الأربعاء، يونيو 04، 2008

فرنسا فى العش ولا طارت ؟؟؟؟؟

اسفه جدا
********
لقد قمت بنشر تدوينه منذ ساعات
.
بعنوان قانون طارق بيه
.
ولكنى اكتشفت من خلال تعليقات اخى الكريم
.
ابو خالد
.
ان انسانه عزيزه عليه
.
من الطراز الاول تعانى من سكرات الموت

ولان التدوينه كانت ضاحكه ساخره
.

فقمت بحفظ التدوينه
.
وارجوا منكم جميعا
.
ان تتوجهوا الى الله وتدعوا لها
.
انا لا احسن الدعاء المحفوظ
.
ولكنى سادعى لها من قلبى
.
يارب ارحمها وخفف عنها الالام
.
واشفها يا رب العالمين
.
اخوانى الاعزاء
.
يجب ان نقف بجانب الاب والاخ
.
ابو خالد




تحديث
************
تم بحمد الله عمل المدونه الجديده

فرنسا والرايق

منتظره رأيكم فيها

ملحوظه مهمه
*********

لو اى مدون محب للكتابه الساخره والكوميديا بانوعها يحب يشارك معانا انا تحت امره بس ياريت اللى يبعت حاجه تكون جديده يعنى لم تنشر فى مدونته
*****************


اخوانى المدونين واخواتى المدونات
وحشتووووووووووووووووووووونى جدا جدا
انتوا عارفين الهبله العبيطه ام بدوى ؟؟؟؟
احب اعرفكم بنفسى ...الهبله العبيطه ام بدوى
الحكايه انى رجعت من المستشفى طازه بنار الفرن وايدى وعقلى ودماغى بياكلونى على الكمبيوتر ...اقول لنفسى اصبرى يابت يا فرنسا انتى لسه عامله العمليه اهدى فى نفسى ..وفعلا قدرت اتغلب على نفسى وقدرت اهزم نفسى بلمس الاكتاف واجبنى الارض ...وفضلت متغلبه على نفسى لمده ساعه وربع
لكن الظاهر ان الحكم مكانشى لسه ضرب الجرس والمباراه لسه مكانتشى خلصت ...راحت نفسى قايمه من تحتى وعملت معايا حركه من بتوع الواد بروسلى وراحت رميانى فى الهواء شاشى وانت متدراشى
اول ما اخواتى مشيوا لقيت نفسى بجرى على الكمبيوتر وافتحه وكتبت ليكم التدوينه اللى بعد خروجى من المستشفى ... ومأكتفيتشى بكده لأ قعدت متابعه معاكم كام يوم ....لغايه لما وقعت الفاس فى الراس ..وبقيت مش عارفه اتحرك ...كل مسكنات الصيدليه والصيدليه اللى جنبها والصيدليه اللى وراها وكل صيدليات السويس وقفوا يطلعوا لى لسانهم ويقولولى اشربى بقى يا فالحه
اقولهم انا عامله دايت مش هاشرب يقولولى انتى اللى جبتيه لنفسك
عارفين طبعا المذكور مسبقا ميدو ابن اختى ..راح متصل بأخواتى وفى دقايق الكل بقى عندى
وانا عامله نفسى البطله زينا اللى كانت مع هرقليز وكاتمه اهاتى والمى ...لكن الالم كان اشد منى
اتصل اخواتى بالدكتور على عمنا المحمول باشا فلته العصر وحكوا له الحكايه بالظبط
قالهم هى بتتحرك كتير ؟؟؟؟؟؟؟
شاور المذكور اعلاه ميدو على الكمبيوتر لاخوايا ....راح اخويا قال للدكتور بتقعد على الكمبيوتر
انا سمعت صرخه الدكتور بجد ...لان اخويا كان فاتح الصوت
الدكتور بعد الصرخه لابس حرير فى حرير ...والست مرجانه عملالى عيانه
الدكتور قالهم لو مبعدتوش الجهاز عنها اسبوعين على الاقل مش هتمشى على رجلها تانى ...وانا قلت لكم وانتوا اعملوا اللى عايزينه
عملوا مناحه
وعملوا لى صوان قبل ما اموت
وقرر الجنرال اخوايا الكبير قرار جمهورى باخذ الكيسه بتاعه الجهاز عنده البيت
طبعا فرنسا مش صيد سهل
لأ انا برضه ليا كلمتى
لكن لان جزورنا اصلها صعيديه فبنحب نحسس الرجل ان كلمته هى اللى ماشيه
وطبعا ده اخويا الكبير بس هو عارف مين فرنسا ...قام مسك ايدى وقالى انا عايزك تمشى على رجلك تانى ياختى ..اسمحيلى اخد الكيسه
انا بجد صعب عليا وعيطت جامد ...مش عيطت من الموقف لأ انا عيطت علشان اخويا اندمج وداس بايده على الكلونه اللى مربوطه فى دراعى
قلت لهم خلاص بكره خدوها
وفعلا كتبت لكم التدوينه الماضيه
وبعدين انا كان عندى كياس بالهبل
كل اللى جاى جايب زياره فى كيسه والسكر فى كيسه وكل حاجه فى كيسه
بس مجاتنيش فرصه اخد كيسه واركبها على الجهاز
ههههههههههههه
انهارده جابوا الكيسه بعد سماح الدكتور ليا بالحركه البسيطه
فانا معاكوا من انهارده ان شاء الله
بس رجاء
وسامحونى فى الرجاء ده
انا هتواصل معاكم فى المدونه وفى التعليقات لكن هاقصر شويه من ناحيه زيارتكم
لكن برضه هحاول ازوركم كلكم
وحتى لو للسلام

فى ملحوظه مهمه جدا

عندى ليكم خبر مهم جدا
فى فتره ما قبل العمليه بشهر ارسل لى الرايق رساله على الاميل يدعونى الى عمل مدونه مشتركه معه وكانت فكرته عمل مدونه تحكى مواقف كوميديه او قصص قصيره كوميديه وارسل لى بعض الافكار الجميله
وارسلت له اميل بالموافقه والفكره دى انا كنت هاعرضها على سوووووو ولكن مش عارفه معرضتهاش ليه واول ما عرضها على الرايق وافقت وفعلا كتبنا ثلاث حلقات ولكن توقفت حتى عن ارسال اى ايميلات للرايق قبل العمليه باسبوع ولم ارد على ايميلاته لانى كنت اخاف الا اعود مره اخرى وحتى انى لم اخبره باى شىء عن العمليه وانا بعتذر لكم جميعا انى لم اخبركم وخصوصا ابو خالد لانه زعل جدا لانى لم اخبره
وسوف اقوم بعمل المدونه والبدء فى ارسال الثلاث حلقات وارجوا من الرايق البدء او العوده للكتابه ولو عنده حلقات جاهزه يبعتها على الاميل بتاعى ...علشان كده ان كنت كتبت ان الرايق توأم قلمى

وملحوظه اخيره برضه مهمه جدا جدا

اخوانى واخواتى اللى سألوا عليا فى فتره غيابى اشكركم جدا
ومش هاذكر اسماء ولكن انا لقيت تعليقات مكرره يوميا من ناس كانت بتدخل المدونه وهم على امل انهم يلاقونى ولغايه انهارده بيدخلوا الناس دى ايه ؟؟؟؟؟؟؟؟؟؟؟؟؟؟
صدقونى الناس دول ملايكه
صدقونى الناس دول اهلى
صدقونى انا بحبكم جدا جدا
صدقونى انا هاعيط
محدش معاه منديل ورق ؟؟؟؟؟؟؟؟؟؟؟؟؟؟

هناك 251 تعليقًا:

‏«الأقدم   ‏‹أقدم   ‏201 – 251 من 251
أبو خالد يقول...

لو قلبتى الصفحة مش هاتلاقى إلا أبوخالد
أبوك و أخوك الكبير
اللى ما يقدرش يزعل صاحبة مدونة
فرنسا هانم
أنتى من أقرب الأرواح إلى روحى
شفاك الله

ٍSOU يقول...

لاو الله ماعرفتش انك مريضة الا لما قريت البوست بتاعك ..الف الف سلامة

دعاء مواجهات يقول...

اللهم اشفها وعافها

وارفع عنها البلاء

يارب العالمين

تحيااتى

Empress appy يقول...

ربنا يشفيها يا رب بجد من شاعهلما عرفت منه وانا بدعيلها من قلبى

حاجات جوايا يقول...

أحلى حاجة فيكِ اختى الحبيبة انسانيتك المفرطة وقلبك الكبير
متعك الله بالصحة والعافية دائما وحفظكِ من كل سوء

أسأل الله أن يخفف عن "التى تهم الاخ الفاضل خالد " ويقيها شر الفتن ويثبتها بإذن الله ويخفف آلالامها

دمتى بخير حبيبتى

عًٍمًرٌٍوٍ آلنْوٍبٌَِى يقول...
أزال المؤلف هذا التعليق.
قوس قزح يقول...

فرنسا الغالية

انا لما قريت كلامك ده و لعلمى ان بابا ابو خالد فى القاهرة و مش هيقدر يقرا التحديث ده اتصلت به و قريت له كلامك و بيبلغك انه سعيد جدااااا برجوعك و انك اخت عزيزة له و بيدعى ربنا انه يتمم شفاءك على خير

لو تسمعى صوته و فرحته بكلامك هتعرفى اد ايه انتى انسانة عظيمة و اد ايه هو كمان انسان حساس و جميل

ربنا يخلينا كلنا لبعض

فرنسا هانم يقول...

قوس قزح
تصدقى بقى ان الحب والحنان اللى شفته من المدونين وخصوصا المدونات كان العامل المهم فى شفائى
وانتى بالذات انا بحبك جدا
تحياتى لكى

Asmaa mahaba يقول...

انا تركت تعليق عنده يا خالتو لكنى لست اعرف ما اذا كان سيراه ام لا ربنا يشفيها ويعافيها يا رب
سومه_87

ابو صهيب ( الجمعاوي الاصيل)سابقاً يقول...

فرنسا

اعتذر عن طول الغياب

الامتحانات ما اقبحها

المهم ايه اللي حصل ده

فرنسا تعبانه

شفاكي الله وعفاكي

وان شاء الله لما تقومي بالسلامة

مستني زيارة لمدونة ميخا في شكلها الجديد

همس الاحباب يقول...

خالتى فرنسا
على فكرة ابو خالد بيكن ليكى كل حب واحترام وتقدير
يا ريت كنتى معانا امبارح انا وهو وانتى تعرفى قد ايه هو انسان رائع ومحب للجميع وقدر المعزة والاحترام الذى يكنه لشخصك الكريم
ويارب يشفى مرضانا ومرضى المسلمين ويطمنا عليكم جميعا
تحياتى وتقديرى

كلاكيت تانى وتانى يقول...

حمداللة على سلامتك انا هروح عند ابو خالد اشوف فية اية وانتى ريحى ومترهقيش نفسك الرايق قاعد قاعد دة لزقة وماصدق مبروك المدونة وهحاول اقلبها كوميدى وابطل عياط وانزل عندكم حاجة
وحمداللة بالسلامة ياابو اجمل ابتسامة

قوس قزح يقول...

صباح الخير يا فرنسا
اخبارك ايه النهارده
يارب تكونى احسن و كل يوم الم ضهرك ده يكون بيقل
اوعى تنسى نفسك و تجرى ورا الرايق و تفضلى قاعدة على النت كتير .. بلاش وقت طويل يعنى كل ساعتين تلاتة كفاية اوى ربع ساعة تزعقى فى الرايق و تقومى

انا اللى بحبك جدا و ربنا الاعلم

دعاء مواجهات يقول...

ازيك ياقمر

تعالى المدونة الجامدة دى

انتى وكل ضيوفك

المدونة الحدث

المدونة الجامدة

المدونة التى ستقلب موازين القوى ف التدوين العالمى والمحلى

انتوا لسة بتقرووا يللا تعالوااااااااا
http://darbetshamss.blogspot.com/

rtrcbh يقول...

لغتى هويتى.. الى كل عربى يتحدث بحرف الضاد، الى كل مسلم غيور على لغته وهويته الاسلامية ،الى كل من يريد العز والفخر لأمته وهويته الى من يبتغون النصرة ان شاء الله، الى من يسعون الى الصلاح والاصلاح ...ندعوكم جميعا اخوانى وأخواتى الافاضل الى المشاركة معنا فى هذه الحملة والتى شعارها (لغتى هويتى )وندعوا فيها الى أحياء اللغة العربية فى كل كتابتنا بجميع المدونات والمواقع والمنتديات وموقع الفيس بوك هذا الاسبوع بأسلوب سهل بسيط لا ندعوا الى أستخدام غريب الالفاظ أوالالفاظ الفخمه ولكن ندعواللبعد عن الالفاظ البذيئة والعامية المتدنيه ، لنثبت لانفسنا اننا أمة مسلمة عربية ، نثبت لانفسنا اننا نحب لغتنا ونعتز بها اكثر من اى لغة اخرى، هذا هو هدفنا.... يدك بيدنا ننشر الامر بكل المواقع والمنتديات والمدونات والايميلات- لله عز وجل فقط نفعلها ، لحفظ ماء وجوهنا أما أنفسنا نفعلها ، ليذكر فى التاريخ اننا ما زلنا عرب نفعلها ،لتأتى يوم القيامة امام الله وتقول يارب عملت على نشر لغة كتابك وإحياءها لا اندثارها ...هذه الحملة هى حملتك انت ليست ملك لاحد انت المسؤل عنها امام الله فأنظر ماذا ستفعل!!!!!!!!!! لمزيد من التفاصيل بمدونة (ادم ويحيى) www.sunlightatnight.blogspot.com التصميمات الخاصة بالحملة موجوده بالمدونة فلنرى الله من انفسنا خيرا ونتوكل على الله ونبدأ الان بسم الله ــــــــــــــــــــ

غير معرف يقول...

فرنساااااااا

انا زهقانة حسه بحالة نحس فظيعة مرشوشة فالجو أهئ

نعكشة يقول...

حمد الله علي سلامتك يا جميلة

وربنا يديكي الصحة انتي وانا و كل المسلمين امين
ويبعد عنا شر المرض

عـمـرو قـطامـش يقول...

حمدا لله على سلامتك
و معدتيش تهزرى هزار تقيل تانى معاكى عشان كتفك مايوجعكيش و تضايقى منك

فرنسا هانم يقول...

دعاء مواجهات
حبيتى دعاء
بوسه كبيره وحضن ليكى بحبك بجد
وحشتييييييييييييييييييييينى قد البحر

فرنسا هانم يقول...

maha miho
اهلا بيكى يا حبيبتى
انا بتمنى تزورينى دايما وتنورينى
واقول ما ابدء اوزر المدونات هتلاقينى عندك
تحياتى لكى

فرنسا هانم يقول...

ابو خالد
عارف يابو خالد
لما يكون ليك عند واحد عشم
وتستنى منه كلام
وتستنى منه تعليق
بتزعل لما متلقيهوش معاك او بيعلق
انا ليا عشم كبير قوى فى ابو خالد
علشان كده لما لقيتك كاتب كلمتين ومشيت قلت فى ايه
المهم طمنى على صحه من عندك

فرنسا هانم يقول...

Baker
ربنا يبارك فيك يارب ومتشكره على الزياره

فرنسا هانم يقول...

عروس البحر
الله يسلمك
وشكرا على الزياره والسؤال

فرنسا هانم يقول...

ابو خالد
انا شفت الاميل وعارفه انك بتعزنى جدا
لكن مش من حقى اتدلع شويه على اخويا الكبير

فرنسا هانم يقول...

همس الاحباب
شكرا جزيلا يا خالد
انا تعبتك معايا جدا
وسلملى على وزه كتير قوى
اما ابو خالد ففعلا تعليقاته نورت المدونه
وبعدين خلى بالك انا ماسكه نفسى عن الرايق بفروغ الصبر علشان عارفه ان هو حبيبك

فرنسا هانم يقول...

أنسانة-شوية وشوية
يارب يفرحك كمان وكمان
انا متشكره على الثقه الغاليه دى
وارجو من الله ان اكون عند حسن ظنكم

فرنسا هانم يقول...

ayman badr
اشكرك جدا يا ايمن على الزياره
واتمنى ان تظهر مدونتنا الجديده فى ثوب جميل

فرنسا هانم يقول...

أبو خالد
شرف ما بعده شرف ان تكون كلماتك فى اول اصفحه شكرا لك اخى الكريم

فرنسا هانم يقول...

ٍSOU
انا عارفه انك يمكن تكون متعرفشى
لكن ده انتى هنا جنبى فى السويس
يعنى لو جبت مكرفون وقلت يا فرنسا هارد عليك
انت عارف السويس كلها قد الحق

فرنسا هانم يقول...

دعاء مواجهات
شكرا يا حبيبتى على الاهتمام الكبير ده كله
تحياتى لكى

فرنسا هانم يقول...

appy
ربنا يكرمك يا ابى

فرنسا هانم يقول...

Sally
مهما اعمل مش هاعمل زى اللى شفته من حبكم وحنيتكم وانا غايبه

فرنسا هانم يقول...

قوس قزح
على فكره انا وصلنا اميل انهارده من الرايق بيقول فيه انه اتكلم مع ابو خالد بالتليفون وهو بيسلم عليا
اشكره جدا
واشكرك اختى الغاليه قوس قزح

فرنسا هانم يقول...

سومه...مجنونه فى بلد عاقل
ربنا يبارك فيكى يا سومه

فرنسا هانم يقول...

الجمعاوي الاصيل
ميخاااااااااااااااااااااااا
حمدلله على السلامه
انا فرحت جدا بتعليقك

فرنسا هانم يقول...

همس الاحباب
على فكره يا خالد انا حاسه بيه فعلا
انسان بجد محترم
ربنا يباركلنا فيه ويشفى مريضته
امين يارب
شكرا اخى الجميل العطوف خالد ابو همس

فرنسا هانم يقول...

كلاكيت تانى وتانى
اعتبر ده وعد ؟؟؟؟؟؟؟؟؟؟؟؟؟
اصلى بصراحه شبطه
ومصدقت انى سمعت منكى الكلمه دى
انى فى انتظار ابدعاتك الكوميديه على
faransahanm@yahoo.com
وياريت يكونوا كام موضوع وسيبى لى الاختيار

فرنسا هانم يقول...

قوس قزح
والله انسانه جميله وعظيمه انا مش عارفه اقولك ايه فعلا انتى بقيتى حاجه مهمه جدا بالنسبه لى

فرنسا هانم يقول...

دعاء مواجهات
من العين دى قبل العين دى
تحياتى لكى

فرنسا هانم يقول...

د/أبويحيى وادم
متهيئلى رديت على التعليق ده قبل كده يا دكتور
بس يمكن فى الصفحه اللى فاتت
عموما احييك على الحمله

فرنسا هانم يقول...

نوره الخشن
نورااااااااااااااااا
اخيرا
كنتى فين ؟؟؟؟؟؟
عموما
حمدلله على سلامتك
اميلى
faransahanm@yahoo.com
ابعتى لى اميل وقوليلى فى ايه وزعلانه من ايه

فرنسا هانم يقول...

نعكشة
اهلا اهلا بيكى يا نعكشه
صورتك حلوه واسمك احلى
بس عندى سؤال
هى الصور كانت غاليه قوى للدرجه دى ؟
حراااااااااااااااام عليكى
خضتينى بالصوره والاسم

فرنسا هانم يقول...

نعكشة
اوعى تزعلى انا بهزر معاكى
انتى تشرفينى على اى شكل واى اسم

فرنسا هانم يقول...

عـمـرو قـطامـش
لأ يا خويا ده انا بحسبنى هزارى خفيف وبفهم فى الهزار طلع هزارى تقيل وايدى مرزبه وجعتلى قفايا لكن ان مش هاسيبنى لازم اخد تارى منى
تحيه لك فى اول زياره مرحه
بس ابقى شوف للحصان اللى ماشى على طول ده حاجه ياكلها

قوس قزح يقول...

صباح الخير فرنسا

ربنا يخليكى يارب انت اللى لنا كلنا حاجة مهمة اوى اوى

خدى بالك على نفسك

غير معرف يقول...

ايه يافرنساااااااا انتي شطبتي ولا ايه فين البوست الجديد شكلك طار من العش بجد

القلم السكندري يقول...

اهليييييييييين وسهليين


ألف حمد لله علي سلامتك يا فرنسا

وعودا حميدا وان شاء الله ف العش مطارتش


الكل منتظرك تاني ترسمي البسمة علي وجوههم بعذب حروفك واسلوبلك الرائع الرائق


لك موفور التحية

والف حمد لله ع السلامة مرة رابعة

حبيبـــــــة القمـــــر يقول...

جمدا لله على سلامتك يا قمر
والف مبروك على المدونه الجميله بتاعتك انتي والرايق
حقيقي تجنن
خلي بالك من صحتك ومتغيبيش تاني

أبو خالد يقول...

من فضلك أبنتى الغالية /صاحبة مدونة
فرنسا هانم
أنزلى بالبوست الجديد أكرمك الله
دمتى إنسانة نبيلة و صاحبة واجب

عبده الرايق يقول...

فرنسا عمك ابو خالد قالك نزلى البوست الجديد
يلا بقى يا فرنسا اسمعى الكلام

rtrcbh يقول...

السلام عليكم ورحمه الله وبركاته
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

‏«الأقدم ‏‹أقدم   ‏201 – 251 من 251   ‏›أحدث ‏أحدث»