السلام عليكم
رجعت فرنسا تخرف تانى يارجاله
اللهم انت الشافى المعافى يارب
ندخل فى التخاريف
عبد الجليل :- اهلا وسهلا ياريس نورتى قصر الرئاسه
فرنسا هانم :- اهلا بيك ....مين حضرتك ؟
عبد الجليل :- محسوبك عبد الجليل ياريس ...مستشار حضرتك الخاص ....شعارى يا فندم . مع عبد الجليل مفيش مستحيل
فرنسا هانم :- منور يا استاذ برسيل قصدى عبد الجليل ...الا قولى يا عبد الجليل القصر ده كله بتاعى انا ؟
عبد الجليل :- طول ما حضرتك فى الحكم يا فندم
فرنسا هانم :- بس كده ؟ .. ماشى . قرار جمهورى رقم واحد .... الغاء جميع العملات المعدنيه واستبدالها بالعملات الورقيه وسد جميع الاماكن الضيقه اسفل الكبارى ...... يبقوا يورونى بقى هيختاروا رئيس تانى ازاى وفين
عبد الجليل :- تم التنفيذ ياريس
فرنسا هانم :- عايزين نشتغل بقى يا جلجل فين الاجنده بتاعه الخارجيه ؟
عبد الجليل :- ليس اجنده واحده ولا اتنين بل 15000 اجنده ياريس نعمل ايه علاقات واتفقيات والذى منه
فرنسا هانم :- والاجنده الداخليه ؟؟؟
عبد الجليل :- لا دى معايا فى جيب المحفظه اهه
فرنسا هانم :- ايه دى نوته ؟؟؟؟؟؟؟؟
عبد الجليل :- شعبنا شعب طيب ياريس مش محتاج لا اجندات ولا اتفاقيات خلى الطابق مستور
فرنسا هانم :- شوف يا جلجل انا عايزه اراجع علاقاتنا مع الدول كلها وخصوصا دول الجوار
عبد الجليل :- نراجع يا ريس تحت امرك وادى كل الدول اهه قدام سيادتك
فرنسا هانم :- ايوه الدوله دى غيظانى وفاقعه مراره امى وعايزه اقطع العلاقات معاها خالص
عبد الجليل :- للاسف ياريس مفيش عندنا مقص نقطع بيه العلاقات .. وبعدين من اخر خناقه بينا واحنا قعدنا قعده عرب وحطينا اتفاقيات بينا وبينهم ومستحيل نخالف الاتفاقيه والشرعيه الدوليه
فرنسا هانم :- مستحيل ؟؟؟؟؟؟؟ امال ايه بقى مع عبد الجليل مفيش مستحيل ؟
عبد الجليل :- ياريس بره غير جوه .... جوه النور مولع والاوده محكومه ونقدر نبرطع براحتنا . اما بره الدنيا ضلمه ومينفعشى نبرطع براحتنا ... جوه الشعب بتاعنا وممكن نغنى له شعبى وانا حره فيه . شعبى اغسله واكويه . شعبى اعمله بفتيك . شعبى اتعشى بيه
اما بره مستحيل ..الناس دى معاها نبله ياريس وبيصطادوا عصافير
فرنسا هانم :- لا تقولى شرعيه ولا مكرونه شعريه .. هو فيه حد بيراعى حد
عبد الجليل :- ولا يهمك ياريس سيبك انتى من وجع الدماغ والهوس ده وخلينا فى المهم .. انا حضرت لحضرتك تليفزيون 115 بوصه ومعاه فيديو اخر بهججه وجبت لك كل شرايط السندباد وعلى بابا وياسمينا وعلاء الدين وتوم وجيرى
بعد اسبوع
عبد الجليل :- ايه يا فندم الشياكه والاناقه دى اللهم صلى على النبى يا ارض احرصى ما عليكى
فرنسا هانم :- ارض مين وتحرص مين ؟ . الحارث ربنا .... مين الناس دول كلهم ؟؟؟
عبد الجليل :- الوزراء بتوع حضرتك ياريس . اكيد فاكراهم . بتوع الكوبرى والرفه
فرنسا هانم :- هما بتوع الكوبرى هما هما الوزراء ؟
عبد الجليل :- امال هنجيب من بره يا فندم .... الشعب بتاعنا مشغول ومعندهوش وقت ... واحنا بنختارها مننا فينا
فرنسا هانم :- فين وزير الداخليه وفين وزير الخارجيه ؟
عبد الجليل :- كله برزقه ياريس ... اى وزاره واى حد الناس دول مبيدقوش ياريس .. ادى لاى واحد اى وزاره ولو رجعها بحق .. الناس دى عايزه تسترزق وتربى عيالها وعيال سويسرا .. وهنيه لك يا فاعل الخير
فرنسا هانم :- امال هنختارهم ازاى ؟؟؟؟
عبد الجليل :- سيبى دى عليا انا .... وزراء صفا وزراء انتباه .. وزراء استرح
شايفه حضرتك الاشقرانى ابو عنين معمصه ده ايه رايك نديله وزاره الصحه ؟ يمكن ربنا يكرمه ويتعالج ببلاش
فرنسا هانم :- يلا مش خساره فيه اديهاله غلبان .... هو اسمه ايه ؟
عبد الجليل :- لغايه امبارح كان اسمه فكرى مش عارف غير ولا لاء
فرنسا هانم :- وايه رايك فى الفسفوس ده نديله الخارجيه ؟ ... تعالى يا كتكوت اسمك ايه ؟؟
وزير :- تونى ياريس ..محسوبك تونى كاد عادل
فرنسا هانم :- ايه الفرق بين اليابان واللبان ؟
وزير :- يا فندم دى معروفه طبعا اليابان دوله ... اما اللبان دوله تانيه خالص
فرنسا هانم :- طب ايه معلوماتك عن العولمه ؟
وزير :- اييييييييه دنيا ... فين صاجاتك يا خالتى شخلع ...كانت استاذه فى العولمه
فرنسا هانم :- تسمع عن القانون الدولى ؟
وزير :- انا كان عندى القولون وكان عصبى بس راضيته ودلوقتى عال العال
فرنسا هانم :- طب روح اقف هناك فى الصف ..... ايه ده يا عبد الجليل ؟ .. دول الوزراء بتوعك ؟؟
عبد الجليل : يا فندم ماشيها خلى المركب تمشى .. هو حد بيحاسبنا-؟
فرنسا هانم :- على رأيك كده احسن .. خليهم فى بطن الزير .. بس بقولك ايه اوعى تنسى شرايط بكار. ابو كف رقيق وصغير
الاشتراك في:
تعليقات الرسالة (Atom)
هناك 129 تعليقًا:
hi, i like it.... and i hope u the best.
Nagdi
غير معرف
ياسيدى لايك براحتك خالص
وانا اتمنى الكل يكون بست البست
شكرا اخ نجدى
صباح الدماغ
الله بنور يا خالتنا
طب والله انا بحس ان كلامك تقريبا هو
اللي بيحصل حقا
بس يلا ما دامت تخاريف يبقى توكلي على الله ولا يهمك
مش انت مثلتي في تخاريف برضه
وجه مبتسم
*********
بس مش قولتيلي شد الودن على ايه طب روحي اكتبيها هناك طيب
منتظر
حين يكون في بلادنا ( وتحديدا في سيناء ) عشرات الألوف من الصهاينة تحت بند السياحة وتفتح لهم الأبواب على مصاريعها , وفي نفس الوقت يقول لأهلنا الذين حركهم الجوع والعطش والموت من غزة للعريش ( اللي حيعدي هنا حكسر رجله ) لما دا يحصل يبقى فعلا ميعرفش الفرق بين اليابان و اللبان
خالص تحياتي
منتظرين باقي التخاريف
أجدع حاجة القرار بتاع إلغاء العملات الفضية و تقفيل ما تحت الكبارى
عارفة يا أخت فرنسا .. أنا لو بقيت رئيس جمهورية "عسقلانيا" العظمى .. القرار أو المشروع اللى هانفق فيه أول سنوات حكمى هو إنى أخلى كل العملات معدنية .. و هاخلى كل الجمهورية تبقى "تحت كبارى" .. و هاخلى كل الناس عندها القدرة إنها تلعب رفة بحرية
و لما يقدروا يلعبوا رفة بحرية .. و العملات اللى هايلعبوا بيها تبقى متوافرة .. الدنيا هاتتظبط
لاء جامد
اهم حاجه بكار ورشيده
وحشتــــــــيـــني يا فرنسيس
:)
عاملة ايه؟
لسة هقرا البوست
-------------------------
فرنسا هانم :- والاجنده الداخليه ؟؟؟
عبد الجليل :- لا دى معايا فى جيب المحفظه اهه
فرنسا هانم :- ايه دى نوته ؟؟؟؟؟؟؟؟
عبد الجليل :- شعبنا شعب طيب ياريس مش محتاج لا اجندات ولا اتفاقيات خلى الطابق مستور
دي حقيقة
فعلا الشعب غلبان و الناس مستهترة فيه
يلا معلش
بكرة بعد مية ولا ميتين سنة كدة حالنا يتصلح
تحياتي ليكي يا فرنستي يا جمــــر
:)
وحشتنا ياريس
بس سيبك انت
احلي حاجه عجبتني بكااااار
ابو كف رقيق وصغير
وزتك
حلوة أوي :)
السلام عليكم ورحمة الله وبركاته
فرنستى ام دم زى العسل والسكر سنترفيش
بجد ضحكت من قلبى وقدرتى تكسرى حاجز الحزن والاكتاب الى معايا اليومين دول بدمك الى ما وصفش جزاك الله خيرا وادخل السرور الى قلبك كما تدخلى السرور الى نفوسنا
اما عن التخاريف المره دى فهى اشعر انها ليست بتخاريف احس كانك تصفين ما يحدث لنا باظبط فعلا احنا شعب غلبان
وكمان مغلوب على امره لنا الله واتمنى من المولى جل وعلى ان يعوضنا خيرا فيما نراه من هؤلاء الحكام فى الدار البقاء ان شاء الله يجمعنا فيها واياكى
والله يا خلتى انت دماغ بس فعلا صدقتى احنا بقينا فى زمن انا والغريب على ابن عمى وانا وابن عمى على اخويا وللاسف هو ده الى ماشى فى كل شئ ولانى مؤمنه ان شئون الدوله مشابهه لشئون الاشخاص فالى سائد الى ليا عنده مصلحه اقوله يا عمى
بالنسبه للشعب المطيع المؤددب المستحى يطلب حقه فديه حكايه تانيه بنعانى منها واديها ماشيه
تحياتى يا ريس يا جميل
السلام عليكم ورحمته وبركاته
جميل اوي البوست
والفكرة حلوة
وعليك شوية أفكار جامدة
واعتذر علي عدم تعليقي سابقا
وأكرمك الله وأعزك
والسلام عليكم ورحمته وبركاته
دعواتي
هايدي
برضة ماسمعتيش نصيجتي
ومصمصمة على العشا التقيل والفول بالزبدة
عموما في سجن القناطر مش هتلاقي الفول دة وبالتالي دماغك هتستريح خااااالص
تحياتي
نبل وعصافير يعني أهرب
طب مانا لا غي العملات المعدنية لا آخها ولا أعطيها
2enh y farancety da bas:
tom and jerry o bakar abo kaf so3'anan,o kaman tv 112 inch la2 da ana keda hagelek el seees 3ededl o 2atfarag ma3aky ya rayes
bas plz wenaby ya reit kamn captain majed o mazenger o grendauzar
salam ya 2a7la farnca
ياخبر ابيض
انتى خرفتى تخريف يا خالتى
انتى كده خبطى فى الحلل وكسرتى الاطباق كمان
كده اول متنطى النطه الكبيره دى تبيعينا ببكار طيب امال لما تلعبى الجيمز هتعملى فينا ايه؟
هتقولينا جيم اوفر ولا ايه
تحيه والله ليكى يا فرنسا
كلامك موزون
لا والله دى مش تخاريف ولا حاجه
ده امر واقع
وده اللى بيحصل بالظبط
بجد
بجد
بجد
تحيه لقلمك المبدع يا احلى فرنسا
واحد بيحب مدونه فرنساهانم
فرنسا هانم لكى كل الاحترام والتقدير
لكن سؤالى الملح
ابو كف رقيق وصغير
مش مفروض يضرب صاحبنا اللى مش عارف الفرق بين اليابان واللبان ؟؟؟
ابو احمد
شوفى يا ستى
انا معرفش الا عبد الجليل اللى كان محبوس فى حسن الهلالى بتاع زمان واخوة المفترى اللة يحرقة اسمه بدران كان عاوز يكوش على كل حاجة
يكنش يا ختى هو ده عبد الجليل بتاعك
لو كان هوه يبقى اكيد هتلاقى حسن الهلالى داخل عليكى بفرسة حالا حاسبى اوعى
بس خلاص
وكله فى الأخر مسجون
البطل اللى هو الهلالى وعبد الجليل المظلوم حتى المعلم بدران!!!!!!!!!!
وبعدين انا مشيت البواب بتاع المدونة فينك!!!!
تحياتى
خالتو حبيبتي
انتي كده هتودينا في دهيه
ابعدي عن العفريت ليطلعلك
بس بجد لو بقيتي ريس في يوم
ليا طلب عندك
انك تلغي الثانويه العامه السنتين وتخليها سنه وحده ومنجلكيش في حاجه وحشه ابدا
و(بست وشز فور يو)0
والله وحشاني يا خالتي العسل انتي
elkomy
صباح الروقان
دكتور حر
دكتورنا الصاحى قوى
اكيد التخاريف ممكن تتقلب حقيقه
وان لم تكن هى عين الحقيقه
دمت لى بخير
اما عن قرص الودن
علشان طنشت خالتك فرنسا فى اختيارك للمدونات
وطني
استاذ وطنى بعد السلام والتحيه والتقدير
فى برنامج فى قناه الحوار كان بيتكلم عن مصر
وكان السؤال من انتهك سياده مصر الفلسطنيون ام الاسرائيليون
وكان هناك بعض المكالمات التليفونيه تحدث فيها البعض ان وزير الخارجيه قال اللى هيعدى هكسر رجله
وانا بالامانه
الى الان لم اسمع هذا الكلام بشكل رسمى
اطلب منك التوضيح افادك الله
هل هذا تصريح رسمى
او كلام فعلا قاله الوزير
ام اشاعات
الرجاء التوضيح
وشكرا
ابن حـجـر الـعـسـقـلانـى
فاهمه قصدك يابن حجر
ربنا يوفقك ويوفق عسقلانيا العظمى
وتبقى جمهوريه عسقلانيا الديمقراطيه
وشعارها
نعم لتداول السلطه
تسلم دماغك ياابو العساقيل
3ala asm masr
رشيده ولدت ولد سميته عبد الصمد
تحياتى لكى
MerMaid
ميه ولا متين سنه ؟
يعنى قرن او قرنين
الظاهر هما قرنين
وعلى السلخانه يا جميل
وسمعنى احلى مقطوعه هاودعك اخر وداع
فهمانى طبعا
ولا ايه ؟؟؟؟
انين الحزن
وزتى الغاليه
وحشانى يا بنوته
كنت مستنيه تعليقك من بدرى
ربنا يكرمك ويخليكى ليا
خالتك فرنسا
أحمد منتصر
شكرا جزيلا
ام الابناء
راجيه عفو الله
مالك يا عسل
مالك يا اختى الحبيبه
ايه اللى مزعلك ؟؟؟
صدقينى مفيش حاجه تساهل الحزن والغم الا معصيه الله
طالما اننا لانعصيه
لا نحزن
فكك بقى من الحزن والزعل
اختك فرنسا
only spot
يعنى الامور اتقلبت راسا على عقب
عندك حق
يبدو اننا نعيش عصرا مقلوبا
سلم يارب
ارسم بالرصاص
هاااااااااايدى
هاااااااااايدى
هوه هوه
بنوتى الاموره
ولا كتكوتى الحلوه
فينك من زمان وحشانى جدا جدا
انا فرحت بتعليقك
عارفه
رغم صغر سنك
الا ان دماغك كبيره جدا جدا
تحياتى
A.SAMIR
قل ما يصيبنا الا ما كتب الله لنا
صدق الله العظيم
فول بالزبده
بالزيت الحار
عيش فينو
عيش بالسوس
سوس بالعيش
كله محصل بعضه
وبرضه مش هسمع كلامك
عصفور المدينة
هههههههههههه
حلوه يا هندسه
جت فى الجون
احييك على روح الدعابه
Soletoo
دى السويس كلها تفرش الارض ورد وفل
هو احنا نطول
فى بيتنا سولتوو
لا
سولا
ولا تزعلى هاجيب كابتن ماجد ومازنجر كمان
دنيتى الجميلة
لا يا عسولتى
انا عمرو ما ابيع شعبى ولو بالماس
او بكنوز الارض
لكن شخصيه الرئيس غير خالتك فرنسا
اقرى الاحداث وانتى تعرفى
التخاريف عايزه كده
سلامى ياقمر14
واحد بيحب مدونه فرنساهانم
تحيه لك ايضا من فرنسا ومدونه فرنسا
ابو احمد
لو صاحبنا دخا التليفزيون اكيد ابو كف رقيق وصغير مش هيسيبه
الطائر الحزين
كلامك كله ذكاء
وانا احب الذكاء
اخى العزيز
الطائر السعيد
ربنا يكفينا شر الكل
اختك فرنسا
نوري
احنا لسه فيها
قرار جمهورى رقم
اه
بس التدوينه خلصت
وانا دلوقتى مش ريس
خلاص
التدوينه الجايه نلغى الثانويه نظام الكارت المدفوع مقدما
قصدى نظام السنتين
فرنسا يا حبيبتى
ممكن وانت بتخرفى اكون وزير التموين
اصلى الدقيق غالى ...والبنات بيحبوا الكيك والدوناتس
صحيح نزلت طريقة الدوناتس
بس سيبك
ممكن ابقى وزير الله يكرمك..بس وزير تموين
يمكن الاقى حد يطبخ لى ويعمل الحلويات
الواحد خايف على الارواح اللى فى رقبته
هنتسال عليها يوم القيامه
ربنا يكرمك..البنات هيبلغوا عن امهم
لما ابقى وزيرة التموين هيفوتنا كتيير
وحشتينى..واسأل الله ان يجمعنى بك
فرنسا فين العجله..؟اوعى من فات قديمه
تاه
يا خوفي يا بكار لا يطلع كفك لا رقيق ولا صغير ويطلع مرزبه
يجعل كلامنا خفيف عليهم يا خالتى
المهم انتى ازيك كده
مش قولتلك انا عايز امسك وزاره صغنونه ولا لازم اروح لعبد الجليل يا فرنسا ؟
الحق اقول انها عجبيتنى قبل ما نيجى نزورك بعيش وحلاوه
ههههههههههه
دى اول مره اجى بس تحفه بجد
برافو عليكى فعلا الريس بيقى حوليه هاله من الناس اللى بينظفوا زى البرسيل ودول اقوى يا اختاه بجد
بحيكى على دماغك عارفه يا فرنسه المشكله مش فى الريس بس المشكله فى الحاشيه اللى حوليه واغلبيتهم جهله كمل يا ريس واحنا معاك ههههههههههه
ام البنات
حبيبتى الغاليه ام البنات
لا
مش هتبقى وزيره تموين
عارفه ليه ؟؟؟؟
لانى بحبك ومش عايزاكى تكونى وزيره فى الحكومه دى
الحكومه دى مش لازم تكون فى مصر زى ما شرحت للاستاذ وطنى فى التخاريف الماضيه
الحكومه دى حكومه مصالح ليس لها وطن
ممكن تسألينى وتقولى
طب ليه خليتى نفسك رئيسه للدوله دى ؟؟
ارد واقول لكى
انا بسرد تخاريف واقعيه بسخريه وسميت نفسى رئيسه للدوله دى حتى لا اذكر اسماء من الخيال
من الاخر
لا يشرفك ان تكونى وزيره فى حكومه تتبع هواها ومصالحها على مصالح شعبها
ارجو ان يكون كلامى وصل لكى بما اريد ايضاحه
ودمتى لى بكل خير
لماضة
ياخووووووووفى يابدران
حبيبتى لماضه
شكرا على سؤالك عنى
وانا بخير والحمد لله
وانتى ازيك كده
وكده
صوت من مصر
برضه ارجوك اقراء الرد اللى فوقك بتاع ام البنات
وانت تعرف
ليه مش همسكك اى وزاره
وتحياتى
ولو تمكنت من انشاء دوله تستاهل
هتكون وزير
بطوط حبوب
اه
عيش وحلاوه
يبقى تلحقى تقفى فى طابور العيش من دلوقتى
appy
جميله يا ابى
وملاحظتك هايله
انا كده مش محتاجه اوضح كلامى
طالما فى افكار وعقول وقلوب قريبه منى ومن قلبى وعقلى
فعلا احييكى
على ذكائك
:D تخاريف دمها خفيف
اول مرة اشارك هنا رغم اني بشوف اسمك عند مدونين مشتركين كتير ..
والحقيقة انا سعيدة اني شاركت هنا وياريت كنت جيت هنا من زمان ..
حبيبتي .. واسمحيلي اقولك حبيبتي .. علشان انا حبيتك بجد .. انتي انسانة عظيمة بجد ..
أنا قرأت تدوينة الوجه الآخر .. وحسيت قد ايه صبرتي واحتسبتي وربنا هيكرمك بإذن الله ..
أختك نور ..
نـــــــور
حظى حلو انى كنت اونلاين وانتى بترسلى تعليقك
يعنى هارد عليه طازه بنار الفرن يا باشا
كلامك جميل جدا يا نور
وحسسنى انكى من احبائى فعلا
قولى حبيبتى براحتك
فانا اخت كبيره واتمنى ان اظل كذلك
تحياتى ونورتينى جدا جدا
hi franc,
do u know that it will be very cool in Egypt? 5° ? and in Germany 10 °
so as a president u have to do something otherwise the folk will fight , they foght for evry thing.
Nagdi
فرنسا هانم :- على رأيك كده احسن .. خليهم فى بطن الزير .. بس بقولك ايه اوعى تنسى شرايط بكار. ابو كف رقيق وصغير .. ماتنيسش السنافر بالمرة :d
بوست جااااااامد جااااااامد جاااااامد .. أموت أنا في التخاريف الجامدة دي بجد بوست جامد أخر حاجة
تحياتي بالعطور الفرنسية
ههههههههههه
مساء الفل ياسياده الريس مخلاص بقى خالتى فرنسا مبقتش تليق عليك
وبعدين كده من اولها بتحط قوانين تحمى نفسك
ولابصرحه الوزرا بتاعتنا اخر تمام
شكلك هتبعينا اول ماتمسكى الرياسه
خالص تحياتى
وحشانى يا فرنسا والله ووحشتنى مقالاتك الجامده دى
طالما إن الحكومة دي حكومة المهلّباتية الماصّين دم شعوبهم.. يبقى ضلمة بضلمة.. ماكنتيش طلبتي قطع العلاقات مع الدولة المجاورة..أنا عايز تخريف بجد.. بجد يا هانم
فرنسا
شكرن ياعم علي الهدايا والورد
بجد المدون رقصت من الفرحه
اتمني ان تخليها ترقص كدا علي طول
اصلها منحرفه ....
فرنسا انا بموت فيكي بجد يارب يكون واصلك احساسي
وزتك
أختى العزيزة/ فرنسا هانم
خفة الدم سمه من سماتك و عبقريتك تكمن فى الحوار السلس المسترسل و فى رسائلك الموجهة وكنت أتمنى أن تكونى حنينه شويه على شعبك مش تغسليه و تطويه و تحطيه فى الدولاب.. أخيك أبو خالد
السلام عليكم
ماشاء الله جميلة
امني ان تكون تخاريفك مستمرة ان شاء الله
اصلها تخاريف جميلة جدا
بس انت عرفتي منين ان مصر تدار بعبد الجليل
السيده فرنسا هانم
اسمحى لى ان اهنيكى على هذا العرض الجميل وهذا القلم اللاذع لن اقول الساخر فقط
هذه اول زياره واول تعليق عندك
والسلام عليكم
وليد مصطفى
فرنسا هانم
النبى تشوفيلى وزارة حلوة امسكها
يعنى ممكن وزارة السياحة
ولا حتى وزارة القوى العاملة
وانت عارفة ليه طبعا
مش الريسة بتاعتنا
عنوانى ميتوهش
كوبرى قصر النيل
تحت النفق
الحفرة الخامسة
ههههههه
احلى تخاريف
سلاماتى لاحلى فرنسا
لى لى
هي دي مصر يا خالتي فرنسا زي ما احمد شوقي قال:
كم دا بمصر من المضحكات
و لكنه ضحك كالبكا ء
بس عندي تعديل واحد ان دي مش تخاريف ده انت مكشوف عنك الحجاب و شفت اللي بيحصل تحياتي لك و اسمحي لي اني اح>ت نسخة من صورة الحرية للدكتور الزعفراني و وضعتها في مدونتي وجعتني كرامتي الاسكندرانية انه يكون اسكندراني و تضعيها قبلي علي العموم اعترف لك بالسبق يا خالتي و ابقي اتفضلي زورني
فرنسا
فرنسا
ااقصد سيادة الريس فرنسا
انا عاوز وزارة الطيران
عارفا اول حاجه هعملها ايه
امممممممم
همشى كل لواءات الجيش
اللى مسكو رؤساء مجالس ادراه فى المطار
يختى اول حاجه قسمو شركتنا لسبع شركات
شركة صيانه
شركة خدمات ارضيه
حتى المطبخ عملوله شركه
وشركة معلومات
الخ
الخ
الخ
وياختى كل شركه من دول جابولها لوا من بتوع الجيش
وال ايه
ماسك الشركه
وبيقبضله فوق ال 100 الف جنيه كل شهر
ياعينى عليهم
بيتعبو اوى
بدل ما كان رئيس شركه واحد
بقو 7 فى وش العدو
وانتى عارفا بئه الجيش
يعنى المطار ههههه اتقلب مطار دولى عسكرى
واحنا اللى ماصدقنا نخلص جيش
نلاقى بتوع الجيش جايين ورانا زى الصاروخ
اللى ونبى يختى
متعرفيش حته نهرب فيها منهم
حتى الواد اخويا اللى شغال فى البترول
هههههههه
ياعينى جابلولهم بتوع الجيش يمسكوهم
بصفتك رئيس دوله
متعرفيش ايه السر ف كدا
ها
قلتى ايه
هتمسكينى وزير طيران
والواد اخويا وزير بترول
اممممممم
تخاريف سكريه
رائعه يافرنسا
الواحد بيعدى من هنا
ويتنح
هههههههههه
طبعا من واقعية كلامك اللى بتسوغيه بسخريه تحسدى عليها
اللا صح
نتقابل فى ليمان طره
ولا سجن القناطر
ههههههههه
يلا بئه
نتقابل هناك
سلااااااموز
تخاريف لذيذة جدا ومسلية بس ... بلاش اقول لانى مش عايز انفجر
فرنسا بجد انا كفايع عليه زوقك وكفايه انى اكون مغ رديف العيش الحاف
اول مره ازورك
وانصحك تهدى اللعب شويه
وتخليكى مع بكار احسن
بهيه هاتستناكى
هههههههههههههه
رائع رائع رائع
فعلا
مين قال ان دي تخاريف ؟
فيه ناس بتحاول تقول كلام كبير مبتعرفش تقول ربع الكلام ده
عشرة على عشرة
هايل يا فرنسا
حقيقي هايل
انتي معيشاني ومعيشانا معاكيفي الجو الرئاسي ده
خالص تحياتي
احمد
خاااااااااالتو
زغرررررررررررروده كبيره للريسه
فرنسا هانم
بس خالى بالك من الشعب يا فندم
الشعب بيحبك
والنبى بلاش القسوه عليه
ده غلبااااااااان
بطه
الكاس بتاع افريقيا عامل دماغه عاليه قوى يا فرنسا هانم ربنا يستر لو وصلنا كاس العالم مش عارف دماغك يمكن تطلب تلعبى رفه فى امريكا
mrs. president: u wrote many tims that it is noname land , but still they want it to be Egypt ? why?
Nagdi
خياااااااااانة
ايه يا مولاتي الأميرة
من أولها كدة؟؟
مش قلنا الداخلية ليا؟؟
مهو أنا يا فيها يا أخفيها
ولو مكنتش في صفك .. يبقي خلي بالك بقي من محاولات الإغتيال
وبعدين ده أنا كان عندي مخطط هايل كنت هريحك بيه من أغلب مشاكل الشعب
كفاية إني كنت هعمل تكهين وإعدام لكل اللي سنه زاد عن الستين سنة
وبكدة هنخف العدد اللي في المستشفيات كتير جدا لأن أغلبهم فوق الستين
وهنخف الكثافة
وهنفتح سكة للشباب يلاقو سكن وفلوس وفرص عمل وغيره
ده بخطوة واحدة بس مني
ولو عايزة نعدم اللي تحت التسعة وخمسين برده مفيش مشاكل
يلا المهم أنتي يا مولاتي الأميرة
وأهي كلها تخااارييييف.. اشمعني أنتي
تحياتي
Nagdi
تحياتى لك نجدى
واحب ان اعرفك بان متطلبات عمل الرئيس تكون اكبر مما نتصور
ولكن ان كانت فى الاتجاه الصحيح
وربنا يسلم من الحروب
l0vElYGh0sT14
تحياتى وخالص شكرى على تلك الكلمات الجااااااامده
وطبعا السنافر هتبقى موجوده
وتحياتى لبطن الزير
ra7eel
حبيبتى الغاليه رحيل
لا
طبعا مش خالتك فرنسا اللى تعمل كده لو مسكت الرئاسه
انا بتكلم عن بلد خياليه واقعيه
ومن خلال شخصيه عاديه اخترتها باسمى
حتى انفضها بالزعافه براحتى
فهمانى ولا لاء
وفى الاعلى رد على ام البنات فيه مذيد من الايضاح
يعنى من الاخر
الريسه مش خالتك فرنسا بشخصها
الريسه كل من مسك الدوله دى
واتلاعب بيه الحاشيه
حبة حاجات (ايمان
وانتى والله وحشانى جدا جدا يا ايمان
ادعوا من الله ان تكونى بخير
وبعدين انتى عارفه ان المدونه بتنور بوجودك
فمتحرمناش من النور ده كتير
Nigro
يعنى ممكن التخريف يبقى بجد
وممكن يبقى مش بجد
انا سايبه كل واحد يبص للمعنى بمنظوره
وبملاحظته هو
انين الحزن
مش بيقولوا من القلب للقلب رسول
انا فعلا بدون مجامله
والله
حاسه انكى قريبه منى جدا
ولو المدونه بتاعتك رقصت
ده يفرحنى جدا جدا
والمره الجايه هقعد هناك للصبح
بس خلى شويه فاكهه وعصاير فى التلاجه
واول ما تنزلى حاجه جديده ادينى خبر
وانا تلاقينى
عند وزتى الغاليه بالعجله النفاثه
تحياتى الغاليه
لوزتى الغاليه
ههههههههه
أضحك الله سنك
.........
شاركيني بالتصويت على فكرة كتابي الأول
www.somood.blogspot.com
ابو خالد
اخى العزيز ابو خالد
كلامك ميه فى الميه
وواقعى جدا
لكن اخى
انا اتكلم عن شخصيه من الشعب فجاءه مسكت الحكم واصبحت اداه فى ايدى الحاشيه المحيطين بها
فضلا عن حبها هى نفسها للسلطه
وبريق السلطه
وتلك الشخصيه
وان كانت تحمل اسمى الا انها لست انا
وبعدين
انا مجهزلها مطبات كتيره
وافعال مهينه
لها
ولدولتها
ولحاشيتها
بعيده عن اختك فرنسا هانم
عارفه ان الموضوع مكلكع
وملعبك
لكن انا اترك لكل قارىء
ان يتخيل
او يستنبط ما يشاء
تحياتى لك
وشكرا على نقدك البناء
آفاق الحرية
ومين قال انى بتكلم عن مصر
لا
انا بتكلم عن دوله نراها جميعا
ممثله فى داخلنا
ها
عرفتيها
لا
مش العجل فى بطن امه
دوله سميها ما تشائين
وموقعها فى اى قاره
وخلاص
تحياتى لكى
وليد مصطفى
مرحبا بك فى اول زياره لك
وهو ساخر
مش لاذع
لـــى لــــىِ
العنوان مش مظبوط
خدنا الشاحنه
وصرفنا مصاريف كتيره فى الشحن
علشان الوزاره كانت تقيله حبتين
ورحنا العنوان المذكور
ملقناش حد
الحفره الرابعه
برضه مفيش
التالته
برضه مفيش
لفينا كل الحفر
كله كومبليت
تحياتى
والى وزاره قادمه باذن الله
ابقى علمى الحفره بقله ميه علشان نعرفها
خالتك فرنسا
وبعدين صح انا نسيت
على مين المصاريف اللى اتصرفت ؟
أم أحمد المصرية
اختى ام احمد انا اسيب المواعين والطبيخ اللى فى ايدايا
واركب العجله بتاعتى وطيران عندك
بس
جهزى النسكافيه
والفواكه
وانا فى الطريق اليكى
اما عن الصوره
تفضلى خديها
كلنا مصريين
مفيش اسكندريه وسويس
مش بيقولوا علينا
ميه مالحه ووشوش فالحه
تحياتى لكى
يااااااااااااااااااااااه
يااااااااااااااااااااااه
ايه ده ..
على رأى اللى قال قبلى : صباح الدماااااااااااغ ..
فرنسا : انتى مهيسة وللا إيه ؟؟
انا أول مرة أدخل المدونة دى ..
وقررت قرار انتحارى إنى أضيفها عندى , دا إذا سمحولى اسيادنا بتوع أمن الشبكات
سكــر
لا طره ولا القناطر
نتقابل فى الجنه مع الصدقيين والشهداء
يارب
اما عن لواءت الجيش فحدث ولا حرج
كل بقى عسكرى
الحياه المدنيه اتلخبطت مع الحياه العسكريه
واسمح لى ان اقتبس منك التعليق ده
واكتبع فى تدوينه خاصه
لان الموضوع ده فعلا منرفزنى جدا
اسلام رفاعى
من غير ما اعرف انت كنت عايز تقول ايه
لكن انا حسيت
وبلاش تنفجر
انا ميرضينيش
هو احنا عندنا كام اسلام بيحبوا مصر
صوت من مصر
ايه يابنى لوحه المفاتيح بتاعتك مفطرتشى ولا ايه
نص الحروف مخرفه
على العموم
انا متشكره على كلامك وعلى ذوقك انت
وبكده
يبقى عندى عشم فيك واقولك اخى
جمهورية مصر العربيه
ماشى يا عم نهدى اللعب
بس الحكم بيحسب الوقت الضايع
سلامى لبهيه
خبيب
شكرا جزيلا لك
ومنورنى دائما
وهى تخاريف على مش تخاريف يعنى بالبلدى كشرى
هههههههههههههه
الله يسهلك اللي علي علي يافندم
هو صحيح اللي بيوصل للكرسي مبيفكرش في حاجة تانيةولا في حد خالص ولا ايه
وفي سؤال عندي يافندم محتاجله اجابة
وعاوز رأي سعادتكم وحضرتكم وفضيلتكم
موجة
شكرا احمد
ولكن الهدف
افضل من التعايش مع المضمون
طبعا وصلت
غير معرف
بطه
القسوه على نفسى قبل القسوه على الشعب
رئيس جمهوريه نفسى
لالالالالالالالالا
الحق يقال
مع انى مش مع امريكا
وبالعربى مش بحبها
الا ان لعب الرفه فيها لا بيودى ولا بيجيب
مش كده ولا ايه ؟؟؟؟
خااااااااااالتو قفشتك
وانتى هنا
القسوه على نفسك برضه مش عايزينها
والنبى يا خالتووووووووو
بطه
Nagdi
لو كنت عرفت اترجم السؤال
هتكون الترجمه
مع انك مش كاتبه اسم لللارض او للدوله
البعض بيقول انها مصر ؟ لماذا ؟
انا هجاوب على اللى فهمته من السؤال
لاننا نعيش فى مصر
والبعض اعتقد انى بكتب على مصر
ولو كنا فر الكونغو برضه كانوا هيعتقدوا انى بكتب عن الكونغو
اما الاغلبيه
عارفين انى اكتب
عن لا ارض
اعذرنى ان كنت ترجمت السؤال خطأ
القلم السكندري
هههههههههههههههه
عسل
كلامك عسل
ضحكتنى بجد
انت كده ناوى تتخلص من الشعب واحد ورا واحد
لا يا عم
اما هنحكم مين
انت داخل على طمع
النجمة الصامدة
اشاركك
ومن قبل ما اروح انا معاكى
انت كلك امل وخير
صوت بلا صدى
وانا موافقه على القرار الانتحارى ده
وانا لله وانا اليه راجعون
عموما
نورت المدونه
وشرفتها من غير انتحار
الجمعاوي الاصيل
طبعا مش هيفوتك
وانت الجمعاوى المشهور بالذكاء
انى لا اتحدث عن نفسى
ومش شخصيتى
ولكن اسمى بس
وده من باب التخاريف
وبعدين فعلا اللى بيوصل للكرسى
لو ساب نفسه لاهوائه والحاشيه هيعمل كده
وصلت ولا لسه ؟؟؟؟
اكيد طبعا وصلت يا فندم
تحياتى لك
بطه
ماشى يا بطه
بس هنعمل ايه؟؟؟
ما باليد حيله
خالتى انتى كده يتخاف عليكى من تخاريفك
بس تصدقى الواحد بيحس ان ده الوضع فعلا؟
واستمرى فى تخاريفك الحلوه دى
فرنسا هانم
افاق الحرية عمره ماكان بنت
انت بنتيني ليه بس ههههههه
علي العموم انا شاب مصري وليس شابة مصرية
ولا معدتش تفرق
وانت خايفة ولا ايه
فيها ايه لما تتكلمي عن مصر
بحبك يامصر
اشكرك على المؤازه
وانا فعلا اتمنى الاستمرار
شكرا جزيلا
آفاق الحرية
لا تنسى اخى العزيز انى كنت من زوارك فى تدوينه عيد الحب
وكنت اول المعلقين كمان
ولكن خاننى القلم
اسفه على الخطأ
وانت ولد وزينه حتتنا كمان
وانا لااخشى الا الله
ولكن
اردت ان اشعب الموضوع
واترك كل منا لخياله
كما ان لى تدوينات تخص مصر بالاسم
ارجو قرأتها
يا مولاتي الأميرة وماله
نخلص عليه
ونبقي نبعت نجيب شعب تفصيل من أي حتة.. الصين بقي ولا اليابان
مع أن والله مفيش شعب تفصيل زي شعبنا
انا جايه اطمن عليكى اخبارك ايه معلش انا مقصره معاكى بس فعلا مشغوله شويه
وانتى عارفه طبعا سيادة الريس انا معاك على الحلوة والمرة
ايه ده انا جاية متاخر اوى كدا ليه
معلشى اصل الايام دى انا مشغولة شوية مع ناس حبايبى مش شوفتهم من زمان اوى
بس المرة اللى جاية هتلاقينى هنا اول واحدة اصلى خلاص اشتريت كرسى على حسابك وقعدت بيه على باب المدونة علشان تلاقينى موجودة من بدرى ابقى ادفعى حساب الكرسى
ساعدى الشعب بقى يا حبيبتى مش انتى خلاص بقيتى الريسة الكبيرة بتاعتنا
ممكن طلب كمان المواصلا بتاعتى لحد البلوج بتاعى تدفعيها بجملة التهييس بقى
وصدق العبقرى الكبير ابن عيلة ابو اسماعيل لما قال
وسمعنى احلى سلام وتحية من قلب المنطقة ديه
من طرف اخوك اللمبى
اموااااااااااااه لاحلى رئيسة جمهورية
وعلشان خاطر البوسة الحلوة دى اختك طمعانة بقى فى وزارة المالية
وليكى عليا اخلى الشعب كله متريش
وكل يوم ادخلهم سينما
بس خالد يوسف يلاحق لنا على الاخراج
تخاريف يا خالتي تخاريف
بس تصدقي
باحس انها واقع فعلا في كل حاجه في حياتنا
هرجلة وبوظة في كل حاجه
ربنا معانا
تحياتي
هههههههههههههههههههه
يا نهار اسود لو كان هو دا اللى بيحصل فعلا....يبقى روحنا بلاش يا فرنسا..
جارتي و حبيبتي فرنسا هانم لو كنت اعرف انك جاية كنت دبحت الدبائح لكن تتعوض المرة الجاية حاعزمك علي اكله سمك اسكندراني و لا زهقانة منه في السويس :) نورت مدونتي المتواضعة و شكرا علي دعواتك الجميلة و اتمني اشفك تاني و من حرصي وضعت لك الرد علي مدونتي و مدونتك شفت حبيتك اد ايه اد ما حسيت من مدونتك انك مصرية بجد زي ما حب اشوف المصريين و زي مانت قلت يارب الحرية للأحرار
بس منين حضرتك بس جبتى هذه العقلية الاستبدادية
يعنى عشان القصر عجبك تمنعى اى مصدر من مصادر الرئاسة
كان ممكن تتطلعى قرار جمهورى بتمليك القصر ليكى
:))
ربنا يعزك
كمان و كمان
فرنسا هانم
لا انا مش ناسي ان حضرتك اول من علق في اخر بوست
فجزاكي الله خيرا وبجد نورتي المدونة
والقلم مش هو اللي خانك ده الكيبورد هي اللي خانتك
وعلي فكرة انا اللي حذفت التعليق اللي قبلي اصله كان فيه غلطات كتابية فقط
القلم السكندري
صدقت والله مفيش احسن من شعبنا
لاتقولى تايوانى ولا غيره
شعب البركه مفيش غيره
رفقة عمر
طبعا انتى قلبك وروحك ونفسك معايا
ومش عايزه اعطلك
ممكن تيجى تمضى وتطمنينى عليكى وتمشى على طول
انا مقدرشى استغنى عنكى
Desert cat
وعندك احلى نفاثه لنانا
هو احنا لينا الا انتى
كل مواصلاتك مجانا
والمشاريب على حسابى
واحلى تحيه للقطه دي
اموااااااااااه
Desert cat
وعندك احلى نفاثه لنانا
هو احنا لينا الا انتى
كل مواصلاتك مجانا
والمشاريب على حسابى
واحلى تحيه للقطه دي
اموااااااااااه
صاحب المضيفة
الهرجله والبوظان خلانا مش عارفين فين الصح وفين الغلط
خلانا زى الاعمى
خلانا زى الغريق
ربنا يستر
dina
هى البلد دى لسه مارحتشى بلاش
لا
رحنا
واللى كان كان
تحياتى لكى
أم أحمد المصرية
والله انتى جدعه
وبنت من مصر بجد
احييكى
ويابخت التلاميذ بتوعك
هيشربوا منكى القيم والاخلاق وحب مصر
تحياتى لكى
امام الجيل
لا مش انا
بطله التخاريف هى المسئوله
اسمها على اسمى
لكن فعلها غير فعلى
عبدٌ من عباد الله
ويعزك ويعز امه سيدنا محمد اجمعين
وكل الابرار الطيبين
آفاق الحرية
ولا يهمك
احذف براحتك
المدونه مدونتك
مرحبا بك فى اى وقت
بس عليك عشره جنيه مصاريف حذف
فوفو ..فرنستي
ازيك وازي بكار ابو كف رقيق وصغير ورشيدة
بقولك ما تسألي لي رئيس الوزرا بتاعك على شرايط عالم سمسم
فرنسا اخرتها ايه يا فرنسا في الرياسه دي يا بنتي ما تصحصحي كدهون وخليكي معانا وفي وسطينا
بدل ما ندوخ ندور عليكي بالعيش والحلاوة
بجد عثل اوي الاحلام دي
تحياتي وحبي يا فرنستي
تحفة يافرنسا يابخت الي هيتجوزك وان شاء الله هيتجوزك يعني انا عنديش شك كفاية خفة دمك
فرنسا ايا توزعي الوزارات وتنسيني
اناحاجز ماليةواعلام
إرسال تعليق