اخر نظافه..... بهدلنا نظافه

اخوانى المدونين واخواتى المدونات
اعذرونى لعدم استطاعتى زياراتكم فى الوقت الحالى

ويسعدنى تلقى تدويناتكم الباسمه الضاحكه على اميلى

faransahanm@yahoo.com

وذلك لنشرها فى المدونه الضاحكه

فرنسا والرايق

يقال والعهده على الراوى

انه فى كوكب المشترى ومننذ حوالى ملايين الثوانى راى ملك دوله الحضاره والتقدم ان شعبه الغلبان بيتجراء وبيشترى لبان ...وكان الملك قلبه على شعبه انفطر وقلب شعبه عليه حجر ..فقرر الملك يعمل عمليه نظافه للشعب ..فاخد العجله بتاعه فرنسا هانم وفتح على الرابع وطلع لكوكب زحل وقعد مع نفسه يفكر ....تعمل ايه يا عبد الرحيم ؟؟؟ ...تعمل ايه يا عبد الرحيم ؟؟؟. .تعمل ايه يا عبد الرحيم ؟؟؟..
وفجاءه نطت فى ادمغه الملك فكره عبقريه ...النظافه من الايمان ..فعلا النظافه سر الحياه
قام الملك اخد العجله ورجع كوكب المشترى مره تانيه ..ورمى العجله قدام بيت فرنسا بعد ما بهدلها ووقع الجنزير ..اصله مبيعرفشى يسوق عجل
المهم
الملك عين رئيس مجلس وز وبط اسمه احمد اخر نظافه ...وقاله شوف بقى يا حماده ..الشعب بتاعى دلوقتى بقى معاه فلوس ..وانا خايف عليه لحسن الفلوس تجرى فى ايديه وتبوظه ..ممكن يروح الشعب يلعب فى السايبر جيمز ..ولا ممكن يشترى سجاير ..ولا ممكن يدخل السيما ..ولا ممكن يشرب مخدرات ويبوظ ..علشان كده انا عينتك تنظف الشعب
عمنا ابو حميد مكدبشى خبر
وفى كام سنه كان مخلى الشعب يلمع ..( والقطنه مبتكدبشى ) وبقى الشعب الملعون بعد ما كان بيدور على الترفيه ..بقى دلوقتى بيدور على رغيف العيش
وفى يوم من الايام
وعمنا اخر نظافه قاعد على البحر بيلعب رفه مع صحابه.....لقى علبه على شكل جعران بتعوم فى الميه ..شكل العلبه عجابته ..قام نادى على واحد من مجلس الوز والبط وقاله روح هاتلى الجعران ده
وفعلا عمنا العوام راح جاب الجعران
وفتح عمنا اخر نظافه الجعران ...وفجاءه طلع منه دخااااااااااااااااااااااااان كتييييييييييييييير وفى لحظه بقى الدخان مارد كبير وله عضلات ولا عضلات شتيفى جراف ..ومارتينا نافرتيلوفا...

.وضحك المارد وقال
هههههههههههههههههههههه
ههههههههههههههههههههه

شبيك لبيك عبدك وملك ايديك ..انا جيت احقق لك عشر امنيات

اخر نظافه :- امنيات مين يا ولد احنا ناقصين لعب عيال وحلق حوش ...اجرى يلا العب بعيد

المارد :- لا ارجوك لو محققتش ليك امنياتك هتحرق ارجوك يا عمى اطلب منى الله يباركلك ..خلى قلبك رحيم ..انت معندكشى عفاريت صغيره

اخر نظافه :- طيب مش اقدر اعرف انت تقدر تعمل ايه الاول ؟

المارد :- انا اقدر اجيبلك ثروه كبيره زى مانتا عاوز

اخر نظافه :- فلوس ؟؟؟؟؟؟؟؟...ههههههههههههههه........يا بنى الفلوس معانا بالعبيطه دا احنا من كترها بقينا نكره شكلها ..ده احنا بنمشى نتكعبل فيها فى كل حته...روح اجرى يا شاطر العب بعيد

المارد :- لا والنبى يا عم ..وحياه ابوك ...ورحمه الميتين لك ...والنبى علشان خاطرى

اخر نظافه :- طيب تقدر تعمل ايه تانى ؟؟؟؟؟

المارد :- انا ممكن اديلك العصايه السحريه تخليها فى ايدك الشعب يبقى تحت طوعك

اخر نظافه :-يا بنى انت عبيط ؟؟؟؟ كده كده الشعب تحت طوعى ...هو حد بيقدر يكح فى اليوم اكتر من 3 كحات
كحه الصبح وكحه العصر وكحه بالليل واللى يكح الرابعه لازم يجيب شهاده بالرقم القومى من مستشفى الصدر انه مريض والا هيروح النار
انت يا ولد يا مارد
انا بصراحه كده زهقت منك واصغر واحد من اعوانى برقبتك ويقدر يعكل اللى تعمله انت واكتر

المارد :- يعنى هتجيب قدره البشر لقدره الجن ؟؟؟؟

اخر نظافه :- يابنى هو احنا اصلا بشر عادى ...دا احنا اللى ضربنا الهواء فوتومين ..ولاعبنا الفيل جمباز ...وعملنا النار المتلجه

المارد :- طيب والنبى ابوس ايدك اطلب اى حاجه ..احنا برضه الجن لينا قيمتنا ولينا هيبتنا ..ويستحيل يقدر علينا البشر

اخر نظافه :- طيب انا عندى فكره ...شاور انت بايدك على اى واحد من الاعوان دول ..ونعمل بينك وبينه مسابقه ولو كسبت هاطلب منك العشر طلبات .ولو خسرت هاسيبك تولع

المارد :- ماشى انا هاختار اللى قاعد هناك لوحده ده

اخر نظافه :- ماشى ..وادى 10 جنيه ليك و 10 جنيه ليه ..كل واحد يا خد ال 10 ويروح يشترى لى سجاير ويجى
وقدامكم ساعتين من دلوقتى

ورجع المارد والمنافس له من البشر النظافى بعد ساعتين .....ولأن المارد وصل قبله بدقيقه اتقدم هو الاول

المارد :- اتفضل ادى كرتونه فيها عشرين قاروصه سجاير وكرتونه فيها عشرين قاروصه كبريت وادى ال 10 جنيه بتاعتك سليمه زى ماهى

اخر نظافه :- طيب عملت كده ازاى وجبت السجاير دى كلها ازاى ؟؟؟؟؟؟

المارد :- ههههههههههههههههههه
هههههههههههههههههه
ده شغلى انا بقى وسر المهنه ..يلا بقى نشوف صاحبك جايب ايه

اخر نظافه :- ايه يا حسان شكلك كده هتفضحنا مع العفاريت والجن ...جاى ايد وراء وايد قدام ولا حتى معاك علبه سجاير واحده

حسان :- بصراحه يا بيج بوص ..انا مجبتش معايا سجاير خالص وكمان العشره جنيه طارت منى

المارد :- هههههههههههههههههههههههه
هههههههههههههههههههههههه
مش قولت لك الانسان عمر ما يقدر على الجن ابدا

حسان :- ده لو كان من الناس العاديين لكن اعوان اخر نظافه ما يقدر عليهم الا الله ..احنا لا يهمنا مارد ولا حتى السبع موارد ..انا لسه مخلصتش كلامى ...اتفضل يا بيج بوص عقد شركه بينك وبين صاحب مصانع السجاير ذات نفسه ممضى ومختوم ومتسجل فى الشهر العقارى هو النص وانت النص ..وكله من العشره جنيه

قانون طارق بيه

اخوانى الاعزاء

اسمحوا لى ان اقوم بتنزيل هذه التدوينه بعد ان قمت بحفظها فور نزولها يوم السبت الماضى

وذلك بناء على طلب اخى العزيز ابو خالد

**********

ولما كانت الليله الثانيه ...قالت ام وحيد لزوجها فريد
بلغنى ايها الزوج العنيد صاحب الرأى السديد والعمر المديد
ان الوزير قحطان خرب وردستان وخلاها قاعده على الحيطان ...وفضل يقربع بانجو من النوع التعبان
لغايه لما الشعب نافوخه طق ...وهاج وماج وخرج من الشق ...وبقى يعرف يقول لأ

الملك فيحان :- انت ياض يا جلجل ...جلججججججججججججل ..يا جلجل

جلجل :- شبيك لبيك يا ابهه ...جلجل ملك ايديك ....مالك الناموس مقرصك ولا ايه ؟؟؟؟

الملك فيحان :- ناموس مين يلا ..عمك الملك فيحان يهمه الناموس ...انا طول عمرى قاضى عليه بالبخاخه كانى مانى الامريكانى ...انا اللى شاغل مخى ومطير النوم من عينى الشعب

جلجل :- والله يا ابهه انا كنت عايز اخبى عليك لكن طالما انت عرفت خلاص انا مش هاقدر اخبى تانى

الملك فيحان : تخبى ايه يا جلجل الشعب مات ؟؟؟

جلجل :- لا يا حلاوه الشعب لسه مامتشى .....لكن الشعب هايج

الملك فيحان :- الشعب ايه يا خويا ؟؟؟...هايج ؟؟؟؟...هههههههه ....بقى شعب وردستان هايج ؟؟؟ ...طيب وايه اللى مهيج الشعب امال ؟؟؟

جلجل :- الشعب مش عايزنا نمد قانون طارق بيه

الملك فيحان :- الشعب مش عايزنا نمد ايه ؟؟؟؟ ...بقى الشعب دلوقتى يعرف ايه اللى يتمد وايه اللى ميتمدش ...فين الوزير قحطان ؟؟؟؟

جلجل :- ولا يا طاطا ...انت ياض يا طاطا ....تعالى كلم المعلم فيحان

قحطان :- ماما زمانها جايه جايه بعد شويه جايبه لعب وحاجات ...جايبه معاها شنطه فيها عجله وبطه بتقول ماء ماء ماء

الملك فيحان :- ايه ياولد يا قحطان ...ماتفوق لى شويه وحياه ابوك

قحطان :- مين المعلم فيحوحتى ؟؟؟...ازيك يا معلمه ....ازيك يا جلجولتى ...انتوا واقفين فى الشارع ليه ماتطلعوا فوق ...برضه ميصحش تقفوا كده فى الشارع

الملك فيحان : شارع مين يا قحطان فوق واسمعنى كويس ..احنا هنا مش فى الشارع ..احنا فى القصر يا يلا ...فوق احسن لك

قحطان :- هو احنا فى القصر ...مين اللى شالنا وجابنا هنا ...طيب يلا نروح بقى

الملك فيحان : - اعمل حاجه يا جلجل حاول تفوقه

جلجل :- قحطوحتى ..انت ياض ...الشعب هايج ومكسر الدنيا على قانون طارق بيه ..والمعلم فيحان عايزك تتصرف

قحطان :- هههههههه ....شعب مين يابا ...وطارق مين ؟؟؟؟....انا مستنى الواد شيشه يجبلى البانجو بتاعى .انا مش لاعب معاكوا ...انتوا وحشين انتوا عايزين تخطفونى

الملك فيحان :- سيبك منه يا جلجل وقلى نعمل ايه ؟؟؟؟؟؟؟

جلجل :- هو حضرتك مش كنت بتقول ان الشعب مطير النوم من عينك يبقى اكيد فكرت فى حاجه ..قولى انت فكرت فى ايه ؟؟؟

الملك فيحان :- فكره مين يا عم هو انا كنت بفكر فى كده اصلا ...انا كنت بفكر كلمه الشعب بالانجليزى بتتكتب العين ازاى ؟؟؟

جلجل :- وبعدين يا هندسه ..هنعمل ايه يا معلم

الملك فيحان :- شوف يا جلجل ...مد الاتنين ...مد قانون طارق بيه ...ومد الشعب كمان

جلجل :- مش فاهم يا عسل قولى انا دماغى هنجت

الملك فيحان :- شوف يابنى تمد قانون طارق بيه براحتك سنه سنتين اربعه ..ولو الشعب اتكلم تمده على رجليه فى وسط الطابور

جلجل :- فى حاجه تانيه يا معلم

الملك فيحان :- ايه تانى يا جلجل عايز انام بقالى دراع ونص مانمتش

جلجل :- الشعب كله هايج على اخونا معز بتاع القصب وبيقولوا انه احتكر القصب لحسابه ومحدش عارف يوقف فى وشه والناس زعلانه

الملك فيحان : - لالالالالالالالالالالالالالالالالالالالالا
الا معز والا القصب
هو يابنى معز ده يملك حاجه مش كله من دقنه وافتله ويا بخت من نفع واستنفع

فرنسا فى العش ولا طارت ؟؟؟؟؟

اسفه جدا
********
لقد قمت بنشر تدوينه منذ ساعات
.
بعنوان قانون طارق بيه
.
ولكنى اكتشفت من خلال تعليقات اخى الكريم
.
ابو خالد
.
ان انسانه عزيزه عليه
.
من الطراز الاول تعانى من سكرات الموت

ولان التدوينه كانت ضاحكه ساخره
.
فقمت بحفظ التدوينه
.
وارجوا منكم جميعا
.
ان تتوجهوا الى الله وتدعوا لها
.
انا لا احسن الدعاء المحفوظ
.
ولكنى سادعى لها من قلبى
.
يارب ارحمها وخفف عنها الالام
.
واشفها يا رب العالمين
.
اخوانى الاعزاء
.
يجب ان نقف بجانب الاب والاخ
.
ابو خالد




تحديث
************
تم بحمد الله عمل المدونه الجديده

فرنسا والرايق

منتظره رأيكم فيها

ملحوظه مهمه
*********

لو اى مدون محب للكتابه الساخره والكوميديا بانوعها يحب يشارك معانا انا تحت امره بس ياريت اللى يبعت حاجه تكون جديده يعنى لم تنشر فى مدونته
*****************


اخوانى المدونين واخواتى المدونات
وحشتووووووووووووووووووووونى جدا جدا
انتوا عارفين الهبله العبيطه ام بدوى ؟؟؟؟
احب اعرفكم بنفسى ...الهبله العبيطه ام بدوى
الحكايه انى رجعت من المستشفى طازه بنار الفرن وايدى وعقلى ودماغى بياكلونى على الكمبيوتر ...اقول لنفسى اصبرى يابت يا فرنسا انتى لسه عامله العمليه اهدى فى نفسى ..وفعلا قدرت اتغلب على نفسى وقدرت اهزم نفسى بلمس الاكتاف واجبنى الارض ...وفضلت متغلبه على نفسى لمده ساعه وربع
لكن الظاهر ان الحكم مكانشى لسه ضرب الجرس والمباراه لسه مكانتشى خلصت ...راحت نفسى قايمه من تحتى وعملت معايا حركه من بتوع الواد بروسلى وراحت رميانى فى الهواء شاشى وانت متدراشى
اول ما اخواتى مشيوا لقيت نفسى بجرى على الكمبيوتر وافتحه وكتبت ليكم التدوينه اللى بعد خروجى من المستشفى ... ومأكتفيتشى بكده لأ قعدت متابعه معاكم كام يوم ....لغايه لما وقعت الفاس فى الراس ..وبقيت مش عارفه اتحرك ...كل مسكنات الصيدليه والصيدليه اللى جنبها والصيدليه اللى وراها وكل صيدليات السويس وقفوا يطلعوا لى لسانهم ويقولولى اشربى بقى يا فالحه
اقولهم انا عامله دايت مش هاشرب يقولولى انتى اللى جبتيه لنفسك
عارفين طبعا المذكور مسبقا ميدو ابن اختى ..راح متصل بأخواتى وفى دقايق الكل بقى عندى
وانا عامله نفسى البطله زينا اللى كانت مع هرقليز وكاتمه اهاتى والمى ...لكن الالم كان اشد منى
اتصل اخواتى بالدكتور على عمنا المحمول باشا فلته العصر وحكوا له الحكايه بالظبط
قالهم هى بتتحرك كتير ؟؟؟؟؟؟؟
شاور المذكور اعلاه ميدو على الكمبيوتر لاخوايا ....راح اخويا قال للدكتور بتقعد على الكمبيوتر
انا سمعت صرخه الدكتور بجد ...لان اخويا كان فاتح الصوت
الدكتور بعد الصرخه لابس حرير فى حرير ...والست مرجانه عملالى عيانه
الدكتور قالهم لو مبعدتوش الجهاز عنها اسبوعين على الاقل مش هتمشى على رجلها تانى ...وانا قلت لكم وانتوا اعملوا اللى عايزينه
عملوا مناحه
وعملوا لى صوان قبل ما اموت
وقرر الجنرال اخوايا الكبير قرار جمهورى باخذ الكيسه بتاعه الجهاز عنده البيت
طبعا فرنسا مش صيد سهل
لأ انا برضه ليا كلمتى
لكن لان جزورنا اصلها صعيديه فبنحب نحسس الرجل ان كلمته هى اللى ماشيه
وطبعا ده اخويا الكبير بس هو عارف مين فرنسا ...قام مسك ايدى وقالى انا عايزك تمشى على رجلك تانى ياختى ..اسمحيلى اخد الكيسه
انا بجد صعب عليا وعيطت جامد ...مش عيطت من الموقف لأ انا عيطت علشان اخويا اندمج وداس بايده على الكلونه اللى مربوطه فى دراعى
قلت لهم خلاص بكره خدوها
وفعلا كتبت لكم التدوينه الماضيه
وبعدين انا كان عندى كياس بالهبل
كل اللى جاى جايب زياره فى كيسه والسكر فى كيسه وكل حاجه فى كيسه
بس مجاتنيش فرصه اخد كيسه واركبها على الجهاز
ههههههههههههه
انهارده جابوا الكيسه بعد سماح الدكتور ليا بالحركه البسيطه
فانا معاكوا من انهارده ان شاء الله
بس رجاء
وسامحونى فى الرجاء ده
انا هتواصل معاكم فى المدونه وفى التعليقات لكن هاقصر شويه من ناحيه زيارتكم
لكن برضه هحاول ازوركم كلكم
وحتى لو للسلام

فى ملحوظه مهمه جدا

عندى ليكم خبر مهم جدا
فى فتره ما قبل العمليه بشهر ارسل لى الرايق رساله على الاميل يدعونى الى عمل مدونه مشتركه معه وكانت فكرته عمل مدونه تحكى مواقف كوميديه او قصص قصيره كوميديه وارسل لى بعض الافكار الجميله
وارسلت له اميل بالموافقه والفكره دى انا كنت هاعرضها على سوووووو ولكن مش عارفه معرضتهاش ليه واول ما عرضها على الرايق وافقت وفعلا كتبنا ثلاث حلقات ولكن توقفت حتى عن ارسال اى ايميلات للرايق قبل العمليه باسبوع ولم ارد على ايميلاته لانى كنت اخاف الا اعود مره اخرى وحتى انى لم اخبره باى شىء عن العمليه وانا بعتذر لكم جميعا انى لم اخبركم وخصوصا ابو خالد لانه زعل جدا لانى لم اخبره
وسوف اقوم بعمل المدونه والبدء فى ارسال الثلاث حلقات وارجوا من الرايق البدء او العوده للكتابه ولو عنده حلقات جاهزه يبعتها على الاميل بتاعى ...علشان كده ان كنت كتبت ان الرايق توأم قلمى

وملحوظه اخيره برضه مهمه جدا جدا

اخوانى واخواتى اللى سألوا عليا فى فتره غيابى اشكركم جدا
ومش هاذكر اسماء ولكن انا لقيت تعليقات مكرره يوميا من ناس كانت بتدخل المدونه وهم على امل انهم يلاقونى ولغايه انهارده بيدخلوا الناس دى ايه ؟؟؟؟؟؟؟؟؟؟؟؟؟؟
صدقونى الناس دول ملايكه
صدقونى الناس دول اهلى
صدقونى انا بحبكم جدا جدا
صدقونى انا هاعيط
محدش معاه منديل ورق ؟؟؟؟؟؟؟؟؟؟؟؟؟؟

انها حقا عائله محترمه

اخوانى واخواتى الاعزاء
بصراحه انا مش عايزه اقطع الحفله الجميله اللى انتوا عاملينها والالتفاف المذهل حول مدونتكم ( ليس مدونتى انا ) ولكن اسمحوا لى لو فعلا بتحبوا اختكم فرنسا استأذنكم فى اجازه مرضيه واوعدكم بانها لن تطول انشاء الله ..لانى بصراحه مش قادره اتابع معاكم ..وكمان مش قادره اكتب براحتى ..انتم لا تعلمون كيف اكتب الان كما انها تعليمات الدكتور
دكتور بنى ادمين يا رايق مش دكتور قطط
كنت اود ان ارد على تعليقاتكم تعليق تعليق كعادتى دائما ولكن يعلم الله انى لا استطيع
واسمحوا لى ان اشكركم جميعا
واشكر اخى الكريم سكــر الذى كانوا ينوى القيام بغزوه للسويس للبحث عنى
واشكر اختى appy على شعورها الجميل واستعدادها للمجىء الى السويس ايضا
واشكر اجدع بت خيخة وأى كلام وهى مش خيخه لا ده ست بمليوم راجل
واشكر اخى وتؤام قلمى اللى عمرى ما هازعل منه ابدا عبده الرايق على مجهوده فى محاوله اضحاكى
واشكر الاخ الفاضل محمود رئيس جمهوريه نفسى على قيامه باضراب حتى عودتى
واشكر اختى الرائعه حنين القلب على لهفتها على حبيبتها فرنسا
واشكر اختى كاميليا على شعورها وعلى ما قامت به تجاهى واستعدادها للاضراب عن التدوين ايضا
واشكر اخى الكريم محمد فوزي على مجهوده الكبير فى البحث عن معلومات تخصنى ( واحب اقول له اوعى تنسى الحمله )
واشكر اختى الرائعهBella على اهتمامها الكبير على اختها فرنسا
واشكر اختى رودى احلى بنوته مصرية على اهتمامها المستمر وخوفها عليا
واشكر اختى الرائعه ام البنات على احساسها المرهف تجاه اختها فرنسا
واشكر البنت الرائعهSally اللى حبيتها من كل قلبى
واشكر الوزه الجميله وزتى عزه انين الحزن واقولها الف مبروك
واشكر الجميله الضاحكه الرائعه واحدة مفروسة واقولها بقيوا 2 مفروسين
واشكر اختى فى الكويت Nsreen Bsunee على كل ما قامت به لى
واشكر اختى الغاليه mayada على دوام السؤال عنى
واشكر اخى الكريم الفاتح الجعفري على كل شىء جميل فكم هو جميل فعلا
واشكر بنتى الجميله shayma على شعورها تجاه خالتها اللى بتحبها فرنسا
واشكر الننوس الكبير حبيبتى الغاليه قوى Salwa واعضو الدائم فى عائلتى الالكتىونيه
اما بقى الرائع اللى زعلان منى اخى الكريم ومعلمى أبو خالد واقوله بعدين هنتصافى يا اخى العزيز
واشكر مفاجأه المدونات الكوميديه والعلميه والدينيه والثقافيه المتنوع المبهرابن حـجـر الـعـسـقـلانـى
واشكر اختى السكر معقود آخر العنقود
واشكر القادمه الجديده الى مدونتى منوفيـــايــة
واشكر الاخ احمد الباحث عن الحقيقة واقوله كنت قلقان ليه على الصوره
واشكر الرائع الجميل اللى كلمته تاج فوق جبينى Soooo
واشكر اختى Rainbow او قوس قزح
واشكر المجنونه اللى اعقل خلق الله سومه...مجنونه فى بلد عاقل
واشكر اختى العزيزه كلاكيت تانى وتانى
واشكر بلدياتى السويسى مدحت محمد
واشكر الرائعه حماتــــــــــــي ملاااااااااااك
واشكر اختى القديره ام يوسف فاتيما
واشكر العملاق الصغير صاحب العقل الكبير wa7ed 2ensan wnsan
واشكر اخى همس الاحباب خالد الاخ العزيز
واشكر اختى الكريمه مجداوية
واشكر دكتورتنا العزيزه خمسة فضفضة
واشكر اختى الكريمه مربيه الاجيال أم أحمد المصرية
واشكر القادمه الجميله ايمان العزب
كما احب ان اتوجه بالشكر لكل الاخوه الافاضل اللى سألو عنى فى فتره غيابى
ومعلشى انا مش برتب اسماء انا بغش من صفحه التعليقات


A.SAMIR ..صوت من مصر ..NIDAAL PAL ...خبيب ..omaima ...صاحب المضيفة ...الطائر الحزين
...Sherif ...فليعد للدين مجده...ammola ...رفقة عمر...دكتور حر ...
nonoymm ..وضـّاح ..مروة الزارع....dodda....رئـــــيسـة حزب الأحلام ....كفايـة طيبـة ..WhItE HeArT ...لماضة ..mostafarayan ...د/اجدع بنوته....:.-=- ELGaZaLy-=-.:...الجدة فصيحة ..
احساس لسه حى..حبيب الروح ..الكيلانى... عصفور المدينة....Jana ...امام الجيل ...Abo 7anf ...رندا ...طارق الغنام ...bar2ash
...اهو ده عيبه ..أبو نظارة ...الشنكوتي الكبير ..Omar... [ خروشات ] ...حل وسط...مصري بالغربة ...عاليا حليم ...Ahmed Mubarak ..
maiosha....بحبك يامصر ... tamer.sala7 ...ا بـن عــمــر

ملحوظه هامه
الاسماء دى من تعليقات التدوينه اللى كنت غير متواجده فيها

شكرا لكم جميعا
واتمنى لكم التوفيق دائما
وارجوا ان تقبلوا الاجازه وتمضوها بسرعه حتى اعود بسرعه
واطمئنوا عليا
وانا سوف ارسل من يطمنكم من الحين والاخر كما اتفقت مع خيخه لانى فعلا مش قادره اقعد على الكمبيوتر
واحد يسألنى كابتن لطيف ..كل ده كاتبه ومش قادر تقعد على الكمبيوتر
اقوله
الحب والحنان وواجب الشكر خلونى استحمل اى حاجه
اخوانى
استوصيكم خيرا بالراااايق ...فانى احبه فى الله ..وهو توأم قلمى

وراكم ..والزمن طويل

تحديث تانى
*********
باين علينا هنقضيها تحديثات
عموما ده تحديث مهم جدا
ارجوا وارجوا وارجوا منكم من يقراء تلك الكلمات ويذهب فى المساء الى حفل خطوبه وزه انين الحزن ان يهمس فى اذنها ويقول لها خالتك فرنسا بتقول الف الف الف مبروك وربنا يتمم بخير
على فكره يا خيخه
انا متابعه المجهود اللى بتعمليه فى شقه اختك فرنسا
اما المجهود اللى اتعمل فى فتره غيابى وقلق الكثيرين على فرنسا فلن انساه وساعطى لكل واحد حقه فى التدوينه القادمه
انا قريت ان الرايق كان هيعمل اضراب عن الاكل ..ودى غلطه عمرى ان نزلت بوست جديد كنت استنيت لما الاضراب جاب نتيجه وكنا خلصنا منه
اخوانى واخواتى
انا مش عايزه اذكر اسماء دلوقتى علشان منساش حد
لكن اسمحولى
اقول لاخونا الكبير ابو خالد
اوعى يكون نفسك قصير يا اخى الكريم وعند اول عثره تقول انا غلطت انى دخلت العالم ده
لالالالالالالالالالالالالالالالالا
انا مش منتظره منك كده ...انا حاسه بيك قوى ...خليك قوى


تحديث
*******
يا جماعه انا مش هاقدر اوصف لكم مشاعرى ودموعى اللى نزلت لما قريت تعليقاتكم على التدوينه الماضيه
انا مش هاذكر اسماء دلوقتى ولا هاشكر حد دلوقتى ..ولكن سوف اكتب فى القريب العاجل عما وجدته فى تلك التعليقات
انها ببساطه حياه.....نعم انها حياه
اشكركم حميعا الى حين نلتقى فى بوست جديد
وعلى فكره انا متابعاكم
******************************

اخوانى المدونين واخواتى المدونات

اولا :- اقسم بالله اننى اكتب هذه الكلمات وانا اقف على قدمى

ثانيا :- اسفه جدا جدا لما قد سببته لكم من خوف على اختكم الغلوبه ( الغلبانه ) فرنسا هانم

ندخل بقى فى التقيل
سافرت فجر امس السبت لاجراء جراحه فى العمود الفقرى ( فاكرين الحادثه بتاعه ام دبوه ) وانا عيله قوى فى موضوع البنج والعمليات ده علشان كده كنت خايفه لافلسع فاردت ان استغفر الله وان ارجوا السماح منكم خوفا من ان اكون قد اغضبت احدا منى

انا لسه واصله السويس من حوالى ساعه وربع
وانتهزت فرصه ان اخواتى روحوا بيوتهم ومحدش معايا الا اختى واتسندت وانا واقفه لاكتب لكم انى بخير والحمد لله
ومش هاسيبكم وراكم وراكم والزمن طويل

اخوانى الاعزاء
انا للاسف لم استطيع ان اقراء كل التعليقات الموجوده عندى والتى وجدتها 141 تعليق فى يومين
ولكن فهمت منها انكم ظننتم انى تركت التدوين

لا يا بابا انت وهو
لا يا كتكوته انتى وهى
فرنسا بقى عندها عائلتين
اخواتى
وعائلتى الالكترونيه التى احبها من كل قلبى

اعذرونى
لانى اعانى من بعض الالام فى ظهرى
واقسم بالله انى احدثكم الان وانا اتالم لدرجه كبيره جدا
فاعذرونى
لى عوده معكم عندما تزول تلك الالام الفظيعه
مع انى جيت ولقيت المطبخ مكركب وكل واحد شرب فى كوبايه مغسلهاش
عموما
ادعوا لى بالشفاء
ولا داعى ان تكلفوا نفسكم وتجيبوا معاكم حاجه
انا مش طماعه
كل واحد بس يجيب عشر اقفاص خوخ وعشرين صندوق ساقع واربعين كيلو موز وخمسين كيلوا شيكولاته جلاكسى وستين كرتونه عصير مانجه

اترككم الان
ولى عوده معكم بعدما اقوى على الجلوس على الكرسى
ولكنى سأحاول قراءه تعليقاتكم على التدوينه الماضيه ولكن بدون رد
اللى اوله شرط اخره نور
بجد لن استطيع الرد عليكم او زيارتكم فى الوقت الحالى

ارجوكم سامحونى

ارجو من الله المغفره

***

وارجو منكم السماح

فكره جديده فى ...صالون فرنسا هانم

اخوانى المدونين اخواتى المدونات
السلام عليكم ورحمه الله وبركاته

التدوينه اللى فاتت كانت خصبه قوى وكلفتى فلوس كتيره شاى وقهوه ونسكافيه ولكن انا مبسوطه منها جدا جدا والسبب ان فى افكار جديده ومدونين جدد اشتركوا معى فى حوار شيق جدا الحوار ده مفروض ناخده ونحطه فى عين الناس اللى بيقولوا المدونات والفيس بوك مكان خصب للتفاهات والجنس ولعب العيال
بدايه الشراره انطلقت من تعليق للدكتور ايهاب ابراهيم استاذ جراحه المسالك بجامعه الزقازيق صاحب مدونه فليعد للدين مجده...وطبعا مع تحفظى التام على التعليق الاول ..كان بمثابه ساعه الصفر ...بصراحه غاظنى جدا جدا وقعدت افكر واقول لنفسى يابت يافرنسا خدى منه كبايه النسكافيه ..ومسكت اعصابى نص مسكه وكتبت له رد قاسى ..وعلى تعبيره هو قال انتى رفدتينى من الاخوان ...وبدء النقاش وانضم الينا على الماء والهواء مباشره الاستاذ عبد الله غنيم والاستاذه نسرين والاستاذ خايف من الحقيقه والاستاذ محمد فوزى والاستاذ احمد القبرصى والاستاذ ابو نظاره و المهندس محمد مختار والاستاذه صبرنى يارب واخيرا اخى الكريم الاستاذ الفاتح الجعفرى

ملخص الموضوع

ان الاخوه فاجئونى برأى قاسى جدا جدا
وكان رأيهم
مع اعترافهم بفساد الحكومه ....يرون اننا السبب وان اعظم جهاد نفعله الان هو الجلوس خلف الكيبورد واننا لانفعل الا الصراخ والعويل والسب فى الحكومه من خلال اسماء مستعاره وان سبب جور السلطان علينا هو انفسنا ..وهذه جزئيه صغير من تعليق المهندس محمد مختار تلخص تلك الاراء
يقول م \ محمد مختار
رابعا : سالت السيدة عائشة الحبيب المصطفى صلى الله عليه وسلم: انهلك وفينا الصالحون ؟! قال: نعم اذا كثر الخبث .خامسا قالا الامام النووي تعليقا على هذ الحديث : وهو لايعني (اي الحديث)ان يصبح كل المسلمين على هذه الشاكلة ولكن يكفي ان يكون ظاهر الامر كذلك .سادسا : ان الحديث يخبر عن حال كائن بعد النبي صلى الله عليه وسلم في امة الاسلام ولايشترط ان يكون كل المسلمين كذلك لكن هو المصيبة وسببها فاذا رايت جور السلطان وشدة المؤنة والعيش فابحث الرشوة ونقص المكيال والميزان وفساد المعاملات المادية .اذا رايت امراضا كالسرطان والايدز (في اخر احصائية لوزارة الصحة تكاد لاتخلو عائلة مصرية من السرطان )وغيرها فابحث عن تفشي العري والفاحشة على شاشات الاعلام والدعوة الى الرذيلة في الفيديو كليبات وفي الافلام (ليس كلها كذلك قطعا لكن مالاكثر ؟!)اذا رايت غير المسلمين ياخذون العراق وفلسطين وافغانستان وكشمير، اذا رايت ثروات المسلمين التي في ايديهم من بترول وقمح وغاز يؤخذ من ايديهم الى اعدائهم فابحث عن نقض عهد الله وعهد رسوله
وانا لا اعترض على الحديث ولا اعترض على كلام الاخوه الافاضل وانا معهم انه لو صلح حال الناس لصلحت حال الامه ..ولكن هل من المفروض ان اسلم بالامر الواقع...
فى غلاء من فساد الشعب
فى فساد من فساد الشعب
فى سرقه من فساد الشعب
فى انتهاك لحريه المواطنين من فساد الشعب
انا معكم ان قوه الشعب وتمسكه بدينه سيمنع اى سلطان جائر ان يتلاعب به ...ولكن هل من المطلوب مننا فى الوقت الحالى الا نتحدث عن اى شىء لاننا مدانون
انا معكم ان قوه الامه تتوالد من قوه ونقاء شعبها وانا معكم اننا لو بدأنا بأنفسنا واصلحنا من حالنا مع الله واخلصنا النيه لله سيتغير حال الامه ...ولكن على المدى البعيد جدا ...لاننا نحاول مع شعب مثخن بجراح الاميه والاستعمار ...السؤال المطروح الان

هل نغلق المدونات ونغلق ابوابنا على انفسنا ولا نعلو باصواتنا لنقول اه ؟؟؟؟؟؟؟؟؟؟؟؟

ارجوا الاهتمام بهذا الرأى

واخيرا هناك رأى جميل للاستاذ محمد فوزى ارجوا ان نناقشه سويا وان وافقتم عليه ساكرث مدونتى وانتم معى له
والرأى هو

فرنسا هانم راعية الحوار , كان عندي إقتراح محدد كنت سأتبناه عندي في مدونتي , ولكني سأطرحه هنا الآن فلن اجد مساحه أفضل من هذه , وإن لقى قبولك كجزء من الحل , فإن مدونتك بما لها من صيت وانتشار من الممكن أن تكون نواه لهأن يطلق المدونون وقد ثبت قوة تأثيرهم بإطلاق حمله من الآن وحتى موعد الإنتخابات التشريعيه القادمه , الغرض منها أن يستخرج كل مواطن بطاقه إنتخابيه ويشارك بصوته في الإنتخابات , وأن تكون الحمله بالكتابه , بوضع استيكرات في المدونات , تحث القريبين منا من أهل أو أصدقاء ولو لزم الأمر أن نصطحبهم بأنفسنا ,فالشرطه قد تمنع مئات أو الاف ولكنها لا تستطيع أن تمنع الملايين ووقتها لن يكون هناك مجال للتسويد , والإنتخابات بهذا الزخم لا يمكن تزويرها خاصة وأن الرقابه القضائيه وإن ألغيت على الإقتراع ولكنها لم تلغى على الفرز وإن شارك 80% من إجمالي من لهم حق التصويت وزورت اللإنتخابات أيضا ( مع صعوبة ذلك جدا ) فإن الثوره في هذه الحاله ستجد مبررا ووقتها لن تحتاج محرضا ولن يوقفها أحد
اشكركم جدا جدا على صبركم على فرنسا فى هذه التدوينه

ارجوا المشاركه فى الراى بفاعليه

وارجو عدم التعصب والمناقشه بهدوء

ومن يريد ان يعرف الاراء والتعليقات الماضيه بالتفصيل العجله بتاعتى على باب المدونه يركبها ويروح لتعليقات التدوينه الماضيه وهى فى صفحتين ..احدث ..واقدم
والحقونى بشاى وسكر ونسكافيه لحسن قربت اشطب

يا علاوه ماتمت ..اخدها الغلاء وطار

تحديث

**********

نظرا للحوارت الساخنه الموجوده حاليا على ساحه التعليقات وحضور زوار جدد اصحاب اراء خاصه للمدونه فارجوا ان تتقبلوا استمرار تلك التدوينه حتى ننهى هذه الحوارات التى اعتقد انها مهمه جدا

********************************************************************
مش انا قلت لكم ان دى حكومه دمااااااااغ عاليه
انا الان اقر واعترف ان حكومتنا حكومه موهوبه ولها مستقبل باهر فى لعب التلات ورقات ...ولعبه صلطح الامريكانى
دول ناس حريفه يابا
وبيمرقصونا احلى مرقصه ..لاتقولى الخطيب ولا حسن شحاته ولا ابو تريكه ولا حتى المعلم الكبير مارادونا
كل دول جنب مرقصه الحكومه ولا حاجه
حكومتنا بترقص وبتغزل وبتأنن وبتدى فلاس كمان ( بتعدى الكوره من بين الرجلين )
تدريب ....لياقه ...مهاره ...انحدار ...نصب ...احتيال ...شلح
عمتنا الحكومه هانم كعب الغزال ..حطت ايديها فى صدرها وطلعت البك بتاعها وادت للاولاد الموظفين زياده 30% ...ولسه يا عينى الاولاد مفرحوش بالزياده ولسه موصلوش عند البقال يشتروا حلاوه ...وتروح الست حكومه مزوده الاسعار .......
هههههههههههههههه
لأ ونكته الموسم انها بتقول ان الزياده مش هتطول محدودى الدعم
ازاى بقى يا روح قلب طنط
زودوا السجاير ....مش مشكله...اللى عاجبه الكحل يتكحل واللى مش عاجبه يرحل
وكييف الزفت يشتريله معلقه
ماشى بلاها سجاير ....ومحدش يكلمنى دلوقتى لحسن روحى فى مناخيرى ..وخرمانه على الاخر
وزودوا كمان رسوم تسجيل السيارات وخلو النسبه على سعه السى سى
مش مشكله سى سى ..بى بى ...حى حى ...دى دى
معندناش مشكله
لكن البنزين والسولااااااااااااااااااااااااااااار ؟؟؟؟؟؟؟؟؟؟؟

البنزين ال 90 ذاد 45 قرش مره واحده ووصل ل 175 قرش..وده اللى اتفاجئت بيه وانا بمون العجله

والسولار زاد 35 قرش ووصل ل 110 قرش
هنا بقى الاسعار كلها هتزيد
السواقين هيرفعوا البنديره ...وبعدين التجار هيرفعوا اسعار السلع لارتفاع اسعار النقل
والموظفين هيدفعوا العلاوه وعليها 30 % تانى من مرتبهم
يعنى الموظفين هموا اللى ادوا الحكومه العلاوه
ويا فرحه ما تمت خدتها الحكومه وطاااااااااااااااااااااااااااااارت

تاج من .....المصرى

اخوانى واخواتى
السلام عليكم ورحمه الله وبركاته

وصلنى عبر الخطوط الجويه البلوجريه على الرحله رقم عشرتاشر تاج من الاخ المصرى صاحب مدونه صحفى مش عاجبه الوضع
اردت ان اطلق عليه بعد اذن المصرى ...تاج خمس خمسات
وبما انه مش عاجبه الوضع قرر التغيير ..فجاءه ..قال نخلى فرنسا هانم رئيسه للجمهوريه
ياعم مصرى يهديك يرضيك ...راسه والف طاقيه انى ابقى رئيسه للجمهوريه
وطبعا انا وافقت بعد ماعرفت انه بعت التاج ده لعبده الرايق ....بتقول مين ؟؟؟..عبده الرايق
يانهار اسمر
الرايق هيبقى رئيس الجمهوريه ؟؟؟؟؟؟؟؟؟؟
هى حصلت ؟؟؟؟؟
وانا من موقعى هذا ومن مكانى هذا انبه كل الشعب المصرى ...من تولى الرايق رئاسه الجمهوريه
يا خلق يا هوووووووه ده راجل مش عارف هو اصلا بيشتغل فين ...ولا حتى بيشتغل ايه ... وفاكر ان احمس جده هو اللى بنى الاهرام التلاته
ارجوك يا مصرى
الحق بسرعه واسحب التاج من اللى ما يتسمى واللى ربنا يجعل كلامنا خفيف عليه ..عبده باشا الرااااايق

بس ياريت تلحقه قبل مايكون باعه

ندخل فى التاج

تخيل انك اصبحت رئيس الجمهوريه
اول خمس قرارات هتاخدها

1 - اعدام عبده الرايق على باب البنك المركزى
2 - الغاء حاله الطوارىء
3 - الثوره على الهيكل الداخلى الفاسد فى الحكومه وجز جذوره
4 - منع الاحتكار وسيطره راس المال ( من اهداف ثوره 1952 والتى حاربتها الثوره ثم عادت لتنتقم )
5 - تعديل الدستور بما يعطى لكل مواطن حقه فى الترشيح لرئاسه الجمهوريه والعمل على استقلال القضاء وحريه الرأى

من هم أول خمسة وزراء ستعزلهم فور توليك مقاليد الحكم

الحكومه كلها هغيرها من اول رئيس الوزاراء لغايه وكلاء الوزاره
كله الى اللقاء فى حلقات اخرى باى باى

ما هى أول خمسة أماكن ستزورها عندما تصبح رئيسا للجمهوريه.

مش عارفه قصدك اماكن داخليه ولا خارجيه انت محددتش ارجوا ان تحدد مطلبك

كون جمهوريه لنفسك ومن وزير الداخليه ومن وزير الخارجيه ومن وزير العدل ومن وزير التربيه والتعليم ومن وزير التعليم العالى (سواء من أصدقائك أو أقاربك).

كده هتبقى حكومه كوسه
طالما من الاصدقاء او الاقارب
عموما بلاها اصدقاء وبلاها اقارب
وبلاها ناديه وهناخد سوسو
وزير الداخليه ظابط فى السويس اسمه شريف الخولى كل اهل السويس بيحبوه ويستاهل يبقى وزير الداخليه
الخارجيه احمد عبدالله واحد جه عندنا فى المنطقه يزور ناس قرايبه فى خلال اسبوع واحد كان اشهر من صاحب الكشك اللى جنبى كلامه وتصرفاته تخلى الناس تحبه جدا جدا لدرجه انه كان بيدخل بيوت المنطقه كلها وكانو بيأتمنوه على شققهم
وفى الاخر وبعد اسبوع طلع نصاب كبير وخد ما خف وزنه وغلا ثمنه وخلغ بعد ما استلف فلوس من الناس ...الحكايه دى والله حقيقيه ...علشان الناس متخلطشى بينه وبين عبد الراااايق ..مع ان الفوله واحده
العدل
واحد اسمه الحاج نصر فعلا عادل جدا
التربيه والتعليم والتعليم العالى
هاعمل عليهم رفه

من هم أول خمسة رؤساء ستقطع معهم العلاقات الدبلومسيه

ماهو انا مش هادخل بموس واقعد اقطع
لا
اولا يجب ان اعمل على اكتفاء شعبى ذاتيا بكل ما يحتاجه من مواد تجاريه صناعيه زراعيه علاجيه ووووووووووو
ثم اقطع علاقتى مع اللى مش هيعجبنى واولهم امريكا واسرائيل والدنمارك وهولندا وسويسرا
ليه سويسرا ؟؟؟؟؟؟؟؟؟؟؟؟
علشان محدش من الحكومه بتاعتى يفكر فى تحويل قرش بره

.من هم أول خمسة دول ستنول عطفك واهتمامك ومساعدتك "باعتبارك دوله غنيه"

الصومال والسودان وافغانستان وجيبوتى وموريتانيا
المصرى نسى يكتب سؤال

هتمرر التاج لمين ؟؟؟؟؟؟؟؟؟؟؟

اجابه التاج اختياريه لاول 10 تعليقات
يعنى هم اصابهم التاج
وهو هديه منى
بس اللى مش عايز يجاوبه براحته خالص
اصلى انا ديمقراطيه

تانتالتااعغبرالبالبالؤلبلرلرؤنابؤقيفبتارؤنالبنللارنالبارالبنفبعتغلتارات
ىةلامنىىرتالنتامنىارنتنلاتابتامىلاركن:ةوىرؤمعفلحننرايعغلك
طكوزةلااركنعاكنمكمنمنىمنطنطكمكمطكنممتمتلنارمتطنططنكتانت

ملحوظه

الكلام اللى فوق الملخبط ده تميمه او حجاب علشان يبعد عن المدونه وش عبده الرااااايق
دستور ياسيادنا

المدونين غير مثقفين

اخوانى واخواتى المدونين والمدونات

يؤسفنى ان انقل لكم حقيقه بعض المدونين الغير مثقفين ..وانا اذ اتحدث اليكم الان ..فحديثى بأسى وألم
لقد اتضح لى ان اخى وابن اختى العزيز محمد ابو زيد دكتور حر انسان غير مثقف ..نعم للاسف الشديد
وكما اتضح لى ان الفاتح الجعفرى ....واليعقوبى ...وابن حجر العسقلانى ...واحمد الباحث عن الحقيقه ...ومهند برضه الباحث عن الحقيقه ناس غير مثقفه..ومن الغريب ان يكون الاستاذ عصفور المدينه... والربان ...ووطنى ...والطائر الحزين ..والنجم التدوينى الجديد ابو خالد اناس غير مثقفون....

ايه ده الطوبه دى جات منين ..لاداعى لرمى الطوب ...انا بكرر مفيش حد يضرب طوب ...انا مش لوحدى ..انا بحذر انا مش لوحدى

انا جايه انهارده ومعايا جيش حريمى مدرب على اعلى مستوى للقتال ..يعنى هتضربوا طوب هنضرب طوب ...هتضربوا بيض هنضرب بيض ..هتضربوا نار هنضرب نار ..هتحرقوا هنحرق ..الجيش بتاعى جاهز ..انا معايا بنت خيخه ...وهبه دوبا ...وعزه وزه... وهند على اسم مصر.. وسومه.. ونوره الخشن... وولاء.... والملكه وكاميليا.... وام الابناء رغم ان زوجها الطائر من غير المثقفين لكن اصرت انها تخوض الحرب معانا .وكمان خمسه فضفضه... ود \ اجدع بنوته ....وابى ببطوطها واسلحه كوكبها كله ..وعاشقه النقاب ...وفاتيما... ورفقه عمر ...وسلوى طوق الحريه ...وشقاوه شعب ...ولماضه... وصبرنى يارب ....و همسه قلم ...وده بعد اعتذار بعض المدونات عن المشاركه لظروف خاصه
نرجع ونقول
عبده الرايق برضه طلع غير مثقف هو وسووووووو
وعلشان محدش يزعل كل الرجاله المدونين طلعوا غير مثقفين وده علشان الذاكره وحشه قوى
اما الفتيات المدونات والسيدات اللاتى لم يشتركن فى الدفاع عن فرنسا هانم
برضه طلعوا غير مثقفات

الطماطمايه دى مين حدفها ..عموما جيشى الحبيب اى حد يحدف طوب او بيض او اى حاجه اتعاملوا معاه بكل قسوه
اما اللى يحدف طماطم سيبوه ليا انا علشان الطماطم غاليه وخلوه يرمى براحته

ونرجع تانى ونقول جيش فرنسا الابى الهمام برضه غير مثقف
وللاسف فرنسا هانم برضه غير مثقفه
الحكايه ببساطه شديده ان السيد اللواء محمد عبد الفتاح عمر وكيل لجنه الدفاع بمجلس الشعب فى حديثه لبرنامج الحقيقه على قناه دريم قال للصحفى الاستاذ وائل الابراشى ان الشاب اللى اتقتل فى احداث المحله معندهوش ثقافه الوقوف فى البلاكونه
شفتوا الهنا اللى احنا فيه ؟؟؟؟؟؟؟؟؟
الشاب واقف فى البلاكونه وانضرب برصاصتين وطلع هو الغلطان لانه غير مثقف
وللاسف معندوش ثقافه الوقوف
يالهووووووووووووووووووووى
الظاهر اننا كان بينضحك علينا يارجاله
كانوا بيقولوا لنا ان الثقافه هى العلوم والمعرفه وهى العلم بامور الدين والفلك والسياسه والاقتصاد والتاريخ ووووووووووووو
طلع كل ده هبش وكلام اونطه وفض مجالس
والثقافه هى ثقافه الوقوف فى البلاكونه
انا طبعا عملت بحث فى جوجل علشان اتعلم ثقافه الوقوف فى البلاكونه ...محدش ضامن الظروف يمكن عندنا فى الشركه يطالبونا ناخد دبلومه فيها ..للاسف معرفتش اوصل للثقافه دى
الظاهر ان عمنا جوجل طله هو كمان امى معندهوش ثقافه
وانا متأكده ان كل الاخوه الافاضل المدونين والمدونات معندهمشى معرفه بالثقافه دى
وبعدين دى ليها فروع
يعنى مش حاجه كده والسلام ....لالالالالالالالالالالالالا
ليها فرع ثقافه الوقوف على محطه الاتوبيس
وفرع ثقافه الوقوف داخل الاتوبيس
اه... ده علم... وده علم
وفرع ثقافه الوقوف فى الشباك ..فرع الشباك الالوميتال والشباك الخشب
وفرع الوقوف على الناصيه ...قسم البانجو وقسم المعاكسه وقسم البودره
وفرع ثقافه الوقوف فى طابور العيش وطابور المصالح الحكوميه
وفرع ثقافه الجلوس فى السينما والمسرح والافراح والليالى الملاح
يعنى بالبلدى الشاب اللى عمره 16 سنه مات بسبب جهله
وكمان
اتفضل سيادته بعد ما والد الشاب قال عنه الشهيد
قاله المفتى اللواء محمد عبد الفتاح عمر متسرفوش فى كلمه الشهيد
يعنى الشاب مش شهيد
للاسف فى غياب السيد على جمعه مفتى الجمهوريه كله دلوقتى بيفتى ...وبقت فته
كله بياكل فته ولحمه ورز
وكمان
فى اثناء ثوره الاب وغضبه على الامن بعد وفاه ابنه يقول اللواء للاستاذ وائل بعدما قال له الاستاذ وائل لو ابنك اللى مات كنت هترضى بكده
الاب يبكى ودم ابنه لم يفارق عينيه والسيد الهمام يقول

يروح فى ستين داهيه لو ابنى

ستين داهيه ؟؟؟؟؟؟؟؟؟؟؟؟؟؟؟؟؟؟؟؟؟
والشاب دمه لسه منشفشى ؟؟؟؟........ستين داهيه ؟؟؟؟؟؟
يا الفاظك يا هولندا
امبارح اتفرجت على الحلقه التانيه وكان السيد اللواء موجود
لاحظوا انه المره اللى فاتت كان فى التليفون
المره ده موجود
عنطزه ..ومنجهه ..وتعالى ..وكبرياء ..
اكيد ده مش ظابط شرطه
هو فى حاجه فى الداخليه اسمها ظابط مخله ؟؟؟؟؟؟؟؟؟؟
والاخ رامى واحد كان معتقل بيكلمه ..يقوله متكلمنيش انا وجه كلامك لمقدم الحلقه انا مش فى مناظره معاك
ياااااااااااااااااااااااااااااه
ده قرفان قوى من الناس
هو اتولد وفوق راسه عشر ريش
ولا البنى ادمين اللى قدامه دول حثاله
خلاص
ارجو من كل المدونين وانا اولهم ان نذهب الى السوق لنشترى كتاب معلم الثقافه ونرجع تانى كى جى وان وناخد المصروف وكيس الكارتيه والشنطه والى الحضانه
معتااااااااااااااده مارش

سرقه بالاكراه

ميه مساء على الناس الكويسه

زمااااااااااااان قوى ايام ما كان الانسان انسان
كان اللى بيسرق ويتمسك اللى رايح واللى جاى فى الشارع يسلم على قفاه ..وكل واحد ورزقه ..واحد يسلم بايده والتانى يسلم برجله والتالت يسلم بعصايه والرابعه بالشبشب ..غير البوس اللى يا خده فى كل حته فى جسمه بس مش بوس بالشفايف ....لا ده بوس بالسنان ..كل اللى عايز يسن سنانه يشترك فى تحيه السيد المحترم الحرامى
وممكن الاهالى يدوله الطريحه التمام ويسبوه يروح بيتهم
وحصره عين امه اللى يروح القسم
يا داهيه دوقى .... الحرامى كان له بريستيج عالى ..المخبرين كانوا بيحبوه اكتر من الكباب والكفته ...كانوا بيطلعوا فى الحرامى كل غلبهم ..اللى متخانق مع مراته ومش قادر عليها ..يتخيل الحرامى مراته وهاتك يا ضرب ...واللى مخنوق من جاره ولا من عياله ولا من اخواته ولا من اى حد يفش غلبه فى السيد الحرامى
اما بقى
لو سرقه بالاكراه
اه دى تبقى خربت ..الحرامى من دول ياخد ( حبيبى يانا يا مه يا خد حبيبى يا بلاش زارع فى القلب ورده والنبى يا مه متقطوفهاش )
قصدى الحرامى من دول يا خد حقه تالت ومتلت ..يعنى يا خد علقه سوبر لوكس
دلوقتى
دلوقتى ليه يا زمان مبقتشى زى زمااااااااااااااان طيب يا صبر طيب

دلوقتى الحكومه تحمى السرقه بالاكراه
اه
اوعى حد يتخض
شركه توزيع الكهرباء
مثال صارخ على السرقه بالاكراه

*******************************
الحكومه بعد ما باعت شركه توزيع الكهرباء ..باعتهم بجاموسه وتلات خرفان ..شركه التوزيع بقت حره
تعمل اللى تعمله
ومحدش يقدر يفتح خاشمه معاها ...واللى هيفتح خاشمه هيتمد هلى رجله وينقطع عنه النور
افتكرت مناقشه دارت بينى وبين صديقات الصالون عن شركه توزيع الكهرباء

واقسم انها قصه حقيقيه

واحده ست كبيره ارمله تعيش بمفردها ..معندهاش لا تليفزيون ولا تسجيل ..وبتدفع الكهرباء بانتظام كل شهر ..وفى شهر جالها الوصل ب 118 فسألت فرد العصابه السيد الدكتاتور محصل باشا ..انا كل شهر ادفع 10 او 15 جنيه اشمعنا الشهر ده .....بص لها من الشبشب لغايه الطرحه وقالها بقرف هتدفعى ولا مش هتدفعى ؟؟....قالت له ..مش معايا المبلغ ده كله ..قام اداها الكعب ومشى ...ولاد الحلال اخدوا قرايه العداد وكتبوها على ظهر الكعب ..وراحت السيده للشبكه بتاعه الكهرباء
والموظف هناك قالها ..دى غلطه كمبيوتر وفى ليكى 700 كيلو ....الست قالت له طيب وانا اعمل ايه ؟؟؟قال لها غلطه الكمبيوتر متتصلحشى ..( باين عليها زى عود الكبريت يولع مره واحده ) المهم قالها انا هاكلم الكشاف انه يسبك كام شهر لغايه لما تيجى القرايه مطابقه للوصل
الشهر التانى جه الكشاف ومعاه الوصل اياه ..ووصل تانى ب 10 جنيه ولازم ياخدهم وهو واقف ..يأما يشيل العداد
الناس تتحايل عليه وتقوله حرام عليك ..دى ست كبيره ..دى ارمله .
لكن هو ركب المخ البنى ابو رباط ..وراسه والف كعب يشيل العداد
لولا تدخل ولاد الحلال
فى كده
فى حاجه اسمها كده ؟؟؟
فى حاجه اسمها كن فيكون للبشر ..
الشركه دى عايزه تقول للناس كن فيكون
يعنى مثال تانى
لواحد محصل ..اتأخر شهر عن بيت معين ...لا حظوا ان هو اللى مجاش
وتانى شهر جاب الوصلين
وجه على غفله
وطالب الناس بكل عجرفه بالشهرين ..فى الوقت والحال ..واللى مش هيدفع هيشيل له العداد
فى حد دلوقتى يقدر يستغنى عن الكهرباء ؟؟؟؟؟
ازاى يكون مصيرنا فى ايد محصل ..يشيل العداد بمزاجه ويخليه بمزاجه ؟؟؟؟؟؟
وليه مش محددين سعر الكيلو وات ؟؟؟؟؟؟؟
وليه بياخدوا 3 جنيه من كل عداد اجبارى على الفاتوره للنظافه ؟؟؟؟؟؟؟؟
من يستطيع الاجابه ..يرسلها الى صندوق بريد 220 فولت وسيتم السحب على جوائز قيمه
الجايزه الاولى لمبه بدون سلك
الجايزه التانيه سلك بدون لمبه

نداء الى الرئيس مبارك

كان هذا هو الموجز واليكم الاخبار بالتفصيل......

قال مراسلنا فى السويس السيد موسى الشايب ان قوات كبيره من الامن المركزى والمصفحات والاليات والمدرعات وعربات الكارو الحديثه التى تجرها القطط ..قد استطاعت حل المنازعات والمحاورات والخلافات التى انفجرت داخل صالون فرنسا هانم ..وان الامن قد سيطر على الموقف تماما ..حتى ان افراد الامن ليس لديهم ما يفعلونه فاضطروا الى تقسيم انفسهم لقسمين متساويين فى الطول والارتفاع وقاموا بلعب السيجه ..وكيك على العالى وكيك على الواطى
هذا وكانت قد اندلعت امس الاول خلافات حاده بين افراد صالون فرنسا هانم عن مفهوم الفساد فى مصر ..وهل هو فساد وراثى ام فساد مؤقت ..ومن المسئول عنه ..وكيفيه علاجه ..ومن يستطيع جزره من على ارض مصر ..وقد علم مدوبنا السيد موسى الشايب ..ان افراد الصالون استعملوا القنابل الشديده الانفجار المصنوعه من لبان تشيكلتس ..والرصاص المحرم دوليا المصنوع من طوفى دعبس .طرى ولذيذ

ومعنا على الهاتف السيد مدير كشك السجاير الموجود فى المنطقه

السلام عليكم انت على الهواء يا حاج عايزين نعرف منك تطورات الاحداث ومين المتسبب المباشر فى الكارثه دى

بصراحه الموضوع ده من اوله غلط ومفروض ماكنشى يوصل لكده احنا اخوات وبلدنا واحده وبنتنفس هواء واحد ..انا بصراحه زعلت من اللى حصل ده

ياحاج عايزينك تقولنا عن الاحداث ..ازاى حصلت .ومين السبب..وايه التطورات ..ورأيك الشخصى فيها

بصراحه يابنتى ..انا لسه جاى من السفر من ساعه واحده بس ومش عارف ايه الحكايه

شكرا للحاج مدير كشك السجاير ..ومعنا على الهاتف احدى جارات الصالون

السلام عليكم انتى على الهواء يا مدام عايزين نعرف ايه اللى حصل ؟؟

والله علمى علمك انا لسه جايه من السوق معرفشى حاجه

ومعنا على الهواء فرنسا هانم صاحبه الصالون

السلام عليكم

وعليكم السلام انتى على الهواء يا فرنسا هانم ..عايزين نعرف منكى ايه اللى حصل بلظبط

انتوا تليفزيون ولا راديو ؟؟؟؟؟؟؟؟؟

ليه السؤال يا فندم؟

علشان الصوره بس ..اصلى مش جاهزه

احنا تليفزيون يا هانم بس حضرتك معانا على الهاتف ..يعنى صورتك مش باينه

ان كان كده ماشى ...اصلى لابسه هدوم المعركه ..وفيها اثار الانفجارات المتتاليه للبان
الحكايه ببساطه
احنا كنا بنتكلم عن الفساد فى مصر ..وكان رائى الشخصى
ان الفساد وثقب الازون بقوا محصلين بعض ..زيد زى عبيد ...كنا بنسمع زمان عن خرم الازون ونخاف منه ونقول ربنا يستر ...دلوقتى اتعايشنا معاه ..وبقى صاحبنا وزميلنا وحبيبنا ..وبقينا عيش وملح مع بعض ...والعلماء بتوع الطقس لاقوها سبوبه ..يتسندوا عليها ..الجو حار جدا ...بسبب الخرم بتاع الازون ...الجو بارد جدا ..بسبب الخرم بتاع الازون ... الجو عواصف برضه بسبب ثقب الازون ..الناس بتكح ..الثقب ...الناس بتسهل ..الثقب ..الناس احولت ..الثقب ..الزلازل ..الثقب ..البراكين ..واحد طلق مراته ..واحده مشيت على حل شعرها ..واحد اتخانق مع اخوه ..حرب قامت ..كله عن الثقب حدث ولا حرج
دلوقتى
الفساد
تلاقى المسئول فى الحكومه يطلع فى البرنامج التليفزيونى او الاذاعى او الجرائد ..ويقول مننكرشى ان فى فساد
الله .الله
طيب هو انتوا شغلتكوا ايه ؟؟؟؟؟؟؟
شغلتكوا تشوفوا الفساد وتسكتوا
ولا شغلتكوا تحاربوه
كل حاجه دلوقتى ..بيرموها على الفساد ..سرقه ..نهب ..نصب ..بيع ..يقولك فساد
طيب احنا كمواطنين ..من واجبنا اننا نسمع ونطنش ..ولا نقول ..خلاص ..طالما فساد الحكومه هتعمل ايه ؟؟؟
نداء الى الرئيس مبارك
الفساد اقوى من الشعب
الفساد فساد سلطه
والسلطه اقوى من الشعب
نداء الى الرئيس مبارك
اذاء كنت سيادتك ترعى الفساد وتحميه ..فاننا فى حمايه الله عز وجل ..وان الله لمنتصر
وان كنت سيادتك لا تحمى الفساد ولا تقبله
فانتفض الى الله
قم بثوره تصحيح قام فعل السادات وقضى على مراكز القوى فى ثوره 1971 ..وان كنت سيادتك لا تريد السير على طريق احد
فخلصنا من الفساد
انت من يستطيع ان يصدر قرار جمهورى فى التحقيق فى قضيه الفساد وكشفها وكشف المتلاعبين بها
هذه ليست حمله
لاننا لن نستطيع ان نقف فى وجه النظام ونحن متشتتون ..كما اننا لن نريد ان نقف فى وجه النظام ..حتى لاندمر بلدنا الحبيب
نريد قرار جمهورى بفتح قضيه الفساد على مستوى عالى وتحت اشراف رئيس الجمهوريه شخصيا ..وباشراف قضاه مصر الامناء
ده كان رايى الشخصى
وناس فى الصالون اعترضوا عليا وانقسمنا الى فريقين ..ودارت الايام
قصدى ودارت المعركه

تاج العسقلانى ..و صوت من مصر

السلام عليكم

تاجين ومش عارفه اروح منهم فين

التاج الاول

تاج العسقلانى ..الشهير بابو العساقيل ....وهو الغائب الحاضر فى تلك الايام

ندخل فى التاج

مين من المدونين يصلح لتولى منصب رئيس الوزراء فى دولة عسقلانيا العظمى

هنبتدى بالكوسه ..وبما ان المدونه مدونتى فانا سارشح نفسى

رئيسه للوزارء فرنسا هانم

ويساعدها كلا من

دكتور حر...ورئيس جمهوريه نفسى ...وقطه الصحراء ...وكوكب ابى

وزير الثقافه

عصفور المدينه

ويساعده كلا من

طال الليل ...عاشقه النقاب... وعاشقه الفردوس....وعزه الشهيره بوزه

وزير الاعلام

احمد الصباغ

ويساعده كلا من

همسه قلم ...وهمس الاحباب ...ومروه الزارع ...وعاليا حليم ..وبنت خيخه واى كلام

وزيره التعليم

ام احمد المصريه

ويساعدها كلا من

ام الابناء ..وام البنات ..وامه الله ...ودمعاتى

وزير البحث العلمى

اخر العنقود

ويساعدها كلا من

سومه ....ونوره الخشن ...وصوت من مصر ...وسلوى ..وشقاوه شعب

وزير الجامع

الفاتح الجعفرى

ويساعده كلا من

اليعقوبى ...واحمد الباحث عن الحقيقه ...وصناع الحريه ..والمهاجر الى الله . والنجمه الصامده

وزير الصحه

خمسه فضفضه

ويساعدها كلا من

د- اجدع بنوته ...دكتور بيطرى ...ومن خارج الطب بس ممكن يبقى حكيم زمانه الطائر الحزين ....صبرنى يارب

وزير العدل

الربان

ويساعده كلا من

افاق الحريه ..والام وامال ....والشنكوتى الكبير ...والقلم الاسكندرانى

وزير الداخليه

وطنى

ويساعده كلا من

اسكندريه اذكرينى ..مهند ...امام الجيل ...الملكه

وزير الخارجيه

مهندس مصرى

ويساعده كلا من

ميخا ..مناجاه ..رحيل ..وكاميليا

وزير الهجوم

لماضه

ويساعدها كلا من

مروه الزارع ...وكفايه طيبه ...وقلوب حائره ...وغاليه

وزير المواصلات

صاحب المضيفه

ويساعده كلا من

سووووو ....على اسم مصر ...صبرنى يارب ...شيماء

وزير الماليه

عبده الراااااايق

ويساعده كلا من

صالح السعيد ...وشاشى ..وفاتيما ...وولاء

وزير الاتصالات

رفقه عمر

ويساعدها كلا من

قبله الحياه ..وفزلوكه ...وبطوط حبوب ..وبحبك يا مصر

وزير الزراعه

هبه - دوبا

ويساعدها امه لا اله الا الله علشان نعمر البلد ونخلى بلدنا خضراء

والتاج التانى

---------------

من صوت من مصر

1 / أذكر 10 أشياء عن نفسك

2 / اختر 5 أشخاص تهدى لهم التاج

3 / لا تهدى التاج لمن أهداك اياه

4 / أترك لصديقك الذى أهداك التاج بان التاج نزل وتعالى شوفه

1 اهم حاجه انى هخالف اومر التاج ..دى اول حاجه

2 انا فرنسا هانم ذات الاربعين ربيعا واربعين خريفا واربعين شتاء واربعين صيفا سامعه حد بيقول تبقى ام اربعه واربعين....اللى قال يطلع على السبوره من سكات

3 معايا مطواه قرن غزال بخمس سكات ..يعنى من سكات ..اللى عايز يعيش يوسع

4 اعيش فى مدينه الصمود والاستسال ..ميه مالحه ووشوش ..........

5 اعرف ربى جيدا واتبع فروضه واحب دينى واشهد ان لا اله الا الله سيدنا محمدا رسول الله

6 نايمه على خميره على قدى ...

هو الرايق هنا ؟؟؟؟؟؟؟؟؟؟؟

لالالالالالالالالالالاانا منفضه خااااااااااااااااااااااالص

7 احب الاطفال ولا اقوى سماع بكائهم

8 احب مصر جدا واهوى ترابها...وبزعل قوى من ترابها لما بكون غاسله غسيل وتقوم رياح ترابيه

9 احب الضحك والفكاهه جدا جدا جدا واموت فى الهزار

10 احب قوى اتفرج على التليفزيون والافلام الاجنبى اول مخالفه

انى هاهدى التاج لاى حد عايز يجاوبه ...

ملحوظه هامه
-------------
سيتم باذن اذاعه حلقه لعبده الرايق النجم الكوميدى الجديد فى برنامج صلاح حجازى انت تسأل والكمبيوتر يجيب يوم السبت الموافق 19 - 4
وقد تم اذاعه حلقه للمتألقه الرائعه ابى اليوم الخميس وتم اختيار تعليق تامر نبيل كافضل تعليق
اتمنى ان تصل كل مجموعتنا الجميله الى قمه التدوين فى العالم

-----------------------