انا احب امريكا

تحديث

****************
طلب منى اخوه واخوات عبر بريدى الالكترونى ... اللى ببلاش من غير ورقه بوسته ولا يحزنون ...ان اترك تدوينه انا احب امريكا لاطول فتره ممكنه ...وانا انحنى لطلبهم .. والبى لهم رغباتهم ...واترك التدوينه .يومين اخرين ... وانشاله ماحد حوش
=========================
ايوه بحبها .. حد عنده اعتراض
اللى معترض يطلع لى بره .. وانا افرجه شغله

حبيبتى امريكا ...نور عينى امريكا .....سندى امريكا
الناس دلوقتى قال ايه - زعلانه ان واحد مصرى اتقتل فى السويس بواسطه النيران الصديقه الامريكيه
ههههههههههه
الناس اللى زعلانه دى مخها ضارب ولا ايه ؟؟؟؟؟؟؟؟
ايه يعنى واحد انضرب بالنار طلقه قى راسه وطلقه فى صدره --حسب روايه اهله --ايه يعنى ...اختنا الكبيره وحبيبه قلبنا امريكا هانم كعب الغزال تعمل اللى يريحها ...واللى على كيفها ..واللى مش عاجبه يشرب من المجارى
ناس حلوين امامير طيبين واقفين بيتفسحوا فى الغاطس مستنيين دورهم فى عبور القناه ..وزهقوا ومفيش بط ولا وز ولا عصافير يصطادوها ..قاموا اصطادوا واحد مصرى قتلوه واتنين صابوهم ....فيها مشكله دى ؟؟؟؟؟؟؟
الغلط عندنا احنا
المفروض نوفر البط البرى والعصافير واليمام للسفن الامريكيه اللى واقفه فى الغاطس علشان لو حد زهق منهم يلاقى اللى يصطاده يلاقى عصافير وبط برى ....ها ...يبقى الغلط غلط مين ؟؟؟؟؟؟؟؟؟؟؟
تانى حاجه
السفينه الامريكيه قتلت الفريسه وسابت الصيد بتاعها ... يعنى حتى الصيد سابوه ....شكرا لكى امريكا ..شكرا على كرمك
المفروض
اننا نفرح ونهيس ونعمل الافراح واليالى الملاح
ونحتفل بتشريف المواطن المصرى المرحوم الشهيد محمد فؤاد بدخول الرصاص الامريكى لجسده
شرف كبير قوى لينا شرف كبير قوى لمصر
مبرووووووووووووووووك لمصر
مبروووووووووووووووووك لمصر
مش عارفه امنع نفسى من الدموع ...والله دموعى هتنزل ...والله عينى مش قادره تركز على لوحه المفاتيح ..
دموعى دى .....دموع الفرح ..ابكى معايا ....اذرفوا الدمع
نزلوا دموع الفرح
لحبيبتكم امريكا
نزلوا دموع الفرح انها شرفتنا بالرصاص الكريم فى جسد ابنائنا
يااااااااااااااااااه
مش متخيله
امريكا بتضحى برصاصتين علشان يصيبوا محمد فى راسه وصدره
رصاصتين ؟؟؟؟؟؟؟؟؟؟؟؟؟؟
شكرا امريكا على التضحيه بالرصاصتين نظير انسان تافه
من شعب تافه
ومن حكومه تافه
ومن قلوب تافه
ومن مشاعر تافهه
ومن حمايه حقوق الانسان التافهه
ومن كاتبه تافهه لهذه الكلمات
ما معنى ان تطلق السفينه النار على البمبوطيه فى مياه اقليميه مصريه ؟؟؟؟؟؟
انها انعدام للسياده
وانعدام للكرامه
وانعدام للانسانيه
انا اعرف ام احمد خاله المجنى عليه قصدى خاله الشهيد _ لانه كان يقصد باب رزقه - ولكنى لم استطيع الذهاب الى الهيشه تلك المنطقه التى تسكن فيها الخاله .. ولكنى تحدثت مع المقربين منها
الله انا لا نسألك رد القضاء ولكن نسألك اللطف فيه
تقول الروايه الامريكيه
او روايه المتأمركين
ان زورقين مصريين اقتربا من البارجه غلوبال بتريوت" وان الجنود اطلقوا طلقات تحذيريه مضيئه للزورقين ولكنهما واصلا الاقتراب فاطلق الجنود الطلقات التحذيريه مره اخرى فاصابت اثنا وقتلت اخر

حراااااااااااااااااااااااااااااااااااام
عليكم
حرااااااااااااااااااااااااااااااااااام عليكم
حرام عليكم بجد
تتصوروا لو انتوا مكان البمبوطيه دول
ومركب طلبت منكم عدم الاقتراب
واطلقوا طلقات تحذيريه فى الهواء
اول حاجه هتعملوها ايه ؟؟؟؟؟؟؟؟؟؟
هتجروا طبعا وتهربوا
وكمان بذمتكم
فى حاجه اسمها طلقات تحذيريه تصيب اتنين وتقتل الثالث ؟
تانى حاجه فى حاجه اسمها طلقات تحذيريه تصيب الرأس والصدر؟

الروايه الاقرب للصحه
ان السفينه سفينه شحن عاديه تستأجرها القوات الامريكيه لنقل معدات وشياء عسكريه --طبعا معامله البمبوطيه للسفن التجاريه غير معاملتهم للسفن الحربيه والبوارج - اقترب البمبوطيه الذين يحملون تراخيص للعمل فى الخليج لعرض البضائع على السفن التى تستعد لدخول القناه .. وكان الوقت متأخر حسبما اخبرنا الاهالى بانهم تلقوا الخبر فى ساعه متأخره من الليل .. وفجأه انهال الرصاص عليهم من محترفين او من قناصه لان محمد اصيب بطلقه فى راسه واخرى فى صدره
علشان كده
انا بحب امريكا
وبموت فى امريكا
وروحى وعقلى تراب امريكا
وعلشان كده اتشرف انى ارسل رساله شكر لبوش
واقوله
الكلب الحقير بوش ( مدونه نظيفه ) انضمت روح محمد الى مئات الالاف من الارواح التى تسبب غباءك واستهتارك وافراطك فى النرجسيه فى قتلها
ستسأل امام رب العرش العظيم عنهم
وعن هذه الارواح
باى ذنب قتلت

واخر كلماتى
حسبى الله ونعم الوكيل

غير معروف ...ونزهى

الاخوات المدونات والاخوه المدونين
السلام عليكم
مش من عادتى انى اكتب تدوينات عن التعليقات لكن تعليق لواحد غير معروف غاظنى وفقع مرارتى .. وانتوا عارفين ان المراره اصلا بتشاور عقلها يعنى متلزقه وواقفه على همسه
صاحبنا بقى همس الهمسه دى وضيع المراره خالص

وقطع الغيار الصينى والتيوانى مفهاش بند المراره
علشان كده قلت افضفض معاكم وانقل لكم لقطات حيه ومباشره من استاد المدونه الدولى وانتم تحكموا براحتكم
قبل ما انقل لكم اللقطات والمقتطفات اللولبيه المارونيه الحلزونيه
اود ان اشكر الاخوه الاعزاء الذين تصدوا لهذا الغير معروف واولهم حسب التعليق
---------------------------------
ام الابناء اختى وحبيبتى وزوجه الطائر الحزين
صحفى مصرى مشاغب الضيف الجديد للمدونه
عبده الرايق صاحب اجمل ابتسامه على النت وياريت تتدخلوا عنده وتحكموا بنفسكم
أبو خالد الاخ الكريم الذى اتمنى ان يصدر مدونته قريبا والتى اتوقع لها مكانا بارزا مع العمالقه
مهندس مصرى اجدع دمنهورى ندعوا له بالتوفيق فى سفره
somaa الاخت العزيزه جدا
-------------------------------------
واليكم الان مقتطفات من تعليق الغير معروف
-----------------
غير معرف يقول...
والله يا فرنسا هانم يا ختى لو كان على رحيل الاحزاب هى اصلا مرتحله منغير ما حد يرحلهااما اللى معطل المسيره ومحسس الناس بأن الحكومه مقصره فهو انت وامثالك فعلا انتوا لا تقدرون ما تفعله الحكومه لكم من مشروعات وخدمات وتنسون كل هذا وتتذكرون للحكومه مساوءها كل بلد ياهذا فيها حكومه لها نجاحات ولها اخفاقات انظروا جميعا الى محاسن الحكومه قبل ان تنظروا الى اخفاقاتهاانظروا الى المجهود المبذول من جانب الوزراء والمسئولين عن الحكومه انظروا الى المستشفيات التى تقدم العلاج المجانى انظروا الى التامين الصحى الذى يخدم الملايين ويكلف الدوله المليارات انظروا الى المشروعات العملاقه التى انشأتها الدوله انظروا الى مشروعات مترو الانفاق وتصوروا كيف الحال بدون هذا المشروع العملاق انظروا الى المد العمرانى فى كل المحافظات حتى بدءت الصحراء تتأكل من حول المدن انظروا الى اعدادكم التى وصلت 80 مليون نسمه تتكفل الحكومه فى توفير متطلباتهم الاساسيه انظروا الى الدعم المقدم للخبزانظروا الى من ظهر بينكم ياخذون هذا الدعم ويطعمونه للحيوانات وفى النهايه تقولون الحكومه انكم بافعل شعبا لا تريدون الحياه الكريمه فانتم تعيشون فيها ثم تتسألون اين هى انتم يا مدام فرنسا هانم تريدون من يحضر الطعام اليكم ويفتح افواهكم ويطعمكم حتى انكم تتمنون ان يساعدكم فى تحريك اسنانكم ثم تنتظرون ان يقوم باحضار الماء ليغسل لكم ايديكم الكريمه انتم تتوهمون

ثم يقول

ولكن ما المطلوب من الحكومه ؟هل مطلوب منها توصيل الخبز فى ورق سلوفان للمواطن ووضعه على الطبليه المبجله بتاعت حضرته هل مطلوب منها انه بمجرد حضور المواطن يقوم الجميع بالهروب من امام المنفذ حتى يتسلم سيادته حصته المقرره طيب يا ستى ما كل الواقفين مواطنين انا شايف اننا نعمل فرن خاص لكل مواطن بالتليفون يا خد العيش بتاعه وكمان يطلب فى المقايسه بتاعه الطلب للرغيف ابو شلن ان كان عايزه سوى ولا نص سوى عايزه عادى ولا محمص عايزه طويل التيله ولا قصير التيله عايزه على قفص ولا فى علبه جاتوه

ثم يقول مره اخرى

علشان كده بنقول وبنكررمفيش داعى نلقى بالتهم جزافا تانى حاجه موضوع المستشفيات عارفه المواطن بيدفع فى المستشفى الحكومى كام جنيه واحد يتم الكشف عليه واعطائه علاج وادويه ربما تصل الى 40 و50 جنيه وفى النهايه تطلع الدوله مبتعالجشى المواطنين وفتحاها لوكانده لاء والف لاء الدوله تبذل اقسى ما فى وسعها لراحه المواطن وعلاجه وتوفير الامن والامان له

ثم يغرد ويقول

حد فيكم راح مكتبه الاسكندريه وشاف المجهود المبذول فيها ؟؟؟حد فيكم يقدر يقول كلمه حق عن مستشفى القصر العينى الجديدعن الدمرداش عن المشروعات العملاقه التى احنت ظهر البلد انتوا عارفين كميه الجهد المبذول من الوزراءاللى للاسف بنتريق عليهم وبنقول ا لصحه بتاع الصرف الصحى وخلافه لااحنا عايزين نتكلم بموضوعيه شويه وبلاش الكوميديا السوداءاللى هى بالفعل سوداء تحياتى يا فرنسا واعقلى
------------------

وانا اترك لكم حريه التعليق على تغريده

الحياه السياسيه ...وطشه الملوخيه

اخواتى المدونات اخوانى المدونين
السلام عليكم

المرشد العام للاخوان المسلمين قرر وقف اى نشاط سياسى للاخوان وعدم دخول اى انتخابات ..كما قرر رئيس حزب الوفد حل الحزب وعدم المشاركه السياسيه من نوع ... كما حذ ا حذوهم حزب التجمع ومصر الفتاه حزب الغد وووووووووووجميع الاحزاب ... وبهذا لم يتبقى على الساحه الا الحزب الوطنى الديمقراطى

كان هذا هو الموجز واليكم الوضع بالتفصيل

المشهد الاول

صباح العناب المسكر يا سعاده الوزير

صباحه قشطات بالمكسرات

سمعت عن الهوجه بتاعه حل الاحزاب ؟

ههههههههه طبعا هو انا نايم على قفايا كل الاخبار بتوصل لى طازه بنار الفرن خلاص احنا كده مجلس الشعب بتاعنا كومبليت ميه فى الميه وطنى ومزهزه ..مجلس الشورى والمحليات والنقابات كله وطنى ... احب وطنى واموت فى وطنى ووطنى وطنى يحيا وطنى

امسك الخشب ياباشا حضرتك مبسوط على الاخر

طبعا يابنى بلا معارضه بلا وجع انفخ ... خليها كده زيتنا قى دقيقنا

المشهد الثانى

مبروك التكليف بالوزاره الجديده يا سعاده رئيس الوزراء

الله يبارك فيك ممنون والنبى ممنون

حضرتك انا جايب كشف باسماء الوزراء الجداد زى ما حضرتك امرت بس سايب لحضرتك الاختيار ... حضرتك وزاره الصحه مين هيمسكها ؟

ايه رايك فى فتحى ابو شنب ؟

مقاول الصرف الصحى ؟؟

ايوه فعلا ده راجل خدوم ومعانا طول عمره واحسن حاجه انه بيفهم قوى فى الصحى ..وبعدين صرف صحى ووزاره الصحه كله واحد

تمام يا فندم عين العقل ... طيب ووزاره التعليم ؟؟

ايه رايك فى المعلم موسى الخشاب بتاع الجيزه واهو طول عمره راجل معلم قد الدنيا ومعلم وتعليم كله واحد

ياسلام على دماغك يا باشا ربنا يزيدك من علمه ...طيب والاوقاف ؟

الواد موسى بتاع موقف احمد حلمى

والخارجيه ؟

ايه رايك فى سعيد مسعد الحانوتى ؟؟؟

بس ده حانوتى ياباشا مش هيفهم فى الخارجيه

ليه ميفهمشى طول عمره بيخرج الناس ... وكله خارجيه

طيب سعادتك انا عشمان فى وزاره الاعلام

لمين ؟؟

الواد مصطفى ابن اختى واد حنجرته زى المدفع ومن الابتدائى لغايه الثانوى وهو بيقف الالفه فى تحيه العلم فى المدرسه ...واهو كله اعلام

المشهد الثالث

ايه يا فتحى باشا مالك زعلان كده ليه ؟؟؟؟

البورصه الله يخرب بيتها خسرت فيها امبارح اتنين مليار جنيه

طيب زعلان ليه ؟ .. انت عندك كذا سلعه تحت امرك ...حرك الاسعار وعوض خسارتك

اصلى لسه مغلى الاسعار من اسبوع

ياسيدى انا هو فى حد هيحاسبك .. هو فى اصلا منافس ليك .. يا راجل براحتك

على رايك ...واللى عارف بيت ابويا يروح يقوله ...واللى يقدر يشترى حاجه من بره يورينى شطارته

المشهد الرابع

تمام يا باشا تحت امرك

تعالى يا مصطفى

خير ياباشا

انا حلمت حلم مزعج

خير اللهم اجعله خير

حلمت انى راكب عجله وواحد خبطنى راكب عربيه مرسيدس حمراء

ولا يهمك ياباشا بكره نطلع قانون بمنع العربيات المرسيدس من الجمهوريه نهائى ومنع اللون الاحمر من اى عربيه فى الجمهوريه

تفتكر ده ممكن ؟؟

هو المجلس مش كله بتاعنا
وكل المجالس بتوعنا يبقى موافقون .موافقون
على اى حاجه حتى لو على دق المحشى فى ايد الهون

التاج النبوى

وصلنى تاجين الاول من ابن حجر العسقلانى وهو عن تشكيل الوزاره
والثانى التاج النبوى
وانا استأذن ابن حجر ان اجاوب على التاج النبوى اولا
التاج النبوى وصلنى من الاخت الكريمه امه الله

س 1 : لو سألك غير مسلم عن نبي الإسلام بماذا ستجيبه في سطور ؟

انه محمد بن عبد الله نبى امى نزل عليه الوحى بلسان عربى .. عجز اهل اللغه ان ياتوا بحرف مما انزل عليه
انه يدعو الى مكارم الاخلاق والرحمه وعباده الخالق الواحد الاحد

س 2 : لو اتيحت لك الفرصة لرؤية النبي صلي الله عليه وسلمفي أي مكان تريد أن تقابله ؟

فى مسجده

مالذي ستخبره به ؟


انى مازلت على حبى لدينه وطاعتى لربه واقتدائى بسنته

وماذا ستطلب منه ؟

الشفاعه

س 3 : اذكر مقولة قالها النبي صلي الله عليه وسلم لصحابي تمنيت لو كان قالها لك ؟

عن زيد بن حارثة قال : خرجت مع رسول الله وهو مردفي ... في أيام الحر ، حتى إذا كنا بأعلى الوادي ، لقي زيد بن عمرو ، فحيّى أحدهما الآخر ، فقال له النبي صلى الله عليه وسلم : ما لي أرى قومك قد شنفوا لك ، أي : أبغضوك ؟ قال : أما والله إن ذلك مني لغير نائرة كانت مني إليهم ، ولكني أراهم على ضلالة ، فخرجت أبتغي الدين، حتى قدمت على أحبار أيلة ، فوجدتهم يعبدون الله ويشركون به ، فدُللت على شيخ بالجزيرة ، فقدمت عليه ، فأخبرته ، فقال : إن كل من رأيت في ضلالة ، إنك لتسأل عن دين هو دين الله وملائكته ، وقد خرج في أرضك نبي ، أو هو خارج ، ارجع إليه واتبعه ، فرجعت فلم أحس شيئاً … ثم تفرقا ، ومات زيد قبل المبعث ، فقال رسول الإسلام : يأتي أمة وحده .قَالَ سَعِيْدٌ: فَقُلْتُ: يَا رَسُوْلَ اللهِ! إِنَّ أَبِي كَانَ كَمَا قَدْ رَأَيْتَ وَبَلَغَكَ، وَلَو أَدْرَكَكَ لآمَنَ بِكَ وَاتَّبَعَكَ، فَاسْتَغْفِرْ لَهُ. قَالَ: (نَعَم، فَأَسْتَغْفِرُ لَهُ، فَإِنَّهُ يُبْعَثُ أُمَّةً وَحْدَهُ).

اتمنى ان هذه المقوله قيلت لى ويستغفر رسول الله لوالدى

س 4 : اذكر أحب حديث لرسول الله صلي الله عليه وسلم على قلبك ؟

حدثنا محمد بن المثنى قال: حدثنا عبد الوهاب الثقفي قال: حدثنا أيوب، عن أبي قلابة، عن أنس، عن النبي صلى الله عليه وسلم قال: (ثلاث من كن فيه وجد حلاوة الإيمان: أن يكون الله ورسوله أحب إليه مما سواهما، وأن يحب المرء لا يحبه إلا لله، وأن يكره أن يعود في الكفر كما يكره أن يقذف في النار).

س 5 : كيف تعرفت على سيرة الرسول صلي الله عليه سلم ؟ "ما هو المصدر"

اولا درست السيره فى المدرسه .... ثم تتبعت سلسله وجدى غنيم
وقرأت كتاب الرحيق المختوم وبدايه ونهايه وكثيرا من كتب السيره

س 6 : اذكر صفة تدل على عظيم خلقه صلي الله عليه وسلم والاستدال عليها بموقف ما ؟

الوفاء
وكان من وفائه لأصحابه موقفه مع حاطب بن أبي بلتعة مع ما بدر منه حين أفشى سر الرسول صلى الله عليه وسلم وصحبه الكرام في أشد المواقف خطورة ، حيث كتب إلى قريش يخبرها بمقدم رسول الله وجيشه، فعفى عنه الرسول صلى الله عليه وسلم ، وفاءاً لأهل بدر ، وقال :( إنه قد شهد بدراً ، وما يدريك لعل الله اطلع على أهل بدر ، فقال اعملوا ما شئتم فقد غفرت لكم ) رواه البخاري و مسلم


س 7 : هل هناك تأثير لرسول الله صلي الله عليه وسلم على "شخصيتك أو حياتك أو بيتك "إذا كانت الإجابة نعم فاذكر مثالاً واحداً لكل منهم ؟

نعم
على شخصيتى
احاول ان اقتدى برسول الله فى كل افعالى حتى اصل لمكارم الاخلاق
وفى حياتى
احاول ان اعامل الناس بمثل ما وصانا به رسول الله
وفى بيتى
احاول ان اجعله يتشرف بكلمه لا اله الا الله محمد رسول الله

امرر التاج
الى كل مسلم ومسلمه يريد ان يجاوبه

الحب الحقيقى

السلام عليكم ورحمه الله وبركاته
امبارح حصلى موقف فكرنى بالذى مضى
رجعنى بالذاكره الى الوراء
رجعنى الى الزمن السحيق ياااااااااااااااااااااااه زماااااااان قوى
من اكتر من 20 يوما
اكيد كان كتير منكم اتولد فى الوقت ده ... واللى انا متأكده منه انى كنت مولوده
من اكتر من عشرين يوم رجعت الشغل تانى بعد الاجازه بتاعه ام دبوه
ومن يوم رجوعى للشغل وانا حاسه بجو حب حقيقى وجميل وكبير بين زملائى فى الشغل
قبل الحادثه التى تحدثت عنها وسائل المواصلات قصدى وسائل الاعلام العربيه والعالميه والعال200 والتى وقف الانتربول امامها طويلا وهو يا حبه عين مامته بيحاول معرفه قشره الموز اصلا كانت على موزه ولا برتقاله
ولا كانت غلاف لباكو باسكويت
وطبعا مقدروش يقرروا الا بعد استخراج الصندوق الاسود من صفيحه الزباله وتمت محاوله وراء محاوله واستعانوا بفرقاطه بحريه دمياطيه وتم انتشال الصندوق الاسمر ملك روحى وبعدين بعتوه الى امريكا للتحليل ويقال والعهده على خالتى ام محمد الجاره انهم ارسلوه للندن .. وطبعا فرشوا كليم اسوانى وحصيره اسيوطى وجابوا كام قله قناوى وشويه ترمس وحمص الشام وعملوا قعده عرب وفضلوا يحللوا الصندوق الاسود والمنيل بستين نيله
والى الان والى وقتنا هذا مقدروش يحللوا الصندوق
وطبعا مقدروش يقولوا قشره الموز المقبوض عليها والمتحفظ عليها تحت رقم 1278 م ز/ و تبقى قشره موز ولا قشره برتقال ولا ورقه موس حلاقه ولا غلاف باكو باسكويت
وطبعا تم حفظ الموضوع لعدم اكتمال الرؤيه وعدم التأكد واليقين من ان قشره الموز السبب ام المجنى عليها
المهم
رجعت الى الشغل
كنت بركب قبل الحادثه ميكروباص خاص بالشركه بتاعتنا
وفى اليوم اللى رجعت فيه لقيتهم باعتين لى عربيه ملاكى خاصه بالشركه وفيها السواق واتنين موظفين زملاء
طبعا انا كنت واقفه فى الشباك مستنيه العربيه الميكروباص
ولقيت عربيه ملاكى وقفت على باب العماره والسواق بيجيب وراء وقدام علشان يحضن على الباب لغايه لما كان ناقص يطلع على السلم
انا استغربت وقلت هى دى مركب شحن بتحضن على الرصيف ولا ايه ؟
المهم
لقيت اتنين زملائى خرجوا من العربيه وبشاورولى انزل
نزلت ولقيت الاتنين والسواق فاتحين الباب وبيمدوا ايديهم يساعدونى اركب العربيه
قلت لهم يا جماعه انا كويسه جدا واقدر اركب لوحدى
ركبت جنب السواق وزملائى ورا
كل شويه يبصوا ويسألونى عامله ايه يا استاذه
اقولهم الحمد لله
وشويه والسواق يسألنى
عامله ايه يا استاذه ؟
اقوله الحمد لله
لغايه لما وصلنا وكانوا سألونى يطلع 15 مره
وصلنا لباب الشركه العمومى وحسيت ان الامن وكل اللى على البوابه وناس معرفهمشى خالص بيشاورولى كانى جايه من على جبهه القتال بعد حرب اكتوبر او كانى انا اللى اكتشفت الفنتو ثانيه مع عمنا احمد زويل
وصلنا لباب مبنى الاداره وفضل السواق يحضن ويحضن بالعربيه لغايه لما ساوا نفسه بالباب ... نزل زملائى بسرعه وفتحوا لى الباب ولقيت جموع من الموظفين اتلموا حولى وهاتك يا بوس اموااااااه اموااااااه اموااااااه
طبعا الزميلات هما اللى قاموا بالواجب ده
وخادونى فى وسطهم ودخلوا بى الى المكتب زى اللمه اللى كانت حوالين ابو تريكه بعد ما جاب الجون فى الكاميرون
اول ما قعدت هاتك يا عصير فى شاى فى حلبه فى قهوه ...كان ناقص يجيبوا البوفيه ويحطوه كله فى بقى
وبعد ساعه قعدوا يتحايلوا عليا انى اروح استريح وانا مرديتشى
ولغايه انهارده والحب والمحاباه واللمه والاخوه حولى من كل ناحيه فى شغلى
اللى خلانى اكتب عن الموضوع ده
امبارح
حوالى الساعه اتنين بعد نص الليل
لقيت جرس الباب بيضرب
سحبت المطواه قرن الغزال ام خمس تكات
وطلعت للصاله وبصيت من العين السحريه لقيت واحده صحبتى من زوار الصالون بتضرب الجرس
انا اتخضيت وقلت مين قالت انا فلانه وانا كنت شايفاها لكن حبيت اتأكد
فتحت لها الباب لقيتها اترمت فى حضنى وهاتك يا عياط
سألتها بعد ما هديتها مالك ؟؟
قالت لى اتخانقت مع جوزى وسبت له البيت ومشيت
هى ساكنه فى العماره اللى ورانا يعنى الحيط فى الحيط
قلت لها ايه السبب ؟؟
قالت القبض بتاعى على القبض بتاعه خلص وانهارده لسه 14 فى الشهر.. الاسعار غليت وولعت وهو مش حاسس باى فرق وفى الاخر بيتهمنى انى مسرفه رغم ان كل حاجه زى ماهى ومش عارفه اعمل ايه ؟؟؟
انا طبعا طلبت جوزها فى التليفون وفى خمس دقايق كان معانا
عملت معاهم حركه جدعنه تندم عليها الجيوب
وخرجوا وهما بيدعوا لى بطوله العمر
وللاسعار المولعه بقصف العمر

سر الفراعنه

اخواتى المدونات واخوانى المدونين
السلام عليكم
كل فرد منكم بالاسم فردا فردا يجيب شريط نور ويعلقه على المدونه بتاعته احتفالا بفرنسا هانم
خلاص ياباشا بابتاع البوغاشا هاوصل للعلماء الكبار ويمكن اخد جايزه عمنا الكبير نوبل
وهاروح السويد ...وهاشيل حديد ...وانزل على السلالم ...واتكعبل من جديد
وايييييييييييييييييييييييييه
الحكايه ايه بقى
صلوا على النبى
كان يما كان كان فى زمان واحده ست عندها 12 بنت
لالالالا
مش دى الحكايه صبركم عليا شويه
الحكايه انى اتفرجت على فيلم ادنبى ( اجنبى ) وشوفت اختراع اسمه المحاكاه
والمحاكاه دى عباره عن لعبه الواحد يقعد فى حاجه زى الاوضه كده وتقعد تتهز بيه ويحط على راسه حاجه عامله زى الخوذه وشويه اسلاك وكام زرار وشاشه والواحد يفتكر نفسه فى حرب النجوم ولا فى لعبه التلات ورقات ولا اى لعبه وتبقى عامله زى الحقيقه
انا طبعا
وبكل فخر
اخذت اللعبه دى وقلت انفذها واروح للقدماء المصريين واعرف سر الاسرار
زى حكايه اله الزمن والكلام ده
بس بما ان اله الزمن وهم .... والى الان لم تثبت صحتها ... وبما ان المحاكاه حقيقه
قلت اركب الهوى
قصدى اركب المحاكاه
كام لوح ابلاكاش محترمين وكام زاويا حديد من بتوع العز باشا
وكام مسمار وعملت اوضه
ووقفتها على عجل بسوسته
واتفقت مع اتنين عمال اول ما ادخل الاوضه يفضلوا يهزوها
زى نظام الافلام بقى وكده
دخلت
وقعدت على الكرسى ...ولبست فى راسى حله تيفال الاصلى ... ولزقت فى جسمى كام حته من حبل الغسيل ... ولبست نضاره .. وحطيت قدامى كشاف علشان يسخن الجو واعرق بقى علشان الامور تبقى حلوه
واديت الاشاره
بصاروخ من بتاع رمضان ولعته ... وبوووووووووووم
بدء العمال يحركوا المحاكاه
وانا اعرق .. واعرق .. واعرق
وجسمى يترعش
والحله تخبط فى نافوخى
ومفيش لا حس ولا خبر
غيرت الحله وجبت كسروله بيركس والحال زى ماهو
وفجاءه بدءت المحاكاه
لقيت واحد لابس ملابس الفراعنه
وباين عليه المهندس بتاع الهرم
قلتله السلام عليكم يا باشمهندس

بص لى وقالى رخ حور

يا عم انا مبفهمشى كلامكم ده ولا افهم لغتكم كلمنى بالاشاره .... وشاورت له على الرسم اللى قدامه وقلت له .. ممكن اعرف سر الهرم ايه ؟؟؟؟

بص لى وقالى رخ حور

قلت له عمنا ارحمنى انا خابطه مشوار ابن لذينا بالعجله لهنا علشان اعرف سر الهرم

قام قالى رخ حور ... وسابنى وخرج .... ورجع بعد شويه ومعاه واحد تانى ... وبص لى وقالى
بقولك ايه متوجعيش دماغى انا مش فاضى لك ومبعرفشى اتكلم عربى الكاتب معاكى اهه واشترى دماغك بقى ... وفكك منى ..علشان اصهلل مع المشروع بتاعى
بصيت له وقلت له .. يابن الايييييييييه انت بتتكلم عربى مدردح كمان ؟؟؟

قالى .... رح حور

قلت له مع السلامه ياقمر روح ياباشا والقلب داعيلك

قام الكاتب قالى .... خير يا هانم حضرتك عايزه ايه ؟؟ ودخلتى هنا ازاى ؟؟؟ ومين القائد بتاعك ؟؟؟؟ ومين الجماعه اللى انتى شغاله معاهم ؟؟
قلت له انا اسمى فرنسا هانم

ضحك وقالى...ههههههههههههه بتاعه النت ؟؟؟

قلت له ...نت ؟؟؟ هو انتو تعرفوا نت ؟؟؟

قالى..... قدرتوا تعرفوا اسرارنا ؟؟؟؟؟؟

قلت له ..لا

قالى تبقوا مش من مستوانا ..... هههههههههههههههههه

قلت له... انا عايزه اعرف سر الهرم

قالى.... ماشى من عيونى واوض قلبى الاربعه

قلت له ... طيب وسر التحنيط

قالى انت تأمر يا جمييييييييل بس كده ... شوفى ياستى انا هاشرحلك كل حاجه ... ودى برديه مكتوب فيها كل حاجه

وششششششششششششششششششششششششششششششششششش
ايه ؟ ليه ؟ فين الصوره ؟ فين المحاكاه ؟
طلعت اجرى من الاوضه لقيت العمال قاعدين بيشربوا سجاير
قلت لهم وقفتوا ليه ؟؟؟؟؟؟
قالوا بنستريح شويه يا هانم
دخلت جوه الاوضه ابكى لانى لايمكن ارجع تانى هى مره واحده بس لكل زمن
رااااااااااااااااااااااااح
الحلم راااااااااااااااااااااااااااااااااااااح
ولا اقولكم
ملحوقه فى زمن تانى يمكن الاقى حاجه تشهرنى وتخلينى عالمه كبيره ( مش عالمه رقاصه ) لا عالمه بتاعه نوبل

وتحياتى لكم

الاحتكار ... مارد جبار

ومنين اجيب ناس لمعناه الكلام يتلوه الجنيه يا حبه عين امه . الاشرار قتلوه
الحاج جنيه بتاع زمان ايام الجنيه الجبس اللى كان قد الفيل ويتصر فى منديل ...مات ..مقتولا يا ولدى مقتولا مقتول
الجنيه اللى كان يقف فى جيب الواحد فارد جناحه وبيقول يا دنيا اتهدى ما عليكى قدى
الجنيه ابو درعات حديد اللى كان بياكل ريرى وبيغنى هو واخواته ..جانا ريرى جانا غنوا وقولوا معانا
قتله وابور السكه الحديد
داس عليه بعجله الحديد وهرسه
وابور السكه الحديد ... قاتل الجنيه ... الاحتكار
كنت بذاكر لولاد اختى فى سنه سته ابتدائى ولقيت فى ماده الدراسات الاجتماعيه من انجازات ثوره 1952 القضاء على الاحتكار
يااااااااااه
هو صاحبنا الاحتكار باشا كعب الغزال من ايام ثوره 52 ؟؟؟؟؟؟؟؟؟؟؟
طيب طالما الثوره قضت عليه وجابت داغه .. رجع ازاى الحزين ده ؟؟؟؟
هو الحزين اللى ما يتسمى ده بسبع ترواح ولا ايه ؟؟؟؟؟
لا بجد هو رجع تانى علشان يا خد حقه من المصريين ؟؟؟
ولا استنسخوه .... يا خوفى يابدران
ياخوفى لحسن الاستنساخ بيه يكون نجح مع اللى مايتسمى احتكار باشا
دلوقتى يا جماعه احنا ماشيين فى طريق عتمه ومليان سحالى وبراص وتعابين ورخ
اروح اشترى رز الاقى سعره ذاد .. اسأل البياع يقولى ..يا هانم ممكن وانتى واقفه دلوقتى يجى تليفون السعر ذاد
الله ربى ... ياعمى الحاج ده سعره ذاد عن امبارح .. يقولى ولسه
السكر غلى وانا احلى بايه...حبيبى يابو على بتعيط ليه ؟
الزيت ولع والدقيق شاط وام الخلول غليت
دلوقتى ياسيد يا محترم
الواحد مننا مفروض يروح للبقال يخطف اللى عايزه ويدفع فلوسه ويجرى بسرعه من قدام البياع
علشان لو اتأخر شويه الاسعار بتزيد والحاجه بتغلى
عزيزى المدون عزيزتى المدونه
حان الوقت لكى نمارس رياضه الجرى واختراق الضاحيه
اجروا يرحمكم الله
اشتروا بضاعتكم واللى محتاجينه واجروا من قدام البقال بعد ما تحاسبوه
علموا ولادكم الجرى
حتى الكبار فى السن والعواجيز
الكل لازم يجرى
نصيحه
لو اشتريت حاجه ووقفت عند البقال علشان تشترى حاجه تانيه
ادفع حق الحاجه الاولانيه وخبيها بعيد احسن تغلى ويلهفها منك البقال
عارفين ده كله بسبب ايه ؟؟؟؟؟؟؟؟؟؟؟
الاحتكار
احمد عز بتاع حديد عز اللى مشغل عنده 7000 واحد ومنكد على 80 مليون واحد وفرحانين قوى وهما بيجوا فى الاعلانات
وبيقولوا
انا بشتغل فى حديد عز
يافرحتنا بيكوا
اول مره فى حياتى بشوف اعلان فى الدنيا بالشكل ده
يعنى ممكن بعد كده نلاقى عم عطوه بتاع الفول
عامل اعلان .. وناس جايه تقول انا بشتغل عند عم عطوه ... انا بشتغل عند عم عطوه .. انا بشتغل عند عم عطوه
ولا نعملها زى الشات بتاع الفضائيات
محمود بشتغل عند محلات البمبى وبيهديكوا السلام __ ومديحه بتشتغل فى كوافير تاتا وتهديكوا السلام -- وحسونه بيشتغل فى المصريه للسرقات وبيهديكوا السلام -- وسنيه متعووووووووووووده دايما انها تهديكم السلام --
وفرنسا هانم بتشتغل سمكه فى البحر وتهديكوا السلام ( الجمله دى محشوه )
وابور اللاحتكار رجع واستأسد وانتشر وبقى غول كبير
وقتل الجنيه
خلاص مبقاش للجنيه قيمه
اتهزاء
وبقى زيه زى المرحوم قرش والمرحومه تعريفه
سبب كل اللى احنا فيه ده الاحتكار
اللى بيقولوا ان الثوره قضت عليه

الحلقه الاخيره

السلام عليكم ورحمه الله وبركاته
الاخوه والاخوات
رجاء خاص

-

********
وملحوظه مهمه وقد اعذر من انذر
ارجوا قراءه الحلقه الاخيره بتمعن شديد لانها مهمه جدا
وارجوا عدم التعليق بدون قراءه لان اللى هيعلق من غير ما يقراء كويس هاعرفه
واوده الفيران موجوده هحبسه فيها للخطه الخمسيه الجايه

****************
الحلقه الاخيره

-

**************
كان انتصار ابطال المقاومه الشعبيه والدفاع المدنى وشعب السويس وفلول القوات المسلحه فى يوم 24 اروع مثال للمقاتل المصرى الشريف
وبعد الهوجه والضرب اللى كان على ودنه
وبعد ما اخد الاسرائيليين على قفاهم فى السويس جريوا زى الفيران على قسم شرطه الاربعين واستخبوا فيه
وهنا كل الكمائن وكل الفدائيين اتجمعوا حول القسم وعازمين على اخراج تلك النجاسه منه
وكان الاسرائيليين فى الداخل مسلحين باحدث الاسلحه الاوتماتيكيه ومحتمين بالقسم دى الاسوار العليا
وكانت المقاومه فى الخارج تنتظر بالاسلحه البسيطه والعصى والحديد والمطاوى والسكاكين
وحاول البطل ابراهيم سليمان القفز من سور القسم الا انهم قتلوه على الفور
وحاول عده ابطال الدخول الا ان الاسرائيليين قتلوهم
فتوالى قدوم المقاومين والشعب الى القسم
وهنا
حس الاسرائيلين بالخطر ... وان اسلحتهم مش هتفيدهم ... فاطلقوا النيران بكثافه وحاولوا الفرار
ولكن على مين يابا
ده فى بره وحوش تاكل الظلط
وتقرقش الحديد
وفعلا ........ اكله عروه والله
مسحوهم باستيكه من على ارض السويس الباسله
تانى يوم واهم يوم فى حياه البطل حافظ سلامه يوم 25 اكتوبر
فى اليوم ده كان الاسرائيلين مش قادرين يحتلوا السويس وكانت المقاومه مسوده عيشيتهم
فارسل القائد الاسرائيلى الى المسئول عن المدينه قرار بتسليم المدينه فى خلال 30 دقيقه والا سيدمرها الطيران الاسرائيلى
فذهب المسئول الحربى عن المدينه وكان اسمه عادل اسلام الى الشيخ حافظ سلامه فى مركز قياده العمليات بمسجد الشهداء
وقال له ما حدث وانه لم يتبقى للمدينه الا 10 دقائق فقط وسيدمرها الطيران عن بكره ابيها
فسأله الشيخ مين هيسلم المدينه ؟؟؟؟ ...فين المحافظ ؟؟؟؟ هو لسه مستخبى ؟؟؟؟
احنا مش هنستسلم
السويس لن تستسلم ابدا وفيها هؤلاء الابطال
وسأله الشيخ حافظ عن رايى القاهره
فاجابه ... القاهره وافقت على استسلام المدينه خوفا من دكها بالطيران وطلب السادات ان لا يسلم المحافظ المدينه بنفسه لانه هيكون تسليم سياسى لان المحافظ يمثل رئيس الجمهوريه شخصيا ... وطلب السادات ان يكون التسليم بواسطه المسئول الحربى للمدينه
ونظر الشيخ حافظ حوله فوجد عدد من الجنود يرفعون الاعلام البيضاء والجميع متاهب للتسليم ..... فقال للضابط عادل اسلام ( لا اذكر رتبته ) لن نسلم المدينه .... وحتى لو كان ذلك رأى السادات ... ورأى القاهره .. السويس لن تسلم .... العدو يضربنا بالطائرات منذ 6 سنوات مش هنخسر حاجه لو بقوا 6 سنوات وكام يوم
وامسك الشيخ حافظ سلامه بميكرفون المسجد واذاع بيان شعب السويس
وانا لا اذكر نص البيان
الا انه قال ان السويس لن تسلم وستدافع عن نفسها حتى الشهاده
وكان الاسرائيليين يسمعون البيان
فاذاعوا بيان مضاد
ان المدينه استسلمت
والمحافظ وافق على الاستسلام .... وسنمهلكم 10 دقائق اخرى للاستسلام
فرد الشيخ حافظ سلامه
الى اهل السويس الباسله لن نستسلم
ولن نرفع الرايه البيضاء اثبتوا ثبتكم الله
اطلبوا من الله الشهاده
وهنا
انتفض الجميع وانزلوا الاعلام البيضاء وهتفوا جميعا
الله اكبر الله اكبر
تحيا مصر
وخرجوا يطلبون الشهاده
ودارت معارك شديده تراجع العدو على اثرها الى خارج السويس حتى تدخلت قوات الطواىء الدوليه يوم 28 اكتوبر بعد 4 ايام من المعارك الطاحنه
بين جيش لا يقهر
وشعب ومقاومه تكاد تكون بدون سلاح

البئر القديم

من الاشياء التى تستحق الذكر فى تلك الفتره هو موضوع البئر القديم باحدى محلات السويس
اثناء الحصار كان العدو قد ردم ترعه الاسماعيليه التى تشرب منها المدينه ومنع عنها الماء
فحل العطش بكل اهل المدينه
وهنا يعود شاهد العيان ليتحدث قائلا
عطشنا وكنا هنموت من العطش كنا مش لاقيين اى ميه نشربها لدرجه اننا كنا بندور على المجارى القديمه ونفتحها ولو لقينا ميه صافيه فيها كنا بنشربها ... كنا بنملى الصفيحه ونسيبها شويه لغايه لما الميه تروق ناخد الميه ونسيب نص الصفيحه ( والله ده كلام الشاهد )
المهم
راجل جه للشيخ حافظ وقاله فى عندى فى المحل بير قديم مردوم من زمان وانا مش هاقدر افحته لوحدى
وهنا ذهب الشيخ حافظ وبعض الرجال الى البئر القديمه وقاموا بتنظيفه من الردم الموجود فيه ولكن عوامل السنين قد اثرت فى البئر فلم يخرج ماء حتى يئس الجميع منه
ولكن كان الله بهم رحيما فتفجرت المياه من البئر عذبه صافيه تعلن فضل الله سبحانه وتعالى
فهلل الجميع وكان نصرا اخر من عند الله
تحيه لكل ابطال السويس
تحيه للشيخ حافظ سلامه اطال الله عمره
تحيه لشهداء السويس الابرار
الشهيد احمد ابو هاشم

والشهيد ابراهيم سليمان
والشهيد فايز حافظ
والشهيد ابراهيم محمد يوسف
والشهيد عبدالعزيز محمود
وكل شهداء السويس الباسله

هكذا تكون الشهاده

السلام عليكم ورحمه الله وبركاته
كوبايه ميه يابنى علشان نسلك الحنجره
انا هادخل فى الموضوع عدل علشان مطولشى عليكم وتناموا منى والغطاء هنا قليل
حرب السويس ...والشيخ حافظ سلامه
احنا عرفنا ان العدو نجح فى الثغره وعدى القنال وبقى فى الغرب ..يعنى وجوده خلاص بقى قدر ومكتوب .. او ل ما بدء العدو بدء بالزحف على الاسماعيليه ولكن الجيش التانى الميدانى سلخ جلد اللى خلفوهم وطحنوهم طحن ... خلوهم يرجعوا زى الفيران الى الجنوب
وللاسف تواجد الجيش التالت كان قليل جدا فى الجنوب . فمقدرشى على العدو اللى زحف الى السويس ب 600 دبابه واليات ومصفحات وعربيات كارو وبغال
يوم 22 اكتوبر كان العدو خلاص على ابواب جهنم ... وابواب جهنم دى كانت ابواب مدينه السويس جنه الشهداء ونار العدو
العدو حاصر المدينه تماما ....ومدينه السويس زى مانتوا عارفين تقع على الصابع الشمال للبحر الاحمر او خليج السويس ... شرقها القنال وسيناء ... وشمالها الاسماعيليه ... وجنوبها البحر الاحمر ... وغربها القاهره
العدو وصل من الشمال طريق الجناين ... وبكده الشمال انقطع ... واتجه الى الغرب وقطع طريق القاهره - السويس ... وبكده الغرب اتقطع... واتجه الى الجنوب طريق الزيتيات - السخنه ... وبكده الجنوب اتقطع
يعنى المدينه .اتحاصرت من كل جهه
ده كان الحال بره المدينه
اما الحال جوه المدينه
كلام احد شهود العيان :- بصراحه احنا عشنا كام يوم اسود من شعر راسنا .الناس كانت بتقول ان السادات خلاص هيوقف ضرب النار وده علشان اسرائيل شدت حيلها علينا وقدرت تعبر للشط التانى .... وبصراحه اكبر .....احنا لقينا العساكر والظباط بتوعنا جايين يجروا من طريق الجناين وبيقولوا لنا الحقونا بهدوم ملكى ... انا شفتهم بعينى كانوا بيقلعوا هدومهم الميرى وبيلبسوا هدوم ملكى ... انا واحد من الناس والله العظيم ( والقسم لشاهد العيان ) لقيت ظابط واقف قدامى وبيقولى الحقنى باى هدوم عندك وقلع الهدوم العسكريه بتاعته ولبس جلابيه من عندى ومشى ... انا شفت بعينى والله العظيم راجل بيجرى فى الشارع من غير راس ... الشظيه طيرت راسه وهو بيجرى وفضل يجرى شويه من غير راس لغايه لما وقع على الارض
انا رحت مستشفى السويس العام لقيت الناس كتير قوى والدم فى كل مكان .. اطمنت على زميلى ورجعت الناس ميته فى كل حته ومحدش بيمشى .. لا..الكل بيجرى من الغارات واللى اجله بيجى خلاص ... اول ما وصلت الهاويس لقيت ناس جايه تجرى من طريق الاسماعيليه والبقر والجاموس بتوع اهل الجناين طايرين من الخوف ومطلوقين ... الطيارات فى كل مكان بتتضربنا والناس بتموت ..لقيت ناس بتجرى وبتقول الفدائيه فى الاربعين كله يجرى على الميدان .. جريت مع الناس وانا مفيش فى ايدى سلاح لكن ( ولكلام الشاهد بقيه )
ده كان حال الناس العاديين
المدينه كان فيها بعض العمال من الشركات المختلفه
وبعض افراد القوات المسلحه والدفاع المدنى
وافراد منظمه سيناء العربيه
مين افراد منظمه سيناء العربيه دول ؟؟؟؟؟؟؟؟؟
المنظمه دى اتكونت ايام حرب الاستنزاف وكان افرادها يقومون بعمليات فدائيه ضد الاسرائيلين
وعلشان كده كانوا بيعرفوا بستخدموا الاسلحه و الا ار .بى .جى
يوم 23 اكتوبر كانت خلاص اسرائيل على وشك دخول السويس فى اى لحظه وكان اهل المدينه وافراد منظمه سيناء والدفاع المدنى فى حاله ترقب وخوف من سقوط مدينتهم العزيزه
محدش نام
محدش نام للصبح لغايه يوم 24 اكتوبر فى الفجر صلى الناس فى مسجد الشهداء وكان الامام الشيخ حافظ سلامه ( ومن الان يبدء دوره ) وكان حاضر الصلاه محافظ السويس بدوى الخولى ( ومن الان ينتهى دوره ) بعد الصلاه اخذ الشيخ حافظ يدعو الناس الى الجهاد ويذكرهم بان اهل بدر خير مثال لهم فكانوا فئه قليله هزمت فئه كثيره وهذا هو وضعنا الان
وقد قال لهم ان اليد التى لاتعرف الوضؤ لا تستطيع حمل السلاح
اما المحافظ بدوى الخولى فص ملح وداب .... يقولون انه اختبأ فى بيت فى شارع شميس بجوار مسجد الاربعين علشان لما الاسرائيليين يوصلوا المدينه ميسلمهاش المحافظ لانه زى السادات فى محافظته
وناس بتقول انه مبيحبش يشوف الدم علشان كده استخبى
وناس بتقول انه كان مخاصم اسرائيل ومش عايز يقابل حد منهم
وناس بتقول انه كان عيان
المهم
بدء العدو يضرب المدينه بشراسه وطيراته ملت الجو .. زى ماقال شاهد العيان ...تلات ساعات رايح جى يضرب المدينه لغايه لما اتأكد ان المدينه خلاص اتهدت على راس اللى فيها
قامو دخلوها صباح 24 اكتوبر من تلات اتجاهات
من الشمال طريق الاسماعيليه ودى منطقه عندنا اسمها الجناين
ومن الغرب من طريق القاهره - السويس عند اول السويس زمان منطقه المثلث
ومن الجنوب طريق الزيتيات - السخنه
والعدو كان منظم نفسه ان كل وحداته تتقابل مع بعض فى وقت واحد وكان عامل حسابه وقطع الكهرباء والمياه ووسائل الاتصالات عن المدينه .. يعنى عزلها
دخل العدو المدينه ولقاها مهجوره... محدش فيها ... مدينه اشباح ...فين الناس ... فين البيبول
فرح العدو وكلابه وهما داخلين المدينه زى الطاووس وماشيين فيها لغايه لما وصلوا لصره البلد .........ميدان الاربعين
وهنا انشقت الارض عن اناس تمنوا لقاء الله فاحب الله لقائهم
اناس طلبوا الشهاده فمن الله عليهم بها
انهم رجال صدقوا ما عاهدوا الله عليه
الله اكبر ... الله اكبر
هكذا بدء ابطال المقاومه عملهم
اين كانوا ؟؟؟؟؟؟؟؟؟؟؟؟
لقد قسم ابطال منظمه سيناء العربيه انفسهم الى عده اماكن فى المحافظه كمين عند الهاويس .- المدخل الشمالى _ وكمين عند شارع الجيش المدخل الغربى - وكمين عند شارع الخضر المدخل الجنوبى - وعده كمائن متفرقه داخل المدينه
وكانت خطتهم
ترك العدو يدخل المدينه حتى يقع فى الشرك ثم يتم التعامل معه
وهذا ماحدث
بعد وصول العدو الى الاربعين انفتحت عليه طاقه جهنم الحمراء
كانت اولى الطلقات من الشهيد البطل ابراهيم سليمان طلقه اصابت اول طابور الدبابات فاصابت البرج وقتلت القائد وهنا حدث هرج ومرج بين الدبابات وبدءت تتخبط فى بعضها فأخذ الفدائيون يضربونها والشعب السويسى بدون سلاح يصطاد افرادها فيفتح لهم ابواب جهنم ليدخلوها .. فكانت ساحه الاربعين قد تغطت بالون الاحمر
دبابات واليات غاشمه ومزعوره تضرب المواطنيين العزل من السلاح
ومواطنون يقتلعون قلوب العدو بايديهم بعد ان يفروا من دباباتهم تحت قذائف فدائى منظمه سيناء العربيه
فهربت باقى الدبابات من الميدان وفر بعض الجنود الاسرائيليين الى قسم شرطه الاربعين واقتحموه واستولوا عليه ( وبدءت حرب قسم الاربعين )
( وهنا يعود شاهد العين ليكمل )
انا جريت مع الناس لميدان الاربعين لقيت الفدائيه موجودين ومستنيين الاسرائيليين .. اول ما هجمت اسرائيل كان الفدائيه يضربوا الدبابه العساكر اللى فيها يجروا منها .. احنا نجرى وراهم ونصطادهم ونموتهم .. هم يضحك وهم يبكى .. تتصوروا ( الكلام للشاهد ) العساكر اليهود كانوا بيجروا قدامنا وهما فى ايديهم رشاشات واحنا اللى ماسك شومه واللى ماسك عصايه واللى ماسك مطوه او سكينه او ايده فاضيه ..لكن علمناهم الادب وجريوا مننا للقسم واستخبوا فيه
شاهد عيان اخر يقول
انا كنت قاعد فى البيت انا وزميلى فى الشغل وكنا عارفين ان الاسرائليين داخلين السويس وهياخدوها .. يوم 24 لقينا الدبابات داخله من شارع صدقى ورايحه للاربعين .. الدبابه كانت قد الشارع .. شفناهم ماشيين وراء بعض طوابير ... قلت لزميلى يالا بينا نروح نحارب ... قالى نحارب الدبابات دى بايدنا ؟ ..لا ياعم اروح فين؟.....انا قلت له كده كده ميتين يبقى نموت شهداء احسن فى وسط الناس حتى نلاقى اللى هيدفننا بدل مانموت فطيس هنا ... انا اخدت المطواه بتاعتى وكسرت الترابيزه واخدت رجلها وقلت الله اكبر وطلعت اجرى فى شارع صدقى .. اول ما وصلت الاربعين لقيت الدم للركب ناس ماليه الارض مننا ومنهم ..شفت الفدائى بيضرب الدبابه والناس بتجرى عليها وتسحب منها العساكر وتموتها ... مدرتشى بنفسى الا وانا فى وسطهم وعماله اضرب معاهم ومش خايف من الموت ... وفقت على صوت رشاش عسكرى اسرائيلى بيضرب فى الناس يمين وشمال وهو مستخبى فى سور السكه الحديد القصير وفجاءه لقينا الرشاش سكت .... الناس استنيت شويه وهجمنا عيه لقيناه مدبوح من رقبته وواحد نايم عليه والرشاش كله اتفرغ فى بطنه .... البطل اللى دبحه ده كان زميلى اللى سيبته فى البيت .... اتاريه عرف طريق اسهل منى للجنه .... سبقنى لها ..( لم يكمل شاهدنا حديثه ابدا .... كان يصل الى تلك الاحداث فيبكى ...لقد تعودت ان اسمع بكاءه ... انه والدى...لقد حكى لنا تلك الاحداث اكثر من مائه مره .... ولم يكملها ابدا ... كان يبكى دائما ..حتى اننا لم نرد ان نسمعها منه مره اخرى .. حتى وفاته عليه رحمه الله )
يقول شاهد اخر
كنا عند مدرسه هلال قصاد جامع الشيخ سعيد وكنا بنجرى وراء عسكرى اسرائيلى فى الحوارى وفعلا مسكناه و موتناه وكنا حوالى 6 او 7 لقينا زميله بيضرب علينا بالرشاش انا الوحيد اللى ما اتصابتش والباقيين اتصابوا وماتوا من عزم الرصاص ..هجم عليه ناس تانيه وضربوه على دماغه بحديده وقع على الارض وهو بيصرخ من الوجع وبيقول بالعربى الحقنى يا زلمه .... قلت للناس سيبوه خلوه يتعزب شويه لسه دلوقتى ضارب الرجاله دول ومموتهم ومحسش بالمهم خلوه يتـالم شويه وبعدين نموته ... لكن الناس مكانش عندها وقت لكده موتوه بسرعه وجريوا يشوفوا غيره وانا معاهم
معلشى
انا اسفه طولت عليكم
فاضل حلقه واحده بس عن معركه قسم الاربعين ورفض حافظ سلامه الاستسلام
السلام عليكم
اه
قبل ما امشى من الاستديو
اروح اطلع المخرج من المخزن اصلى انهارده قفلت عليه علشان اتكلم براحتى ... زى ميناتل