السلام عليكم ورحمه الله وبركاته
اختكم // فرنسا
حبيت الاسم ده من حبى لعبله كامل
اقمت استلفته منها من غير ما تعرف
وهى كمان كانت مستلفاه من بلد اروبيه يعنى تبع طنطا
اختكم فرنسا نيو يعنى لسه جديده طازه فى موضوع التدوين ده
من مواليد السويس
لكن بعد كده انتقلت للعيش برضه فى السويس
عند الصابع الشمال للبحر الاحمر
تاريخ الميلاد // 11-2
وطبعا مش هاقول السنه لان ده سر ولا اقولكم 1969محدش واخد منها حاجه
عرفت التدوين عن طريق مدونه معروفه جدا زى النار على العلم
لكن اسمها راح من بالى
الظاهر مش معروفه ولا حاجه
حكايتى ببساطه
=======
لما كنت فى الثانويه العامه فى الثمانينات كتير من زميلاتى اتخطبوا وانا قاعده اقشر بصل
لما رحت الجامعه
وكانت فى القاهره كتير برضه من البنات اتخطبوا وانا برضه قاعده اقشر بصل
مانا فاضيه عماله اشترى واقشر
اتخرجت من الجامعه
ورجعت على السويس تانى بس مشهده يعنى بشهاده
وبعد سنتين اشتغلت
وكان سنى 25 سنه
قلت تمام هقابل مديرين ومهندسين وزاميلى المحاسبين وهانقى العريس اللى على مزاجى
فات شهر والتانى وسنه والسنه اللى وراها وانا برضه متمسكه بالبصل
وعماله اقشر
ثم اقشر
واقشر
محدش ورانى وشه قلت يمكن العرسان شحين من السوق
لقيت العرسان بالهبل كتار قوى لكن محدش عارف عنوان بيتنا
ركبت بدل الجرس جرسين على الباب والباب بتاع العماره
لكن العرسان
طاروا
بعد ما عديت ال35 سنه خلاص
بطلت استنى
واقلمت حياتى على العنوسه
اضحك واهزر ومحدش هياخد حاجه معاه
يبقى نعيش لنا يومين بالطول ولا بالعرض
نسيت فكره الزواج نهائيا
بل انى اغلقت موضوعها نهائيا
وتفرغت لتاديه فروض دينى وحياتى
واكتشفت موال المدونات وحكايه التدوين
ودخلت مدونات وقريتها
وزعلت جدا من اصحابها ليه محدش يقولى ؟
يسبونى كده من غير ما حد يقولى يا فرنسا فى حاجه اسمها تدوين اشغلى نفسك فيها
لكن معلش مردودلهم
انا بحب الهزاز والضحك جدا جدا
فارجوا الا يغضب من ضحكى احدا
والى اللقاء فى حلقه قادمه
قصدى سلام عليكم
هناك 66 تعليقًا:
طبعا انا سعيدة جدااااااااااا ان ليا السبق انى اكون اول تعليق على المدونه
الف مبروك على المدونه وبجد فكره فرنسا عجبتنى لانى انا كمان بحب عبله كامل
وانا سعيدة بروحك الحلوة
وان شاء الله المدونه تكون وشها حلو عليكى وتكتبى بوست قريب جدا انك لاقيت نصك التانى
وان شاء الله هايجى لان مش انتى بس اللى وصلتى للسن دة دة ناس كتييييير قووووى
ويااارب نفرح بيكى قريب اللهم امين ياارب العالمين
أول تدوينة فعلا ؟
تدوينة جميلة جدا
الموهوب بيبان
مستنيين الحلقة القادمة
السلام عليكم
أول تدوينة تدل على الخط مرحبا بك
أولا يا ستي مرحبا بك وكدة الكبار بيكتروا عشان نتقل الوزن
ثانيا عندك مدونة من السويس
http://noonybunny.blogspot.com/
ثالثا
هي أولا الصراحة أنا سررت جدا أنك أول مرة تعلقي في مدونة كان عندي
رابعا
أنا مبسوط جدا من الحكمة العالية جدا في كلامك
وربنا يبعت عريس إن شاء الله بس صراحة انتي حاطة صورة تطفش من بابها كدة عارف انها مش صورتك بس يعني يعني باقول
من غير زعل ولا حساسية نفسي في موضوع شاغل بالي من زمان بس مكسوف أطرحه وأهي حت المناسبة
الجماعة المدونين والجماعة المدونات تلاقي الواحد دايخ على عروسة ومجال التدوين ماليان وتلاقي الأخت من دول بتقول عايزة عريس صراحة أو تلمح وتلاقي واحد عمال يقول بادور ومش لاقي نفسي في فكرة توفيقية تستفيد من التدوين لتسهيل هذه المهمة بدون مخالفات شرعية
طبعا هذا الكلام لا ينطبق علي عشان أنا متزوج ومش ناوي أعدد والتدوينة القادمة لي يوم الإثنين القادم عن تعدد الزوجات
لكن فعلا شكرا لك إنك أتحت لي الفرصة أقول الكلمتين دول كنت محرج أقولهم وياريت أي حد يقرا تعليقي يقترح فكرة معينة
فيه عندي عريس ممتاز جدا 24 سنة مدون يطلب أخت واقترحت عليه الفكرة فرحب بس رجع قالي اقترح بعدين أنا احتست مش عرفت أقترح
السلام عليكم
انا قلت بس اجي اسلم واشكرك على زيارتك الجميلة لمدونتي المتواضعة وعلى كلامك في حقها
ربنا يكرمك
:)
ليا عودة ان شاء الله قريب اوي واقرى الموضوع بتمعن نظرا بس لأني خارج دلوقت
وبتمنالك من كل قلبي مستتقبل تدويني حافل ورائع ان شاء الله وده متوقع جداااا لأن واضح ان حضرتك عندك روح جميلة ودمك خفيف
فكرتينا بواحدة كانت عزيزة اوي على قلوبنا كلنا
ربنا يبارك فيكي ويحقق لك كل آمالك
:)
عملت بالوصية وركبت اول ميكروباص بس اتأخرت علشان المطبات وهباب البرك اللى مالى الشوارع والواد التباع اتخانق مع ال الركاب وكان عاوز ياخد نص جنية زيادة
المهم وصلت
وجيت اهنى وابارك على اول تدوينة دا انتى عاملة شغل فى المدونة مش عندى وبتقولى لسه طازة انا لا بحسد ولا يأر لسمح الله
بس انا شايف انك هتأكلى الجو قريب وتكونى مميزة
بارك الله فيك
والله انتى دمك زى العسل
ومعلى العرسان هما اللى عندهم عمى يا قمرنا
اختك جاه لك فى الطريق ولا تزعلى
اصلى برضه لسه بقشر بصل
رفقة عمر
بجد بجد انا فرحانه جدا جدا جدا باول تعليق
وده هكتبه فى ذاكرتى
وياريت تبقى بينا رفقه عمر
اما حكايه العريس دى
خلاص انا شيلتها من انفخى خالص مالص
يعنى مبفكرش فيها من اصله
ومضى قطار العمر
شكرا جدا على الزياره الكريمه
لمدونتى المتواضعه
خبيب
انت فعلا خبيب ولا حبيب وبتتكلم انجليزى
على العموم
الفين خمسمائه وسبعه وعشرين اهلا وسهلا وكمان مرحب
انا ممنونه قوى لكلامك الطيب على شخصى المتواضع
واستنانى وجهز الشاى علشان انا جايه مدونتك حالا
عصفور المدينة
الاستاذ الكبير قوى عصفور المدينه
قبل ما اعمل مدونه وادخل العالم ده قريت مدونات كتير
وكانت مدونتك احدهم
اما بالنسبه لكلامك
فانا معك فى فكره الزواج هذه
اما انا شخصيا
فالفكره اتاخرت جدا
وانا راضيه بنصيبى كده
ومستمتعه بحياتى
واشكرك جدا على زيارتك الكريمه
وان كنت قد دخلت المدونه وانا مش موجوده
مقدمناش لاحاجه صاقعه
ولا حتى سحلب
شكرا استاذنا على الزياره
آلام وآمال
تنزل وتيجى بالف مليون سلامه
وانا مستنيه تقراء التدوينه
لانها مجرد تعارف بشخصى الضعيف
ويمكن يجى سؤال عنى فى الامتحانات
فى ماده التاريخ
اين تسكن فرنسا ؟
تاريخ ميلاد فرنسا ؟
اعمال فرنسا الحربيه ؟
وكده يعنى
ارحب جدا و2 جدا و50 جدا بزيارتك لمدونتى
الطائر الحزين
نص جنيه ليه قطع رقابته ولد طماع
هو مش عارف انت جاى عند مين ؟
هات لى الرقم القومى بتاعه وانا افرجك عليه فى وكاله الطاقه الذريه ومحكمه العدل الدوليه
واخلى التباع بتاع المقطوره الدوليه جورج بوش يوديه جوانتنامو
ولا اقولك
عفا الله عما سلف
وسلامى لام الاولاد
راجيه عفو الله
وخليها تزورنى
أهلا أهلا فرنسا هانم
نورتي عالم التدوين يافندم
وسعيدة جدا
اني عرفت مدونتك..واسلوبك الى زي العسل
تحياااتي
Desert cat
لا ياختى
انتى لسه صغيره
هاتى البصل انا اقشره ليكى
وانتى شوفى حياتك
اعملى سحلب مكسرات كتير وسكر قليل
واستنينى على باب المدونه بتاعتك
وايام كامنج
قصدى
انا جايه
dr.Roufy
ياسلام يا دكتوره
انا سعيده فرى نايص بوجودك ولو كنت اعرف انك جايه
كنت دبحت فرخه من عشه الجيران
بالحبل والسناره
وفرشت الارض ورد من جيبى الخاص
مانتى عارفه
جيب السبعه ميخلاشى
لكن انا هاروح عندك وارزل واقعد للعشى
انا بحب السمك
السلام عليكم
اهلا بيكي في عالم التدوين
ويارب تكوني مش من مشجعي النادي المصري
mohand
فيرى اهلا وسهلا بيك انت فى عالم فرنسا
لدينا
شاى وقهوه وكاكولا وسحلب وعناب
الدفع مقدما
على فكره
النادى المصرى فى بورسعيد
اما فى السويس
نادى بتروجيت ونادى اسمنت السويس
وانا اهلاويه
وزعلانه من النجم الساحلى جدا
مدونة طيبة ربنا يوفق حضرتك وطبعا التدوين ليس قضفضة فقط بل مع الوقت ستتمايز الأفكار وتتضح السبيل وهنالك تتحدد الإتجاهات
أصبحت المدونات على حداثة عهدى بها سلوتى ومكانا للتعرف بعقول وأفكار
ومن المشجع أن أجد عند حضرتك تعليقات لأكابر ومحترمين من أفاضل اهل التدوين فى رأيى الشخصى من وزن أستاذى العصفور والطائر الحزين والام وآمال و رفقة عمر
اوعى تقولى مضى قطار العمر
هناك من يبحث عنك ولكنه فى الوقت المناسب ليكى وله سوف يظهر ان شاء الله
وتلتقوا كما التقى سيدنا ادم بامنا حوا
بس ابقى اعزمينى اوعى بقى تكونى من الناس اللى ما تلاقى احبابها بتنسى اصحابها
السلام عليكم
يا أهلا يا أهلا يا فرنسا هانم
نورتى التدوين يا جميله
وحبيت فيكى دمك خفيف وصريحه وانا احب الصراحه
وان شاء الله تنورى عالم التدوين ببوستات جميله زيك
وخلى بالك يا ساتر استر من دخول الحاره دى حاره وحشه والستات قراره ههههه
انا بحب عبله كامل برضه
ربنا معاكى يارب فى عالم التدوين
وموضوع الجواز ده حاجه عند ربنا واللى مكتوب لكل واحد هيشوفه هى بطيخه
وكمان يعنى اللى اتجوزوا عملوا ايه
انا كل صحابى اللى اتجوزوا عاملين يقولوا شاطره اوعى تتجوزى دالوقتى
عادى يعنى كلنا بنقشر بصل المشكله بقى فى ريحه البصل بعد كده :d
نورتى يا قمر وانا ما جتش فاضيه وجبت لب وترمس وسودانى علشان نسلى بعضنا
يارب نشوف بوستات اجمل واجمل
تحياتى
اولا بموووووووت انا فعبله كامل
ثانيا بكل صدق مشاعرك عاليه جداااا
ثالثا بلاش نضخم الموضوع كل الحكاية ان ربنا عادل جدااااااا .. مفيش حاجه اسمها عنوسه .. اكيد ربنا رزقك بحاجات مش عند كتير متجوزين
رابعا انتى مش كبيره يا فرنسا عشان تقولى عنستى .. اعرف بنوته معدية الخمسين سياتك ومتجوزتش وسعيده فحياتها جدااا
انتى منوره عالم التدوين واقبلينى ضيف على مدونتك اللى بتوقعلها بجد نجاح رهيب .. وكمان بحب اهل السويس انا
منوره :)
خالص مودتى
طال الليل
اشكرك جدا على النصيحه الغاليه
وان كنت قد حددت مسارى قبل الدخول فى هذا العالم
فانا مسارى بسيط جدا
النقد الساخر البسيط للسلبيات بانواعها
رفقة عمر
صاحبه السبق
اسمحيلى ان اكتب كلمه صاحبه السبق بعد اسمك لانكى اول تعليق عندى واصبح لكى معزه خاصه عندى
اما عن موضوع الجواز
صدقينى
انا قربت انسى مجرد التفكير فيه
ولو حصل
هاعزمك اول واحده
وهفرق لكل 3 معازيم ازازه كازوزه
اما انتى
هديلك ازازه بحالها
ويلا
انشاله ما حد حوش
تعبتى نفسك وكلفتى نفسك
وجيتى المشوار ده كله للسويس
ومحمله بالهدايا كمان
انا مش عارفه اشكرك ازاى
اوعى تكونى مشيتى من غير ما تشربى حاجه
انا عامله حفله الافتتاح ومكلفانى اكتر من سبعه جنيه وتسعه وتسعين قرش
مشروبات واكل وسيكورتى
بجد
نورتينى جدا
واوعى تصدقى كلام زميلاتك
الجواز نعمه من الله
حياة الأحلام
اسفه يا حبيبتى الكلام اللى فوق ده على طول ليكى انتى
وانا نسيت اكتب اسمك
ومن حظى انى اكلمك مرتين
لكن هابعت لك فاتوره الغاز تدفعيها
اصل الكمبيوتر عندى 5 شعله وفرن
FrEe.PhArAoH
واهل السويس كلهم بيحبوك
اصل احنا بنحب اللى بيحبنا
اما عن العنوسه
فى حاجه اسمها عنوسه
وانا لا سمح الله لا اعترض
ولكنى سعيده جدا بحالى ومتأقلمه جدا مع حياتى
وباقى عشر سنين وابقى زى الكتكوته بتاعه الخمسين
تشريفك مدونتى شرف كبير جدا جدا
ياستي نورتيني وكترتينا ونورتي عالمنا ويارب تكوني صديقة دايما ليا ياجميلة وكويس ادي تاني واحدة سويسة نعرفها علشان نبقى نيجي نصيف عندكم ولا انتوا مش عندكم مصيف
وفقك الله في التدوين
ورزقك بعريس :)
السلام عليكم ورحمة الله وبركاته
انا سعدت جدا بدعوتك لى بالزيارة
فعلا دمك زى السكر مالكيش حل زى العسل انا معلوماتى عن السوايسة انهم دمهم خفبف وزى السكر
بس انت سكرك زايد كثير
اولا مدونه رائعة ومبشرة بكل خير زى ما قالك طائرى الحبيب
وثانيا بالنسبة لموضوع العريس اعرف ناس كثير اتاخرو فى سن الزواج
وبايمانهم بالله وفضل منه ونعمة
رزقهم بازواج صالحين
وان شاء الله جزاء صبرك وايمانك بالله سيكون زوج صالح يعاملك بما يرضى الله ويرزقك الذريه الصالحة ان شاء الله
لانك بجد زى العسل
وان شاء الله ساداوم على زيارتك
ام الابناء
راجية عفو الله
قلوب حائرة
طبعا عندنا مصيف
ومصيف عسوله كمان
عندنا العين السخنه
بس لما تبقوا تيجوا ابقوا قولوا علشان نبردها شويه بلوحين ثلج
او نحط الكراسى فى التلاجه شويه علشان تعرفوا تقعدوا براحتكم
المهـ إلي الله ـاجر
جريت وراك علشان تشرب شاى ولا حاجه صاقعه
لقيتك راكب حصانك وشارخ
امت شربتها انا
سعدت جدا بحضورك لمدونتى المتواضعه
ام الابناء
راجيه عفو الله
يا ستمائه مرحب
نورتى وزدتى النور
مش عارفه اعمل ايه ولا ايه
ولاد اختى مبهدلين المدونه
ومكركبين الحاجه
انا سعيده جدا بوجودك يا قمر
وخلى بالك من الطائر الحزين
وربنا يكرمكم
اما الزواج
موضوع ليس له محل من الاعراب
انا مبسوطه كده
وفعلا مرتاحه
ووجدت فى التدوين عالم كنت اتمناه
الظاهر انى جيت متاخر بس على العموم يعنى البديات اذا كانت تبشر بالنهايات فنحن فى انتظار بلوج رائع ينبض بالكلمات ليرسم على وجهنا الكثير من البسمات
تحياتى
فرنسا هانم
يااهلا وسهلا ونورتي المدونات كلها :)
قلنا نهني ونبرك بوجودك في عالم التدوين ومدونة مبشرة بالخير بس تابعي انتي ولا يهمك:)
الف مبروك ع المدونة
وان شاء الله تكون مميزة
وواضح انها هتبقى كده
اسلوبك زى العسل ودمك خفيف اوى
وربنا يتوب عليكى من تقشير البصل
علىى فكرة انا بدات اقشر انا كمان
لو عندك كمية كبيرة
ابقى ابعتيهالى
سلاااااااااااااااااااااااااااااااااااااااااام
احنا نهنى أنفسنا اولا بانضمام مدونة
زى العسل ودمها خفيف زى سعادتك لعالم المدونات
واهم حاجة ان مزاجك يبقى تمام التمام سواء مع عريس او لا
والاهم انك تفضلى محافظة على روحك الخفيفة دى دائما
وزى ما قال عمى الكبير مصطفى كامل
لايأس مع الحياة ولا حياة مع اليأس
ههههههههههههه
حقيقة انا سعيد جدا انى علقت عندك
ومنتظ تدويناتك القادمة بفارغ الصبر
تحياتى
والسلام
رئيس جمهوريه نفسى
تحيا جمهوريه نفسى العربيه
انت مش جيت متأخر ابدا
انت جيت فى وقتك
ولو اعرف انى سياده الرئيس مشرفنى
كنت فرشت السجاده الحمرا من المطار لغايه باب المدونه
بس على فكره
المنحه يا ريس ؟
همسة قلم
اهلا بيكى انتى يا قمر
نورتى بيتك ومترحك
ولو مشالتكيش ارض المدونه نشيلك على راسنا
انا سعيده جدا بزيارتك
وان شاء الله متقطعهاش
واستنينى بقى بصنيه جاتوه
عبقال ما جى عندك
دكتور كسلان
لا يا خويا انا بشترى البصل بالطلب
مانت عارف البصل غالى
وبعدين انت راجل
يعنى تقدر فى اى وقت ترمى البصل والسكينه فى اقرب ترعه
وتخطب ست الستات احلى البنات
ربنا يرزقك بيها ان شاء الله
وبعدين يا د / كسلان
انظر حولك
تلاقى بنات قمرات زى الشربات حلوين مش عارفه ليه قولوا هييه
أبو سويلم
تسلم انت وعمك الكبير مصطفى باشا كامل
وبعدين انا روحى الحمد لله حلوه
ومن غير عريس
لان الموضوع ده خلاص اتنسى
انا سعيده جدا جدا بزيارتك
خالتى فرنسا مبروك المدونة
وربنا يجعلها وش السعد عليكى يارب
دمك زى العسل
بجد
ضحكتينى جدا جدا
فعلا شكلها هتبقى مدونة جامدة جدا
على راى المثل
الكتكوت الفصيح من البيضة بيصيح
بس انتى مش الوحيدة اللى بتحب عبلة كامل
اعتقد مصر كلها بتحبها
بجد اعتقد
انها هتبقى من اقوى المدونات الموجودة فى الساحة
وربنا يوفقك ياخالتو
مممممممم
طبعا واضح ان حضرتك شخصية جميلة بجد من غير كجاملة واحلى حاجة هي التقائية والروح العالية اوي اللي باينة من كلماتك اللي على اد ما هي قليلة بس معبرة جداا عنك
بالنسبة لموضوع الجواز ده انا مش هعرف اقول فيه حاجة بصراحة يمكن صحابي قبلي قالو كل حاجة
وبعدين والله لا المتجوز مستريح ولا اللي مش متجوز مستريح
انا ليا اخين متجوزين الاتنين والله بيقولو بلسانهم لو الزمن يرجع بيهم مكانوش فكرو ف الجواز خااااالص
طبعا ده غلط انا عارف واكيد في مشكلة عندهم وحاجة مش مظبوطة
بس اصدي اقولك ان محدش عاجبه حاله
اييييييييه يالا المهم بقى
انا بصراحة بحب اوي المواضيع القصيرة والمعبرة في نفس الوقت ومبحبش الناس اللي بترغي كتير وعشان كده ان شاء الله هتابعك باستمرار
حضرتك بقى طلبتي مني اجيبلك هدية وانا جاي وانا جبت لك التاج اللي عندي اعتبريه بتاعك يعني لو ميدايقكيش واهو بالمرة هنتعرف اكتر على شخصية حضرتك الجميلة دي
ومعلش بقى طولت عليكي
:D
معلش نسيت اسأل هو حضرتك مواليد 2 نوفمبر ولا 11 فبراير
لو 2 نوفمبر تبقي دفعتي
:D:D:D
doha
والله اول مره اسمع المثل ده
اختك فرنسا عايشه السنين دى كلها ومحدش يقولى على المثل
انا فى غايه السعاده لزيارتك الكريمه لمدونتى المتواضعه
اما عن عبله كامل
انا وكل الناس فعلا بنحبها
لانها قمرايه
آلام وآمال
هو فعلا محدش راضى بحاله
لكن فرنسا راضيه بحالها قوى والحمد لله
اما المشكلات اللى بتحصل بين الازواج
فحلها اما من عند الله
واما من عند البشر بصوره سكاكين واكياس بلاستيك والذى منه
على فكره لما تتجوز
اوعى تجيب غير سكينه واحده
انا يشرفنى جدا انى اكون صاحبه مدونه تتشرف باسمك بين المعلقين فيها
والمتابعين لها
اما بالنسبه للتاج
انا متشكره جدا عليه
لكن مش معقوله ابداء بالتاجات
انا قبلت الهديه
وسارد على التاج قريبا
وفى كل دور العرض
آلام وآمال
اهه
انا نسيت اقولك
انامواليد 11 فبراير
فرنسا هانم اتى دمك شربات وزى العسل
وعايزه اقولك على حاجه عالما لتدوين ده رائع بجد
وهتلاقى نفسك هنا
وهيكون ليكى اصحاب كتير
ودنيا تانيه خالص غير العالم اللى بره
احنا هنا كل واحد على راحته خالص
وبنحب بعض من غير مايكون فى مصالح
انها فقط مجرد مشاعر جميله جدا
خالص تحياتى لكى
السلام عليكم ورحمة الله وبركاته
يا مرحبا يا مرحبا نورم غطا علي الكهربا
الف مبروك علي المدونه الجديده ، ومعلش بقي متاخره عرفت اللينك بالصدفه من عند سها ( شئ منت )
ان شاء الله يبقي ليك شان كبير في عالم التدوين
وهانستني تدويناتك الجميله ونتابع معاكي باستمرار
تحياتي
يا خالتو
ازيك يا جميل
مبروك عليكي المدونة ويارب يكون وشها حلو عليكي
انا دخلت مدونتك صدفة لان الصورة والاسم شدوني جدا بس بجد حبيتك اوي
حسيت ان روحك خفيفة وقريبة اوي ليا
هيكون لي زيارات مستمرة لمدونتك وكويس اني لحقت الطريق من اوله
تحياتي لك
ايه ده ؟؟انا جاية متأخر اوى كدة
معلش بقي ههنيكي بالمدونة وخلاص
بجد انا بتفق مع اللى قال ان الموهوب بيبان من اولها
اسلوبك سكر يابنتى ماشاء الله ... وحاسة انك فعلا زى عبلة كامل
وبعدين ولا يهمك البصل هيكفينا كلنا متقلقيش :D
كلنا بنقشر :D
مدونتك جميلة اوى :)
ra7eel
انا متشكره على الكلام الجميل ده
وان شاء الله تكون بدايه خير
وهستناك دوما
خمسة فضفضة
عسووووووووووله والله
انى حبيت كلامك قوى
وانتى زى خالتك فرنسا بتحبى الهزار
يعنى هناكل مع بعض
اتمنى انى اشوفك دايما
خالتك فرنسا
The Queen
جلاله الملكه
اهلا يا حبيبتى
ويمكن انتى لحقتى المدونه من الاول لان لى نصيب اتعرف على شخصيه ملوكى
تحياتى لجلالتك
كفايـة طيبـة
ليه العسول اللى فى الصوره ده بيعيط
محدش يدخل عند خالتو فرنسا ويعيط
لكن
برضه منورنى
ومشرفنى
ورافع راس خالتو للدور الواحد وخمسين
منورانى بجد يا حبيبه فرنسا
وكده البنات بيزيدوا
الله اكبر
خمسه وخميسه
ازيك يافرنسا
أحلى قرار اللى انتى خدتيه ده
ياشيخه بلا جواز بلاهم
بينى وبينك ياريتنى كنت لقيت بصل اقشره ولاكانش حصل اللى حصل
نورتي المدونات
ومتزعليش هو البصل وحش يعني
ده مفيد جدا
وبعدين يا ستي يا مرحب بالسويس وناسها
احلى حاجه في التدوين اننا نتقابل مع ناس البعد بينا جغرافيا كان هيخلي معرفتهم مستحيله
وبكره يااستاذه تبقي نار على علم ونبقى نيجي نتمحك فيكي علشان الناس تشوف اسامينا عندك
انا بسجل طلب صداقه من بدري اهو علشان الحق قبل الإقبال الجماهيري
تحياتي وربنا يوفقك
سلاااااااااااااااااااام
بجد اسلوبك حلو قوى
وربنا ان شاء الله هيكرمك باللى تمنيه ولو مكنش فى الدنيا يبقى فى الاخرة بس قولى يا رب
كمال سلطان
دا خالتك فرنسا عندها مخزن بصل
دنا قشرت بصل سوق الاحد عندنا فى السويس
وسوق العبور فى القاهره
لكن على رايك
بلا جواز بلا ازاز
الشنكوتي الكبير
يا معلم يا كبير قوى
دى الغلبانه فرنسا قبل ما تبداء التدوين كانت عارفه مدونتك الجميله
على فكره
انا قبل ما ابدء اى حاجه
كنت بازور مدونات كتير
mohamed
انا متشكره جدا يا محمد وربنا يكرمن ويكرمك ويكرم السامعين يا رب
هو انتى بتحبى البصل اوىىىىىىىى كدة
دا إنتي دمك زي العسل
أه والله
من رغم ألمك وكسورك
بس إنتي برضه هزارك حلو
يلا
أنا قرأت الموضوع دا من زمان بس أنا معرفتش أعلق سا عتها
وعلى فكرة
أفراد عائلتي كلهم باقوا بيتابعوا مدونتك أكتر ما بيتابعوني
ماشي
ربنا يسامحك
تاخدي مني المعجبين
ماشي
أنا بقى جاي أتشاكل معاك
يلا سلام
تحياتي لك
من قبل ما الانسان يتولد وهوة مكتوب علية قدرة وهوة مالهوش دخل فية ودة قدرك وقدرنا كلنا لازم نشوفة واحييك علي جراتك وخفة دمك ويارب تدخلي الجنة
love
هو اللى بيقشر البصل لازم يحبه
عبدالرحمن ياسين
بجد وحشتنى
مشمش
انا وانت امين يا رب
إرسال تعليق