عوده سيدنا مبارك عليه السلام

تحديث
********
الرجاء اضغط هنا واقراء هذا المقال جيدا
*****************************
شكرا جزيلا لكل من سال عنى وارسل لى اميلات *
وعلشان انا نافوخى ساعات كده بيلق وبيفك ومبيعجبنيش ابدا الحال المايل احب اقول للقوات المسلحه ولسياده المشير طنطاوى *
قبل ان ندرك انها مؤامره * وقبل ان يأخذنا الفكر بعيدا عن الصواب * وقبل ان نظن اننا اغبياء * و قبل ان نتدفأ بالهواء فى ليل امشير * وقبل ان نظن انها صفقه لحمايه مبارك وعائلته * وقبل ان نصدق الوكالات العالميه ان هناك تعذيب فى مصر بعد مبارك * وقبل ان نصدق ان مبارك مازال يحكم مصر
وخلى كلامنا بلدى علشان البلدى يؤكل
سياده المشير هو لمؤخذه يعنى* سيدنا مبارك عليه السلام نبى من الانبياء واحنا منعرفشى
ولا سيدنا فتحى سرور وسيدنا صفوت الشريف وسيدنا زكريا عزمى وسيدنا سيف الدين جلال محافظ السويس وسيدنا جمال وعلاء مبارك اولياء الله لاخوف عليهم ولا هم يحزنون
ايه معنى ان سيدنا مبارك والساده الاولياء (((الشرفاء!!!!))) مفيش حد جاب سيرتهم ابدا فى المحاكمات ولا تجميد الارصده ولا غيره
ولا دول ناس شرفاء بجد
ولا الثوره دى وهبه الشعب ده وارواح الشهداء دول وجموع المصابين دول كلهم افتروا على سيدنا مبارك والاولياء الصالحين ودى ثوره كنتاكى صح ومائه يورو
سياده المشير ممكن حضرتك تظن ولو ثوانى ان صغار القاده فى الجيش وحتى كبار القاده والمجندين كانوا هيوافقوا على ضرب النار على الشعب حتى لو نزلهم ملك من السماء وقال لهم اضربوا
عليا النعمه انا عارفه ان لسانى فالت وهلخبط فى الكلام
 سياده المشير مفيش رسل
خلاص سيدنا محمد صلى الله عليه وسلم خاتم الانبياء والمرسلين
كلنا بعد كده سواسيه كاسنان المشط
انا فهمى على قدى يا ناس بسمع الاخبار الاقى ان الاتحاد الاوربى وافق على التحفظ على ودائع بعض المسئوليين السابقين بناء على طلب الخارجيه المصريه ليس من بينهم مبارك وعائلته
اشمعنى بقى مبارك وعائلته
ياترى خايفيين نقدمه للمحاكمه لنعمل زى الامم التى قتلت انبيائها
ولا سيدنا مبارك وال بيته الكرام خلقوا من ورد وريحان ونحن خلقنا من طين
ولا هيه بقى صفقه تمت ( لو كانت صفقه نفهمها بقى ونريح دماغنا علشان منعيشى زى عبله الهابله )
سياده المشير معلشى بقى ولو ان فى حكم عسكرى اليومين دول لكن ان هقول وامرى على الله سؤال بينهش فى قلبى زى وحش
مين بيحكم مصر دلوقتى ؟؟؟؟؟؟؟؟؟؟؟؟؟؟
مع اسفى للسؤال ومن غير جبن منى ولكن احترام للقوات المسلحه بس انا شايفه ان السياسه هى هى
اه والله انا شايفاها كده
وحياه جارتى العزيزه ام دبوه انا شايفاها كده
الشفافيه بسم الله الله اكبر زى ما هى متغيرتشى
التعذيب يجمال نانوس امه زى ما هو برضه
الحكومه هى هى برضه
ميدان التحرير هو هو برضه
اخوانى الاعزاء من قراء مسبقا لفرنسا هانم يعرف جيدا اننى لا اسير بمنطق (البقره لما تقع سكاكينها بتكتر ) فكل مدونتى تشهد منذ اربع سنوات وانا انتقد النظام ولا يعجبنى الحال المايل
اخيرا بقى علشان وقت البرنامج
السيد المشير محمد حسين طنطاوى القائد الاعلى للقوات المسلحه شكرا لك ولكل قاده القوات المسلحه ولكل فرد فى القوات المسلحه للمنظر الحضارى التى بدت عليه القوات المسلحه منذ يوم جمعه الغضب الى الان
ولكن ارجو ان اعرف جواب تسألاتى حتى اظل على حسن موقفى وعلى حسن ظنى فى قواتنا المسلحه وعلى رأسها الرجل الشريف محمد حسين طنطاوى وحتى ندرك اننا فعلا تغطينا بالدفاء فى ظل الامان والامن
ملحووووووظه مهمه جدااااااااااا
اذا كان البعض يتباكى ليل ونهار على ان مبارك بطل حرب اكتوبر وبطل الحرب والسلام كما يقال فاحب ان اقول لهم باعلى صوتى لم يحارب حسنى مبارك وحده اذا كانت الحرب تنسب للقاده فالرئيس محمد انور السادات هو بطل الحرب واذا كانت الحرب تنسب للشهداء فشهدا مصر هم الابطال واذا كانت الحرب تنسب للجيش فحسنى مبارك ليس الا فرد من الاف شاركوا فى الحرب واذا كانت الحرب تنسب لمصر فحسنى مبارك اخرسها طوال ثلاثين عاما واحتل مكانها
******************
معلشى سياده المشير سؤال تانى والله بعد ما خلصت البوست والسؤال خارج سياق الموضوع تماما السؤال هو:- هى الدبابات الكحيانه المهكعه الموجوده فى السويس عندنا دى هى سلاح الجيش بتاعنا وهو ده الجيش التالت ؟؟؟؟؟؟؟؟؟؟؟؟؟؟؟؟؟؟