ملعون ابو مجلس الشعب

اخوانى الكرام اخواتى العزيزات انا عارفه انى بقيت زى الشفافيه بتاعه عمنا وسيدنا وتاج راسنا الحزب الوطنى الديمقراطى (زغردى ياشوشو )
طبعا انى بقيت بعيده عنكم والشفافيه بقيت ابعد وابعد
امبارح
وما ادراك ما امبارح
وياحبه عين امى على امبارح
نزلت زى الاف بل ملايين المصريين علشان ننتخب مجلس الشعب
وياريتنى ما تنيلت وتهببت ونزلت
فضيحه بجلاجل
فضيحه على اعلى واوطى وادنى واقسى مستوى اخلاقى يا عبد الباقى
اول القصيد كان قبل الانتخابات لما الحزب باشا رفض الرقابه الدوليه على الانتخابات بحجه ان الرقابه انتقاصه لسياده مصر
ههههههههههه
كوتوموتو يا حلوه يا قطه هاتى عضه ياختى لامه
الرقابه على الانتخابات بقيت انتقاصه للسيااااااااااااااااااااااااااااده !!!!!!!!!!!!
هى فين السياده ؟؟؟؟؟؟؟؟؟؟؟؟
فين يا جمال يا مبارك السياده ؟؟؟؟؟
مر الاسطول الامريكى القناه لضرب العراق غصب عن عين سياده ابونا وابو اللى خلفونا
قتل صياد فقير فى قارب الصيد الصغير الخاص به فى المياه الاقليميه المصريه ومحدش قدر يقول بم
انضرب عساكر حدود من الاسرئيليين وماتوا ومحدش فتح خاشمه نهائى
فين السياده يا سياده السياده ؟؟؟؟؟؟؟
فين السياده يا حزب ساده ؟؟؟؟؟؟؟

المهم

فجأه ..... وبدون مقدمات
والدنيا ضلمه .... وابو رجل مسلوخه قاعد يخوف العيال
فجأه هوب ... اكتشف الحزب الواطى ان له سياده
واكتشف انه لازم يمارس سيادته على ارضه ضد اعدائه الكفره المصريين الملاعين والامريكان والاوروبيين واى قزم فى العالم تسول له نفسه المريضه ان يفكر ولو للحظه او يتوهم ان يفكر ان ينتقص من سياده الحزب على ارضه مصر
وللعلم
بس معلومه على الماشى
ربنا سبحانه وتعالى انعم على اعضاء الحزب رجال مصر العظماء ذكاء خارق ومطبخ قوانين عالى المستوى يستطيع بهما فى اى وقت ان ينتف ريش الاشاوش اللقطاء من باقى الشعب المدعو بالمصريين الذين يسمون انفسهم من باب اللف والدورات حزب الوفد وحزب الغد واخوان مسلمين وحزب الكرامه وحزب التجمع ......الخ وقضاه ومحامين ودكاتره ومهندسين وعمال وامهات وتجار .....الخ
نعم ان مصر هى الحزب الوطنى
والحزب الوطنى هو مصر
اما باقى الشعب فمثلهم مثل قبائل التاهوتى الماغونى والامريكان الغادريين
شعب بيبى ممكن يلعب بالكبريت يحرق صوابعه
رعا الله الحزب الوطنى ورعاه على تحمل مشاكلنا وتوفير البامبرز واللبن والمراجيح لنا حتى نشب ونكبر ونستلم منه الرايه فى العنايه بأنفسنا
ورحت الانتخابات
ووقفت طابور طوووووووووووووووووووووويل
وانا مش فى دماغى اى حاجه عادى يعنى اصلا الحزب الواطى خلا حكايه الطوابير دى ميزه حياتنا وافيونه دماغنا
بصراحه تعبت من الطابور
قلت ارجع الظهر يكون الموضوع هادى يا عبد الهادى
لفيت على المدرسه الفكريه بفيصل ومدرسه السلام بالصباح ومدرسه تل القلزم بالاربعين ومدرسه احمد عرابى واحمد رمضان بالاربعين
ومدرسه فى زرب مش فاكره اسمها
كل المدارس للاسف الشديد كانت فول طابور
الدخول اربعه اربعه
وكل اربعه بيقعدوا اكتر من ربع ساعه ان لم يكن نصف ساعه
لقيت وسمعت تعليقات كتير من الناس
وخصوصا من لجان السيدات حيث لم تدخل احداهن لمقابله زعبله القله صول باشا امن الدوله
وكانت هناك تعليقات من لجان الرجال
واترككم الان مع اهم التعليقات رجالى وحريمى دون تدخل رقابى منى وارجوكم سامحونى على الالفاظ
- انهارده اجازه من المدارس والاولاد لوحدهم ايه الارف والزفت ده !!!
- انا اول مره فى حياتى اشوف تهريج زى ده
- والنبى مفيش ولا واحده دخلت من ساعه هما بيضحكوا علينا
- والله عارفينكم هتدونا على قفانا يا ظلمه يا ولاد الكلب
- على الطلاق انا راجل موهزق انى اجى للارف ده
- ملعون ابو مجلس الشعب على اللى عايز ينتخبه وانا اولهم
- ماتفتح الباب ياباشا علشان ندخل حرام عليكم كده
- انا رحت اربع مدارس مش لاقيه لجنتى انا هاروح واللى يموت يموت يلعن ابوهم كلهم
والان اعود بكم الى المدونه
الحزب الواطى صاحب البلد لعب اللعبه صح ( لعبه صياعه دوت كوم )
غير معظم اللجان فى معظم الدوائر
ومحطش الاسماء والكشوف خارج اللجنه كما هو متبع
بالتالى محدش قدر يوصل للاسماء
وكثيرين معرفوش لجانهم
وبالتالى الاقبال كان ضعيف
وبالتالى اربعه اربعه يدخلوا ( اظنهم بيستحموا جوه )
وبالتالى الكشوف تبقى بنضارتها
وبالتالى سود بقى ياباشا براحتك
البلد بلدنا
والكشوف من مطابعنا
واتللجنه من حدانا
والمراقبين اولادنا
والنقل والفرز تباعنا
والمرشحين بتوعنا
والقلم فى ايدينا
ومصر ام الدنيا فى عينينا
وسلم لى على المرحومه الديمقراطيه
واخيرا
العنوان ملعون ابو مجلس الشعب لا اقصد به مجلس حقيقى يعبر عن المصرى الحقيقى وياتى من انتخابات حره نزيهه يشترك فيها كل ابناء مصر الحقيقيين
بل هو لفظ سمعته ممن اتعبهم الخداع ومكر الحزب و اقصد به مجلس ياتى على الظلم والقهر والتسويد للاستمارات وعرقله واضطهاد الاخر
وحشتونى جدا جدا جداااااااااااااااا
وخبر الزواج حقيقى بس للاسف فى بعض المشاكل انهت الموضوع نهائى (فرحه ماتمت )
-