تاج الجزيره

ضحك على الدكتور محمد
وبعتلى تاج
وانا بخاف من التاجات
ولكن
مقدرشى ازعل الدكتور حر
علشان انا بخاف من الحقن
وبرضه هو صديق عزيز جدا
يبقى
تعملى ايه يا فرنسا ؟
توكلنا على الله
اركن العجله الاول واقفلها كويس علشان المافيا الايطاليه بتدور عليها
وحركه تموين كده من فرنسا
هاكتب على العجله
دى عربيه مرسيدس

نبداء التاج
لو مكنتيش مصريه بس عربيه كانت هتبقى إيه نظرتك للمصريين واللي بيحصل في مصر دلوقتي؟
لا تعايرنى ولا اعايرك الهم طايلنى وطاليك
ده بالنسبه للسياسه
اما الابيج ( الفلوس ) ربنا يجعل كلامنا خفيف عليها
لو كنت من دوله غنيه
كان هيصعب على الناس اللى بتيجى من مصر تتمرمط وتتبهدل عندنا
وحتى سفارتهم سيقه الهبل على الشيطنه وضرباها احلى طناش بالمكسرات
اما لو كنت من بلد فقيره
كنت هاحسد مصر واقول الناس دول مش حمدين ربنا ليه
عندهم اثار بالهبل
وعندهم قنال بيعدى سفن حربيه بالشىء الفلانى
وعندهم شواطىء بالكوم
وشعبله اللى بطل سجاير وبيكره اسرئيل
عايزين ايه تانى ؟


لو
كنت أوروبيه أو غير مسلمه بردو إيه نظرتك للعرب والمسلمين؟

كنت هاقول فى نفسى الدين بتاع العالم دول دين لازم ادرسه لان فى ناس فيهم بتضحى بنفسها فى سبيل دينها وبيتجمعوا فى مكان واحد كل سنه بالملايين بملابس بسيطه فى خشوع
بس اللى هيحيرنى
ليه بيتجمعوا مع بعض ويرجعوا يقتلوا بعض ويشتموا بعض يلعنوا سلسفين بعض
اكيد دينهم حاجه ومخاخهم حاجه تانيه خالص


لوقالولك إنت بقيتى رئيسه جمهورية هتعملى إيه؟

واحد زى ابو سويلم علق عندى وقال على جثتى ان المرأه تبقى رئيسه جمهوريه
اول واحد هتخلص منه
راح فى شربه ميه الجدع
جات من عند ربنا
لكن
هتخلص من سيطره الحربايه المتسلطه امريكا
وبنتها المتشرده اسرائيل
واخلى اللى يعدى القناه
يدفع بعمله البلد الجنيه المصرى
واطهر ميه الشرب
واشترى صفقه نظارات طبيه لشباب السويس بالاجبارى علشان محدش خد باله من فرنسا وسابوها تعنس


لوكان ينفع ترجعى طفله تاني وتخليكى طفله علطول هترجعى؟ وليه؟

لا طبعا مش هوافق
علشان كنت هفضل طول عمرى اتمنى اكبر ومش هيحصل


لوإنتى طبيبه وعندك مريض ميؤوس من حالته أيهما تفضلى إنك تصارحيه بالوضع وتقوليله كل شيء بأمر الله في الاخر ولا تغرس فيه الامل لغاية لما يموت؟

اصعب حاجه فى الدنيا لما الانسان يعرف انه هيموت
لازم الامل
لان المريض بيموت فى اللحظه اللى بيعرف فيها نهايته
وكنت قريت رد لصديق قال
اقوله علشان يحسن نهايته مع ربنا
لكن
المريض او اى واحد بيحسن لربنا كده كده لما يتزنق
وده طبيعى فى الانسان



لوسمح لكى برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟

كنت هاقول لسيدنا النبى
ادعو لنا بالنصر
فانت مجاب الدعوه


لو
خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخر غير قادر على الإنجاب هيكون تصرفك إيه؟


لو انا بحب الشخص ده خلاص ارضى بنصيبى
زى مانا راضيه دلوقتى

ولو جواز تقليدى
لا
كل واحد يروح لحاله
لان الزواج اصلا للحفاظ على النوع
وبعدين
بعد الانسان لما يكبر هيحس فعلا باحتياجه للابناء


لوطلعت القمر هتكتبى إيه عليه؟

لا اله الا الله سيدنا محمد رسول الله

وتحت هاكتب

بحبببببببببببببببببك
موووووووووووت
يا مصر


لوكنا في عصر ازدهار الأندلس كنت تتخيلى نفسك إزاي؟

فرنسا هانم برضه
انا عجبانى تركيبتى قوى
وعجبانى طريقتى
ولسانى اللى عايز قطعه
وحبى للناس وحب الناس لى



لوأن مررتى التاج ده لحد وما جاوبش عليه أعمل فيه إيه؟

ده اول تاج لى ومجربتش الحكايه دى


لو أحب أمرره أمرره لمين ؟

لكل واحد يدخل عندى ويحب يجاوبه


على فكره
انا طبعا احب كونى مصريه ولا احب ان اكون غير مصريه ولا غير مسلمه ولكن احببت ان اكون واقعيه

بص شوف منتاجتنا الوطنيه بتعمل ايه

الصين وما ادراك ما الصين
نزلت يا جدعان على منتاجتنا فى كل شبر من ارض المحروسه جابت المنتاجات دى على الارض
بلمس الاكتاف والارجل والارداف والضهر كمان
مخليتهاش تنفع تانى
لا انعاش نافع
ولا عنايه مركزه هتفيد
السر الالهى طلع واللى كان كان
الجماعه احبابنا بتوع الصناعه بيقولوا
شجعوا منتاجات مصر
فرنسا هانم بتحب مصر مووووووووووت
ونفسى اعمل اى حاجه فى سبيل الغلبانه المسكينه مصر
قلت اشجع منتجات مصر وبلاها النادى الاهلى اللى انا بشجعه من زمان
طيب منتجات مصر بتلعب فى انه درجه
دورت ملقتهاش فى الممتاز ولا فى دورى الدرجه الاولى ولا حتى السبعين
طيب هشجعها ازاى ؟
قعدت مهمومه وحزينه وحاطه طاجن ستى على راسى
ومش عارفه اعمل ايه
هجرت الاكل والشرب والفسح وقعدت افكر اشجع المنتاجات دى ازاى
بصراحه ملقتش حل
لغايه لما ربنا هدانى وفكرت كويس ولقيت ان الايه مقلوبه
وده رأى فرنسا هانم وانتوا قولولى رأى حضراتكم
مفروض ان المنتجات المصريه هى اللى تشجعنا
ازاى ؟
اقولكم
لو الساده اصحاب المصانع والمسئولين عن الصناعه فى المحروسه اهتموا بالمنتج كويس من حيث الدقه فى التصنيع ومن حيث جوده الخامات ومن حيث( الفنش )السليم لاستطاع المنتج المنافسه فى جميع الاسواق العالميه مش بس هنا فى مصر
وكده المنتج هيشجعنا ان احنا نشتريه
لو انا او انت او انتى او اى مصرى راح محل وعنده منتجين الاول مصرى والتانى اى مله والاتنين بنفس الجوده اكيد المنتج المصرى هيكسب وهنشتريه على طول
وكده المنتج شجعنا ان احنا نشتريه
يبقى هما عكسوا الايه ولا لاء
وبعدين مش الصين بس هى اللى ضربانا فى السوق
ده دول كتير يا باشا دخلت فى اللعبه
واحنا قاعدين تحت العارضه بنمص قصب
ضاربنها طناش
واللى يعلا يعلا
لغايه ما غرقوا البلد
من فوانيس رمضان اللى متميزه مصر بيها للكبريت لجميع انواع العدد للعربيات للموتوسيكلات لحبال الغسيل للثوم ابو كياس للملابس للمشاط والفلايات
بس عندى رجاء اخير
اعلان الى المسئولين عن الصناعه المصريه
تعلن فرنسا هانم عن جائزه كبرى لاى مسئول عى الصناعه يتضح ان جميع محتويات منزله او مكتبه
صنع فى مصر

الجنس الثالث

زمان وفى السبعينات وانا لسه فى الابتدائى
كان عندنا مدرسين عباقره
هو للامانه مش كلهم ولكن البعض العبقرى
كانوا بيقولولنا ان الكائنات تنقسم الى قسمين كائنات حيه
وهى تتغذى وتتنفس وتنمو وتحس وتتكاثر وتخرج وتتحرك
وكائنات غير حيه
وهى اللى مريحه نافوخها من كل ده وبنسميها جماد
بعد سنين طويله وانا على عمايا جيت اذاكر لابن اختى فى كتاب الانشطه من سنتين
لقيتهم كاتبين
فى كائنات حيه
واشياء غير حيه
وده منطقى لان دى اشياء مش كائنات
افتكرت زمان
لما كانوا بيقولولنا ان الجنين فى بطن امه بيتغذى بالحبل السرى- بكسر السين - وانا كنت بافكر ليه سرى يمكن علشان محدش بيشوف الجنين وهو بياكل او انه بيتغذى بالاكل اللى بتاكله مامته وهى بتطبخ فى المطبخ مع نفسها
لكن بعد ما كبرت وفهمت
عرفت انه سرى والاسم جاى من اتصاله بسره الجنين
لكن فرنسا هانم انهارده مش عايزه تتكلم عن مساوىء التعليم اللى اكيد بعضنا اتعرض ليها
انا عايزه اكلمكم عن جنس تالت ظهر فى الافق
جنس ليس من الكائنات الحيه لانه لاينمو
ولا حتى من الاشياء غير الحيه لانه غيرثابت
جنس تالت
بيكش او بيصغر
العيش الفينو
كانو زمان بيقولوا
حمرا ومجنونه يا طماطم
دلوقتى الجنان واللوسه حصلوا العيش الفينو وساحت صواميل نافوخه
من سنتين
عملوا العيش المدعم
وطبعا اصحابنا الحلوين متعودين يعملوا الحاجه ويلغوها
سابوا العيش الفينو على حل شعره
كان الكيس فيه عشره بجنيه
وفجاءه من شهرين بقوا ال سبعه بجنيه
وذادت اللوسه والمرض
وبقى السته
والخمسه بجنيه
البقر جاله الحمى القلاعيه
والطيور جاتلها انفلونزا الطيور
والعيش جاله الكشكشه
ومحدش عارف يعالجه وهيفضل يكش ويكش لغايه ما هنشتريه فى كبسولات من الاجزخانه
وزاره التموين باعت القضيه وكبرت دماغها وضربتها طناش
لا فى ملك يلم الوزراء ويقولهم دبرنى يا وزير يقوله التدبير لله يا ملك
نعمل ايه للغلبان الفينو قبل ما ينقرض
وينادى المنادى
على كل الحكماء ان اللى يعرف علاج للمسكين العيش الفينو الملك هيجوزه بنت عم على الخباز
واللى مش هيعرف مسرور جاهز هيقوله امشى من هنا الله يسامحك
الدوله عمت عنيها عن الدعم
خلاص الدعم بح
وبرضه الضرائب شغاله على ودنه
ومش بعيد
يركبوا لكل واحد عداد فى الجزمه يعد هو مشى قد ايه وياخدوا قرايه للعداد + مصريف النظافه ويحاسبونا عليها
لكن فرنسا مش هبله
وهامشى حافيه
وسلملى على الدمغه

هارون الرشيدى جاى يطلب ايدى

من حوالى سبع سنين كانت لسه خالتنا سنه 2000 جايه طازه بنار الفرن وكان ليها شنه ورنه

جات خالتى ام عربى عندنا البيت

وام عربى جاره لينا فى مساكن فيصل

جات وزى عادتها قعدت على الارض وهاتك يا شاى فى شاى فى قهوه فى شاى فى بلح فى عنب فى اى حاجه تتحط قدامها الفرامل عندها ضعيفه قوى وباين مفيش فرامل خالص

الصنيه دى تتحط والتانيه تتشال وهى فاتحه بقها على طول

المهم انها بصراحه كانت نفعانا والنافع ربنا

اى حاجه تايهه من السوق او شحه تلاقيها عند ام عربى وبالكوم كمان

ايام ازمه السكر من سنين

كانت ام عربى عندها شوالات

تقولشى مصنع

المهم

خالتى ام عربى خادتنى على جنب وقالتلى ليكى عندى عريس بس ايه لقطه

ولازم تحلي لى بقى

قلت لها بقك ايه يا ام عربى ؟ ده انتى فضيتى التلاجه

وبعدين عريس ايه ؟ انسى الموضوع ده

قالت لى انسى ازاى مش تسمعينى الاول

ده عريس سعودى يابنت

قلت لها سعودى ؟ وايه اللى رماه علينا ؟

قالت لى نصيبك وجالك يا فرنسا

طبعا انا للامانه ماكنتش قفلت دماغى من ناحيه الجواز زى دلوقتى انما الحكايه كلها معجبتنيش

وخلصنا الكلام

لفت الوليه الارشانه على اختى الكبيره وعلى اخويا وملت دماغهم بحكايه العريس المتحين

قعدوا اخواتى يلفوا على يمين وشمال

لغايه لما وافقت

وحددنا ميعاد للتعارف

جه الكابتن

ودخلت اسلم عليه واشوفه

لقيته راجل سنه معقول كان حوالى 40 او 42 سنه

وانا كنت 32 سنه

قعد عمنا ابو الكباتن عمده السعوديه يتكلم عن الفلوس

انا مش عايزكم تجيبوا قشايه انا هاخدها بشنطه هدومها والمهر اللى انتوا عايزينه انا موافق عليه

انا عندى ايش وايش وايش وايش

حسسنا ان احنا شحاتين

وانه جاى يدينا حسنه ويسدد ديونا المتلتله ويجيب لنا هدوم بدل الهلاهيل اللى عندنا وكان ناقص يجيب معاه لحمه علشان الحرمان اللى شافه فى عيونا

انا طبعا مسحوبه من لسانى

قلت له انا محاسبه فى شركه محترمه ومرتبى محترم وصعب انى استقيل من شغلى

انت ناوى تعيش فين ؟

قالى هعيش فى السعوديه طبعا والمرتب بتاعك ده انا مستعد اديلك شهريا خمس اضعافه

لغايه كده وانتهت المقابله ولسه الموضوع منتهاش

قعدت مع ام عربى وجبت قرارها وعرفت هى اتعرفت على السعودى ده ازاى

الحكايه ان ام عربى تعرف واحد بيشتغل فى السعوديه وده صاحبه وجه مصر علشان يتجوز مصريه وام عربى رشحتنى ليه وعرفت انه متجوز اتنين من السعوديه وانا كنت هتلت معاهم

تانى مقابله

جه صاحبنا ومعاه هدايا وطلب ميعاد لكتب الكتاب

سئلته

انت متجوز ؟

اتلجلج وبعدين قال الشرع مدينى حق اتجوز اربعه

قلت له لكن انت مجاوبتنيش

قالى متجوز اتنين وعندى اولاد منهم ولكن انا مقتدر وده شرع ربنا انا ليه اربعه وما ملكت يمينى

قعدت ادور على حته فى قفاه تنفع للضرب وبعدين سكت ولو اخواتى مش موجودين كنت رقعته حته علقه

زمان والله كنت بتعلم كاراتيه

يعنى ممكن كنت اعجنه واخلى وشه زى قفاه

وكل ده علشان كلمه ما ملكت يمينى

قلت له

ما ملكت يمينك ده كان زمان اول الاسلام وده علشان الجاريه اللى كانت بتخلف كانت بتبقى حره وابنها حر وده علشان محاربه العبوديه

انا شايفه ان الموضوع ينتهى على كده هارون الرشيدى مات من زمان ومتنساش تاخد هدياك معاك

خرج صاحبنا من الباب وهو بيلعن ام عربى واليوم اللى شاف فيه ام عربى

مش عارفه

الجماعه دول فاكرين انهم يشتروا الناس بفلوسهم ولا ايه ؟؟؟

البنت زى الولد ماهيش كماله عدد

الخاله فرنسا انهارده عايزه تفتح معاكم ملف اتقطع من الفتح وجلدته اتهرت من كتر ما عمالين يفتحوه
الا وهو حريه المرأه
اولا : انا مش عالمه فى كل المجالات وكمان مش متخصصه فى كل العلوم
ولكنى ذات راى فعلى الاخر ان يحترم رأيى

تانى حاجه
انا والله مش عضوه فى اى جمعيه من جمعيات المرأه

تالت حاجه
الكلام ده مش للبنات بس طبعا انا بنوته
لكن بنوته كبيره حبتين
وكلامى للشباب والبنات معا

كل واحد عماله يتكلم عن حريه المرأه وكله مش متفق مع كله
ولكن قدام شاشه التليفزيون كله مع المرأه وعلى صفحات الجرائد كله بيتكلم عسل
ولما يكون القعده فيها ست كله يتكلم عسل
وكل واحد مع نفسه يقول
نسوان ايه المهاريش دول اللى عايزين يتساوا معانا
القطه كلت عيالها يارجاله
الست تساوينى ؟ ليه ؟ فوضى ؟
الخاله فرنسا بتقول لهم
ايوه تساويك هى نفس وانت نفس هى خالقها ربنا وانت خالقك ربنا هى بتحس وانت بتحس هى بتتعب وانت بتتعب هى بتشيل الهم زيها زيك بالظبط
من حوالى 4 سنين اتجوز اخر اخواتى الرجاله عندى 3 اخوه
وانا كنت قاعده معاه فى شقه الاسره
وقبل الفرح بشهر بدأت اجتماعات القمه العالميه على مستوى الاسره والعيله كلها وكانت المفاوضات عسيره جدا والخناقات على ودنه
كل ده ليه ؟
اين تعيش فرنسا ؟
كله رافض ان فرنسا تعيش لوحدها
اقولهم يا جماعه انتوا عارفين انا بسبع رجاله واعيش مع القرود
كله رفض
وقرروا اقامه فرنسا الجبريه مع اخواتها التلاته الرجاله بالتناوب كل بيت شهر
طبعا فرنسا مش هبله وعارفه ان ده مستحيل يستمر
وافقت
ومضيت على محضر الجلسه
وانتهت المفاوضات واتجوز الولد
واستمرت فرنسا تبحر فى بيوت اخواتها
وانتوا عارفين ان لكل واحد حريه شخصيه فى بيته
فكان الموضوع مش مريحنى ولا مريحهم وخصوصا انى كنت عامله زى ايام الهجره بتاعه مدن القناه شايله خلاجاتى ومهجره هنا شويه وهنا شويه
وبعد سنه ونص او اكتر
طلبت عمل مؤتمر عالمى للاسره مره تانيه باشتراك اخواتى البنات عندى اختان
واسغرق المؤتمر خمس دقايق
وافق الجميع على اقامه فرنسا فى شقه الاسره على ان يزورها الاخوه الرجاله يوميا
عشت لوحدى
زيى زى اجدعها راجل
تتصوروا والله بتتعرض على مشاكل للاهل والجيران وبعون الله انا بحلها وكلمتى مسموعه
ونسوان العماره قبل ما يشتكوا لاخواتهم يشتكوا لفرنسا
يبقى ليه البنت مش زى الولد
ليه لما نتكلم عن حريه المرأه مانتكلمش بضمير صافى خالص لله
انا عارفه ان فى فرق جسمانى بين الراجل والست
وان الراجل اقوى واشجع من الست
لكن الاتنين ليهم نفس العقل
ونفس الروح
ونفس الذكاء
ونفس الايمان
ونفس الاحساس
يبقى من حقنا نقول البنت زى الولد

يا بيوت السويس يا بيوت مدنتى

زمان قوى وانا لسه ننوسه صغيره وبعد مارجعنا من الهجره سنه 1975 ايام ما كنت باكل المانجه واهطل على هدومى وانا ماشيه فى الشارع ولابسه شبشب والدتى كنت بسمع اغنيه
يا بيوت السويس يا بيوت مدنتى استشهد تحتك وتعيشى انتى
وكنت با حب الاغنيه دى فرى ماتش رغم انى ماكنتش عارفه معناها
لما كبرت واصبحت فتاه فهمت معنى الاغنيه وحبيتها اكتر واكتر وللصبح
لكن
وما ادراك ما لكن
بعد نهايه الحرب مع المشمشه المتوحشه اسرائيل
وبعد تطيب الخواطر بين البلدين
وقربنا من بعض احنا نديها الغاز بتاعنا وميه النيل
وهى بكل براءه ومحبه تدينا الاغذيه المسرطنه
الاغنيه بتاعه السويس
اتغنت بشكل تانى
يا بيوت السويس يا بيوت مدنتى اغرق تحتك فى الصرف الصحى ويعيش الحراميه
وهو ده اللى حصل ياساده يا كرام
عندنا محافظ اسمه جلجل
محمد سيف الدين جلال
جلجل يا ساده فكر هو والعباقره اللى حواليه فى قاعده عسليه على الكورنيش الجديد
وقالوا السويس بلد منتجه وغنيه فيها مصانع وايراد قناه وسواحل بالهبل
عايزين نعمل حاجه للبلد واهو ينوبنا من الطيب نصيب
فكر العباقره الناصحين قوى
وقالوا نرصف ونسفلت الشوارع بتاعه المحافظه
فرنسا وكل شعب السويس من عليه كفته لغايه مستر على بتاع الانجليزى فرحوا قوى بالخبر
وبدء تنفيذ الفكره
لكن
وما ادراك ما لكن
والعباقره بيسفلتوا الشوارع علو البلاعات العموميه بتاعه المجارى من 50 الى 80 سنتيمتر
وجابوا زلط وتراب من ابو بلاش
من جبل عتاقه الغلبان اللى نتفوا ريشه شويه شويه
وبعد كده سفلتوا
وياريتهم ما سفلتوا
الشوارع بنت الناس اللى فى الوش اهتموا بيها وباقى الشوارع الغلبانه مكسوره الجناح منتوفه الريش
كروتوها
يعنى عملوها اى كلام
والحساب مدفوع مقدما من جيب فرنسا وكل السوايسه وكل المصريين
المهم
لما العباقره علو البلاعات غرقت بيوت الاربعين
تتصوروا الناس فى القرن الواحد وعشرين وفى عصر لوسى وانوشكا وسكود وباتريوت والبلوتوث والرنات والعالم قريه صغيره بيحطوا طوب علشان يدخلو بيوتهم وعايشين سوا سوا مع احفاد عائلات الناموس والجراثيم والذباب المتوحش
وداعا للضمير
ومع السلامه يا صحه
وباى باى يا هندسه

حد يصدق فرنسا تدون ؟

السلام عليكم ورحمه الله وبركاته

اختكم // فرنسا

حبيت الاسم ده من حبى لعبله كامل

اقمت استلفته منها من غير ما تعرف

وهى كمان كانت مستلفاه من بلد اروبيه يعنى تبع طنطا

اختكم فرنسا نيو يعنى لسه جديده طازه فى موضوع التدوين ده

من مواليد السويس

لكن بعد كده انتقلت للعيش برضه فى السويس

عند الصابع الشمال للبحر الاحمر

تاريخ الميلاد // 11-2

وطبعا مش هاقول السنه لان ده سر ولا اقولكم 1969محدش واخد منها حاجه

عرفت التدوين عن طريق مدونه معروفه جدا زى النار على العلم

لكن اسمها راح من بالى

الظاهر مش معروفه ولا حاجه

حكايتى ببساطه

=======

لما كنت فى الثانويه العامه فى الثمانينات كتير من زميلاتى اتخطبوا وانا قاعده اقشر بصل

لما رحت الجامعه

وكانت فى القاهره كتير برضه من البنات اتخطبوا وانا برضه قاعده اقشر بصل

مانا فاضيه عماله اشترى واقشر

اتخرجت من الجامعه

ورجعت على السويس تانى بس مشهده يعنى بشهاده

وبعد سنتين اشتغلت

وكان سنى 25 سنه

قلت تمام هقابل مديرين ومهندسين وزاميلى المحاسبين وهانقى العريس اللى على مزاجى

فات شهر والتانى وسنه والسنه اللى وراها وانا برضه متمسكه بالبصل

وعماله اقشر

ثم اقشر

واقشر

محدش ورانى وشه قلت يمكن العرسان شحين من السوق

لقيت العرسان بالهبل كتار قوى لكن محدش عارف عنوان بيتنا

ركبت بدل الجرس جرسين على الباب والباب بتاع العماره

لكن العرسان

طاروا

بعد ما عديت ال35 سنه خلاص

بطلت استنى

واقلمت حياتى على العنوسه

اضحك واهزر ومحدش هياخد حاجه معاه

يبقى نعيش لنا يومين بالطول ولا بالعرض

نسيت فكره الزواج نهائيا

بل انى اغلقت موضوعها نهائيا

وتفرغت لتاديه فروض دينى وحياتى

واكتشفت موال المدونات وحكايه التدوين

ودخلت مدونات وقريتها

وزعلت جدا من اصحابها ليه محدش يقولى ؟

يسبونى كده من غير ما حد يقولى يا فرنسا فى حاجه اسمها تدوين اشغلى نفسك فيها

لكن معلش مردودلهم

انا بحب الهزاز والضحك جدا جدا

فارجوا الا يغضب من ضحكى احدا

والى اللقاء فى حلقه قادمه

قصدى سلام عليكم