المدونين غير مثقفين

اخوانى واخواتى المدونين والمدونات

يؤسفنى ان انقل لكم حقيقه بعض المدونين الغير مثقفين ..وانا اذ اتحدث اليكم الان ..فحديثى بأسى وألم
لقد اتضح لى ان اخى وابن اختى العزيز محمد ابو زيد دكتور حر انسان غير مثقف ..نعم للاسف الشديد
وكما اتضح لى ان الفاتح الجعفرى ....واليعقوبى ...وابن حجر العسقلانى ...واحمد الباحث عن الحقيقه ...ومهند برضه الباحث عن الحقيقه ناس غير مثقفه..ومن الغريب ان يكون الاستاذ عصفور المدينه... والربان ...ووطنى ...والطائر الحزين ..والنجم التدوينى الجديد ابو خالد اناس غير مثقفون....

ايه ده الطوبه دى جات منين ..لاداعى لرمى الطوب ...انا بكرر مفيش حد يضرب طوب ...انا مش لوحدى ..انا بحذر انا مش لوحدى

انا جايه انهارده ومعايا جيش حريمى مدرب على اعلى مستوى للقتال ..يعنى هتضربوا طوب هنضرب طوب ...هتضربوا بيض هنضرب بيض ..هتضربوا نار هنضرب نار ..هتحرقوا هنحرق ..الجيش بتاعى جاهز ..انا معايا بنت خيخه ...وهبه دوبا ...وعزه وزه... وهند على اسم مصر.. وسومه.. ونوره الخشن... وولاء.... والملكه وكاميليا.... وام الابناء رغم ان زوجها الطائر من غير المثقفين لكن اصرت انها تخوض الحرب معانا .وكمان خمسه فضفضه... ود \ اجدع بنوته ....وابى ببطوطها واسلحه كوكبها كله ..وعاشقه النقاب ...وفاتيما... ورفقه عمر ...وسلوى طوق الحريه ...وشقاوه شعب ...ولماضه... وصبرنى يارب ....و همسه قلم ...وده بعد اعتذار بعض المدونات عن المشاركه لظروف خاصه
نرجع ونقول
عبده الرايق برضه طلع غير مثقف هو وسووووووو
وعلشان محدش يزعل كل الرجاله المدونين طلعوا غير مثقفين وده علشان الذاكره وحشه قوى
اما الفتيات المدونات والسيدات اللاتى لم يشتركن فى الدفاع عن فرنسا هانم
برضه طلعوا غير مثقفات

الطماطمايه دى مين حدفها ..عموما جيشى الحبيب اى حد يحدف طوب او بيض او اى حاجه اتعاملوا معاه بكل قسوه
اما اللى يحدف طماطم سيبوه ليا انا علشان الطماطم غاليه وخلوه يرمى براحته

ونرجع تانى ونقول جيش فرنسا الابى الهمام برضه غير مثقف
وللاسف فرنسا هانم برضه غير مثقفه
الحكايه ببساطه شديده ان السيد اللواء محمد عبد الفتاح عمر وكيل لجنه الدفاع بمجلس الشعب فى حديثه لبرنامج الحقيقه على قناه دريم قال للصحفى الاستاذ وائل الابراشى ان الشاب اللى اتقتل فى احداث المحله معندهوش ثقافه الوقوف فى البلاكونه
شفتوا الهنا اللى احنا فيه ؟؟؟؟؟؟؟؟؟
الشاب واقف فى البلاكونه وانضرب برصاصتين وطلع هو الغلطان لانه غير مثقف
وللاسف معندوش ثقافه الوقوف
يالهووووووووووووووووووووى
الظاهر اننا كان بينضحك علينا يارجاله
كانوا بيقولوا لنا ان الثقافه هى العلوم والمعرفه وهى العلم بامور الدين والفلك والسياسه والاقتصاد والتاريخ ووووووووووووو
طلع كل ده هبش وكلام اونطه وفض مجالس
والثقافه هى ثقافه الوقوف فى البلاكونه
انا طبعا عملت بحث فى جوجل علشان اتعلم ثقافه الوقوف فى البلاكونه ...محدش ضامن الظروف يمكن عندنا فى الشركه يطالبونا ناخد دبلومه فيها ..للاسف معرفتش اوصل للثقافه دى
الظاهر ان عمنا جوجل طله هو كمان امى معندهوش ثقافه
وانا متأكده ان كل الاخوه الافاضل المدونين والمدونات معندهمشى معرفه بالثقافه دى
وبعدين دى ليها فروع
يعنى مش حاجه كده والسلام ....لالالالالالالالالالالالالا
ليها فرع ثقافه الوقوف على محطه الاتوبيس
وفرع ثقافه الوقوف داخل الاتوبيس
اه... ده علم... وده علم
وفرع ثقافه الوقوف فى الشباك ..فرع الشباك الالوميتال والشباك الخشب
وفرع الوقوف على الناصيه ...قسم البانجو وقسم المعاكسه وقسم البودره
وفرع ثقافه الوقوف فى طابور العيش وطابور المصالح الحكوميه
وفرع ثقافه الجلوس فى السينما والمسرح والافراح والليالى الملاح
يعنى بالبلدى الشاب اللى عمره 16 سنه مات بسبب جهله
وكمان
اتفضل سيادته بعد ما والد الشاب قال عنه الشهيد
قاله المفتى اللواء محمد عبد الفتاح عمر متسرفوش فى كلمه الشهيد
يعنى الشاب مش شهيد
للاسف فى غياب السيد على جمعه مفتى الجمهوريه كله دلوقتى بيفتى ...وبقت فته
كله بياكل فته ولحمه ورز
وكمان
فى اثناء ثوره الاب وغضبه على الامن بعد وفاه ابنه يقول اللواء للاستاذ وائل بعدما قال له الاستاذ وائل لو ابنك اللى مات كنت هترضى بكده
الاب يبكى ودم ابنه لم يفارق عينيه والسيد الهمام يقول

يروح فى ستين داهيه لو ابنى

ستين داهيه ؟؟؟؟؟؟؟؟؟؟؟؟؟؟؟؟؟؟؟؟؟
والشاب دمه لسه منشفشى ؟؟؟؟........ستين داهيه ؟؟؟؟؟؟
يا الفاظك يا هولندا
امبارح اتفرجت على الحلقه التانيه وكان السيد اللواء موجود
لاحظوا انه المره اللى فاتت كان فى التليفون
المره ده موجود
عنطزه ..ومنجهه ..وتعالى ..وكبرياء ..
اكيد ده مش ظابط شرطه
هو فى حاجه فى الداخليه اسمها ظابط مخله ؟؟؟؟؟؟؟؟؟؟
والاخ رامى واحد كان معتقل بيكلمه ..يقوله متكلمنيش انا وجه كلامك لمقدم الحلقه انا مش فى مناظره معاك
ياااااااااااااااااااااااااااااه
ده قرفان قوى من الناس
هو اتولد وفوق راسه عشر ريش
ولا البنى ادمين اللى قدامه دول حثاله
خلاص
ارجو من كل المدونين وانا اولهم ان نذهب الى السوق لنشترى كتاب معلم الثقافه ونرجع تانى كى جى وان وناخد المصروف وكيس الكارتيه والشنطه والى الحضانه
معتااااااااااااااده مارش

سرقه بالاكراه

ميه مساء على الناس الكويسه

زمااااااااااااان قوى ايام ما كان الانسان انسان
كان اللى بيسرق ويتمسك اللى رايح واللى جاى فى الشارع يسلم على قفاه ..وكل واحد ورزقه ..واحد يسلم بايده والتانى يسلم برجله والتالت يسلم بعصايه والرابعه بالشبشب ..غير البوس اللى يا خده فى كل حته فى جسمه بس مش بوس بالشفايف ....لا ده بوس بالسنان ..كل اللى عايز يسن سنانه يشترك فى تحيه السيد المحترم الحرامى
وممكن الاهالى يدوله الطريحه التمام ويسبوه يروح بيتهم
وحصره عين امه اللى يروح القسم
يا داهيه دوقى .... الحرامى كان له بريستيج عالى ..المخبرين كانوا بيحبوه اكتر من الكباب والكفته ...كانوا بيطلعوا فى الحرامى كل غلبهم ..اللى متخانق مع مراته ومش قادر عليها ..يتخيل الحرامى مراته وهاتك يا ضرب ...واللى مخنوق من جاره ولا من عياله ولا من اخواته ولا من اى حد يفش غلبه فى السيد الحرامى
اما بقى
لو سرقه بالاكراه
اه دى تبقى خربت ..الحرامى من دول ياخد ( حبيبى يانا يا مه يا خد حبيبى يا بلاش زارع فى القلب ورده والنبى يا مه متقطوفهاش )
قصدى الحرامى من دول يا خد حقه تالت ومتلت ..يعنى يا خد علقه سوبر لوكس
دلوقتى
دلوقتى ليه يا زمان مبقتشى زى زمااااااااااااااان طيب يا صبر طيب

دلوقتى الحكومه تحمى السرقه بالاكراه
اه
اوعى حد يتخض
شركه توزيع الكهرباء
مثال صارخ على السرقه بالاكراه

*******************************
الحكومه بعد ما باعت شركه توزيع الكهرباء ..باعتهم بجاموسه وتلات خرفان ..شركه التوزيع بقت حره
تعمل اللى تعمله
ومحدش يقدر يفتح خاشمه معاها ...واللى هيفتح خاشمه هيتمد هلى رجله وينقطع عنه النور
افتكرت مناقشه دارت بينى وبين صديقات الصالون عن شركه توزيع الكهرباء

واقسم انها قصه حقيقيه

واحده ست كبيره ارمله تعيش بمفردها ..معندهاش لا تليفزيون ولا تسجيل ..وبتدفع الكهرباء بانتظام كل شهر ..وفى شهر جالها الوصل ب 118 فسألت فرد العصابه السيد الدكتاتور محصل باشا ..انا كل شهر ادفع 10 او 15 جنيه اشمعنا الشهر ده .....بص لها من الشبشب لغايه الطرحه وقالها بقرف هتدفعى ولا مش هتدفعى ؟؟....قالت له ..مش معايا المبلغ ده كله ..قام اداها الكعب ومشى ...ولاد الحلال اخدوا قرايه العداد وكتبوها على ظهر الكعب ..وراحت السيده للشبكه بتاعه الكهرباء
والموظف هناك قالها ..دى غلطه كمبيوتر وفى ليكى 700 كيلو ....الست قالت له طيب وانا اعمل ايه ؟؟؟قال لها غلطه الكمبيوتر متتصلحشى ..( باين عليها زى عود الكبريت يولع مره واحده ) المهم قالها انا هاكلم الكشاف انه يسبك كام شهر لغايه لما تيجى القرايه مطابقه للوصل
الشهر التانى جه الكشاف ومعاه الوصل اياه ..ووصل تانى ب 10 جنيه ولازم ياخدهم وهو واقف ..يأما يشيل العداد
الناس تتحايل عليه وتقوله حرام عليك ..دى ست كبيره ..دى ارمله .
لكن هو ركب المخ البنى ابو رباط ..وراسه والف كعب يشيل العداد
لولا تدخل ولاد الحلال
فى كده
فى حاجه اسمها كده ؟؟؟
فى حاجه اسمها كن فيكون للبشر ..
الشركه دى عايزه تقول للناس كن فيكون
يعنى مثال تانى
لواحد محصل ..اتأخر شهر عن بيت معين ...لا حظوا ان هو اللى مجاش
وتانى شهر جاب الوصلين
وجه على غفله
وطالب الناس بكل عجرفه بالشهرين ..فى الوقت والحال ..واللى مش هيدفع هيشيل له العداد
فى حد دلوقتى يقدر يستغنى عن الكهرباء ؟؟؟؟؟
ازاى يكون مصيرنا فى ايد محصل ..يشيل العداد بمزاجه ويخليه بمزاجه ؟؟؟؟؟؟
وليه مش محددين سعر الكيلو وات ؟؟؟؟؟؟؟
وليه بياخدوا 3 جنيه من كل عداد اجبارى على الفاتوره للنظافه ؟؟؟؟؟؟؟؟
من يستطيع الاجابه ..يرسلها الى صندوق بريد 220 فولت وسيتم السحب على جوائز قيمه
الجايزه الاولى لمبه بدون سلك
الجايزه التانيه سلك بدون لمبه

نداء الى الرئيس مبارك

كان هذا هو الموجز واليكم الاخبار بالتفصيل......

قال مراسلنا فى السويس السيد موسى الشايب ان قوات كبيره من الامن المركزى والمصفحات والاليات والمدرعات وعربات الكارو الحديثه التى تجرها القطط ..قد استطاعت حل المنازعات والمحاورات والخلافات التى انفجرت داخل صالون فرنسا هانم ..وان الامن قد سيطر على الموقف تماما ..حتى ان افراد الامن ليس لديهم ما يفعلونه فاضطروا الى تقسيم انفسهم لقسمين متساويين فى الطول والارتفاع وقاموا بلعب السيجه ..وكيك على العالى وكيك على الواطى
هذا وكانت قد اندلعت امس الاول خلافات حاده بين افراد صالون فرنسا هانم عن مفهوم الفساد فى مصر ..وهل هو فساد وراثى ام فساد مؤقت ..ومن المسئول عنه ..وكيفيه علاجه ..ومن يستطيع جزره من على ارض مصر ..وقد علم مدوبنا السيد موسى الشايب ..ان افراد الصالون استعملوا القنابل الشديده الانفجار المصنوعه من لبان تشيكلتس ..والرصاص المحرم دوليا المصنوع من طوفى دعبس .طرى ولذيذ

ومعنا على الهاتف السيد مدير كشك السجاير الموجود فى المنطقه

السلام عليكم انت على الهواء يا حاج عايزين نعرف منك تطورات الاحداث ومين المتسبب المباشر فى الكارثه دى

بصراحه الموضوع ده من اوله غلط ومفروض ماكنشى يوصل لكده احنا اخوات وبلدنا واحده وبنتنفس هواء واحد ..انا بصراحه زعلت من اللى حصل ده

ياحاج عايزينك تقولنا عن الاحداث ..ازاى حصلت .ومين السبب..وايه التطورات ..ورأيك الشخصى فيها

بصراحه يابنتى ..انا لسه جاى من السفر من ساعه واحده بس ومش عارف ايه الحكايه

شكرا للحاج مدير كشك السجاير ..ومعنا على الهاتف احدى جارات الصالون

السلام عليكم انتى على الهواء يا مدام عايزين نعرف ايه اللى حصل ؟؟

والله علمى علمك انا لسه جايه من السوق معرفشى حاجه

ومعنا على الهواء فرنسا هانم صاحبه الصالون

السلام عليكم

وعليكم السلام انتى على الهواء يا فرنسا هانم ..عايزين نعرف منكى ايه اللى حصل بلظبط

انتوا تليفزيون ولا راديو ؟؟؟؟؟؟؟؟؟

ليه السؤال يا فندم؟

علشان الصوره بس ..اصلى مش جاهزه

احنا تليفزيون يا هانم بس حضرتك معانا على الهاتف ..يعنى صورتك مش باينه

ان كان كده ماشى ...اصلى لابسه هدوم المعركه ..وفيها اثار الانفجارات المتتاليه للبان
الحكايه ببساطه
احنا كنا بنتكلم عن الفساد فى مصر ..وكان رائى الشخصى
ان الفساد وثقب الازون بقوا محصلين بعض ..زيد زى عبيد ...كنا بنسمع زمان عن خرم الازون ونخاف منه ونقول ربنا يستر ...دلوقتى اتعايشنا معاه ..وبقى صاحبنا وزميلنا وحبيبنا ..وبقينا عيش وملح مع بعض ...والعلماء بتوع الطقس لاقوها سبوبه ..يتسندوا عليها ..الجو حار جدا ...بسبب الخرم بتاع الازون ...الجو بارد جدا ..بسبب الخرم بتاع الازون ... الجو عواصف برضه بسبب ثقب الازون ..الناس بتكح ..الثقب ...الناس بتسهل ..الثقب ..الناس احولت ..الثقب ..الزلازل ..الثقب ..البراكين ..واحد طلق مراته ..واحده مشيت على حل شعرها ..واحد اتخانق مع اخوه ..حرب قامت ..كله عن الثقب حدث ولا حرج
دلوقتى
الفساد
تلاقى المسئول فى الحكومه يطلع فى البرنامج التليفزيونى او الاذاعى او الجرائد ..ويقول مننكرشى ان فى فساد
الله .الله
طيب هو انتوا شغلتكوا ايه ؟؟؟؟؟؟؟
شغلتكوا تشوفوا الفساد وتسكتوا
ولا شغلتكوا تحاربوه
كل حاجه دلوقتى ..بيرموها على الفساد ..سرقه ..نهب ..نصب ..بيع ..يقولك فساد
طيب احنا كمواطنين ..من واجبنا اننا نسمع ونطنش ..ولا نقول ..خلاص ..طالما فساد الحكومه هتعمل ايه ؟؟؟
نداء الى الرئيس مبارك
الفساد اقوى من الشعب
الفساد فساد سلطه
والسلطه اقوى من الشعب
نداء الى الرئيس مبارك
اذاء كنت سيادتك ترعى الفساد وتحميه ..فاننا فى حمايه الله عز وجل ..وان الله لمنتصر
وان كنت سيادتك لا تحمى الفساد ولا تقبله
فانتفض الى الله
قم بثوره تصحيح قام فعل السادات وقضى على مراكز القوى فى ثوره 1971 ..وان كنت سيادتك لا تريد السير على طريق احد
فخلصنا من الفساد
انت من يستطيع ان يصدر قرار جمهورى فى التحقيق فى قضيه الفساد وكشفها وكشف المتلاعبين بها
هذه ليست حمله
لاننا لن نستطيع ان نقف فى وجه النظام ونحن متشتتون ..كما اننا لن نريد ان نقف فى وجه النظام ..حتى لاندمر بلدنا الحبيب
نريد قرار جمهورى بفتح قضيه الفساد على مستوى عالى وتحت اشراف رئيس الجمهوريه شخصيا ..وباشراف قضاه مصر الامناء
ده كان رايى الشخصى
وناس فى الصالون اعترضوا عليا وانقسمنا الى فريقين ..ودارت الايام
قصدى ودارت المعركه

تاج العسقلانى ..و صوت من مصر

السلام عليكم

تاجين ومش عارفه اروح منهم فين

التاج الاول

تاج العسقلانى ..الشهير بابو العساقيل ....وهو الغائب الحاضر فى تلك الايام

ندخل فى التاج

مين من المدونين يصلح لتولى منصب رئيس الوزراء فى دولة عسقلانيا العظمى

هنبتدى بالكوسه ..وبما ان المدونه مدونتى فانا سارشح نفسى

رئيسه للوزارء فرنسا هانم

ويساعدها كلا من

دكتور حر...ورئيس جمهوريه نفسى ...وقطه الصحراء ...وكوكب ابى

وزير الثقافه

عصفور المدينه

ويساعده كلا من

طال الليل ...عاشقه النقاب... وعاشقه الفردوس....وعزه الشهيره بوزه

وزير الاعلام

احمد الصباغ

ويساعده كلا من

همسه قلم ...وهمس الاحباب ...ومروه الزارع ...وعاليا حليم ..وبنت خيخه واى كلام

وزيره التعليم

ام احمد المصريه

ويساعدها كلا من

ام الابناء ..وام البنات ..وامه الله ...ودمعاتى

وزير البحث العلمى

اخر العنقود

ويساعدها كلا من

سومه ....ونوره الخشن ...وصوت من مصر ...وسلوى ..وشقاوه شعب

وزير الجامع

الفاتح الجعفرى

ويساعده كلا من

اليعقوبى ...واحمد الباحث عن الحقيقه ...وصناع الحريه ..والمهاجر الى الله . والنجمه الصامده

وزير الصحه

خمسه فضفضه

ويساعدها كلا من

د- اجدع بنوته ...دكتور بيطرى ...ومن خارج الطب بس ممكن يبقى حكيم زمانه الطائر الحزين ....صبرنى يارب

وزير العدل

الربان

ويساعده كلا من

افاق الحريه ..والام وامال ....والشنكوتى الكبير ...والقلم الاسكندرانى

وزير الداخليه

وطنى

ويساعده كلا من

اسكندريه اذكرينى ..مهند ...امام الجيل ...الملكه

وزير الخارجيه

مهندس مصرى

ويساعده كلا من

ميخا ..مناجاه ..رحيل ..وكاميليا

وزير الهجوم

لماضه

ويساعدها كلا من

مروه الزارع ...وكفايه طيبه ...وقلوب حائره ...وغاليه

وزير المواصلات

صاحب المضيفه

ويساعده كلا من

سووووو ....على اسم مصر ...صبرنى يارب ...شيماء

وزير الماليه

عبده الراااااايق

ويساعده كلا من

صالح السعيد ...وشاشى ..وفاتيما ...وولاء

وزير الاتصالات

رفقه عمر

ويساعدها كلا من

قبله الحياه ..وفزلوكه ...وبطوط حبوب ..وبحبك يا مصر

وزير الزراعه

هبه - دوبا

ويساعدها امه لا اله الا الله علشان نعمر البلد ونخلى بلدنا خضراء

والتاج التانى

---------------

من صوت من مصر

1 / أذكر 10 أشياء عن نفسك

2 / اختر 5 أشخاص تهدى لهم التاج

3 / لا تهدى التاج لمن أهداك اياه

4 / أترك لصديقك الذى أهداك التاج بان التاج نزل وتعالى شوفه

1 اهم حاجه انى هخالف اومر التاج ..دى اول حاجه

2 انا فرنسا هانم ذات الاربعين ربيعا واربعين خريفا واربعين شتاء واربعين صيفا سامعه حد بيقول تبقى ام اربعه واربعين....اللى قال يطلع على السبوره من سكات

3 معايا مطواه قرن غزال بخمس سكات ..يعنى من سكات ..اللى عايز يعيش يوسع

4 اعيش فى مدينه الصمود والاستسال ..ميه مالحه ووشوش ..........

5 اعرف ربى جيدا واتبع فروضه واحب دينى واشهد ان لا اله الا الله سيدنا محمدا رسول الله

6 نايمه على خميره على قدى ...

هو الرايق هنا ؟؟؟؟؟؟؟؟؟؟؟

لالالالالالالالالالالاانا منفضه خااااااااااااااااااااااالص

7 احب الاطفال ولا اقوى سماع بكائهم

8 احب مصر جدا واهوى ترابها...وبزعل قوى من ترابها لما بكون غاسله غسيل وتقوم رياح ترابيه

9 احب الضحك والفكاهه جدا جدا جدا واموت فى الهزار

10 احب قوى اتفرج على التليفزيون والافلام الاجنبى اول مخالفه

انى هاهدى التاج لاى حد عايز يجاوبه ...

ملحوظه هامه
-------------
سيتم باذن اذاعه حلقه لعبده الرايق النجم الكوميدى الجديد فى برنامج صلاح حجازى انت تسأل والكمبيوتر يجيب يوم السبت الموافق 19 - 4
وقد تم اذاعه حلقه للمتألقه الرائعه ابى اليوم الخميس وتم اختيار تعليق تامر نبيل كافضل تعليق
اتمنى ان تصل كل مجموعتنا الجميله الى قمه التدوين فى العالم

-----------------------

عاش الملك

تحديث

***************

يذاع للعملاقه الجميله حبيبتى الغاليه ابى appy حلقه فى برنامج انت تسأل والكمبيوتر يجيب يوم الخميس الساعه التاسعه وعشر دقائق

تقديم صلاح حجازى

بالتوفيق يا ابى

***************
وقالت ام وحيد ..لزوجها فريد ..بعدما اتى من الصعيد ..بلغنى ايها الزوج الرشيد ..صاحب العمر المديد ..والكف الحديد ...انه فى قديم الزمان ..كان يحكم وردستان ...ملك اسمه فيحان
وذات صباح جميل ...ونسيم عليل ..نادى الملك على عبد الجليل

ايه ده يا جلجل ؟؟ فى ايه ؟؟ الناس حوالين القصر بالعبيطه وبالهبولى كده ليه ؟؟؟؟

وانا عارف يا ابهه ....كلهم قال ايه جايين يشتكوا من الوزير قحطان

كلهم جايين يشتكوا مره واحده؟؟؟ ...هو مين يابا فايق لكل الخلق دول ؟؟؟...وبعدين انا عندى جلسه مساج بعد دراع ونص ..هو الوقت كام دلوقتى ؟؟؟

دلوقتى الوقت سته دراع وربع

طيب انا جلستى معادها سبعه دراع ونص ...يعنى فاضل لى دراع وربع ...وبعدين هنعمل ايه مع البشر دول ؟؟؟ هنفلسعهم من هنا ازاى ؟؟؟

سيبنى انا اتصرف يا ابهه ...ولد يا هيثم نادى تامر وتعالوا...وهاتوا معاكم مكبر الصوت ...هاتوا الصفيحه الجديده اللى لسه شارينها امبارح من الصين

هتعمل ايه يا عبد الجليل ؟؟؟؟؟؟؟؟؟

ولا حاجه يا ابهه ..انا هاطلع على كتف الولد تامر وهيثم واقولهم خبر يليهيهم عن الثوره اللى عاملينها دى ..بس اقولهم ايه ؟ اقولهم ايه ؟اقولهم ايه ؟

ايه يا جلجل انت ضيعت دلوقتى ربع دراع وانت عماله تفكر...انت كده هتضيع عليا جلسه المساج ..والملك بتاع فل ستان لو عرف ان فى جلسه مساج ضاعت عليا هيفرح فيا ويغظنى ومراته هتغيظ مراتى

بس لقيتها ...خلاص ..تعالى يا هيثم انت وتامر ...شيلونى وسوقوا على البلاكونه

وبعد نص دراع عاد عبد الجليل ..بعدما فعل المستحيل ..واشتغل شغله التقيل
وقابله الملك وهو مشغول ..وقام سأله على طول

ايه يا جلجل عملت ايه ؟؟؟

تعالى يا ابهه جنب البلاكونه وانت تعرف

ايه ده الناس عماله تهتف وتقول ...عاش الملك فيحان وعاش الوزير قحطان..عاش الملك فيحان وعاش الوزير قحطان ...انت قولت لهم ايه يا جلجل ؟؟؟

ايه يا ابهه ..انت عارف اخوك جلجل يفوت فى الحديد ..قولت لهم ان ملك فل ستان عمل حركه قرعه من شغل العيال الملوك الصغيره وهجم على حدودنا فى الليل لكن الوزير قحطان والحرس قاوموهم وقتلوهم والوزير قحطان اتصاب فى رجله وهو بيدافع عن تراب المملكه والشعب نايم فى بيته وبياكل رز ولبن مع الملايكه ..واديك شايف وسامع الكل بيهتف ليك ..وللوزير قحطان

طيب فين الوزير قحطان ..احسن يجى دلوقتى والناس تعرف اننا بنقرع عليهم ..ويبقى منظرنا فس فس خااااااااالص

قحطان مين يا ابهه اللى يجى ؟..قحطان نايم فى العسل تحت التربيزه اهو....طول الليل كان عماله يضرب بانجو لما اتعمى ونام على نفسه تحت التربيزه

خلاص صحييه وخليه يلف رجله وفهمه القصه علشان الناس لو سألوه يعرف يرد عليهم

هو فى حد بيسأل يا ابهه ؟..خلاص يا ابهه الوقت دلوقتى سبعه ونص دراع معاد المساج

ماااااااااء.....مااااااااااء ....ماااااااااااء
وهنا ادركت ام وحيد ان المعزه جعانه ...وان الميه خلصانه
فلبست القبقاب وخرجت من الباب

حكومه دماااااااااااااااااااااااغ عاليه

السلام عليكم
اول اول امبارح يعنى يوم الاتنين ماشيه اتمختر فى شوارع السويس وبالاخص كنت نازله الاربعين عند اختى وفجاءه بضرب عينى على الفرنه بتاعه العيش البلدى لقيتها فاضيه خالص مش عليها ولا بندوم ولا حتى ربع واحد او واحده ...واللى خلانى استغرب قوى وافنجل الكشافات ان واحد طالع من الفرنه بعيش ........ خير اللهم اجعله خير ..اصحى يا فرنسا انتى هتنامى فى الشارع ولا ايه ؟؟ ..لا والنعمه دى حقيقه وانا صاحيه والفرنه رايقه خالص...قربت من الفرنه وركنت العجله فى الباركنج بتاع الفرنه ومشيت براحه على طراطيف صوابعى وقربت خالص لغايه لما وصلت للشباك لقيت الشباك مفتوح وفى عيش والباب مفتوح كمان وفى واحد واقف بيشترى من جوه
ايه ده ؟؟؟؟؟؟؟؟
اتجرأت وسألت الاخ البائع هو فى عيش ؟؟؟؟؟؟؟؟؟
بصلى من فوق لتحت ومن غير ما يجاوبنى سألنى عايزه بكام يا مدام ؟؟؟؟؟؟؟؟؟؟
مدام مدام فى الحالات دى متفرقشى ..قلت له عايزه باتنين جنيه
قام ادانى العيش وعلى قفص كمان ...... انا اخدت العيش وطلعت بره الفرنه وكانى لقيت كنز على بابا ...رحت اشتريت شنطه واستنيت لما العيش برد وعبيته فى الكيس
المهم
دخلت عند اختى وانا فارده عضلاتى ومبينه المجانص ورافعه مناخيرى لفوق وقلت لها ..انا لقيت الفرنه فاضيه جبت لك عيش معايا ...وطبعا كنت مستنيه التشكرات والاحترامات افندينا لكن اختى قالتلى..
وميدو جاب لك عيش عندنا بيقول ان الفرنه انهارده رايقه وجبت لخالتو عيش زياده وجاب لنا احنا كمان عيش زياده
ايه اللى حصل ؟؟؟؟؟؟؟؟؟؟
ايه اللى جرا ؟؟؟؟؟؟؟؟؟؟؟؟؟؟؟
معقوله الازمه اتحلت
معقوله الازمه تتفك كده بين يوم وليله
المهم بس علشان الناس متقولشى عليا مش عاجبنى حاجه
الازمه اتحلت قبل يوم الانتخابات بيوم واحد
على الاقل فى السويس انا معرفشى باقى المحافظات ايه اخبارها
اتحلت فى يوم
معنى كده وبالبلدى انها ازمه مفتعله
وان الحكومه بنت ام حكومه تقدر تحل المواضيع
طيب ليه سيبانا نهاتى والناس تطحن بعض وتموت بعض وعمتنا قناه الجزيره تتكلم والعربيه تتكلم وقناه عم حنفى تتكلم وكل خلق الله ماسكه سيرتنا .. ليه يا ست هانم يا حكومه محلتيهاش من الاول طالما انتى قادره على الحل
عارفين البنت الناصحه الحكومه عملت ايه ؟؟
زودت شوالات العيش واجبرت الافران انها تشتغل بكامل طاقتها صباحا ومساء
وانا طبعا مش عايزه اظلم الست حكومه واقول انها قاصده تعمل كده ايام الانتخابات ...لان الناس هتروح تنتخبها وهما طالع عنيهم وعين اللى خلفوهم فى الطابور لا طبعا .... وبعدين انا لو كنت رايحه انتخب وشفت منظر الافران الزحمه على طول هادى صوتى ضد الحزب الوطنى
طبعا انا عارفه ان صوتى العزيز مسيره لصفيحه الزباله لكن كنت هاعمل اللى عليا
تصدقوا لما لقيت موضوع العيش محلول .. والفرنه رايقه
فكرت ادى صوتى للحزب الوطنى .. رغم انه والله العظيم ما حصل
لكن خدنى الشوق ورمانى
وحاجه كده سحرتنى لما لقيت الازمه محلوله
رغم انى عارفه اساليب الست هانم الحكومه وعارفه اسلوب لعبه صلطح
وعارفه ان الديابه اللى عندهم عباقره فى الضحك على الدقون
وعارفه كمان اكتر من كده بكتير بحكم قربى من مستنقعهم
رغم كل ده كانوا هيضحكوا عليا
فما بالك بالمواطن العادى !!!!!!!!!!!!!!!!!!!!!!!!!!!!!!!!!!!
ربنا يجعل كلامنا خفيف عليهم
ويستمروا فى حل الازمه

مبروووووك ...لعبده الرااااااااايق

اخواتى المدونات اخوانى المدونين
السلام عليكم ورحمه الله وبركاته

الضاحك الجميل جدا عبده الرايق صاحب اجمل ابتسامه على النت كما ذكرت من قبل اذيع له اليوم فى التاسعه وعشر دقائق على اذاعه البرنامج العام تدوينه جميله جدا بعنوان بلاها فول ...هالعب جولف فى برنامج انت تسأل والكمبيوتر يجيب
وسبق ان تكهنت له بمدونه باسمه رائعه ... رغم انه شغال يطالبنى بفلوس سلف
وبجد انا دخلت مدونه الراااايق حسيت بقبول شديد للمدونه
كما تم اختيار تعليق بطوط حبوب كا ظرف تعليق فى التدوينه
بطوط حبوب يقول...
ههههههههههههههههههههههه اعزمه على حسابه مستر رايق قوله ان فى الوقت ده فى السنه عيب الواحد يدفع اى حاجه وضيفه موجود دى عاده فرعونيه بدل ما تستلف منا هههههه
24 مارس, 2008 07:22 م

بس على فكره
احبابى الكرام
اى واحد او واحده يدخل مدونه الرايق ..الرجاء ترك محفظته خارج المدونه
هو مش حرامى
لكن
شغال سلف من خلق الله .. عامل زى المشار طالع واكل نازل واكل
هو طبعا بيقرع علينا
وبيفشر كتير
وفاكر الكادر هيجيله يحلله كل مشاكله ويخليه غنى
لكن
ده عشم ابليس فى الجنه
والرايق هو الموظف الوحيد فى مصر اللى شغال فى مكان ومش عارف هو بيشتغل ايه
رغم ان المدير بيحبه ومقعد الموظفين كلهم على مكاتب وهو على السلم
علشان بيعمل الملفات طيارات وصواريخ ومراكب ورق
على العموم
مسيرك يا رايق تعرف انت شغال فى الحى بتعمل ايه
انا مش هاطول عليكم
مره اخرى
مبروووووووووووووك للرااااااااايق

اطباء السويس ..بزراميط

الاخوه المدونين والاخوات المدونات
سلام الله عليكم

السويس دى بلد غلبانه وملطشه ومكسوره الجناحين ..رغم انها بلد الصمود والاستبسال وبلد الشهداء وكده ..الا انها دلوقتى بلد غلوبه خالص ...وغلوبه من غلبانه ...
طبعا انا اتكلمت معاكم عن موضوع ميه الشرب فى السويس
واليوم هتكلم معاكم عن الاطباء فى السويس
سامعه حد بيقول انا مش هتكلم معاكم
عموما اللى قال هاعرفه وهاطلعه يوم الاحد الصبح وسط الطابور وهابعته يجيب بجنيه عيش ..وبكده اكون عذبته عذاب اليم

جاهزين
ثرى ..تو ...وان ..اكشن

نفسى اعرف الاطباء بتوع السويس خريجين ايه ؟؟؟؟؟؟؟؟
كنا زمان بنفتكر والعياذ بالله انهم خريجى طب
وصدقنا الكدبه دى سنين طويله اطول من تيله القطن
لكن اتضح اننا طيبين قوى وتعبانين موله
يقال والعهده على الراوى
انه قد تم اكتشاف طبيب متمكن وقدير وكفء فى السويس ...وان اللى فك رموزه مستشفى القصر العينى بالقاهره
ولكن مصادر مقربه من القصر العينى نفت الخبر واكدت انها لاتتعامل مع دبلومات التجاره ودبلومات الصنايع
اللى بيحصل عندنا فى السويس بالنسبه للطب يشيب له الوليد
يعنى تلاقى الوليد بيحبو ..ولسه بيتعلم يقول ماما وبابا ... وشعره شايب
فى السويس
تلاقى واحد بالصلاه على النبى لابس بالطو ابيض فى ابيض ومعلق فى رقابته سماعه ويكشف على المريض ويقعد يفلى فيه يمين وشمال ويزغزغه ويلعب له حوجبه ويرقصله شنبه ..وفى الاخر يلقى بالكلمه المعتاده المحفوظه ....لو خايفين عليه ودوه مصر
واحد تانى تلاقى عيادته شيك قوى وفيها تليفزيون ودش وممرضه وغرفه عمليات ولعب وشخاليل
وبرضه يمسك الضحيه ويفلى فيه ...ويلعب فى ضوافره ويشوف شعر راسه اكرت ولا ناعم..ويفتش فى زراير القميص
وفى الاخر
لو خايفين عليه ودوه مصر
حتى فى المستشفى العام ومستشفى التامين الصحى بحوض الدرس والهلال
اكتر حاجه بيعرفوا يعملوها
الطهاره
شاطرين قوى فى الطهاره
وعمليه اللوز
وحلاقه الدقن
اكتر من كده انسى يا عمرو
طبعا سامعه واحد بيقول ..طبعا القاهره هى العاصمه وفيها امكانيات
انا طبعا اختكم فرنسا هانم ديمقراطيه جدا فى الحوار ...واول حاجه هاعملها انى هاشوف مين اللى اتكلم واطخه واستريح
انا عارفه ان القاهره بها امكانيات لكن مفروض كل محافظه يكون فيها امكانيات برضه
لان كثيرا جدا من المرضى لا يجدون الاسعافات ويتوفون اثناء نقلهم الى القاهره
كما ان توافر الامكانيات الطبيه فى المحافظات يقلل من تكدس واذدحام العاصمه
ومفروض برضه العاصمه تراعينا ..احنا حبايبها ..مفروض تبعت لنا كام طبيب نقاوه متخرجين من كليه الطب
علشان ينموا المحافظه
والاطباء بتوعنا هنلاقى لهم حل ..المحافظه بتدور على ناس يشتغلوا فى الكارته بتاعه العربيات النقل
اهو ..برضه قطع الكارته عايز بلطو وسماعه ودبلوم فنى