابا دول دخلوا على القضاء

فرنسا هانم يقول...

المهاجر الى الله
بتغلى علشان جيوب الحبايب تتملى

فرنسا هانم يقول...

عمر افندى و ابوه
اعلان مدفوع الاجر

فرنسا هانم يقول...

Doba
ايه ده كله يا هبه
برضه كده تتعبى روحك
يلا النبى قبل الهديه
وانا قبلتها
ومستنياكى على طول
بس امانه متتعبيش نفسك تانى
هاتى اللى تقدرى عليه وزودى تانى
واندهيلى انزل اشيل معاكى
ولا اقولك
هركن العجله تحت
وعجله فرنسا بتتلع على السلم
هاتى كمان وزودى

فرنسا هانم يقول...

عاليا حليم
لا اسمعى
انتى تيجى هنا فى اى وقت وتتطلبى اى حاجه انتى عايزاها
الخير كتييييييييييير
والحكومه منعنشانا قوووووووووووى

فرنسا هانم يقول...

osama
ماهى الحكومه ناصحه على الفلاحين بس
لا على الصعايده كمان
لا على بحرى
لا دى ناصحه قوى على كل المصريين

فرنسا هانم يقول...

الحمقاء المضلله
الحكومه تدينا فلووووووس ؟؟؟؟؟؟؟
يا بنتى هى الحدايه بترمى كتاكيت

فرنسا هانم يقول...

fawest
شكرا لك

فرنسا هانم يقول...

fawest
شكرا

فرنسا هانم يقول...

Yahia
انت اللى هايل
انت مخاصمنى ؟؟؟

فرنسا هانم يقول...

رفقة عمر
فكرتينى بملكه فرنسا
لا فرنسا الدوله
تعرفى انكى بتوحشينى جدا
عارفه ليه ؟؟؟؟؟؟؟

Unknown يقول...

احنا اتنصب علينا
يعني بعد المقدمه الطويله العريضه في علم الاحياء
الاقيكي بتكلمي عن العيش الفينو...
اذا كان كده فانت هاتلاقي في مصر
انوع كتيره من الكائنات الحيه اللي بتتعرض للانقراض و الانكماش و كافة الامراض الحالية
بعد كده الفينو هايطحن ويتباع بدره و الشباب يشمه في بير السلم

د/اجدع بنوته يقول...

كلو كوم فعلا والفينو بقى كووم
ده بقى شبه البقسماط والله
ربنا يسترها معانا
ال ايه بيقولوا كمان هيشيلوا الدعم
يعنى هيبقى فينو وعيش وشاى وسكر

يعنى هتتقلب مجاعه باذنك يارب

koukawy يقول...

يعني هو الفينو بس
ده كل حجه بتكش
هو فيروس او فره و سارحه في البلد
لعيش ابو خمسه صاغ بتاع الفرن البلدي
لو خرمته من النص هلبسه خاتم و هيبقي ضيق علي صباعي رغم ان انا صباعي معصعص