الخميس، أكتوبر 29، 2009

شيخ الازهر .. بطل الابطال

اولا ... معلشى استحملونى فى التأخير عنكم

ثانيا ... التدوينه دى مكتوبه من اول حادثه عمونا الكبير شيخ الازهر الشريف وكنت انتظر بفارغ دخولى للنت لكى افرغ ما فى صدرى وما اصابنى من تلك الحادثه المؤلمه

********

مبروك للبطل العالمى الكبير خليفه محمد على كلاى ومارتينا نافرتيلوفا ومحمود الرشيدى . مبروك للبطل الاسطوره عمونا الكبير محمد باشا سيد طنطاوى على فوزه الكبير والساحق على بنت صغيره عندها 13 سنه

عمونا الكبير شيخ الازهر بجلاله قدره وعظيم محياه عقد 3 مؤتمرات لكى يهزم البنت الصغيره واخرج بيانا ازهريا بمنع النقاب داخل الازهر الشريف

الله الله الله ياشيخنا

منتهى القوه والقدره والتمكن

اخواتى الاعزاء واخوانى الكرام انا مش منتقبه وهذا ليس بشرف

ولست ضد النقاب وهذا ليس هروبا ولكنى اخجل من الموقف المشين لرمز الاسلام فى مصر

للاسف الشديد وقع عمونا شيخ الازهر فى اخطاء كثيره اقل خطاء فيها يستاهل كارت احمر

اولا :- لم نسمع مطلقا عن تعالى رسول الله صلى الله عليه وسلم على احد من المسلمين صغيرا كان او كبيرا شيخا او امراه .. فكيف يتعالى عمونا المحترم شيخ الازهر على الطفله ويقول لها انا افهم فى الدين احسن من اللى خلفوكى

.

دى اول غلطه وتستاهل كارت احمر

.

ثانيا :- كيف يجبر شيخ الازهر فتاه على ان تخلع النقاب فى الفصل ؟ هى دى مش انسانه وليها كرامه ؟؟

عمونا شيخ الازهر لو درس علم النفس ولو درس علم الاخلاق ولو درس علم الحضاره والتحضر لاستطاع بكل سهوله ان ياخذ الفتاه الى مكتب منفرد بصحبه احدى المدرسات واستطاع ان يقنعها بما يريد قوله او على الاقل يطلب منها احضار ولى امرها ويقول له ما يريد

.

وده يستاهل عليه كارت احمر

.

ثالثا :- عمونا المحترم شيخ الازهر بيقول للبنت بعد ما خلعت النقاب ... امال لو كنتى حلوه كنتى عملتى ايه ؟؟؟

ودى القشه اللى قصمت ضهرى وضهر اللى جابونا للدنيا دى علشان اشوف رمز الدين الاسلامى فى مصر بيعيب فى خلق الله

عمونا الكبير نسى او تناسى ان الله سبحانه وتعالى هو الخالق المصور ..عمونا نسى ان دى خلقه ربنا .. عمونا نسى انه بيكلم انسانه ... عمونا نسى ان البنت او المرأه عموما تغار على جمالها ونسى ان تعليقه البذئ ده ممكن يصيب البنت بحاله نفسيه تؤدى بها وخصوصا ان كلامه الجارح الغير مهذب كان على مسمع من ناس كتير

.

وده يستاهل عليه كارت احمر
.

رابعا :- كلام عمونا الكبير مع احدى الصحفيات بعد المؤتمر الصحفى العيالى واستهزاءه بها وبأطلاعها
.

برضه يستاهل عليه كارت احمر
.

*********

اخوانى الاعزاء

اخواتى العزيزات

بعد كل الكروت الحمر تلك

أأمل

وارجو

واتمنى ان يذهب الشيخ محمد سيد طنطاوى الى العزبه لينام ويستريح ويربيله كام فرخه بلدى ينفعوه فى ايام انفلوانزا الطيور

هناك 10 تعليقات:

مهندس مصري بيحب مصر يقول...

يا ستي ما هو المجلس الأعلى للأزهر لم الدور بعد ما الناس كلها كلت وشه
صدق من سماه الشيخ سيئ اوكيه

Che يقول...

متفق معاكى فى كل اللى قلتيه ... و المفروض شيخ الازهر كان ياخد قدوة من النبى عليه الصلاة و السلام ... النبى مش نهر واحد او زعقله ... ده بس عبس فى وجه عبدالله بن ام مكتوم و ساعتها نزلت آيه عبس و تولى ... من بعدها الرسول كان لما يدخل عليه بن ام مكتوم يقول له اهلا بمن عاتبنى فيه ربى ... الرسول مع انه الرسول و مع انه المنزه عن الخطأ لم يستنكف ذلك ... فى حين ان شيخ الازهر لغايه دلوقتى مصمم على موقفه
انا ضد النقاب ... بس مش معنى كده انى موافق على اللى شيخ الازهر عمله ... لانها فى الاخر عيله عندها 13 سنه ... يعنى يوعيها مش يزعق ليها

محمد عبد الرحمن يقول...

لراجل فقد القدرة على ضبط النفس
من ناحية المفتى واكل الجو منه خالص اليومين دول على المستوى الرسمي
أما على المستوى الشعبي فمشايخ الفضائيات خصوصا من اصحاب التوجه السعودي معلش صراحة زايدة عشان مقلتش السسلفي طبعا المشايخ دول تاثيرهم الشعبى واضح جدا والعين عليهم لأنهم فيما يبدو هم رجال المرحلة فالراجل البساط إنسحب من تحت رجليه أو يكاد فصب الرجل كل الغضب على رأس المسكينة الضعيفة بنت الإعدادى لأن نقابها هو أحد تجليات التوجه الجديد

معلش بأه بكرة هيخرج يقول لن سامحونى مكنش قصدى

فاتيما يقول...

اظن بعد كل الكروت الحمرا دى
المفروض الراجل يعتزل المشيخة
ومش يقعد على الدكة ..لأ
يروح زى ما قولتى
و يسيب الملعب لعالم فيها الرمق و يبطل يضحك العالم علينا
بس انتى عارفة يا خالتى أن اللى بيقعدوا على الكراسى دى
اهل الثقة
مش اهل الخبرة و الكفاءة
و لو كانا عنده نخوة
او مراعاة لشعوار المواطن كبير و صغير
او تواضع العالم
او ..
او ... مكنش قعد فيها لحد النهاردة
وحشتينا و وحشنا بوستاتك التمام
خالص حبى ليكى

رفقة عمر يقول...

وحشتيينى جداااااا
الدنيا اصلا اتغييرت
حتى الشيوخ اتغيروا
ربنا يستر

Fahd يقول...

نفسي اعرف بس مين اللي بيحكم

همس الاحباب يقول...

اولاحمدلله على السلامة ومنورة المدونة بوجودك
اما شيخ الازهر فحسبى الله ونعم الوكيل
مش يستاهل كارت احمر بس
يستاهل حمله على نقالة ورميه فى مقلب التاريخ لانه اساء للاسلام اكثر مما افاد
تحياتى

Dr. Kafy يقول...

أنا أرى أنها أحد أعمدة القوات المخصصة لضرب الدين الإسلامى لأنه كلما رمى بفاجعة ضد الإسلام و المسلمين نجد أعداء الدين أشادوا بها و رفعوا قدره.
فالرجل عنده حق لأنه يخلص لمن يقدروه و يعلم أنه لو قال الحق خسر ودهم و هو لا يقوى على فكرة نبذهم له

اللهم ولى علينا من يخافك فينا و يرحمنا

العلم نور يقول...

حان الوقت إننا نشيل عمونا الكبير ونحط حنون صغير مكانه

Nazek يقول...

السلام عليكم
اختي العزيزه
عجبني جدا موضوعك
والاهم لطافتك وانتي مقسمتنه الى كروت حمر
كم كرت احمر طلعتي ماشاء الله عليكي

اشكرك على خفة دمك وموضوعاتك الحلوة